Ho Buisana ka Mangolo
MANGOLO a ntlafalitse bophelo le boitšoaro ba batho ba limilione. Qalong, boholo ba libuka tsa Mangolo a Segerike a Bakreste e ne e le mangolo. Kajeno le rōna re ka ngola mangolo bakeng sa ho matlafatsa balumeli ba bacha, ho iteanya le metsoalle, ho khothatsa bara le baralib’abo rōna ba nang le boikarabelo bo khethehileng, ho tiisa ba talimaneng le mathata le ho fetisa boitsebiso bo hlokahalang bakeng sa ho hlokomela mesebetsi ea phutheho.—1 Bathes. 1:1-7; 5:27; 2 Pet. 3:1, 2.
Ho ngola mangolo e boetse ke tsela e atlehang haholo ea ho fana ka bopaki. Libakeng tse ling, batho ba bangata ba lula lifoleteng kapa libakeng tsa bolulo tse sirelelitsoeng haholo tseo ho seng bonolo ho li sebetsa. Ba bang ba ba sieo lapeng ka nako e telele, kahoo ha re ba fumane ha re paka ka ntlo le ntlo. Ba bang ba lula libakeng tse ka thōko.
Ka linako tse ling, ho kula, boemo ba leholimo bo seng botle, kapa thibelo e itseng e ka ’na ea u koalla ka tlung. Na u ka khona ho ngola lengolo bakeng sa ho fana ka bopaki bo eketsehileng ho mong ka uena kapa motho e mong eo u buisaneng le eena ka mokhoa o sa reroang? Na e mong oa liithuti tsa hao tsa Bibele o faletse? Lengolo le tsoang ho uena le ka mo thusa ho lula a ntse a thahasella lintho tsa moea. Kapa mohlomong u ka arolelana boitsebiso ba Mangolo le batho ba sa tsoa nyalana, bao e bang batsoali, kapa ba lahlehetsoeng ke baratuoa ba bona ka lefu.
Ho Paka ka Lengolo
Ha u ngola lengolo bakeng sa ho pakela motho eo u e-s’o ka u kopana le eena, pele ipolele hore na u mang. U ka ’na ua hlalosa hore u kopanetse mosebetsing oa boithaopo oa machaba. Bolela hore u e mong oa Lipaki tsa Jehova, haeba ho loketse ho etsa joalo. Tsebisa motho eo hore na ke hobane’ng ha u ngotse lengolo ho e-na le ho itlisa ka seqo. Ngola lengolo joalokaha eka u buisana le motho eo lifahleho li talimane. Leha ho le joalo, tumellanong le tataiso ea hore u be ‘seli joaloka linoha ’me leha ho le joalo u hloke molato joaloka maeba,’ nahana ka ho teba hore na ke boitsebiso bo bokae bo amanang le uena boo u lokelang ho bo senola.—Mat. 10:16.
Lengolong leo u akarelletse seo u ka beng u se boleletse motho eo haeba u ne u mo etetse. U ka ’na ua fetola kenyelletso e bukeng ea Ho Bea Mabaka kapa u sebelise nehelano ea Mangolo e tsoang tokollong ea morao-rao ea Tšebeletso ea Rōna ea ’Muso. U ka ’na ua botsa potso ’me ua khothalletsa motho eo ho nahana ka eona. Bahoeletsi ba bang ba hlalosa feela hore re na le lenaneo le sa lefelloeng la ho araba lipotso tsa Bibele ebe ba qotsa tse ling tsa lihlooho tsa likhaolo ho e ’ngoe ea lithuso tsa rōna tsa ho ithuta. Sampole ea lengolo le ngoletsoeng ho fana ka bopaki e hlaha leqepheng la 73. E ka ’na ea u fa likhopolo tse itseng, empa ho molemo hore u etse hore le be le litaba tse sa tšoaneng. Ho seng joalo, ka mor’a nako e itseng, ho ka ’na ha etsahala hore batho ba fumane lengolo le tšoanang hangata.
Batho ba bang ba tsoafa ho bala lengolo le lelelele le tsoang ho motho eo ba sa mo tsebeng. Kahoo ho ka ba bohlale hore u khutsufatse lengolo la hao. Phetha lengolo la hao pele motho ea le amohetseng a khathala ho le bala. E ka ba ho loketseng ho kenya sememo se hatisitsoeng se mo memelang libokeng Holong ea ’Muso. U ka ’na ua kenya pampitšana, bukana, kapa tokollo ea Molula-Qhooa kapa Tsoha! ’me u hlalose hore a ka li fumana kamehla haeba a rata. Kapa u ka ’na ua botsa hore na u ka etela motho ea le amohelang lapeng hore u buisane le eena ka ho eketsehileng ka taba eo u e tšohlileng.
Tlhaloso e Khutšoanyane Mabapi le Chebahalo ea Lona
Joale sheba sampole ea lengolo. Hlokomela lintho tse latelang: (1) Le shebahala le le makhethe, ha lea kopakana. (2) Esita leha enfelopo eo e ka lahleha, motho ea tla le fumana o tla ’ne a be le lebitso la motho ea le rometseng le aterese ea poso. (3) Morero oa lengolo o hlalositsoe ka mokhoa o bonolo le o tobileng serapeng sa pele. (4) Ntlha ka ’ngoe ea bohlokoa e boletsoe serapeng se fapaneng. (5) Ka lebaka la morero oa lona, lengolo lena ha le bue lintho ka bolokolohi bo feteletseng ’me ha lea hlophisoa ka mokhoa o feteletseng.
Bakeng sa lengolo la molao, le kang leo mongoli a ka ’nang a le romela ofising ea lekala, ho tla akarelletsoa lebitso la phutheho, hammoho le lebitso la mongoli, aterese ea hae ea poso le letsatsi. Hape ho tla hlaha lebitso le aterese ea motho kapa mokhatlo oo lengolo le romeloang ho oona. Sena se lateloa ke tumeliso e loketseng. Bakeng sa ho phetha lengolo, ka lipuo tse ling ho hlaha polelo e kang “Oa hao kannete” kapa “Ka botšepehi” ka holimo ho mosaeno. Mosaeno ka booona o lokela ho ngoloa ka letsoho.
Lengolong leha e le lefe, lebisa tlhokomelo tabeng ea ho peleta mantsoe hantle, sebōpeho-puo, ho ngoloa ha matšoao a puo le makhethe. Ho etsa joalo ho tla etsa hore lengolo la hao le molaetsa oo le o fupereng li be le seriti.
Karolong e ka ntle ea enfelopo, kamehla u ngole aterese eo lengolo le ka khutlisetsoang ho eona—ho ka ba molemo hore e be aterese ea hao ea poso. Haeba u nahana hore ho ke ke ha e-ba bohlale ho fana ka aterese ea hao ha u pakela batho bao u sa ba tsebeng ka lengolo, botsa baholo hore na ba ka lumela haeba u ka sebelisa aterese ea Holo ea lōna ea ’Muso e le aterese eo lengolo le ka khutlisetsoang ho eona. Aterese ea Mokhatlo oa Watch Tower ha ea lokela ho sebelisetsoa morero ona le ka mohla, kaha ka phoso sena se ka bontša hore lengolo la hao le rometsoe le tsoa liofising tsa Mokhatlo ’me sa baka pherekano. Haeba ho sa ngoloa aterese eo lengolo le ka khutlisetsoang ho eona ’me ho kentsoe sengoliloeng ka hare, sena le sona se ka ’na sa fana ka maikutlo a fosahetseng a hore le rometsoe ke Mokhatlo.
Tiisa hore u khomaretsa setempe sa chelete e lekaneng, haholo-holo haeba u kentse sengoliloeng ka hare. Haeba ho khomarelitsoe setempe sa chelete e nyenyane, motho ea amohelang lengolo leo a ka ’na a lefisoa bakeng sa chelete e haellang ’me sena se ka ama molaetsa oa hao hampe. Hopola hore linaheng tse ngata ha ho kentsoe bukana kapa makasine ka hare, tefello ea poso e feta ea lengolo le tloaelehileng.
Boikutlo bo Nepahetseng
Hang ha u qetile lengolo la hao, le bale bakeng sa ho hlahloba likahare tsa lona. Le utloahala joang? Na le utloahala le le botsoalle le bile le bontša masene? Lerato le mosa li har’a litšoaneleho tseo re lekang ka matla ho li bonahatsa litšebelisanong tsa rōna le ba bang. (Bagal. 5:22, 23) Haeba u hlokomela ho hong ho sa utloahaleng hantle kapa tlhasenyana ea boikutlo bo seng botle, fetola mantsoe a lona.
Lengolo le ka fihla moo u ke keng ua fihla teng. Ntlha ena feela e etsa hore lengolo e be thulusi ea bohlokoa bakeng sa tšebeletso. Kaha lengolo la hao le emela uena le lintho tseo u li thahasellang, nahana ka seo le se bolelang, chebahalo ea lona le hore na le utloahala joang. Le ka ’na la fana ka se hlokahalang bakeng sa ho matlafatsa, kapa la khothatsa motho oa bohlokoa hore a kene tseleng e isang bophelong.
[Lebokose le leqepheng la 73]
’Mateboho Mohale
124 ’Muso Street
Thabong, Gauteng 2006
La 1 June, 20—
Mofumahali Thebe ea Ratehang,
’Na le monna oa ka re hahile hona mona motseng oa lōna. Ha re khone ho bua le uena ka ho toba, empa re na le boitsebiso ba bohlokoa boo re batlang ho u bolella bona. Sampole ea bona e fuperoe ke pampitšana e kentsoeng mona ka hare.
Re motlotlo ho kopanela mosebetsing o etsoang ke baithaopi ba linaheng tse ka holimo ho 200. Linaheng tsena kaofela, batho ba memeloa ho rua molemo lenaneong le thusang batho ho tseba likarabo tsa Bibele lipotsong tsa bohlokoa tse kang: Ke hobane’ng ha re tsofala le ho shoa? Morero oa bophelo ke ofe? U ka fumana thabo ea sebele joang?
Re kopanela mosebetsing ona kahobane re rata baahelani ba rōna e le kannete. Mosebetsi oa rōna hase oa khoebo. Re tšepa hore ka tsatsi le leng haufinyane re tla khona ho buisana le uena ka seqo. Ka kōpo ikutloe u lokolohile ho iteanya le rōna ka aterese e ka holimo.
Ka botšepehi,
[Mosaeno]