Karolo 3

Ke Bo-mang ba Phelang Sebakeng sa Moea?

1. Bolumeli ba moetlo bo ’nile ba tšoantšoa le thaba joang?

LITUMELO tsa bolumeli ba moetlo ba Afrika li ’nile tsa tšoantšoa le thaba. Ka holimo tlhōrong ea eona ke Molimo, ea nang le matla a moea a phahameng ka ho fetisisa. Mosikong oa eona ke melimo e tlaasana, kapa meea, e leng basebeletsi ba Molimo. Ba bapileng le eona ke balimo, ba hopolang malapa a bona a lefatšeng le ho hlokomela boiketlo ba ’ona ka linako tsohle. Maotong a thaba ke ba tlaasana ba sebelisanang le meea: maselamose, linohe le baloi.

2. Polelo e ’ngoe ea Seafrika e bontša joang hore litumelo tsa moetlo li na le tšusumetso e itseng bolumeling?

² Litumelo tsena tsa moetlo li bile le tšusumetso e matla malumeling a mang, Afrika. Polelo e ’ngoe ea Seafrika e beha taba ena tjena: “Ho khomarela Tumelo (ea Bokreste kapa ea Boislamo) ha ho re thibele ho rapela balimo ba rōna.”

3. Re ka fumana ’nete hokae ka ba phelang sebakeng sa moea?

³ Litumelo tsa moetlo tsa Afrika ke ’nete hakae? Bibele e re bolella ’nete ka ba phelang sebakeng sa moea.

Jehova, Molimo oa ’Nete

4. Malumeli a maholo a Afrika a lumellana ka eng?

⁴ Lihlopha tse tharo tse khōlō tsa bolumeli, Afrika, lia lumela hore Molimo o teng le hore ke ea phahameng ka ho fetisisa. Bibele e mo hlalosa e le “Molimo oa melimo le Morena oa marena, Molimo e moholo, ea matla le ea tšabehang.” (Deuteronoma 10:17) Mamosleme le ’ona a lumela ho Molimo a le mong ea phahameng ka ho fetisisa. Ha a bua ka bolumeli ba moetlo ba Afrika, Moprofesa Geoffrey Parrinder o re: “Maafrika a mangata a lumela ho Molimo ea phahameng ka ho fetisisa, ntate oa melimo le batho, ’mōpi oa bokahohle.”

5. Ho sebelisoa mabitso afe a mang ho khetholla Molimo?

⁵ Le hoja ho lumela ho Molimo ho atile, batho ba bangata ha ba tsebe hantle hore na Molimo ke mang. Mohato oa pele ho tsebeng motho ke ho tseba lebitso la hae. Ho na le pherekano malumeling mabapi le lebitso la Molimo. Bokreste-’mōtoaneng o atisa ho bitsoa Molimo, e leng tlotla e bolelang “Ea Matla.” Mamosleme a re ke Allah. Ho ba sebelisang bolumeli ba moetlo, lebitso le sebelisoang ho khetholla Ea Phahameng ka ho Fetisisa le fapana ho ea ka lipuo. Bukeng ea hae e bitsoang Concepts of God in Africa, John S. Mbiti o thathamisa mabitso a Seafrika le litlotla tsa Molimo tse fetang 500. Ka mohlala, ka Seyoruba (sa Nigeria), Molimo o bitsoa Olodumare; ka Sekikuyu (sa Kenya), o bitsoa Ngai; ’me ka Sezulu (sa Afrika Boroa) o bitsoa Unkulunkulu.

6, 7. Lebitso la Molimo ke mang, hona re tseba joang?

⁶ Molimo eena o re’ng ka lebitso la hae? Ha Molimo a ne a laela Moshe hore a etelle Baiseraele pele ha ba e-tsoa Egepeta, Moshe o ile a botsa: “A re re joale ke fihlile ho bara ba Iseraele ’me ke re ho bona, ‘Molimo oa baholo-holo ba lōna o nthomile ho lōna,’ ebe ba re ho ’na, ‘Lebitso la hae ke mang?’ Ke tla re’ng ho bona?”—Exoda 3:13.

⁷ Molimo o ile a araba a re: “Sena ke seo u tla se bolella bara ba Iseraele, ‘Jehova Molimo oa baholo-holo ba lōna . . . o nthomile ho lōna.’ Lena ke lebitso la ka ho isa nakong e sa lekanyetsoang, ’me sena ke sehopotso sa ka ho isa molokong o mong ka mor’a o mong.” (Exoda 3:15) Lebitso lena la Molimo le hlaha ka makhetlo a fetang 7 000 tlalehong ea Bibele, le hoja bafetoleli ba bang ba Bibele ba sebelisitse tlotla “Molimo” kapa “Morena” sebakeng sa lona.

8. Jehova o joang, hona re lokela ho etsa eng haeba re batla hore a re amohele?

⁸ Ha e le hantle Jehova o joang? Ke moea, o matla ’ohle, oa khanya. O phahame ka ho fetisisa, a ke ke a bapisoa, ha ho ea ka lekanngoang le eena. (Deuteronoma 6:4; Esaia 44:6) Jehova o ile a re ho Moshe: “’Na Jehova Molimo oa hao ke Molimo ea batlang boinehelo bo khethehileng.” Ka mantsoe a mang, e le hore Jehova a re amohele, re lokela ho rapela eena a ’notši. Ha a batle hore re rapele ntho kapa motho leha e le ofe e mong.—Exoda 20:3-5.

Jesu Kreste, Morena oa ’Muso oa Molimo

9. Ke hobane’ng ha re ka bolela hore Jesu ha a lekane le Jehova?

⁹ Kajeno ho na le pherekano e ngata tabeng ea hore na Jesu ke mang. Ba bangata Bokreste-’mōtoaneng ba lumela hore Jesu ke karolo ea Boraro-bo-bong bo “Halalelang.” Empa Bibele ha e rute hore Molimo ke batho ba bararo ho a le mong. Ebile ha e rute hore Jesu o lekana le Jehova. Jesu ka boeena o ile a re: “Ntate o moholo ho ’na.”—Johanne 14:28.

10. Jesu o ne a le hokae pele a tla lefatšeng?

¹⁰ Bibele e ruta hore pele Jesu a phela lefatšeng e le motho, o ne a phela leholimong e le sebōpuoa se matla sa moea. Feela joalokaha Jehova a ile a bōpa Adama le Eva lefatšeng, O ile a bōpa batho ba moea leholimong. Jesu e bile eena motho oa pele oa moea eo Jehova a ileng a mo bōpa.—Johanne 17:5; Bakolose 1:15.

11. Ho tlile joang hore Jesu a tsoaloe e le motho?

¹¹ Lilemo tse ka bang 2 000 tse fetileng, Jehova o ile a fetisetsa bophelo ba sebōpuoa sena sa moea pōpelong ea moroetsana ea bitsoang Maria. Lengeloi Gabriele le ile la re ho eena: “U tla emola ka pōpelong ea hao u tsoale mora, ’me u tla mo reha lebitso la Jesu. ’Me o tla busa e le morena . . . , ’me ’muso oa hae o ke ke oa e-ba le bofelo.”—Luka 1:31, 33.a

12. Lebaka le leng leo Jesu a tlileng lefatšeng ka lona ke lefe?

¹² Kahoo Jesu o ile a tsoaloa, a hōla ea e-ba monna, ’me a ruta batho ka thato ea Jehova le morero oa hae. O ile a re ho ’musisi oa Roma: “Ke tsoaletsoe sena, ’me ke tletse [lebaka lena] lefatšeng, hore ke pakele ’nete.” (Johanne 18:37) Ka ho hlahloba seo Jesu a ileng a se ruta, re ka tseba ’nete ka thato ea Molimo le ka morero oa hae. Re ka tseba kamoo re ka fumanang kamohelo ea Molimo kateng.

13. Lebaka la bobeli leo Jesu a tlileng lefatšeng ka lona ke lefe?

¹³ Lebaka la bobeli leo Jesu a tlileng lefatšeng ka lona e ne e le hore a fane ka bophelo ba hae e le thekollo bakeng sa moloko oa batho. (Matheu 20:28) O ile a etsa sena e le hore re ka lokoloha sebeng seo re se futsitseng ho moholo-holo oa rōna Adama. Ka lehlakoreng le leng, sena se ne se tla re nolofalletsa ho phela ka ho sa feleng. Moapostola Johanne o ile a ngola: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.”—Johanne 3:16.

14. (a) Ho ile ha etsahala’ng ka Jesu ka mor’a lefu la hae ha e sa ntse e le motho oa nama? (b) Boemo ba Jesu ke bofe leholimong hona joale?

¹⁴ Ka mor’a lefu la hae ha e sa ntse e le motho oa nama, Jesu o ile a tsosetsoa leholimong, moo a ileng a boela a phela teng e le sebōpuoa se matla sa moea. (Liketso 2:32, 33) Hamorao, Jehova o ile a mo fa “bobusi le ho hlompheha le ’muso, hore batho, lichaba le lipuo kaofela ba mo sebeletse.” (Daniele 7:13, 14) Jesu o entsoe Morena ea matla; ke Morena oa ’muso oa Jehova oa leholimo. Haufinyane o tla bontša matla a hae lefatšeng lohle.

Mangeloi, Basebeletsi ba Molimo

15. Mangeloi a bōpiloe neng hona a bōpeloa hokae?

¹⁵ Jehova le Jesu hase bona feela ba phelang sebakeng sa moea. Jehova o ile a bōpa libōpuoa tse ling tsa moea, e leng mangeloi. Gabriele, ea ileng a bua le Maria, ke le leng la ’ona. Mangeloi ha aa ka a phela lefatšeng pele e le batho. A bōpetsoe leholimong nako e telele pele batho ba bōptjoa lefatšeng. (Jobo 38:4-7) Ho na le mangeloi a limilione.—Daniele 7:10.

16. Ke hobane’ng ha batho ba sa lokela ho rapela mangeloi?

¹⁶ Mangeloi a tšepahalang ha a batle hore re a rapele. Mangeloi a ile a khalemela moapostola Johanne ka matla ka makhetlo a mabeli, ha a ne a leka ho a rapela, a re: “Hlokomela! U se ke ua etsa joalo! . . . Rapela Molimo.”—Tšenolo 19:10; 22:8, 9.

17. Ke eng e bontšang hore mangeloi a khona ho sireletsa bahlanka ba Molimo, hona ke hobane’ng ha see se khothatsa?

¹⁷ Mangeloi ha a sa itlhahisa ho batho ba Molimo lefatšeng, joalokaha a ile a etsa ha a ne a lokolla baapostola ba Jesu teronkong. (Liketso 5:18, 19) Leha ho le joalo, haeba re rapela Jehova ho ea ka Lentsoe la hae, Bibele, re ka kholiseha hore mabotho a mangeloi a sa bonahaleng a Molimo, a matla a tla re sireletsa. Bibele e re: “Lengeloi la Jehova le hlomme liahelo ho pota-pota ba mo tšabang, lea ba pholosa.” (Pesaleme ea 34:7; 91:11) Ke hobane’ng ha see se lokela ho re khothatsa? Hobane ho na le lira tse kotsi sebakeng sa moea tse batlang ho re timetsa!

Satane, Sera sa Molimo

18. (a) Ke hobane’ng ha lengeloi le leng le ile la fetohela Molimo? (b) Lengeloi lee la lerabele le ile la rehoa mabitso afe?

¹⁸ Hase mangeloi ’ohle a Molimo a ileng a lula a tšepahala ho Molimo. A mang a ile a mo fetohela. A iketsa lira tsa Molimo le lira tsa batho lefatšeng. See se etsahetse joang? Libōpuoa tsohle tsa mangeloi tseo Jehova a li bōpileng li ne li lokile ’me li le molemo. Leha ho le joalo, e mong oa bara bana ba moea ba phethahetseng o ile a batla hore batho ba mo rapele ’me a ntšetsa pele takatso eo e khopo. Sebōpuoa seo sa moea se ile sa bitsoa Satane, e bolelang “Mohanyetsi [oa Molimo].” Hape se bitsoa Diabolose, e bolelang “Moetselletsi,” kaha o bua mashano a khopo ka Jehova.

19. Ke hobane’ng ha Satane a ile a hlokofatsa Jobo hona o ile a ho etsa joang?

¹⁹ Satane o susumelletsa batho hore ba ikopanye le eena ho fetoheleng Molimo. Nahana ka seo a ileng a se etsa ho mohlanka ea tšepahalang oa Molimo, Jobo. Jobo o ne a ruile haholo. O ne a e-na le linku tse 7 000, likamele tse 3 000, likhomo le lipoho tse 1 000, le liesele tse tšehali tse 500. O ne a boetse a e-na le bana ba leshome le bahlanka ba bangata. Satane o ile a qala ka ho bolaea liphoofolo tsa Jobo le bahlanka ba hae. A ntan’o etsa hore “moea o moholo” o soahlamanye ntlo, o bolaee bana bohle ba Jobo. Ka mor’a moo, Satane o ile a hlokofatsa Jobo “ka mathopa a bolaeang ho tloha bohatong ba leoto ho ea har’a hlooho.”—Jobo 1:3-19; 2:7.

20. (a) Jobo o ile a putsoa joang bakeng sa botšepehi ba hae? (b) Le hoja Jobo a ile a tšepahala ho Molimo, Satane o entse’ng ka batho ba bang ba bangata?

²⁰ Ho sa tsotellehe teko ena e sisimosang, Jobo o ile a ’na a tšepahala ho Molimo. Kahoo Jehova o ile a mo folisa ’me a ‘qala ho mo fa ho phaella ho sohle seo e neng e le sa Jobo, ka ho imenneng habeli.’ (Jobo 42:10) Satane o ile a hlōleha ho senya botšepehi ba Jobo, empa o atlehile ho etsa hore ba bang ba bangata ba furalle Molimo. Bibele e re: “Lefatše lohle le rapaletse matleng a ea khopo.”—1 Johanne 5:19.

21. (a) Satane o ile a bontša joang hore o lakatsa ho rapeloa? (b) Ke hobane’ng ha Jesu a ile a hana ho rapela Satane?

²¹ Satane o batla hore re mo rapele. O ile a hlakisa sena ha a ne a leka Jesu lilemong tse ka bang 2 000 tse fetileng. Bibele e re: “Diabolose . . . a tsamaea le [Jesu] ho ea thabeng e phahameng ka ho sa tloaelehang, a mo bontša mebuso eohle ea lefatše le khanya ea eona, ’me a re ho eena: ‘Lintho tsena tsohle ke tla u fa tsona haeba u ka itihela fatše ’me ua nketsetsa ketso ea borapeli.’” Jesu o ile a hana, a re: “Tloha, Satane! Etsoe ho ngoliloe, ‘Ke Jehova Molimo oa hao eo u tla mo rapela, ’me ke eena feela eo u tla mo etsetsa tšebeletso e halalelang.’” (Matheu 4:8-10) Ho hlakile hore Jesu o ne a tseba molao oa Jehova, ’me ha aa ka a etsa seo Satane a neng a batla hore a se etse.

Bademona, Meea e Khopo

22. Bademona ba entse batho eng?

²² Mangeloi a mang a ile a ikopanya le Satane ho fetoheleng Molimo. Mangeloi ana a bademona ke lira tsa batho lefatšeng. A khopo ebile a sehlōhō. Nakong e fetileng, a ile a etsa batho ba bang limumu le lifofu. (Matheu 9:32, 33; 12:22) A ile a kulisa ba bang le hona ho ba hlantša. (Matheu 17:15, 18; Mareka 5:2-5) A ne a bile a hlokofatsa le bana.—Luka 9:42.

23. (a) Meea e khopo e batla eng bathong? (b) Satane le bademona ba qhekeletse batho hore ba etse eng?

²³ Ho tšoana le Satane, meea ena e khopo e batla ho rapeloa. Ho e-na le ho hana ho rapeloa ke batho—e hlokomela hore borapeli boo bo lokela Jehova feela—ea bo labalabela, ea bo batla le ho bo khothalletsa. Satane le bademona ba sebelisa ho qhekella, mashano le tšabo ho etsa hore batho ba ba rapele. Ha e le hantle, batho ba bangata ha ba tsebe hore ba rapela Satane le bademona ba hae. Ba bangata ba tla makala ha ba hlokomela hore borapeli ba bona bo hlompha Satane. Leha ho le joalo, Bibele ea lemosa: “Lintho tseo lichaba li li etsang sehlabelo li li hlabela bademona, eseng Molimo.”—1 Bakorinthe 10:20.

24. Satane o sebelisa leqheka lefe le leng ho khelosa batho?

²⁴ Tsela e ’ngoe eo Satane le bademona ba hae ba khelosang batho ka eona hore ba ba rapele ke ka ho jala likhopolo tse fosahetseng ka bafu. A re boneng hore na Bibele e ruta eng ka sena.

[Mongolo o botlaaseng ba leqephe]

[Setšoantšo se leqepheng la 10]

Mangeloi a tšepahalang a hana ho rapeloa