Molimo o Bopile Monna oa Pele le Mosali oa Pele

Jehova o ile a lema serapa sebakeng se bitsoang Edene. Serapa seo se ne se e-na le lipalesa, lifate le liphoofolo. Ka mor’a moo, Molimo o ile a etsa motho oa pele Adama ka lerole eaba o bululela moea linkong tsa hae. Na oa tseba hore ho ile ha etsahala’ng? Motho o ile a phela. Jehova o ile a re Adama a hlokomele serapa sa Edene, hape a re a rehe liphoofolo kaofela mabitso.

Jehova o ile a fa Adama molao oa bohlokoa. O ile a re ho Adama: ‘U ka ja litholoana tsa lifate kaofela empa u se ke oa ja tsa sefate sa tsebo ea botle le bobe. Ha u ka ja litholoana tsa sefate seo, u tla shoa.’

Hamorao Jehova o ile a re: ‘Ke tl’o etsetsa Adama mothusi.’ O ile a etsa hore Adama a robale, a nka khopo ea hae eaba o mo bopela mosali ka eona. Lebitso la hae e ne e le Eva. Adama le Eva ke bona ba ileng ba etsa lelapa la pele. Adama o ile a ikutloa joang ha a bona mosali oa hae? O ile a thaba haholo a ba a re: ‘Bona hore Jehova o entse’ng ka khopo ea ka. Qetellong motho ea tšoanang le ’na ke enoa.’

Jehova o ile a bolella Adama le Eva hore ba be le bana e le hore batho ba be bangata lefatšeng. O ne a batla hore ba sebetse ba thabile ha ba ntse ba etsa hore lefatše e be paradeise, kapa serapa se setle se tšoanang le sa Edene. Empa seo ha sea ka sa etsahala. Hobane’ng? Re tla tseba lebaka khaolong e latelang.