Adama le Eva ha Baa ka ba Mamela Molimo

Ka letsatsi le leng ha Eva a setse a le mong, noha e ile ea bua le eena. E ile ea re: ‘Na kannete Molimo o itse le se ke la ja litholoana tsa lifate tsohle?’ Eva a re: ‘Re ka ja litholoana tsa lifate tse serapeng empa ha rea lokela ho ja tsa sefate se har’a serapa. Ha re ka ja tholoana ea sefate seo, re tla shoa.’ Eaba noha e re: ‘Ho hang le ke ke la shoa. Mohlang le li jang, mahlo a lona a tla buleha ’me le tla ba joaloka Molimo.’ Na e ne e bua ’nete? Che, e ne e bua leshano. Empa Eva o ile a e kholoa. Ha a ntse a sheba litholoana tsa sefate seo, o ile a li lakatsa le ho feta. Kahoo, a kha tholoana a e ja ’me a e fa Adama. Adama o ne a tseba hore ba tla shoa haeba ba sa mamele Molimo. Leha ho le joalo, o ile a e ja.

Hamorao letsatsing lona leo, Jehova o ile a bua le Adama le Eva. O ile a ba botsa hore na ke hobane’ng ha ba jele tholoana eo. Eva o ile a re ke noha e itseng a e je ’me Adama a re ke Eva ea itseng a e je. Jehova o ile a ba leleka serapeng seo hobane ba ne ba sa mo mamela. O ile a beha mangeloi le sabole e tukang ho ba thibela ho kena serapeng seo.

Jehova o ile a re o tla otla noha e thetsitseng Eva. Ha e le hantle, e ne e se noha e buang le Eva. Jehova o ne a sa bopa linoha tse tsebang ho bua. Ke lengeloi le khopo le ileng la etsa hore noha e bue. Le ne le batla ho qhekella Eva. Lengeloi leo ke Satane Diabolose. Nakong e tlang, Jehova o tla felisa Satane e le hore a se ke a hlola a qhekella batho.