Lebotho le Matla la Jehova

Morena oa Siria ea bitsoang Ben-hadade o ne a atisa ho hlasela Baiseraele. Empa morena oa Iseraele o ne a lula a phonyoha hobane moprofeta Elisha o ne a mo lemosa esale pele. Eaba Ben-hadade o rera ho tšoara Elisha. A utloa hore Elisha o motseng oa Dothane, ’me a romela masole a Siria ho ea mo tšoara.

Basiria ba fihla Dothane bosiu. Ka le hlahlamang hoseng, ha mohlanka oa Elisha a tsoela ka ntle a fumana hore motse o pota-potiloe ke Basiria ba bangata. O ile a tšoha haholo ’me a hoeletsa a re: ‘Elisha, jonna re tl’o etsa joang?’ Elisha a re ho eena: ‘Ba nang le rona ba bangata ho ba feta.’ Ka nako eo, Jehova a etsa hore mohlanka oa Elisha a bone lipere le likoloi tse ngata tsa ntoa lithabeng tse potolohileng motse oo.

Ha masole a Siria a leka ho tšoara Elisha, o ile a rapela a re: ‘Jehova ke kopa u a foufatse.’ Eaba hang-hang masole ao ha a sa tseba hore na a hokae, le hoja a ne a ntse a bona. Elisha a re ho ’ona: ‘Le motseng osele. Ntšaleng morao, ke tla le isa ho motho eo le mo batlang.’ Eaba a latela Elisha ’me o a isa Samaria, moo morena oa Iseraele a lulang teng.

Ha masole a fihla moo, ke hona a ileng a bona hore na a hokae. Morena oa Iseraele a re ho Elisha: ‘Ke a bolaee?’ Na Elisha o ile a batla ho iphetetsa ho batho baa ba neng ba batla ho mo utloisa bohloko? Che. Elisha o ile a re: ‘U se ke oa a bolaea. A fe lijo ’me ha u qeta u a lokolle a itsamaele.’ Eaba morena o etsa mokete o moholo oa a fepa ’me ka mor’a moo a a lokolla.