Elisha o Ile a Bona Likoloi Tsa Mollo​—Uena?

Morena oa Syria o ne a tsoma moprofeta oa Molimo e leng Elisha, ’me o ile a fumana hore o motseng o leralleng oa Dothane, o pota-potiloeng ke marako. Morena oa Syria o ile a romela lipere, likoloi tsa ntoa le mabotho Dothane, bosiu. Ka meso, mabotho a hae a ne a se a lika-likelitse motse oo.—2 Mar. 6:13, 14.

Ha mohlanka oa Elisha a tsoha ’me a tsoela ka ntle, o ile a bona batho ba neng ba batla ho tšoara moprofeta eo. O ile a re: “Oho, mong’a ka! Re tla etsa joang?” Elisha o ile a re: “U se ke ua tšoha, etsoe ba nang le rōna ba bangata ho feta ba nang le bona.” Ka mor’a moo, moprofeta eo o ile a rapela a re: “Ka kōpo, Jehova, tutubolla mahlo a hae, e le hore a ka bona.” Tlaleho eo e tsoela pele ka ho re: “Kapele-pele Jehova a tutubolla mahlo a mohlanka eo, hoo a ileng a bona; bonang! sebaka se lithaba se ne se tletse lipere le likoloi tsa ntoa tsa mollo ho pota-pota Elisha ka hohle.” (2 Mar. 6:15-17) Re ka ithuta’ng ketsahalong ee le ho tse ling tse ileng tsa etsahala bophelong ba Elisha?

Elisha o ile a khoba matšoafo ha a ne a qabeletsoe ke Basyria hobane o ne a tšepile Jehova ’me o ile a bona ha Molimo a mo sireletsa. Ha rea lebella mehlolo kajeno, empa rea hlokomela hore Jehova o sireletsa bahlanka ba hae e le sehlopha. Ka tsela e itseng, le rōna re lika-likelitsoe ke lipere le likoloi tsa mollo. Haeba re li “bona” ka mahlo a rōna a tumelo ’me kamehla re tšepa Molimo, re tla ‘lula re sireletsehile’ ’me Jehova o tla re hlohonolofatsa. (Pes. 4:8) A re ke re hlahlobeng hore na re ka rua molemo joang linthong tse ling tse ileng tsa etsahala bophelong ba Elisha.

ELISHA O QALA HO SEBELETSA ELIA

Ka lekhetlo le leng ha Elisha a ntse a lema tšimong, moprofeta Elia o ile a tla ho eena eaba o lahlela seaparo sa hae se khethehileng holim’a hae. Elisha o ne a tseba hore na seo se bolela’ng. O ile a etsa mokete, a salisa ntate oa hae le ’mè oa hae hantle, eaba o tloha lapeng ho ea sebeletsa Elia. (1 Mar. 19:16, 19-21) Kaha Elisha o ile a lumela ho sebelisoa ke Molimo ka hohle kamoo ho ka khonehang kateng, e ile ea e-ba sesebelisoa sa Jehova ’me qetellong o ile a sebeletsa e le moprofeta sebakeng sa Elia.

Elisha o ile a sebeletsa Elia mohlomong ka lilemo tse tšeletseng. Nakong eo, Elisha ke eena ‘ea neng a tšela metsi matsohong a Elia.’ (2 Mar. 3:11) Mehleng eo, ka tloaelo batho ba ne ba ja ka matsoho, ho se na lifereko, lithipa kapa lintho tse ling tse sebelisetsoang ho ja. Ka mor’a lijo, mohlanka o ne a tšella mong’a hae metsi hore a hlape. Kahoo, mesebetsi e meng ea Elisha e ne e le e eisehang. Leha ho le joalo, o ne a nka ho sebeletsa Elia e le tlotla.

Ka ho tšoanang le kajeno, Bakreste ba bangata ba kenela mefuta e fapa-fapaneng ea tšebeletso ea nako e tletseng. Ba etsa joalo hobane ba susumetsoa ke tumelo le takatso ea ho sebelisa matla a bona oohle hore ba sebeletse Jehova. Mesebetsi e meng e hloka hore ba siee mahae a bona ’me ba sebeletse—Bethele, mesebetsing ea kaho le e meng—eo batho ba bangata ba e khellang fatše. Ha ho Mokreste ea lokelang ho nahana hore tšebeletso e joalo ke ea boemo bo tlaase kapa e theolang seriti, kaha Jehova o e nka e le ea bohlokoa haholo.—Baheb. 6:10.

ELISHA O ILE A KHOMARELA MOSEBETSI OA HAE

Pele Molimo a “isa Elia maholimong ka sefefo,” o ile a romela moprofeta ho tloha Gilgale ho ea Bethele. Elia o ile a kōpa mohlanka oa hae hore a se ke a tsamaea le eena, empa Elisha o ile a araba a re: “Nke ke ka u tlohela.” Ha ba ntse ba tsoela pele ka leeto, Elia o ile a phehella Elisha hore a sale ka makhetlo a mang a mabeli, empa ha aa ka a lumela. (2 Mar. 2:1-6) Feela joalokaha Ruthe a ile a khomarela Naomi, Elisha le eena o ile a khomarela Elia. (Ruthe 1:8, 16, 17) Hobane’ng? Hobane Elisha o ne a ananela tlotla eo Molimo a neng a mo file eona ea hore a sebeletse Elia.

Elisha o re behetse mohlala o motle. Ha re fuoa mosebetsi o itseng mokhatlong oa Molimo, re tla o nka e le oa bohlokoa haeba re lula re hopola hore re sebeletsa Jehova. Ha ho tlotla e fetang eo.—Pes. 65:4; 84:10.

“KŌPA SEO NKA U ETSETSANG SONA”

Ha banna bana ba babeli ba ntse ba tsamaea, Elia o ile a re ho Elisha: “Kōpa seo nka u etsetsang sona pele ke tlosoa ho uena.” Feela joalokaha kōpo eo Solomone a ileng a e etsa pejana e ile ea bontša hore ke motho oa moea, le ea Elisha e ile ea bontša se tšoanang. O ile a kōpa hore ‘likarolo tse peli tsa moea oa Elia li tle ho eena.’ (1 Mar. 3:5, 9; 2 Mar. 2:9) Iseraeleng, mora oa letsibolo o ne a lokela ho fuoa likarolo tse peli tsa lefa. (Deut. 21:15-17) Kahoo, ha e le hantle Elisha o ile a kōpa ho ba mojalefa oa lintho tsa moea oa Elia. Ho feta moo, ho hlakile hore Elisha o ne a batla ho ba le sebete se tšoanang le sa Elia, ea ’nileng a “boulella Jehova Molimo . . . ka ho feletseng.”—1 Mar. 19:13, 14.

Elia o ile a arabela kōpo ea mohlanka oa hae joang? Moprofeta eo o ile a re: “U kōpile ntho e thata. Haeba u mpona ha ke tlosoa ho uena, ho tla etsahala ka tsela eo ho uena; empa haeba u sa mpone, ho ke ke ha etsahala.” (2 Mar. 2:10) Ho bonahala eka karabo ea Elia e ne e e-na le lintlha tse peli tsa bohlokoa. Ea pele, ke Molimo feela ea neng a ka etsa qeto ea hore na Elisha o tla fumana seo a se kōpileng kapa che. Ea bobeli, haeba Elisha o ne a tla se fumana, o ne a lokela ho boloka boitlamo ba hae ba hore o tla lula le Elia ho bata kapa ho chesa.

SEO ELISHA A ILENG A SE BONA

Molimo o ile a talima kōpo ea Elisha ea ho batla likarolo tse peli tsa moea oa Elia joang? Tlaleho e re: “Eitse ha ba ntse ba tsamaea, ba bua ba ntse ba tsamaea, bonang! koloi ea ntoa ea mollo le lipere tsa mollo, tsa ba arohanya; Elia a nyolohela maholimong ka sefefo. Nakong eo eohle Elisha o ne a ho bona.”a Eo e ne e le karabo ea Jehova kōpong ea Elisha. Elisha o ile a bona ha Elia a tlosoa ho eena, a amohela likarolo tse peli tsa moea oa Elia, ’me ea e-ba mojalefa oa lintho tsa moea oa moprofeta eo.—2 Mar. 2:11-14.

Elisha o ile a nka seaparo se khethehileng se neng se oele ho Elia ’me a se apara. Joale, seaparo seo se ile sa khetholla Elisha e le moprofeta oa Molimo. Bopaki bo eketsehileng ba hore o khethiloe bo ile ba bonahala hamorao ha a etsa mohlolo oa ho arola metsi a Nōka ea Jordane.

Ha ho pelaelo hore Elisha o ile a angoa haholo ke ketsahalo eo a ileng a e bona ea ha Elia a nyoloha ka sefefo. Ho feta moo, hase kamehla motho a bonang likoloi tsa ntoa tsa mollo le lipere! Li ile tsa fana ka bopaki ba hore ka sebele Jehova o ananetse kōpo ea Elisha. Ha Molimo a araba lithapelo tsa rōna, ha re bone likoloi tsa ntoa tsa mollo kapa lipere. Empa re ka lemoha hore Molimo o sebelisa matla a maholo ho tiisa hore thato ea hae e ea phethoa. Hape, ha re hlokomela hore Jehova o hlohonolofatsa karolo e lefatšeng ea mokhatlo oa hae, ha e le hantle re “bona” ha koloi ea hae ea leholimo e tsamaea.—Ezek. 10:9-13.

Elisha o ile a bona lintho tse ngata tse ileng tsa mo kholisa hore Jehova o na le matla a maholo. Ha e le hantle, moea o halalelang oa Molimo o thusitse moprofeta eo ho etsa mehlolo e 16—e leng e menang e entsoeng ke Elia ka makhetlo a mabeli.b Lekhetlo la bobeli leo ka lona Elisha a ileng a bona lipere le likoloi tsa ntoa tsa mollo, ke nakong ea tlokotsi e ileng ea etsahala Dothane eo ho builoeng ka eona qalong ea sehlooho sena.

ELISHA O NE A TŠEPILE JEHOVA

Le hoja ba ne ba lika-likelitsoe ke lira Dothane, Elisha o ne a khobile matšoafo. Hobane’ng? Hobane o ne a e-na le tumelo e matla ho Jehova. Le rōna re hloka tumelo e joalo. Kahoo, a re rapelleng moea o halalelang oa Molimo e le hore re bontše tumelo le litšobotsi tse ling tsa tholoana ea moea.—Luka 11:13; Bagal. 5:22, 23.

Ketsahalo e etsahetseng Dothane e ile ea boela ea fa Elisha lebaka le utloahalang la ho tšepa Jehova le mabotho a hae a sa bonahaleng a sireletsang. Moprofeta eo o ile a hlokomela hore Molimo o sebelisitse mabotho a mangeloi hore a lika-liketse motse hammoho le batho ba o thibeletseng. Molimo o ile a pholosa Elisha le mohlanka oa hae ka mohlolo ka hore a foufatse ba lireng. (2 Mar. 6:17-23) Nakong eo e thata, Elisha o ile a bontša tumelo ’me a tšepa Jehova ka ho feletseng, feela joalokaha a ile a etsa le makhetlong a mang.

A re tšepeng Jehova Molimo joaloka Elisha. (Liprov. 3:5, 6) Ha re etsa joalo, “Molimo o tla re bontša mohau ’me a re hlohonolofatse.” (Pes. 67:1) Ke ’nete hore ha rea lika-liketsoa ke likoloi tsa mollo le lipere ka tsela ea sebele. Leha ho le joalo, nakong ea “matšoenyeho a maholo” a tlang, Jehova o tla re sireletsa re le mokhatlo oa bara ba motho oa lefatšeng ka bophara. (Mat. 24:21; Tšen. 7:9, 14) Ho fihlela nakong eo, kamehla a re luleng re hopola hore “Molimo ke setšabelo sa rōna.”—Pes. 62:8.