Pauluse o Isoa Roma

Ha Pauluse a fihla Jerusalema, o ile a tšoaroa ’me a lahleloa teronkong. Leeto la hae la boraro la ho ruta batho litaba tse monate le ile la fella moo. Jesu a hlaha ho eena torong, a re: ‘U tla ea Roma u e’o ruta batho moo.’ Pauluse o ile a tlosoa Jerusalema a isoa Sesarea, moo a qetileng lilemo tse peli teronkong. Ha a le ka pel’a ’Musisi Festase, Pauluse o ile a kopa ho ahloloa ke Sesare, Roma. Festase a re: “U ipilelitse ho Sesare, u tla ea ho Sesare.” Pauluse a isoa Roma ka sekepe ’me a tsamaea le balumeli-’moho le eena ba bitsoang Luka le Aristakase.

Ha ba ntse ba tsamaea ka sekepe, leoatle le ile la befa hoo ba neng ba bona hantle hore ba tl’o shoa. Empa Pauluse a bolella banna ba ka sekepeng hore lengeloi le itse ho eena a se ke a tšoha, ba tla fihla Roma ba ntse ba phela.

Leoatle le ile la befa ka matsatsi a 14 ho fihlela ba bona sehlekehleke sa Malta. Sekepe se ile sa khitla fatše ’me sa robeha likotoana. Empa banna bohle ba 276 ba neng ba le ka sekepeng ba pholoha. Ba bang ba ile ba sesa ha ba bang ba itšoarella ka likotoana tsa sekepe ho ea lebopong. Baahi ba Malta ba ile ba ba hlokomela ’me ba ba besetsa mollo hore ba futhumale.

Ka mor’a likhoeli tse tharo, masole a palamisa Pauluse sekepeng se eang Roma. Ha a fihla, balumeli-’moho le eena ba ile ba mo khahlanyetsa. Eitse ha a ba bona, Pauluse a leboha Jehova ’me a matlafala. Le hoja Pauluse a ne a tšoeroe, o ne a lumeletsoe ho lula ntlong e katiloeng ke lesole. O ile a lula moo lilemo tse peli. Ha batho ba tl’o mo bona, o ne a ba ruta ka ’Muso oa Molimo le ka Jesu. Pauluse o ile a ngolla liphutheho tsa Asia Minor le Judea mangolo. Kannete Jehova o ile a sebelisa Pauluse hore a rute batho litaba tse monate lichabeng tsohle.