KHAOLO 18

Taba e Ruta Bamameli

1 Bakorinthe 9:19-23

NTLHA-KHOLO: Thusa bamameli ho nahana. Etsa hore ho be le taba ea bohlokoa eo ba ithutileng eona.

Nahana ka lintho tseo bamameli ba seng ba ntse ba li tseba. Ba thuse hore ba nahanisise ka taba eo u buang ka eona, ho e-na le ho pheta feela lintho tseo ba seng ba ntse ba li tseba.

U se ke oa ea lolololo ka lintho tseo ba seng ba ntse ba li tseba, empa u iketle ha u bua ka lintho tseo ba qalang ho li utloa.
Batlisisa ’me u nahanisise ka taba eo u tl’o bua ka eona. Ha u buella lintlha tsa bohlokoa, qoba ho sebelisa mantsoe a sa tloaelehang kapa ho hlalosa ntlha ea hao ka ho bua ka litaba tsa morao-rao. Nahanisisa kamoo taba eo u buang ka eona e nyallanang kateng le lintlha tseo u batlang ho e tšehetsa ka tsona.

Ha u ntse u sheba taba eo u tl’o bua ka eona, ipotse lipotso tse latelang: ‘hobane’ng, neng, hokae, ho buuoa ka mang, ka eng le hore na e etsahetse joang.’ Phelisa puo ea hao ka hore u botse u be u arabe tse ling tsa lipotso tsena nakong eo u ntseng u fana ka eona.
Bontša kamoo taba eo u buang ka eona e ka ba tsoelang molemo kateng. Hlalosa kamoo Bibele e ka ba tsoelang molemo kateng bophelong ba letsatsi le letsatsi. Bua ka lintho tse tobileng, mekhoa le liketso tseo bamameli ba li tsebang.