Nka Bohato ka Potlako ka “Pontšo”!

“Falimehang, kahobane ha le tsebe letsatsi leha e le hora.”—MATTHEU 25:13, Phetolelo e Ncha ea Sesotho.

1. Ke hobane’ng ha e ne e ka ba bothoto ho tšoana le baroetsana ba maoatla ba setšoantšo sa Jesu?

LESELING la ho tla ha mehla ea thabo bakeng sa lefatše la motho ea lopollotsoeng, ke bothoto bo bokaakang ho tšoana le baroetsana ba bahlano ba maoatla ba setšoantšo sa Jesu! Ba lieha haholo ho nka bohato ’me ba hlōleha ho kena “’musong oa maholimo.” Bao ba maoatla ha ba ka ba nka bohato joaloka maseli ka nako e hlokahalang. (Mattheu 25:1-12) Ha “Evangeli ena ea ’muso” e tla be e boletsoe “lefatšeng lohle, e tle e be bopaki” ’me “bofelo” bo fihlile, ba tla be ba lahlehetsoe ke monyetla oa bona oa ho kopana tokelong ea tšebeletso e ke keng ea hlola e phetoa le ka mohla.—Mattheu 24:14.

2, 3. (a) Jesu o qeteletse setšoantšo sa baroetsana ba leshome ka keletso efe? (b) Ke hobane’ng ha keletso eo e ntse e le nakong, ’me kahoo sehlopha sa ‘baroetsana ba bohlale’ se hloka ho ipoloka se e-na le eng?

² Ke ka lebaka lena Jesu Kreste a qetelletseng setšoantšo sa hae ka keletso ena: “Lebelang ke hona; kahobane ha le tsebe letsatsi le hora.”—Mattheu 25:1-13.

³ Mantsoe ao a Monyali Jesu Kreste ke a nakong haholo, haholo-holo hona joale, lilemo tse 71 ho kenelletsoe ‘bofelong ba lefatše.’ Esita le morao-rao tjena masala a sehlopha sa ‘baroetsana ba bohlale’ a ntse a sa tsebe letsatsi kapa hora eo “monyako” o tla koaloa bakeng sa monyetla o tsoelang pele oa ho amoheloa ’Musong oa leholimo ho ea ba le Monyali eo a mo tšehetsang. Ho hlokahala hore kamehla ba batlang ho ipaka e le baroetsana ba “bohlale” ba be le oli ea moea. Ka ho etsa joalo ba lumella leseli la bona le khanye ka hore ba tsebahatse hohle ‘litaba tsena tse molemo tsa ’muso’ bakeng sa bopaki lefatšeng ka bophara, le lichabeng tsohle ho fihlela “bofelo” bo fihla.—Mattheu 24:14; Mareka 13:10; Tšenolo 14:6, 7.

Hona Joale “Linku” le “Lipoli” Lia Aroloa

4. Ho ea ka tlaleho ea Mattheu, ke setšoantšo sefe sa ho qetela sa Jesu se tlamehang ho phethahatsoa e le karolo ea “pontšo” ea “ho ba teng” ha Hae?

⁴ Pele “bofelo” bo e-tla ka “ho fela ha lefatše,” mosebetsi o mong oa ho arola batho o tlameha ho etsahala ’me o sebeletse e le karolo ea “pontšo” ho bontša hore re “nakong ea bofelo.” (Daniele 12:4) Hona ke phethahatso ea setšoantšo sa Jesu sa linku le lipōli, seo ka sona Mattheu a phethang tlaleho ea hae ea boprofeta bo boholo ba Kreste bo mabapi le “pontšo” ea “ho ba teng” ha Hae a sa bonahale le ea “ho fela ha lefatše.”

5. Ho aroloa ha batho ba kang linku le lipōli ho ne ho tla etsahala neng?

⁵ Joale hlokomela seo Jesu a se profetileng ka sena, kamoo se tlalehiloeng kateng ho Mattheu 25:31-46. O qala setšoantšo ka hore: “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. O tla bea linku ka letsohong la hae le letona, a bee lipōli ho le letšehali.” Ho hlahlame eng? Jesu a tsoela pele:

6. Morena eo e leng Molisa o re’ng ho batho ba ka letsohong la hae le letona?

⁶ “Ke moo Morena a tla bolella ba ka letsohong la hae le letona, a re: Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa. Hobane ke na be ke lapile, ’me le kile la ’nea ka ja; ke na be ke nyoriloe, ’me le kile la ’nea ka noa; ke na be ke le moeti, ’me la nkenya tlung ha lōna; ke na be ke hlobotse, ’me la nkapesa; ke na be ke baba, ’me le tlile ho mpona; ke na be ke le teronkong, ’me la tla ho ’na.

7. Batho ba lokileng ba kang linku ba tla botsa potso efe, ’me Morena o tla arabela joang?

⁷ “Etlaba hona ba lokileng ba mo arabang, ba re: Morena, ke neneng re kileng ra u bona u lapile, ’me ra u nea ua ja; leha u nyoriloe, ’me ra u nea ua noa? Ke neng re u boneng u le moeti, ’me re kileng ra u kenya tlung ha rōna; leha u hlobotse, ’me ra u apesa? Ke neng re u boneng u baba, mohlomong u le teronkong, ’me ra ea ho uena? Morena o tla ba araba, a re: Ka ’nete kea le bolella, ke re: Tseo le li entseng e monyenyane ho baena ba ka, le li entse ’na.”

8. (a) Batho ba kang lipōli ha ba ka ba nka bohato ka potlako ho etsa eng? (b) Kahoo Morena o tla re ba lebe kae ho fapana le ba kang linku, ba lokileng?

⁸ “Lipōli” ha li nke bohato ka potlako ka “pontšo.” Ha li etse lintho tse etsoang ke sehlopha sa “linku.” Kahoo rea bala: “Joale, o tla re ho ba ka letsohong la hae le letšehali: Tlohang ho ’na, lōna ba rohakiloeng, le ee mollong o sa feleng, o lokiselitsoeng Diabolose le mangeloi a hae. Hobane ke na be ke lapile, ’me ha lea ka la ’nea ka ja; ke na be ke nyoriloe, ’me ha lea ka la ’nea ka noa; ke na be ke le moeti, ’me ha lea ka la nkenya tlung ha lōna; ke na be ke hlobotse, ’me ha lea ka la nkapesa; ke na be ke le pabong, le teronkong, ’me ha lea ka la tla mpona. Ke moo le bona ba tla mo araba, ba re: Morena, ke neng re kileng ra u bona u lapile, leha u nyoriloe, leha u le moeti, leha u hlobotse, leha u baba, leha u le teronkong, ’me re sa ka ra u thusa? Ke moo a tla ba araba, a re: Ka ’nete ke re ho Iōna: Ereka ha le sa ka la etsa joalo ho e mong oa ba banyenyane bana, ha lea ka la nketsa joalo le ’na. ’Me bona bao ba tla ea bohlokong bo sa feleng, empa ba lokileng ba tla ea bophelong bo sa feleng.”

9. U ka thabela hore u entse eng nakong ena ea ho phethahala ha setšoantšo sa Jesu sa “linku” le “lipōli”?

⁹ Mohlomong u nkile karolo phethahatsong ea setšoantšo sena sa boprofeta. Na u hlokometse lintho tse molemo tseo Jesu a li boletseng? Na u entse lintho tse joalo ho “baena” ba hae? U ka thaba haeba u ile ua itšoara joaloka ‘linku’ ho bona!

10. Jesu o ile a etsa phapang pakeng tsa “baena” ba hae le ba tšoantšetsoang ke “linku” le “lipōli” joang, hona ke motheo ofe oa Bibele o teng bakeng sa see?

¹⁰ Jesu o entse phapang pakeng tsa “baena” ba hae ba moea le ba ipakang ba tšoana le linku kapa lipōli. Nakong ea ho phethahala ha setšoantšo sena, “baena” ba hae ba mo etsisitse ka ho ineela ho Molimo ba sa itšiele letho. Joaloka Jesu, ba fane ka bopaki ba phatlalatsa ka sena ka hore ba kolobetsoe metsing. Ho feta moo, Jehova, Ntate oa Morena Jesu Kreste, o fetohile Ntate oa bona oa leholimo ka ho ba tsoala ka moea oa Hae o halalelang ’me kahoo a ba etsa “baena” ba moea ba Mora oa hae. Hona ho ba bea mocheng oa sebaka ’Musong oa leholimo le Moholoane oa bona, Jesu Kreste, “Morena oa marena, le ’Musi oa babusi.” (Tšenolo 19:16) Tabeng ena ho ile ha ngoloa ka eena: “Hobane leha e le ea halaletsang, leha e le ba halaletsoang, ke ba a le mong bohle; ka baka leo, ha a na lihlong tsa ho ba bitsa banab’abo, ha a re: Ke tla bolella banab’eso lebitso la hao, ke u binele lifela har’a phutheho.” (Ba-Heberu 2:11, 12) Mona Pesaleme ea 22:22 e sebelisitsoe ho Mora oa Molimo ea tlotsitsoeng, Jesu Kreste.

11. Na hona joale ho sa na le “baena” ba moea ba Jesu ba bangata lefatšeng, ’me ba etsa sehlopha kapa “phutheho” efe?

¹¹ Lefatšeng ho sa ntse ho e-na le masala a “baena” bao ba moea ba Morena ea busang, Jesu Kreste. E le sehlopha, kapa “phutheho,” ba etsa “mohlanka ea khabane, ea bohlale” eo Jesu a buileng ka eena esale pele boprofeteng ba hae ka “ho fela ha lefatše.” A re: “Ana ke mang mohlanka ea khabane, ea bohlale, eo morena oa hae a ’meileng moalosi oa bahlanka ba hae ho ba nea lijo nakong ea teng? Ho lehlohonolo mohlanka eo Morena oa hae, mohla a fihlang, a tla mo fumana a etsa joalo. Ka ’nete ke re ho Iōna: O tla ’mea moalosi oa mesebetsi ea hae kaofela.”—Mattheu 24:45-47.

12. (a) Ho tloha ka 1919, sehlopha sa “mohlanka” se ’nile sa totobala ka ho etsa’ng? (b) Ke holim’a “mesebetsi” efe “mohlanka” a khethiloeng? (c) Hona joale “mohlanka” ea mosebetsing ke karolo ea eng?

¹² Linnete tsa pale li arabela potso ea Jesu ka ho khetholla “mohlanka” enoa. “Phutheho” e sebeletsang e le “mohlanka” e entsoe ka “baena” ba hae bao a ba filoeng ke Molimo ba ntseng ba le lefatšeng. Ke ntho e le ’ngoe le sehlopha sa ‘baroetsana ba bohlale.’ Ho tloha ka 1919 “mohlanka” enoa o ’nile a totobala ka ho fepa “bahlanka” ba ntlo ea Morena ka lijo tsa moea tse ncha tse tsoang Bibeleng, a etsa joalo “nakong ea teng.” Ka hona, Morena ea sa bonahaleng o khethile sehlopha sena se tšepahalang sa “mohlanka” ho alosa “mesebetsi ea hae kaofela” ea moea. Hona ho joalo haholo-holo mabapi le ho boleloa ha “evangeli ena ea ’muso” lefatšeng lohle, leo a le busang. Ho tla fihlela joale bopaki bona ba ’Muso bo eketsehile! Mosebetsi oa “mohlanka ea khabane, ea bohlale” ke karolo e khōlō ea “pontšo” ho re bontša hore na nako ke efe.

13. Ke ho tloha neng “lichaba tsohle” li bokelletsoeng kapel’a Morena, ’me ke neng “mohlanka” a qalileng ho bokella “linku” ka letsohong la Hae le letona?

¹³ “Linku” tse lokileng li entse lintho tse molemo ho litho tsa sehlopha sa “mohlanka.” Linku le lipōli tsa tšoantšetso ke batho ba lichaba tsohle ba neoang bopaki ba ’Muso hona joale. Kahoo, li emeloa ke linku le lipōli tse joalo, “lichaba tsohle” li bokelletsoe kapel’a Morena ea lutseng teroneng ea hae ea leholimong ho tloha ha ho fela Mehla ea Lichaba ka 1914. Tumellanong le ho bokella hono ho profetiloeng, ho hlokomeleha selemo sa 1935. Watch Tower Bible and Tract Society, e sebelisoang ke sehlopha sa “mohlanka,” ka nako eo e ne e-na le liofisi tsa makala tse 49 lefatšeng lohle. Hona selemong seo “mohlanka” a lebisa tlhokomelo e khethehileng ho batho ba kang linku ba lefatšeng, ka pono ea ho ba bokellela lehlakoreng le letona la Morena ea busang, Jesu Kreste. Kahoo, bana ba tsoang lichabeng tsohle ba tla kamanong e haufi le sehlopha sa “mohlanka.”

14. Leseling la Johanne 10:16, ke pono efe e ncha e nkiloeng ka ba lokileng, ba kang linku, ’me ke liofisi tse kae tsa makala tsa Watch Tower Society tse ba sebeletsang hona joale?

¹⁴ Bao ba lokileng, ba kang linku ho ne ho se ho sa hlokahale hore ba khetholloe ka mantsoe a akaretsang e le “batho bao o khahloang ke bona.” (Luka 2:14) Ba ne ba se ba lokela ho talingoa e le sehlopha sa batho ba bangata-ngata feela, ba sa hlophisoang hantle ba tšabang Molimo lichabeng tsohle—linku tse lahlehileng. Jesu o itse o ne a tla bokella “linku tse ling” ’me a li etse ‘mohlape o le mong’ le masala a sehlopha sa “mohlanka.” (Johanne 10:16) Ho bokelloa ha “linku tse ling” tse joalo ho tloha ka nako eo ho ea pele ke karolo e totobetseng ea “pontšo” e tšoaeang “ho fela ha lefatše.” ’Me hona joale Watch Tower Society e na le liofisi tsa makala tse 95 a sebeletsang litlhoko tsa bona.

Ketso e Nakong ka “Pontšo” ea Putsoa

15. “Linku” li tlameha ho finyella litlhokahalo life hore li tle li “amohele ’muso”?

¹⁵ Ho ea ka setšoantšo sa Jesu, “linku” tse lokileng li tlameha ho finyella litlhokahalo tse itseng nakong ea “ho fela ha lefatše.” Li lokela ho elelloa le ho amohela “baena” ba moea ba Kreste ba etsang sehlopha sa “mohlanka ea khabane, ea bohlale.” Hape “linku” li tlameha ho etsetsa sehlopha sa “mohlanka” lintho tse molemo, esita le ho ba chakela ha ba tšoeroe hampe teronkong. Hona “linku” li tlameha ho ho etsa le ho thabela mahlohonolo a Ntate oa leholimo le hore Morena Jesu Kreste a ba memele ho ‘amohela ’muso oo ba o lokiselitsoeng ha e sa le lefatše le theoa.’—Mattheu 25:34.

16. Ka mantsoe “le amohele ’muso,” Morena o memela “linku” hore li kene ho eng, li pholoha “ntoa” efe?

¹⁶ Kaha “linku” tsena ha se “baena” ba Morena ba moea, ha a li memele ho ea lula literoneng tsa leholimo ’me li buse le eena ka lilemo tse khethehileng tse sekete tsa puso ea hae. Ka mantsoe a hae “le amohele ’muso,” o ba memela ho kena mehleng ea ’Muso kamor’a hore a timetse mebuso eohle ea bonyefoli ea lefatše lena nakong ea “ntoa ea letsatsi le leholo la Molimo o matla ’ohle,” Harmagedone. (Tšenolo 16:13-16) Ba bangata ba kang linku ba phelang hona joale ba tla pholoha ntoa eo ea lintoa ’me ba kene Pusong ea Kreste ea Lilemo tse Sekete ba sa shoe.

17. Morena o bua le “linku” joang, hona o fumane ntho eo a ka li fang eona joang?

¹⁷ Kahoo Morena Jesu Kreste o bua le “linku” tsena joalokaha e ka ke bana ba hae bao nako ea bona e fihlileng hore ba kene lefeng le tsoang ho eena. Ka lefu la hae e le motho ea phethahetseng ho fana ka sehlabelo sa topollo bakeng sa bohle, a tela litebello tsohle tsa ho thabela Paradeise ea lefatšeng ka boeena. (Luka 23:39-43) Ntlheng ena Jesu, “Adama oa morao,” ha a tšoane le “motho oa pele, Adama” ea ileng a etsa sebe ’me a lahlela bana bohle ba hae Paradeiseng ea lefatšeng. Kahoo Jesu Kreste ea tsositsoeng, “Ra-bo-sa-feleng” oa lefatše lohle le lopollotsoeng la batho, o na le ntho e ’ngoe eo a ka e fang bana ba kang linku holim’a lefatše. (1 Ba-Korinthe 15:45; Esaia 9:6, 7) Lelapa la motho le qaliloe ka “motho oa pele, Adama,” ka litebello tsohle tsa hae le menyetla eohle ea hae ea Paradeise. Empa Paradeise eo e lahlehileng e lokela ho tsosolosoa ka ’Muso oa Molimo matsohong a “Adama oa morao,” Jesu Kreste.

18. Ke ka kutloisiso efe sebaka sa ’Muso se “lokiselitsoeng [“linku”] ha e sa le lefatše le theoa”?

¹⁸ Adama le Eva ba qalile ho ba le bana hoba ba lelekoe Paradeiseng ea pele. Mora oa bona oa bobeli, Abele ea lokileng, o ile a bolaoa ke mora oa bona oa matsibolo, Kaine. Kahoo Mora oa bona Setha a talingoa e le ea nkelang Abele sebaka. Ka ho hlaha ha bana ba joalo, lefatše la batho le ne le theiloe. Empa pele ho mona, ha batsoali ba lefatše la batho ba lelekoa Paradeiseng, Jehova Molimo a etsa tšepiso ea hae e mohau mabapi le “peō” e neng e tla khoba hlooho ea Noha ea tšoantšetso. Satane Diabolose. “Peō” eo e ne e lokela ho ba peō ea borena, ’me hona ho ne ho ama ’Muso, ho ea ka morero oa Molimo le ponelopele ea oona. (Genese 3:15) Ka hona, ha Satane Noha le peō ea hae ba tšoaroa matsoho, batho ba lopolotsoeng ba ne ba tla kena sebakeng sa ’Muso lefatšeng, tlas’a ’muso oa leholimo oa Peō e hlōlang, e silakanyang Noha le peō ea eona. Ka tsela ena, “’muso” oo batho ba kang linku ba o ‘amohelang’ ho Ra-bo-sa-Feleng oa bona, Jesu Kreste, ke sebaka sa ’Muso oo ba neng ba ‘o lokiselitsoe ha e sa le lefatše le theoa.’

19. Tsamaiso ea lintho ea kamor’a Harmagedone e tla ba le qalo ea mofuta ofe lefatšeng?

¹⁹ Kaha lipōli tsa tšoantšetso li tla tlosoa ka timetso Harmagedone, “linku” tse pholohang li tla qala tsamaiso ea lintho ea kamor’a Harmagedone hantle lefatšeng la Paradeise. Mabapi le sena, Jesu o itse: “Bona bao [ba kang lipōli] ba tla ea bohlokong bo sa feleng, empa ba lokileng ba tla ea bophelong bo sa feleng.”—Mattheu 25:46.

20. Re ka qoba ho hlalosa litšobotsi tsa “pontšo” ka tsela e fosahetseng joang?

²⁰ Nakong ena ea “ho fela ha lefatše” ho tloha ha Mehla ea Lichaba e fela ka 1914, “linku” le “lipōli” li fapana ka tsela eo li hlalosang “pontšo” ea “ho ba teng” ha Jesu. Kaha ho ke ke ha latoloa hore re nakong ea kahlolo, potso e latelang ke ea bohlokoa: “Pontšo” e bolela eng ho rōna? Haeba re e hlalosa kamoo re nahanang kateng, re ka fana ka tlhaloso e fosahetseng bakeng sa litšobotsi tsa “pontšo” eo. Kahoo ke hantle ha re botsa: Jesu Kreste o itse “pontšo” ee e nang le likarolo tse ngata tse nyalanang e lokela ho re bontša eng? Ho ea ka eena, e lokela ho bolela hore tsamaiso ea hona joale ea lintho e tlameha ho fela haufi ka ‘mahlomola a maholo’ a senyang ho feta Moroallo oa lefatše lohle oa mehleng ea Noe.—Mattheu 24:21.

21. (a) Le hoja ‘mahlomola a maholo’ a le kapele, ke hobane’ng ha re lokela ho thaba? (b) Ke monyetla ofe o teng bakeng sa sehlopha sa “linku” sa kajeno?

²¹ Empa, thaba, hobane “pontšo” ena e boetse e bolela hore Puso ea Lilemo tse Sekete ea Jesu Kreste e haufi, e loketse ho qala kamor’a ho timetsoa ha tsamaiso ea Satane ea lintho ea lefatše. (Luka 21:28) Kahoo, tlas’a tšireletso ea Molimo u na le monyetla o ke keng oa lekanngoa oa ho pholoha ‘mahlomola ao a maholo’ u pholohela tsamaisong e ncha ea lintho, moo ho loka ho tla ikahela ka ho sa feleng. Ka sebele, kapel’a hao ho beiloe monyetla oa ho se shoe le ka mohla empa oa ho phela ka ho sa feleng ’me ka tlhohonolofatso u phela lefatšeng la paradeise tlas’a borena ba bokahohleng ba Jehova Molimo!

22. (a) Haeba re nka bohato ka “pontšo” ka potlako le ka nepo, re tla etsa’ng? (b) Kamanong le “pontšo,” Jesu Kreste o tla tumisoa joang?

²² Ho sa tsotellehe hore na re “baena” ba Kreste ba moea kapa re “linku” tse lokileng, joale, a re nkeng bohato ka “pontšo” ka potlako le ka nepo. A re beng le karolo e tsoelang pele ho phethahaleng ha tšobotsi e khōlō ea eona: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle.” Joale ha ho letho leo re tla le tšoha ha “bofelo” bo e-tla. Ho e-na le hoo, thabo ea rōna e tla khaphatseha! Joale, hape, Jesu Kreste o tla tumisoa e le moprofeta ea tšepahalang oa ‘pontšo e litšobotsi li ngata . . . ea ho fela ha lefatše.’—Mattheu 24:3–25:46.

Na U ka Arabela?

◻ Ke neng batho ba neng ba lokela ho aroloa joaloka linku le lipōli?

◻ U ka thabela ho etsa’ng nakong ea ho phethahala ha setšoantšo sa Jesu sa “linku” le “lipōli”?

◻ Ke bo-mang ba etsang “baena” ba Morena le “mohlanka ea khabane, ea bohlale”?

◻ Hore ba kang linku ba tle ba “amohele ’muso” ba tlameha ho finyella litlhokahalo life?

◻ Re tla etsa’ng haeba re nka bohato ka potlako le ka nepo ka “pontšo” ea “ho ba teng” ha Jesu?

[Ntlha e qolotsoeng e leqepheng la 23]

Nka bohato ka potlako ka “pontšo” ea “ho ba teng” ha Jesu. Ho etsa joalo ho ka bolela bophelo bo sa feleng Paradeiseng

[Setšoantšo se leqepheng la 20]

Joalokaha molisa a khetha linku ho lipōli le Jesu Kreste o khetha batho joalo kajeno. Na u motho ea kang nku?