Kamoo U ka Atlehisang ho Bala Bibele

“HO LEHLOHONOLO bafumanehi moeeng.” Ao ke mantsoe ao ke a qalang Thuto ea Jesu e tsebisahalang haholo ea Thabeng, kamoo temana ena e fetoletsoeng kateng Libibeleng tse ngata tsa Senyesemane. (Mattheu 5:3, Revised Standard Version, khatiso ea Boprotestanta le Bokatholike) Na u utloisisa seo Jesu a neng a hlile a se bolela ka “bafumanehi moeeng”? Na u ne a bua ka ba neng ba nyahame? Kapa na u ne a bolela lithoto? Ha ho bonahale a ne a ka bolela lithoto, empa ke habohlokoa ho tseba.

Lipaki tsa Jehova, tse hlokomeloang le ke bahanyetsi ba tsona e le liithuti tse hloahloa tsa Bibele, li fumane hore New World Translation of the Holy Scriptures e beha taba ka tsela e hlakileng le e nepahetseng ka ho babatsehang. E ngola serapa seo sa Thuto ea Thabeng tjena: “Ho thaba ba elang seli tlhoko ea bona ea moea.”

Lihlaloso tse ling tsa Bibele li lumela hore sena ke sona se boleloang ke “bafumanehi moeeng.” Joale, ke hobane’ng, ha liphetolelo tse ngata tse sebelisoang, tse kang Jerusalem Bible ea Katholike le New International Version, li phehelletse ho sebelisa polelo “bafumanehi moeeng”?

Mohlala ona o bontša hore haeba motho a lakatsa ho atlehisa ’malo oa hae oa Bibele, o lokela ho khetha phetolelo e tšepahalang, e hlakileng le e utloisisehang.

Boikutlo bo Loketseng

Ho bala Bibele ka katleho ho boetse ho hloka boikutlo bo loketseng ba ’mali. Mantsoe ao a Thuto ea Thabeng ka makhethe a akarelletsa hore na boikutlo ba rōna e lokela ho ba bofe: “Ho thaba ba elang seli tlhoko ea bona ea moea.” Na bophelo ba hao bo haelloa ke ’nete ea moea? Na u hlokomela hore u hloka ho fepa kelello ea hao le pelo ka lijo tsa moea? Bibele e ka u thusa ho tlatsa tlhoko eo.

Leha ho le joalo, u ke ke ua fepa kelello le pelo ka Bibele haeba u e bala joale ka buka efe le efe. U tlameha ho e bala, “e seng joale ka hoja e le lentsoe la batho, empa . . . [e le] Lentsoe la Molimo, joale ka ha e le Iona ka sebele.” (1 Ba-Thessalonika 2:13) U tla be u sa bale bohlale ba batho kapa histori ea bochaba ea batho, empa menahano ea Molimo le pale ea litšebelisano tsa oona le bahlanka ba oona ba lefatšeng. E boetse e na le boprofeta bo hlollang, ’me bo bong ba bona bo se bo phethahetse, ha bo bong bo phethahala pel’a mahlo a rōna kapa e le hona bo tla phethahala molemong o moholo oa batho.

Kaha Bibele ke Lentsoe la Molimo, ho e bala ka mokhoa o atlehang ho hloka thuso ea Molimo. Ka hona thapelo ho Molimo ke kenyelletso e loketseng ha u bala Bibele. Ka mantsoe a bonolo, a tlohang pelong ea hao, mo kōpe hore a u thuse ho utloisisa seo u se balang le kamoo u ka se sebelisang kateng bophelong ba hao. Ka linako tse ling re haelloa ke matla kapa bohlale ba ho sebelisa tsebo eo re e fumaneng. Bibele ka boeona ea eletsa: “Ha e mong ho lōna a hloka bohlale, a bo kōpe ho Molimo, o sitsang bohle ka phano e kholo, o se na ho khanana, ’me o tla bo neoa. Feela, a kōpe ka tumelo, a se ke a lika-lika.”—Jakobo 1:5, 6.

Ho Bala ka Tumelo

U ka ’na ua re: ‘Nka rapela ka tumelo le ho bala ka tumelo joang haeba ke haelloa ke tumelo?’ Haeba u nka Bibele ’me u qala ho e bala eo ke pontšo ea hore u ‘ela seli litlhoko tsa hao tsa moea,’ ka hona tumelo ea hao e tla eketseha ha u fumana tsebo ea Jehova Molimo le merero ea hae e theiloeng ho Kreste. Tumelo ea ’nete ha e ea lokela ho ferekanngoa le ho lumela lintho ntle ho mabaka. Bibele ka boeona e hlalosa tumelo e le “tšepiso e tiileng ea lintho tse lebeletsoeng, ke pontšo e kholisang ea tse sa bonoeng.”—Ba-Heberu 11:1.

Tumelo ea ’nete e hloka motheo oa bohlokoa oa tsebo, ’me tsebo e joalo e etsa hore lintho tse tšepisitsoeng ke Molimo e be tsa sebele joaloka hoja li bonoa. Ka hona tumelo ke ntho e ’ngoe e ka fumanoang. E latela ho bala le ho utloa lintho tsa Molimo le merero ea ’ona e babatsehang bakeng sa batho. Joalokaha moapostola Pauluse a boletse hore, “Tumelo e fela e tla ka ho utloa, ’me kutlo e tla ka polelo ea [Kreste].”—Ba-Roma 10:17.a

Ha tumelo ea hao e ntse e eketseha, ho bala ha hao Bibele ho tla bontša katleho e eketsehileng. Hobane’ng? Hobane ‘lintho tseo u li lebeletseng’ e tla ba tse “tiileng” haholoanyane. Hona ho ka tšoantšoa le setsoalle se secha pakeng tsa hao le motho e mong. Ha nako e ntse e feta ’me u ntse u tseba motho eo hamolemo, ho mo tšepa ha hao hoa hōla. Qetellong, hoba u phele har’a maemo a mangata ao ho seng mohla motsoalle oa hao a kileng a u tlohela ho oona, u mo tšepa ka ho sa thekeseleng. Haeba a u ngolla, u tla tseba mokhoa oa ho fumana moea oa se boleloang. Le hoja polelo e sa hlaka hantle haholo, u tseba motho eo hantle hoo u se nang bothata ba ho utloisisa khopolo. U bala lengolo leo la motsoalle ka tsela ea ho mo tšepa, e seng ka pelaelo.

Ka ho tšoanang, ha u ntse u tseba Bibele le Mongoli oa eona Jehova Molimo haholoanyane, u tla tšepa Molimo le Lentsoe la oona haholoanyane. Le liketsahalo tse ling tabeng ea Bibele tse ka ’nang tsa bonahala li le thata ho utloisiseha li ke ke tsa sisinya tšepo eo. Ka mohlala, esita le haeba lebaka la ketso e tšabehang e entsoeng ke Molimo ho motho e mong kapa sechaba se seng e sa bonahale kapele, u tla ba le kholiseho ea hore ho ne ho hlokahala. U tla bua mantsoe a tšoanang le ao u neng u ka a bua ho motsoalle eo u mo tšepang: ‘Koana, haeba o entse hoo, ho tlameha ho be ho ne ho e-na le lebaka le letle.’

Ha e le hantle, tumelo ea hao ho Molimo e tla matlafatsoa haeba u ka fumana lebaka la hore na ke hobane’ng ha Molimo o ile oa nka bohato ka tsela e joalo kapa hore na ke hobane’ng ha ka linako tse ling o lieha ho nka bohato liketsong tsa bakhopo. Empa u ka ’na ua hloka thuso. Hoo ho re tlisa ntlheng e ’ngoe ea bohlokoa ea ho bala Bibele ka mokhoa o atlehang.

Ho Hlokahala Thuso

Ke ntho e babatsehang haholo ho bala Bibele eohle. Haeba u bala khaolo e le ’ngoe ka letsatsi, ho tla u nka nako e fetang lilemo tse tharo ho bala Mangolo ’ohle a Seheberu le a Segerike. Empa haeba u bala likhaolo tse tharo kapa tse ’nè ka letsatsi, u ka e qeta ka selemo. Leha ho le joalo, ho fumana maikutlo a akarelletsang a seo Bibele e se fupereng, u ka ’na ua qala ka Lipesaleme le Liproverbia. E be joale u khutlela ho Genese, Exoda, le Samuele oa Pele u fetele mehleng ea Bokreste, ka Mattheu, Liketso, le mangolo a se makae a ngolletseng Bakreste ba pele a kang Ba-Filippi, Jakobo, le Petrose oa Pele kapa oa Bobeli.

U tla hlokomela hore haeba u batla ho fumana molemo le moea oa se fuperoeng ke Bibele, ho hotle ho batlisisa seo e se buang tabeng e fanoeng. Ho ka etsahala hore litemana tse buang ka taba e le ’ngoe li likarolong tse arohaneng haholo ka Bibeleng. Mohlomong u tla ikutloa u hloka lithuso tsa ho ithuta Bibele tse tla u nolofaletsa ho utloa seo Mangolo a se buang, sehlooho ka sehlooho. Hape, kaha libuka tsa Bibele ha li hlahlamane hantle ho latela nako, lithuso tse joalo tsa Bibele li ka u nolofaletsa ho fumana tatelano ea nako. Ho tseba ka sebaka le histori ea sona ho boetse e ka ba ho molemo haholo ho utloisisa Mangolo.

Thuso e joalo ea ho ithuta Bibele e ka fumanoa hokae? Lilemong tsa morao tjena lingoli tsa Katholike li hatisitse libuka tse ngata tseo ho bonahalang li reretsoe ho thusa Makatholike ha a bala Bibele. Empa li iphumana li le tsietsing. Haeba li hlile li thusa Makatholike ho utloisisa Bibele, kapele Makatholike a fumana hore lithuto tse ngata tsa Katholike ha li fumanoe ka Bibeleng. Ka lehlakoreng le leng, haeba lingoli li lokafatsa lithuto tsa Katholike, li fokolisa tšepo ea babali Bibeleng hobane li phahamisa neano ea kereke ho feta Mangolo.—Bapisa Mareka 7:13.

Makatholike a eketsehang a amohela thuso ea Lipaki tsa Jehova. Linaheng tse ngata, batho ba likete ba Katholike ba leka ka matla ho bala Bibele ka kutloisiso. Ba amohela thuso e fokolang kapa ha ba amohele thuso ea letho ho baprista ba bona. Ba tšoana le mohlanka oa mo-Ethiopia ea neng a bala buka ea Esaia. Ha ’moleli oa evangeli Filippi a botsa hore na o hlile o utloisisa seo a se balang, ka boikokobetso, mo-Ethiopia a arabela: “Nka ho etsa joang, ntle leha motho e mong a ntataisa?” (Liketso 8:31, RS, khatiso ea Katholike) Filippi a mo thusa ’me hamorao monna eo ea tšepahalang ea e-ba Mokreste ea kolobelitsoeng. Ka ho tšoanang, ha Lipaki tsa Jehova li ntse li ea ka ntlo le ntlo li kopana le Makatholike, ’me ha ba bolela hore ba na le Bibele malapeng a bona, Lipaki li ba botsa haeba ba ne ba ka rata ho thusoa ho etsa hore mokhoa oo ba balang Bibele ka ’ona e be o atlehileng.

Ho Bala Bibele ho Hlahisa Litholoana

Lipaki tsa Jehova li sebelisa lithuso tse fapaneng tsa ho ithuta Bibele ha li le mosebetsing oa tsona, lithuso tse kang Buka ea ka ea Lipale tsa Bibele (litlaleho tsa Bibele tse 116 tse beiloeng ka puo e bonolo le ka tatellano ea nako), Is the Bible Really the Word of God? (e fana ka bopaki ba mahlale le histori mabapi le bonnete ba Bibele), “All Scripture Is Inspired of God and Beneficial” (kakaretso ea buka ka ’ngoe ea lihlooho tsa Bibele, le boitsebiso ba libaka le histori ea tsona), le U ka Phela ka ho sa Feleng Paradeiseng Lefatšeng (e bokellang mangolo lihloohong tsa bohlokoa tse 30, ho akarelletsa le tšepo e babatsehang eo Lentsoe la Molimo le e beileng pel’a babali ba Bibele ba tšepahalang kajeno).

Lithuso tsena tsa Bibele, hammoho le thuso ea botho eo Lipaki tsa Jehova li tla thabela ho u fa eona ntle ho tefello, li tla etsa hore ho bala Bibele ha hao e be ho thabisang le ho atlehileng. U tla fumana tataiso bophelong ba letsatsi le letsatsi le tšepo e babatsehang ea bophelo Taolong e Ncha ea Molimo e tšepisitsoeng, moo qetellong, thato ea Molimo e tlang ho ‘etsoa lefatšeng, joale ka ha e etsoa leholimong.’—Mattheu 6:10.

[Mongolo o botlaaseng ba leqephe]

[Setšoantšo se leqepheng la 7]

Mo-Ethiopia o ile a hlokomela se hlokahalang ho utloisisa Bibele