Lefatše le Tletseng Bomalimabe
HISTORING ha ho mohla batho ba kileng ba e-ba tlas’a ho tujoa, khatello, le mahlomola tse kanakana. Litlokotsi li se li batla li tloaelehile joaloka moea oo re o phefumolohang. Ha o hlalosa nako ea ho tloha ka selemo sa 1914, makasine o mong o hlalositse: “Ena ebile nako ea moferefere le pefo tse feteletseng, kantle le kahare ho meeli ea lichaha.”
Ho tšosang haholo-holo ke tšekamelo ea lihlōhō tse sa laoleheng lintoeng tsa kajeno. Naheng e ’ngoe e nyenyane ea Afrika, ntoa ea lilemo tse supileng e bolaile batho ba fetang 20 000. Batho ba koetetsoe, ba betiloe, le tse ling tse joalo. Batho ba baholo le bana ebile mahlatsipa a maraba a fatše, liqhomane tse betsoang ka letsoho le tšoaro e sehlōhō.
Ha re talima bomalimabe ponong ea batho ka bomong, boemo ba masoabi bo hlakile. Ka mohlala, leka ho ipea boemong ba mosali eo, a e-na le bana ba hae, a ileng a qobelloa ho bina le ho opa liatla a supiloe ka sethunya ha sehlopha sa banna butle-butle se khabela monna oa hae ho isa lefung. U ne u tla itšoara joang? E, ka sebele ‘lichaba li tsietsoe,’ ’me batho ka bomong ba utloa bohloko ba bomalimabe bona.—Luka 21:25.
Hangata Bakreste ba qoba litsietsi hobane ho hang ha ba nke lehlakore ’me ba tloha libakeng tseo ho bonahalang pefo e ka ’na ea hlaha ho tsona. (Johanne 17:16) Leha ho le joalo, ba ke ke ba qoba litsietsi tsohle, ’me ka linako tse ling ba utloa bohloko joaloka bao e leng karolo ea lefatše. Ka pefo le ho qhekella. Satane Diabolose a ka baka lefu le sa reroang. Kaha karolo ea molaetsa o boleloang ke Lipaki tsa Jehova lefatšeng lohle e akarelletsa ho pepesa mesebetsi ea Diabolose, na re ke ke ra lebella hore Satane a sebelise ‘mekhoa ea hae ea ho bolaea’ ka boiteko ba ho felisa bajari baa ba molaetsa oo? Mangolo a bontša joalo.—Ba-Heberu 2:14, 15; Tšenolo 2:10; 12:12, 17.
Bakreste ba Tobana le Mahlomola a Tsoelang Pele
Ntle ho bomalimabe boo batho ka kakaretso ba tobanang le bona, balateli ba tšepahalang ba Jesu Kreste ba tlameha ho mamella mahloriso a ba tlelang ka lebaka la ho emela hoa bona ’Musi oa Bokahohleng, Jehova Molimo, le ’Muso oa hae. Hoba a hlalose liketsahalo tse sithabetsang tse neng li tla etella pele qetello ea tsamaiso ea puso ea motho tlas’a Satane, Jesu o itse: “Mohlang oo, le [barutuoa ba Jesu] tla neeloa ho tšoenngoa, le tla bolaoa, ’me le tla hlouoa ke lichaba tsohle ka baka la lebitso la ka.” Mareka o qotsa Jesu a phaella, “le tla otloa.”—Mattheu 24:3, 7-9; Mareka 13:9.
E, ka baka la boikemisetso ba bona ba ho bolela “Evangeli ena ea ’muso” lefatšeng ka bophara tlas’a maemo ’ohle, batho ba Jehova ba ile ba tlameha ho mamella teko e eketsehileng ea mahloriso—ho otloa, ho thibeloa, ho kenngoa teronkong, le mekhoa e meng ea ho tšoaroa hampe. (Mattheu 24:14) Koana, bahlorisi ba bile ba bolaea Bakreste ba bang bao “molato” oa bona feela e neng e le ho ruta hore ’Muso oa Molimo ke oona feela tšepo bakeng sa batho!
Jesu o kile a re: “Ea tiisetsang ho fihlela qetellong, ke eena ea tla bolokeha.” (Mareka 13:13) Leha ho le joalo, na re ka mamella ’me re sa khathale? Na ho na le mohloli leha e le ofe oa matšeliso le bomalimabeng ho boholohali? Na re na le mehlala ea ba ileng ha mamella?