Babali ba Batla ho Tseba
Na Litsietsi Tse re Hlahelang ke Kotlo e Tsoang ho Molimo?
Na bophelong u kile ua oeloa ke koluoa e ileng ea etsa hore u ipotse hore na ebe Molimo o rerile hore u hlaheloe ke litsietsi? Ho kula ka tšohanyetso, ho tsoa kotsi e holofatsang kapa ho shoeloa ke mong ka uena ka tšohanyetso ho ka ’na ha etsa hore u nahane hore Molimo o ikhethetse uena hore a u otle.
Ho e-na le ho ikutloa ka tsela eo, tšeliseha hobane Molimo o batla hore batho ba thabe ’me ba se ke ba hlola ba utloa bohloko. Sena se totobatsoa ke taba ea hore ha Molimo a bōpa batho ba pele, o ile a ba beha “serapeng sa Edene,” e leng serapa se neng se tšoana le paradeise, moo ba neng ba phela ntle ho litsietsi.—Genese 2:15.
Ka masoabi, banyalani ba pele ba ile ba khetha ho qhelela ka thōko monyetla ona o babatsehang eaba ba hlompholla Molimo ka boomo. Hase bona feela ba ileng ba latsoa litholoana tse bosula tsa liketso tsa bona, empa le bana bohle ba bona ba ile ba li latsoa, ho akarelletsa le rōna. Hobane’ng? Boemo bona bo ka bapisoa le se etsahalang ha hlooho ea lelapa e hana ho lefa rente ea ntlo—lelapa lohle lea lelekoa ebe le hula ka thata le hona ho sotleha. Ka ho tšoanang, moloko oohle oa batho o oetsoe ke tsietsi ka lebaka la borabele ba batho ba pele. (Baroma 5:12) Lilemo-lemo hamorao, ha monna ea lokileng ea bitsoang Jobo a lla, o ile a re haeba bohloko le mahlomola a hae li ne li ka ‘behoa sekaleng,’ li ne li tla ba “boima ho feta lehlabathe la leoatle.”—Jobo 6:2, 3.
Ntho e ’ngoe e bakang litsietsi ke ho se tsebe ka botlalo lintho tse tla etsahala. Ka mohlala, nka hore motho e mong o haha matlo sebakeng se ratoang ke mello ’me oa a rekisa. Ka lebaka la ho se tsebe hore na sebaka seo se joang, u reka ntlo e ’ngoe ea tseo ’me u lula ho eona. Na u ne u tla be u sa leketlisetse bophelo ba hao le ba bana ba hao selomong? Ho hang bothata leha e le bofe bo ka hlahang bo ke ke ba nkoa e le tsela eo ka eona Molimo a u otlang. ’Nete ea taba e boletsoe ka ho hlaka ka Bibeleng: “Mang kapa mang ea se nang phihlelo o beha tumelo lentsoeng le leng le le leng, empa ea masene o nahana ka mehato ea hae.”—Liproverbia 14:15.
Leha ho le joalo, hoa tšelisa ho tseba hore le hoja kaofela ha rōna re hlaheloa ke litsietsi, Molimo o rerile hore haufinyane moloko oa batho o tla ntšoa litsietsing. Ha nako eo e fihla, u ke ke ua hlola u hlaheloa ke tsietsi, u e bona, kapa u utloa ho thoe e hlahile kae-kae. Ho lla ka lebaka la ho sithabela, ho utloa bohloko, lefu le ho siama li tla be “li fetile.” (Tšenolo 21:4) Tšepiso e ’ngoe e thobang pelo ke ea hore ho hang batho ha ba sa tla hlola ba haha matlo ’me ba leme lijalo ebe lintho tseo li senngoa ke lintoa kapa likoluoa. Ho fapana le hoo, “ba tla sebelisa mosebetsi oa matsoho a bona ka botlalo.”—Esaia 65:21-25.
Ha u ntse u letetse hore Molimo a felise litsietsi tsohle, u ka etsa’ng hona joale e le hore li se ke tsa u ama hampe? Ntho ea pele le e ka sehloohong ke eo Bibele e u khothalletsang eona ha e re: “Tšepa Jehova ka pelo ea hao eohle ’me u se ke ua itšetleha ka kutloisiso ea hao.” (Liproverbia 3:5) E-ba le tšepo ea hore o tla u tataisa a be a u tšelise. Sebelisa bohlale bo tsoang ho Molimo bo fumanoang ka Bibeleng. Seo se tla u thusa hore u etse liqeto tse bohlale le ho u sireletsa litsietsing tsa mofuta oo tseo u ka li qobang.—Liproverbia 22:3.