Bahlanka ba Sebeletsang Bolokang Boemo bo Botle!
“Ba sebelitseng tsa bohlanka boo hantle, ba ithuetse boholo bo molemo, le bonatla bo boholo tumelong e ho Jesu Kreste.”—1 TIMOTHEA 3:13.
1. Hoba motho a khetheloe ho ba mohlanka ea sebeletsang, pakane ea hae e lokela ho ba efe, hona ba bang ka phuthehong ba lokela ho rata ho etsa eng?
BANNA bao hona joale e leng bahlanka ba sebeletsang ba ‘lekiloe pele.’ (1 Timothea 3:10) Empa ho khethoa hoa bona e ne e se phetho ka bohona. Sepheo sa bona ke ho ‘ithuela boholo bo molemo’ ka ho phetha litšoanelo tsa bona ka ‘mokhoa o motle.’ (1 Timothea 3:13) Setho se seng le se seng sa phutheho e kopaneng ea Bokreste se tla rata ho ba tšehetsa hore ba finyelle sepheo sena.
2. Litho tsa phutheho li ameha joang ke se etsoang ke bahlanka ba sebeletsang?
2 Moapostola Pauluse o ile a bontša hore litho tsohle tsa ’mele oa moea oa Kreste li rua molemo ka ho sebetsa hammoho le ho hlokomelana. (1 Ba-Korinthe 12:12-31) Ka ho tšoanang, ha bahlanka ba sebeletsang ba etsa mesebetsi ea bona eo ba e filoeng ke Molimo ka ‘mokhoa o motle,’ setho se seng le se seng sa phutheho ea kajeno ea Bokreste se rua molemo. Empa ha bahlanka ba sebeletsang ba thulana le mathata a ba sitisang ho phethahatsa litšoanelo tsa bona hantle, hona ho ka ’na hoa hlahisetsa litho tsohle tsa phutheho bothata.
3. (a) Ke mathata afe a tloaelehileng ho batho bohle ba Jehova? (b) Phuputso ea haufinyane tjee e thusa ho bontša eng?
3 Batho bohle ba Jehova ba loana ntoa e tšoanang, “ntoa ea rōna ha e loane le nama le mali, empa . . . le meea e bolotsana e sebakeng sa leholimo.” (Ba-Efese 6:12) Ho phaella moo, bahlanka bohle ba Jehova ba loana le litšekamelo tsa bona tse sa phethahalang le tsa boetsalibe. Leha ho le joalo, e le sehlopha, bahlanka ba sebeletsang ba tobane le mathata a itseng ka tsela e totobetseng ho feta lihlopha tse ling tsa Lipaki tsa Jehova. Ho thusang ho bontša sena ke phuputso ea haufinyane liphuthehong tse fetang 320 tse nang le bahlanka ba sebeletsang ba 1 360 naheng e ’ngoe e ka boroa ho Europe.
Bosooa le Lenyalo
4. Bahlanka ba sebeletsang ba sa nyalang ba lokela ho talima bosooa ba bona joang, hona ba bang ba ka ba khothatsa joang?
4 Ho bahlanka ba sebeletsang ba fupulitsoeng, e batla e le karolo e ka holimonyana ho 10 lekholong e ntseng e le masooa. Kahoo ba thabela bolokolohi boikarabelong bo itseng bo tloaelehileng ho ba karolo e ka bang 90 lekholong ea ba nyetseng. Empa baena ba masooa ba tlameha ho hlokomela hore ba se sebelise bolokolohi bona feela ho phehelleng lintho tsa botho tse kang boikhathollo le botsoalle bo feteletseng. Leha e le ho lumella takatso ea tlhaho bakeng sa lenyalo ho tla pele ho ntho leha e le efe bophelong. (Mattheu 6:33) Leha e le ho lumella khatello e tsoang ho metsoalle ea bona e nyetseng ho ba qobella ho potlakela lenyalong kapa ho kena lenyalong le seng bohlale. ’Me, ka sebele Bakreste, ba hlokomelanang ba tla hlompha boemo ba bosooa ba balumeli hammoho le bona ba sa nyalang ’me ba tla ba khothaletsa ho sebelisa monyetla oa bolokolohi ba bona bo boholo bakeng sa ho nehela nako e eketsehileng lipheong tsa puso ea Molimo, mohlomong ka ho nka tšebeletso ea nako e tletseng.
5. Ke kotsi efe e kholoanyane e teng bakeng sa bahlanka ba sebeletsang ba nyetseng ho feta ba masooa?
5 Ho latela phuputso e boletsoeng kaholimo, ba ka bang karolo ea 62 lekholong ea bahlanka ba sebeletsang ke batsoali. Ho bona, kotsi ea ‘ho imeloa’ hoa lipelo tsa bona ke “lipelaelo tsa bophelo” e kholoanyane ho feta ea baena ba masooa. (Luka 21:34-36) Ka hona, ha a khothaletsa bosooa, Pauluse o itse: “Ke rata hore le hloke pelaelo. Monna ea sa nyalang o laba-labela lintho tsa Morena, kamoo a ka amoheloang ke Morena kateng. Empa monna ea nyetseng o laba-labela lintho tsa lefatše, kamoo a ka amoheloang ke mosali oa hae kateng, ’me o arohane. . . . Ea telang bosooa ba hae ka lenyalo o etsa hantle, empa le ea sa bo teleng ka lenyalo o tla etsa hantle ho feta.”—1 Ba-Korinthe 7:32-38, NW.
6. Bahlanka ba sebeletsang ba nyetseng ho hlokahala ba etse eng, ’me ke mang ea ka khonang ho ba fa litlhahiso tse molemo?
6 Le hoja batho ba Molimo ba sa lumele hore ‘manyalo a reroa leholimong,’ baa tseba hore bohlale ba leholimo boa hlokahala bakeng sa ho rarolla mathata a lenyalo. (Pesaleme ea 19:7; Liproverbia 3:5, 6) Ka hona, bahlanka ba sebeletsang ba nyetseng ba hloka ho latela keletso ea Lentsoe la Molimo haufi-ufi kamoo ho ka khonehang. Ba tlameha ho loanela boitekanelo bo loketseng mabapi le ho phethahatsa boikarabelo ba lelapa, ’me le kamohla ba se sebelise sena e le phephi ea ho hlokomoloha litšoanelo tsa bona tsa puso ea Molimo ka phuthehong. Har’a lintho tse ling, kemiso e nahanetsoeng hantle ke ea bohlokoa. Banyalani ba hōlileng le ba nang le phihlelo e ngata ba ka ’na ba khona ho fa ba banyenyane litlhahiso tse thusang ntlheng ena ha ba kōpuoa ho etsa joalo.
7. (a) Lelapa la mohlanka ea sebeletsang ea nyetseng le ka ama boiteko le tsoelopele ea hae ea moea joang? (b) Ke hantle ha bahlanka ba sebeletsang ba rerang ho nyala ba hopola eng?
7 Tšehetso e tsoang ka lapeng ke thuso e khōlō ho mohlanka ea sebeletsang ea nyetseng. Ha e le hantle, litho tsa lelapa tse hlokang nako ea hae e ngata le tlhokomelo ea hae kapa tse batlang haholo lintho tsa nama li ka sitisa tsoelopele ea hae ea moea. Empa ke lehlohonolo ha lelapa la hae lohle le mo tšehetsa boitekong ba hae ba ho ‘sebeletsa ka mokhoa o motle.’ (1 Timothea 3:13) Ka hona ke hoa bohlokoa hakaakang hore mohlanka ea sebeletsang ea e-song ho nyale pele a nkeha ke eo a ka ’nang a mo nyala a leke ho lekanyetsa hore na o tla hle a khothaletse tsoelopele ea bona ea moea!
Ho Hiroa le Lerato la Lintho tse Bonahalang
8. (a) Ke kotsi efe eo bahlanka ba sebeletsang ba bang ba ka bang le eona mabapi le mosebetsi oa boipheliso? (b) Ke ho thuisa Mangolo afe ho ka thusang motho ho loana le lintho tse bonahalang?
8 Ba robeli ho bahlanka ba bang le ba bang ba leshome ho ba fupulitsoeng ba ka tlase ho lilemo tse 60. Ka hona mabakeng a mangata ba ntse ba sebetsa mosebetsi oa boipheliso ho iphelisa le malapa a bona. Ba ka bang bahlano ho ba bang le ba bang ba leshome ho bona ba pakeng tsa lilemo li 20 ho ea ho 40—nakong eo banna ba lefatše ka tloaelo ba hlileng ba fumanang mesebetsi kapa ba loanelang ho tsoela pele ’me e e-ba ba sireletsehileng licheleteng. Haeba u mohlanka ea sebeletsang ea lilemong tseo le kamohla u se khelle fatše kotsi ea ho haha boikutlo ba lefatše, ba lintho tse bonahalang tse ka u fokolisang moeeng. Ho e-na le hoo, hopola hore Pauluse o itse: ” ’Me ha re e-na le lijo le liaparo, a re kholoeng ke tsona.” (1 Timothea 6:8) Jesu le eena o fane ka keletso e molemo e ka re thusang kaofela ho loana le lintho tse bonahalang. Ipalle eona ho Mattheu 6:19-34.
9. Tumellanong le Mattheu 16:26, ka ho khetheha tsela e bohlale ke efe bakeng sa bahlanka ba sebeletsang ba banyenyane?
9 Ka ho khetheha Iōna bahlanka ba sebeletsang ba banyenyane, shebang banna ba “atlehileng” ba phehellang mesebetsi ea lefatše kapa ba bokellang leruo empa ba sa kenye Jehova mererong ea bona. (Bapisa Liproverbia 16:3; 19:21.) E ne e tla ba bohlale joang ho latela batho bao e seng ba Mangolo, ba sekametseng linthong tse bonahalang bao haufinyane bophelo ba bona bo tlang ho felisoa nakong ea ‘mahlomola a maholo’? (Mattheu 24:21) Ke mohlanka ofe oa Jehova ea neng a ka fapanyetsana libaka le bona? Jesu o itse: “Hobane leha motho a ka rua lefatše lohle, ha a timeletsoe ke moea oa hae, ekaba o ruile’ng ka Iōna na?” (Mattheu 16:26) Ka sebele, tsela ea bohlale ke ho haha bokamoso bo sireletsehileng le mokhatlo o hlophisitsoeng oa Jehova ho e-na le bo sa sireletsehang ho hang le ba nakoana le lefatše lena le shoang le rapaletseng matleng a Satane.—1 Johanne 5:19.
Ho Tšepahala ’Musong oa Molimo
10. Mabapi le litaba tsa lipolotiki, “bacha” ba ntseng ba eketseha ba nka boemo bofe, ho akarelletsa le bahlanka ba sebeletsang?
10 Ka boprofeta, ho itsoe ka Morena oa Messia oa Jehova: “Sechaba sa hao e tla ba se mafolo-folo ka letsatsi la ho futuha ha hao; ka bokhabane bo khethehileng, ba bacha ba hao ba ea tsoa pel’a hao joale ka phoka e tsoang popelong ea mafube.” (Pesaleme ea 110:3) Boprofeta bona bo ’nile ba phethahatsoa ho tloha ka 1914, ’me “ba bacha” ba ntseng ba eketseha ba hlokomela hore ba tlameha ho tšepahala pele ’Musong oa Molimo ka Jesu Kreste ea tlotlisitsoeng e le Morena. Ka hona ha banna bana ba inehetseng, ho akarelletsa bahlanka ba sebeletsang, ba ikokobelletsa “borena” ka tsela e lekanyelitsoeng, moo lithahasello li thulanang ka tsela leha e le efe ba ‘tlameha ho utloa Molimo ho e-na le batho.’ (Ba-Roma 13:1; Liketso 5:29) Joalokaha Jesu a boletse, balateli ba hae ‘hase ba lefatše.’ (Johanne 15:19; 18:36) Ba lula ba sa nke lehlakore litabeng tsa lipolotiki tsa lichaba, ba hlokomela hore ho etsa joalo ho ne ho ka ba etsa mahlabaphio ’Musong oa Molimo.
11. Baena ba bang mahlomoleng ka baka la ho se nke lehlakore hoa Bokreste ba ka kholiseha ka eng?
11 Ho thoe’ng haeba bahlanka ba sebeletsang kapa ba bang ba senyeheloa ke mosebetsi oa bona kapa bolokolohi ba bona ka baka la ho boloka ho se nke lehlakore hoa Bokreste? (Esaia 2:2-4; Johanne 17:16) Joale baa tseba hore baena ba bona le likhaitseli tsa bona moeeng ba tla ba tšehetsa kahohle-hohle moeeng, ’me haeba ho hlokahala, le nameng. Hona ho joalo hobane ka lerato batho ba Jehova baa hlokomelana.—Bapisa Johanne 13:34, 35; 1 Ba-Korinthe 12:24, 25.
Ho Hlokahala Phihlelo e Kholoanyane
12. ‘Ho fumana boemo bo botle’ ho ne ho tla akarelletsa eng?
12 Ho hakanngoa hore bahlanka ba sebeletsang ba ka bang karolo e le ’ngoe ho tse tharo ba fupulitsoeng ebile Lipaki tsa Jehova lilemo tse ka tlaase ho tse leshome. Ka ho hlakileng, banna bana ba amohetse thuso le tataiso ea litho tse nang le phihlelo haholoanyane tsa phutheho. Empa ‘ho fumana boemo bo botle’ ho ne ho tla akarelletsa ho tsoela pele ho ithuta ho ba bang le ho fumana phihlelo. Hape ho ne ho tla bolela ho ’na u iketsetsa lipakane tsa botho le ho ba seli ho loanela ho li finyella. Ka hona haeba ka matla u lakatsa ho sebeletsa merero e molemo u le mohlanka ea sebeletsang kapa u hahamalla tokelo eo, na u ipeetse lipakane tse itseng? Ka mohlala, ke hobane’ng ha u sa etse qeto ea ho bala Bibele eohle ka letsatsi le itseng kapa ho ba pulamaliboho ea thusang ka likhoeli tse itseng?
13. Ke keletso efe e ileng ea fuoa Timothea e neng e tla tsoela moena ea lakatsang ho ba mohlanka ea sebeletsang molemo kapa ea sebeletsang boemong boo?
13 Haeba u sa le monyenyane lilemong kapa phihlelong, u ka rua molemo ho se boletsoeng ho 1 Timothea 4:12-15. Le hoja mantsoe ao a ne a tobisitsoe ho molebeli e monyenyane Timothea, boholo ba seo Pauluse a se boletseng moo ka puo le boitšoaro se ka ruisa moena e mong le e mong ea lakatsang ho ba mohlanka ea sebeletsang molemo kapa ea seng a ntse a sebeletsa boemong boo. Moapostola o ngotse: “Ho se ke ha e-ba ea nyatsang bocha ba hao; empa e be uena u etsetsang balumeli mehlala ea lipolelo, ea metsamao, ea lerato, ea tumelo, le ea hloeko. U ineele ho bala, le ho khothatsa, le ho ruta, ke be ke fihle. Hape, u se ke ua lebala mpho e ho uena, eo u e filoeng ka boprofeta hammoho le peo ea matsoho a baholo. Hlokomela taba tseo, ’me u be ho tsona; ho tsoela pele ha hao ho ’ne ho lemohuoe ke bohle.” U hloka ho sebeletsa ho eng ka ho khetheha e le hore “ho tsoela pele ha hao ho ’ne ho lemohuoe ke bohle”? Ka thapelo nahanisisa hore na u hloka ho etsa eng, ’me joale u e etse ka thuso ea Jehova!
Ho Loana ka Katleho le Ho Nyahama
14, 15. (a) Ke khothatso efe ea Mangolo e teng bakeng sa bahlanka ba sebeletsang ba tlamehang ho loana le botsofali le ho kula? (b) Banna baa ba ka khothatsa ba bang ka phuthehong joang?
14 Bahlanka ba sebeletsang ba bangata haholo ha ba sa loana le mathata a ikhethang ho bahlankana. Ba tobane le botsofali kapa ho kula, ho ka ba nyahamisang. Empa ba ipolokang ba le matla moeeng ba ka fumana matšeliso mantsoeng ana a Pauluse a eang ho Bakreste ba tlotsitsoeng bahabo: “Ha re tepelle; empa leha motho oa rōna oa kantle a ntse a senyeha, motho oa kahare, eena, o ntse a nchafala ka letsatsi le letsatsi. Hobane hlomoho e chatsi ea rōna, ea motsotso ona, e ntse e re sebelletsa letlotlo la khanya le tlōlisang, le sa feleng; ha re fela re sa talime tse bonahalang, re mpa re talima tse sa bonahaleng; hobane tse bonahalang ke tsa mehla ena feela; empa tse sa bonahaleng ha li ka ke tsa e-ba le bofelo.” (2 Ba-Korinthe 4:16-18) Bahlanka ba Jehova ba nang le tšepo ea lefatšeng le bona ba na le litebello tse khothatsang haholo—bophelo bo sa feleng lefatšeng la paradeise.—Luka 23:43; Johanne 17:3.
15 Ka hona bahlanka ba sebeletsang ba sa khoneng ho etsa ka hohle joaloka ba bang ka lebaka la ho kula kapa botsofali, ba na le lebaka le letle la ho boloka boikutlo ba thabo le bo molemo. Hona ho bontša kananelo bakeng sa ’nete le tumelo e tebileng linthong tse sa feleng. Moea o motle joalo, hammoho le tšebeletso ea boikokobetso, e tla ba oa molemo o moholo le khothatso ho bohle ka phuthehong.
16. Ke hobane’ng ha mohlanka ea sebeletsang a sa lokela ho nyahama haeba a sa khetheloe ho ba moholo?
16 Haeba u mohlanka ea sebeletsang, tsoela pele ‘ho hahamalla mosebetsi oa bolebeli’ ka ho ntlafatsa matla a hao a ho ruta le litšoaneleho tsa moea. (1 Timothea 3:1) Empa u se ke ua nyamaha haeba u sa khetheloe ho ba moholo kapele. Hopola hore u le mohlanka ea sebeletsang ea hlokomelang litšoanelo tsa hao ka ‘mokhoa o motle’ u sebeletsa merero e molemo le hore u thuso ea sebele ea phutheho. Ke tokelo e khōlō ho sebeletsa ka tsela leha e le efe ka hare ho mokhatlo o hlophisitsoeng oa Jehova le ho thusa balumeli hammoho le uena ho phethahatsa thomo ea ho bolela ka ’Muso.—Mattheu 24:14; 28:19, 20.
Kamoo ba Bang Ba Ka Thusang
17. Mohlanka ea sebeletsang a ka thusoa ke mosali oa hae le bana ba hae joang?
17 Ba hlokomela merero e molemo e etsoang ke bahlanka ba sebeletsang, batho ba Jehova kaofela ba lokela ho rata ho tšehetsa boiteko ba bona. Ka mohlala, ho tla nolofaletsa monna ea joalo ho tsoela pele a ‘sebeletsa ka mokhoa o motle’ haeba mosali oa hae le bana ba hae ba khotsofetse ke seo ba se hlokang bophelong ’me ba sa hloke lintho tse ngata tsa mabotho-botho tse tla mo hloka hore a senye nako e ngata haholo mosebetsing oa boipheliso.—1 Timothea 6:6-8.
18. (a) Baholo ba ka thusa bahlanka ba sebeletsang joang? (b) Ke hobane’ng ha puisano e ntle pakeng tsa baholo le bahlanka ba sebeletsang e le ea bohlokoa?
18 Baholo ba ka thusa bahlanka ba sebeletsang ka ho ba fa tataiso le keletso leha e le efe e hlokahalang. ’Me ha ba ntlafalitse, ba lokela ho babatsoa ka ho tiileng. Har’a lintho tse ling, baholo ba ka tsamaea le bahlanka ba sebeletsang tšebeletsong ea tšimo, ba ba thusa ho lokisetsa lipuo, le ho arolelana le bona letlotlo la bona la phihlelo ea Bokreste. Ho banahala thahasello le puisano tse joalo ka linako tse ling li hlokomolohiloe. Ka mohlala, ha a botsoa ka tlaleho ea tšebeletso ea hae ea tšimo e tlaase, mohlanka e mong ea sebeletsang o ile a bolella molebeli oa potoloho hore: “Ke hobane’ng ha u botsa? O bile tlaase ka lilemo, empa u-ua pele ea buang ka oona.” Baholo ba eletsang bahlanka ba sebeletsang ka mokhoa o hahang le o lerato ’me ka mamello ba ba thusa ka mathata a bona hangata ba thabela ho bona liphello tse totobetseng.
19. Setho se seng le se seng sa phutheho se ka thusa bahlanka ba sebeletsang ho boloka boemo ba bona bo le botle joang?
19 Ha e le hantle, setho se seng le se seng sa phutheho se ka thusa bahlanka ba sebeletsang ho boloka boemo ba bona bo botle. Joang? Ka ho kopanela le bona le ho ba bontša kananelo e tlohang botebong ba pelo mosebetsing oa bona. Joalokaha likarolo tsohle tsa ’mele oa motho ka tloaelo li sebetsa hammoho ho boloka bophelo bo botle, ho joalo le ka litho tsohle tsa phutheho li tlameha ho sebelisana ho tiisa bophelo ba eona bo botle ba moea. (Bapisa 1 Ba-Korinthe 12:24, 25.) Ho tla fihlela moo, ho entsoe ho hoholo ke bahlanka ba sebeletsang ba sebetsang ka thata ba sebeletsang merero e molemo le ho boloka boemo bo botle. E se eka, bahlanka ba sebeletsang le bohle ba tšepahalang ba Lipaki tsa Jehova, ba ka lebella bokamoso ba thabo e sa feleng ’me ba tsoele pele bonngoeng ho thabisa pelo ea “Molimo o thabileng.”—1 Timothea 1:11, NW; Liproverbia 27:11.
Ka Kōpo, Hlalosa
◻ Ke mathata afe a ka ’nang a tobana le bahlanka ba sebeletsang?
◻ Basali le bana ba bahlanka ba sebeletsang ba ka ba thusa joang?
◻ Baholo ba ka etsa eng ho thusa bahlanka ba sebeletsang?
◻ Setho se seng le se seng sa phutheho se ka etsa eng ho thusa bahlanka ba sebeletsang?
[Setšoantšo se leqepheng la 20]
Bahlanka ba sebeletsang ba tlameha ho jara boikarabelo ba bona ka botšepehi mosebetsing oa ho etsa barutuoa le kahare ho phutheho
[Setšoantšo se leqepheng la 23]
Bahlanka ba sebeletsang ba hōlileng ba ka etsa ho hoholo ho thusa le ho khothatsa phutheho