Baromuoa ba Bacha ba Phehella Katleho ea Sebele
SONTAHA sa la 8 Loetse, 1985, ebile letsatsi la bohlokoa ho letšoele la ba 4 351 ba neng ba bokane Holong e ntle haholo ea Kopano ea Lipaki tsa Jehova Jersey City ho tla bona letsatsi la baromuoa ba Sekolo sa Gileade sa Bibele sa Watchtower sehlopheng sa bo79.
Letsatsi e bile le khethehileng kaha ho ne ho sebelisoa Holo ea Kopano ka letsatsi la pele kamor’a ho khakoloa ha eona ka molao. Hape e bile letsatsi la pele ho tloha ka 1970 hore lelapa lohle la Bethele le United States le be tlas’a marulelo a tšoanang. Lelapa lena, ho akarelletsa le basebetsi ba Brooklyn le mapolasing a Mokhatlo, le se le na le litho tse fetang 3 500. Ha e le mona Holo ea Kopano e qetiloe Jersey City, ho na le sebaka se ka lekanang bohle.
Letsatsi e bile le khethehileng haholo bakeng sa bahlanka ba 24 ba bacha ba Jehova ho tsoa linaheng tse leshome tse sa tšoaneng tsa lefatše sehlopheng sa bo79. Ka likhoeli tse hlano tse fetileng sehlopha se ne se ithuta Bibele ka ho tebileng le ho itokisetsa boromuoa. Joale, ka mantsoe a Albert Schroeder, molula-setulo tsatsing leo, sehlopha se ne se khaolitse ho ba liithuti tsa Gileade empa se ne se fetohile baromuoa ba Gileade.
Holong ea Kopano e mabotho-botho e pholileng baromuoa bana ba bacha ba 24 ba ile ba lakaletsoa tsela-tšoeu ’me ba ne ba tla hopola ketsahalo eo ka nako e telele. Molula-setulo a ba hopotsa hore Gileade ba ithutile lintlha tse ngata. Empa Gileade e ile ea hatella haholo ntho e bohlokoa haholo: boemo ba moea. Joale molula-setulo a kenyelletsa libui tse neng li tla fana ka mantsoe a phethang ho baromuoa ba amohetseng mangolo.
Carey Barber, setho sa Sehlopha se Busang, a bua ka ho batla thabo. A ba hopotsa hore Salomone o lemohile hore menyaka ea lefatše lena ha e tlise thabo. (Moeklesia 2:1-11, 17) Ka baka leo Jesu a buella haholo tlhoko ea lintho tsa moea bakeng sa thabo. (Mattheu 5:3) Baromuoa ba lokela ho mamela keletso ea Jesu. Esita le haeba ho ba moromuoa ho bolela ho tela mabotho-botho a bophelo, ba tla atleha.
Sebui se latelang, John Booth, setho sa Sehlopha se Busang, a hopotsa bamameli hore moromuoa e moholo Pauluse o ile a khothatsa moromuoa e mocha Timothea ho tsoela pele a bontša khōlo boitšoarong ba Bokreste, thutong ea botho, le thapelong. (1 Timothea 2:1, 8; 4:12-16) Baromuoa ba bacha ba tlameha ho bontša khōlo e tšoanang haeba ba lakatsa ho atleha. Lyman Swingle, mongoli le motšoara-matlotlo oa Mokhatlo, a bolela hore morao tjena o sa tsoa botsa baromuoa Brazil hore ke keletso efe eo ba ka ratang ho e neha baromuoa ba bacha ho ba thusa ho atleha. Ba re, “Ba bolelle hore ha ba fihla likabelong tsa bona, ba se khaotse ho bala Bibele le ho etsa lipatlisiso tsa Bibele.”
David Olson, setho sa Komiti ea Tšebeletso, a ba bolella ka phihlelo ea monna ea neng a okametse karolo ea lenaneo le ileng la atleha ho bea motho holim’a khoeli. Hamorao, monna eo o amohela moputso oa hae ka hore a fiele libaka tseo ho emisang likoloi ho tsona. O ile a ikutloa a atlehile haholo mosebetsing oa hae oa bobeli. Lebaka? Kahobane mosebetsi oa hae o mocha o ile oa mo nea nako ea ho sebeletsa Jehova le ho hlokomela lelapa la hae. Ka sebele, ba ithabelang ho Jehova, le molao oa hae, le tšebeletsong ea hae ba fumana katleho ea sebele.—Pesaleme ea 1:1-3.
Ulysses Glass, ea ngolisang liithuti tsa Gileade, a leboha bokhothali le hlompho ea baromuoa ba amohetseng mangolo. A bolela kamoo ba neng ba khahlehela kateng lithuto tsa bona le ho thahasella ha bona ho fumana kutloisiso e feletseng. A bolela hore lintho tse joalo li tla ba thusa likabelong tsa bona. Morupeli oa Gilead Jack Redford a eketsa ka hore selemo sa pele likabelong tsa bona e tla ba phephetso. Leha ho le joalo, haeba ba lakatsa ho atleha ba tlameha ho tšoarisana le baromuoa ba bang, ba mamelle, ba hlaolele thabo ea moea.—Moeklesia 7:8, 9.
Sebui se lihelang likhala, Mookameli oa Mokhatlo oa Watchtower Frederick Franz a kenyelletsa puo ea hae ka mantsoe ana: “Ebile ho hotle ho phela lilemo tse 92 le ho ba teng ketsahalong ena!” Eaba o phetela baromuoa histori ea Gileade le ho ba khothalletsa ho tšepahala likabelong tsa bona.
Kamor’a lipuo, liithuti tsa amohela mangolo a tsona, ’me ha e-ba le khefu ea ho fumana lino-mapholi. Ba fana ka litlhaloso thutong ea Molula-Qhooa ea bekeng eo e neng e tsamaisoa ke Dean Songer oa Komiti ea Feketheri. ’Me bohle ba thabela liphihlelo, ’mino, le liketsahalo tse thabisang tseo ba bileng le tsona Gileade le boikemisetso ba bona ba ho batla “lintho tsa bohlokoa ka ho fetisa.” (Ba-Filippi 1:10) Qetellong, baromuoa ba etsa tšoantšiso e nakong: Batlang ho Lōka ha Molimo Bakeng sa Pholoho.
Letsatsi leo la bohlokoa la fihla qetellong ea lona. Ke letsatsi le tla hopoloa ka nako e telele ke liithuti ha li sebelisa keletso eo li e utloileng ’me Ii phehella ho fumana katleho ea sebele likabelong tsa tsona tsa boromuoa.