Ho Bea ‘Letsoho la ka Mohomeng ’me ke sa Hetle’
HA KE palama sefofane ke ea lehaeng la ka le lecha Bolivia, mantsoe ao ’mé a neng a ’ngoletse oona lengolong la hae la ho qetela a ’na a luma kelellong ea ka. “Ha ho motho eo hoba a bee letsoho la hae mohomeng, ’me a hetla, a tšoanelehang bakeng sa ’muso oa Molimo.” (Luka 9:62, King James Version) Ke ne ke ikemiselitse ho sebelisa mantsoe ana.
Le hoja mosebetsi oa boromuoa e ne e tla ba phihlelo e ncha, ke ne ke se ke ile ka thabela tšebeletso ea nako e tletseng ka lilemo tse ka bang hlano. Ke ithutile ’nete ho batsoali ba ka, ba qalileng ho ithuta morao koana ka 1923 le Liithuti tsa Bibele, kaha Lipaki tsa Jehova li ne li bitsoa joalo ka nako eo. Le hoja ke ne ke le lilemo li ’nè feela ka nako eo, ke ile ka batla ho utloisisa libuka tsa Mokhatlo oa Watch Tower. Leha ho le joalo, ka lilemo tse ngata lelapa leso le ne le etsa ho honyenyane ka ’nete. Ba bang ba baahelani ba rōna bao e neng e le Liithuti tsa Bibele ba ne ba tšoha ba re etetse. Hape ke hopola kamoo Ntate a neng a ee a etele baahelani e le hore a ka mamela lipuo tsa Moahloli Leha ho le joalo, ha e-ea ba ho fihlela ka 1938, moo lipeo tsa ’nete li qalileng ho bea litholoana. ’Mè, eo joale a neng a hlaliloe a ba a nyaloa—o ile a qala ho amohela le ho bala ka matla libuka tse tsoang ho Lipaki tsa Jehova. Ke ile ka hlolloa haholo-holo ha ke ithuta hore “bongata bo boholo” bo ne bo tla pholoha timetso ea tsamaiso ena ea lintho ea hona joale ’me bo phele ka ho sa feleng lefatšeng. (Tšenolo 7:9-14) Boitsebiso bona bo ne bo tlameha ho arolelanoa le ba bang!
Kahoo, kamor’a hore ke kolobetsoe ka Phupjane 1939, ka qala ho nahana ka ho ba mosebeletsi oa nako e tletseng, kapa pula- maliboho. Hoba ke fallele Colorado, ke ile ka tloaelana le Helen Nichols le ’mè oa hae—bokhaitseli ba babeli ba batlotsuoa bao e neng e le bo-pula-maliboho ba kamehla. Liphihlelo tse babatsehang tseo ba mphetetseng tsona tsa tsoela pele ho nkhothaletsa hore ke sebeletse ke le pula-maliboho. Kahoo, ka Motšeanong 1940 ka amohela kabelo ea ka ea pele ea bopula-maliboho Salida, Colorado.
Koetliso ea Gileade le Kabelo Linaheng Lisele
Kamor’a lilemo tse seng kae ke bula maliboho likarolong tse fapaneng tsa Colorado le Indiana, ke ile ka memeloa ho ea sehlopheng sa boraro sa Gileade. Sena e ne e le sekolo se hlophisitsoeng ke Mokhatlo oa Watchtower bakeng sa ho koetlisa baromuoa. Ka likhoeli tse babatsehang tse hlano ke ile ka thabela mahlohonolo a Sekolo sa Gileade, empa hoba ke fete ha kea ka ka fumana kabelo ea ho ea linaheng lisele hang-hang. Ntoa ea II ea Lefatše e ne e ntse e loana! Kahoo ke ile ka romeloa ho ea sebetsa le likhaitseli tse ling tse supileng West Haven, Connecticut, ka nakoana. Ka 1945 ka abeloa ho sebetsa Washington, D.C. Leha ho le joalo, tsela ea hlekeha kapele ea ho leba kabelong ea ka linaheng lisele: La Paz, Bolivia.
Pele ke amohela kabelo ea ka, ke ne ke e-s’o utloe le ka Bolivia! Hase feela menahano e tšoenyang maikutlo e ileng ea phalla kelellong ea ka ha re palama sefofane: Ke tla khona joang ke le moromuoa? Na ke tla khona ho tšoarella? Ho hopola keletso ea ’m’e ea ho ‘bea letsoho la ka mohomeng ’me ke sa hetle’ hoa matlafatsa qeto ea ka ea ho atlehisa mosebetsi oa ka oa boromuoa. Hape, ke ne nke ke ka ba mong naheng ena e ncha. Ke ne ke e-na le ngoan’eso le monna oa hae ba fetileng sehlopheng sa bone sa Gileade. Ka la 9 Phupjane, 1946, sefofane sa rona sa lula La Paz.
Har’a Borabele ba ho Liha ’Muso
Hona letsatsing leo ke fihlileng ka lona, motho e mong a leka ho qala borabele ba ho liha ’muso ka ho lihela bomo Ntlong ea Borena ea ’Muso. Bomo e ile ea nyopa joaloka borabele boo. Empa kamor’a nako e ka tlaase ho likhoeli tse peli, borabele bo bong ba boela ba qhoma, ’me ba bangata ba e-shoa ’me ba bang ba tsoa likotsi. Mopresitente oa naha, hammoho le ba bang ba matona a hae, ba fanyehoa palong ea motlakase lebaleng le leholo la motse. Ke ile ka amoheloa ke tse joalo Bolivia.
Leha ho le joalo, kamor’a tšollo eo ea mali e tšabehang, re ile ra khona ‘ho tšelisa ba llang,’ ’me ba bangata ba Babolivia ba ikokobelitseng ba ne ba rata ho ithuta Bibele le rōna. (Esaia 61:1, 2) Matsatsing ao, re ne re atisa ho pakela batho ka lipolelo tse hatisitsoeng lirekotong. Hona ho ne ho bolela ho nka karalefomo le mokotlana oa libuka re leba holimo le tlaase maralleng a phahameng a La Paz a bophahamo bo bupetsang ba limithara tse 3 660 (12 000 ft). Ka lebaka la ho se tsebe Sepanishe hantle, batho ba bang ba ne ba nahana hore ke rekisa karalefomo le likeroto!
Ke thabetse liphihlelo tse ngata ke le moromuoa e mocha. Ka letsatsi le leng, ha ke ntse ke ea ka ntlo le ntlo ho e ’ngoe ea likarolo tse ntle tsa La Paz, motho ea sebetsang a hlaha monyako ’me a re ke kene. Mong’a ntlo oa mosali a mamela nehelano ea ka ’me a etsa peeletso ea Molula-Qhooa, Ke hobane’ng ha a ne a arabela habonolo joalo? O ne a sa tsoa buuoa, ’me ha a ntse a le motebong oa booki, o ne a ile a bala Bibele. A fumana hore lithuto tsa Bibele li fapane haholo le tseo kereke ea hae e neng e li ruta, kahoo o ne a thahasella ka matla ho bala libuka tseo ke mo sietseng tsona. Leha ho le joalo, le pele nka khutlela ho eena, a tla mpatla, qetellong a mphumana koung ea seterata ke ntse ke fana ka limakasine tsa Molula-Qhooa le Tsoha! ho ba fetang ka tsela. A mphehella, ‘Ke kōpa u tl’o mpona!’ A tsoela pele ka potlako le thuto ea hae ea Bibele ’me kamor’a nakoana a kolobetsoa. Hona joale, lilemo tse 30 hamorao, e ntse e le mohlanka ea tšepahalang oa Jehova.
Popi e Litšila
Kamor’a ho sebetsa lilemo tse 11 La Paz, re ile ra abeloa karolo e ka boroa ea Bolivia. Kahoo, ’na le ngoan’eso le monna oa hae le motsoalle oa ka Esther Erickson, ra leba motsaneng o bitsoang Tupiza. E ne e le ka Tlhakubele 1957. Tupiza e pel’a seporo pakeng tsa Bolivia le Argentina. Batho ba ne ba e-na le botsoalle, ’me ho ne ho le bonolo ho qalisa lithuto tsa Bibele. Ha e le hantle, re hlile ra hlophisa liboka tsa kamehla, tseo ba ’maloa ba tsoang Tupiza ba neng ba e-ba teng ho tsona.
Ka letsatsi le leng, ra fumana popi e litšila ka pel’a serapa sa rōna. Hoo ho ne ho bolela eng? Ho bonahala moprista a ne a se a qalile ho lemosa batho ka Lipaki tsa Jehova, kahoo motho e mong o ne a leka ho re “betsa” kapa ho re etsetsa hechizo! Leha ho le joalo, hechizo ea bona ea ipaka e se na matla.
Kaha Tupiza e ne e le motsana, ’na le Esther ra boetse ra abeloa Villazón, motsana o mong o moeling oa Bolivia le Argentina. Sebaka sena se ne se letsoatlare, se le lerōle, se le batang! Empa ha rea ka ra nyahamisoa, kaha re ne re tšepile ho amohela tlhohonolofatso ea Jehova.
Ha ’na le Esther re qala ho sebetsa motsaneng ona, re ile ra hlokomela hore batho ba ne ba e-na le likarete lifenstereng tsa bona tse reng: “Lipaki tsa Jehova le Baevangeli ha ba Amoheloe.” Empa batho ba Villazón ba ne ba sa tsebe ho hang hore na Lipaki tsa Jehova ke bo-mang! Joaloka Tupiza, moprista o ne a kenelletse, a fana ka likarete tsena kerekeng hore batho ba tle ba li bee lifenstereng tsa bona. Ho sa tsotellehe likarete tse lifenstereng, batho ba arabela hantle, ’me ra tsamaisa libuka tse ngata ’me ra qalisa lithuto tsa Bibele tse ngata. Hanyane ka hanyane likarete tsa nyamela lifenstereng.
Leha ho le joalo, re ne re ka tšoarela liboka hokae? Ra fetola kamore e ’ngoe e nyenyane ea ntlo ea rōna Holo ea ’Muso. Bakeng sa litulo re ne re bea mapolanka holim’a mabokose a libuka. Ho ne ho se baena ba kolobelitsoeng, kahoo ’na le Esther re ne re roala hloohong ’me re tsamaisa liboka ka borōna. Ho thabeng hoa rōna, Sehopotsong sa pele sa lefu la Kreste se neng se tšoaretsoe moo, re bile le ba fetang lekholo! Ke ’nete, ba bang ba ne ba tlile ka lebaka la bohelehele ho tla bona kamoo gringas (banana basele) ba tšoarang liboka tsa bona. Empa ba bang ba bao pele ba neng ba tlile ka lebaka la bohelehele ke Lipaki hona joale.
Re ile ra boetse ra sebetsa motsana oa La Quiaca, Argentina, moo re ileng ra khona ho qala lithuto tsa Bibele tse ’maloa le batho ba thahasellang. Ka lebaka la ho tšela moeli hoa rōna haholo, ra hapa tlhokomelo ea lepolesa le leng la moeling. Ka letsatsi le leng, ha re khutla La Quiaca, lepolesa la re kōpa hore re se ke ra etsa mosebetsi oa rōna phatlalatsa joalo, kaha mosebetsi oa Lipaki tsa Jehova o thibetsoe Argentina. Ka re ho eena, “Ke utloile hore ’muso oa lōna o fane ka bolokolohi ba borapeli.” Karabelo ea hae ebile hore baprista ba ne ba hatelletse matona a ’musong, ho felletseng ka thibelo. Leha ho le joalo, kamorao ho moo, o ne a furalla nako le nako ha re tšela moeli re ea Argentina!
Re ile ra sebetsa Villazón ka lilemo tse ’nè. Motsoalle oa ka a ithuta le monna eo mosali oa hae e leng mong’a chicheria, bara e rekisang joala ba mabele. Monna enoa o ile a ithuta ’nete ’me hamorao o ile a kolobetsoa, qetellong a sebeletsa e le moholo ho fihlela a e-shoa. Chicheria? Hona joale ke Holo ea ’Muso! Ha re tloha Villazón, ho ne ho e-na le phutheho ea bahoeletsi ba 20. Hona joale ho na le Lipaki tse ka bang 60, ka ba ka bang 110 ba bang teng libokeng mafelong a beke.
‘Ho se Hetle’ le Kamohla
Kamor’a Villazón ra abeloa Santa Cruz, motse o karolong e ka bochabela ho Bolivia. E bile thabo e kaakang ho bona mosebetsi o hōla ho tloha phuthehong ea bahoeletsi ba 20 ho ea ho liphutheho tse robong tse hōlang. Joale, ka 1965, ka khutlela ho ea phela La Paz ho le leng la mahae a boromuoa, moo e sa leng ke e-ba teng ho tloha ka nako eo.
Ka Tlhakubele 1978 lerako la ntlo ea makote la oa ’me la nkoela holimo ha ke theoha beseng ea motse. Leoto la ka le letona le ne le robehile hampe hoo ke ileng ka tlameha ho ithuta ho tsamaea hape. Empa hona joale ke khona ho tsoela tšebeletsong le ho khanna lithuto tsa Bibele.
Che, hase kamehla tšebeletso ea nako e tletseng e neng e le bonolo. Ho ’nile hoa e-ba le mathata, masisa-pelo le masoabi. Empa thabo ea ho fumana batho ba kang linku le ho ba thusa ho sebeletsa Jehova ho koala sekheo sa masoabi leha e le afe. Hona joale, kamor’a lilemo tse ka bang 44 tsa tšebeletso ea nako e tletseng, ke ikemiselitse ho feta leha e le neng pele ho boloka ‘letsoho la ka mohomeng’ ’me ke kenye letsoho mosebetsing o sa ntsaneng o tla etsoa.—Joalokaha ho boletse Betty Jackson.
[Setšoantšo se leqepheng la 28]
Betty Jackson a bolela litaba tse molemo Bolivia