Jehova—Molimo oa Nako le Linako Tse Khethiloeng
“Bakeng sa ntho e ’ngoe le e ’ngoe ho na le nako e khethiloeng.”—MOEKLESIA 3:1, NW.
1, 2. (a) Ke ka litsela life batho ba leng hlokolosi ka nako? (b) Ho ne ho ka etsahala eng ka bophelo bo bongata kajeno haeba re ne re se na tsela ea ho tseba nako?
BOPHELONG ba letsatsi ka leng, re hlokolosi haholo ka nako. Ka mohlala, ha sesupa-nako se bontša hore ke mantsiboea ’me re bona letsatsi le likela ’me shoalane e tšoara, rea tseba hore nako ea bosiu e atametse. Hape, likarolong tse itseng tsa lefatše, ha k’halentara e bontša hore lehoetla le ea ho feleng ’me re bona mocheso o theoha beke e ’ngoe le e ’ngoe ’me mahlaku a lifate a foforeha, rea tiisa hore mariha a haufi. Ka hona bopaki ba hore na ke nako efe kapa hore na ke linako life tse khethiloeng bo tiisa seo lisupa-nako le lik’halentara li re bolellang sona.
2 Ho hlōleha ho tseba nako le linako tse khethiloeng ho ne ho tla ferekanya bophelo ho se hokae kajeno. Ka mohlala, nahana ka lifofane tse makholo-kholo tse lekang ho lula lebaleng la lifofane le phetheselang haeba ho ne ho se tsela ea ho bolela nako e le hore li ka etsetsoa kemiso! Kapa nahana ka batho ba limillione ba lekang ho kena mosebetsing ka nako empa ba se na tsela ea ho tseba hore na ke nako efe!
3. Ke mang ea qapileng nako le linako tse khethiloeng?
3 Ke mang ea qapileng nako le linako tse khethiloeng? Ke ’Mōpi oa bokahohle, Jehova Molimo. Genese 1:14 e re: “Eaba Molimo o re: Maseli ha a be teng sebakeng sa maholimo, ho arohanya motšehare ho bosiu, e be lipontšo tsa linako tse beiloeng, le tsa matsatsi, le tsa lilemo.”
Nako ea Bohlokoahali le Linako tse Khethiloeng
4-6. (a) Hoa bohlokoahali ke hofe ho feta ho tseba nako kapa linako tse khethiloeng bakeng sa mesebetsi ea batho? Hobane’ng? (b) Re lokela ho botsa lipotso life?
4 Le hoja ho tseba nako kapa linako tse khethiloeng e le hoa bohlokoa mesebetsing ea batho, ho na le ntho e ’ngoe ea bohlokoahali: Ke nako efe kapa ke nako efe e khethiloeng ponong ea Molimo? Moeklesia 3:1 (NW) e re: “Bakeng sa ntho e ’ngoe le e ’ngoe ho na le nako e khethiloeng, le nako bakeng sa tsohle tse etsoang tlas’a maholimo.” Kaha hona ke ’nete ponong ea motho, ke ’nete haholoanyane ponong ea Molimo. O na le nako e beiloeng le linako tse khethiloeng bakeng sa ho phetha morero oa oona. Haeba re sa lumellanye bophelo ba rōna le ’nete ena, joale litokisetso tsohle tsa bophelo ba rōna tsa ho lumellana le lisupa-nako kapa lik’halentara qetellong li tla ipaka li se na thuso.
5 Ke hobane’ng ha ho le joalo? Hobane Jehova o na le morero ka lefatše lena le ka libopuoa tsa batho tse ho lona; ho seng joalo a ka be a sa li bōpa. Haeba re sa lumellanye bophelo ba rōna le morero oo, re ke ke ra kopanyelletsoa ho oona. ’Me morero oa hae o tla hle o phethoe hantle ka nako. O-oa bolela: “Ho lutse joalo le lentsoe la ka le tsoang molomong oa ka: le ke ke la khutlela ho ’na le le feela, empa le tla sebetsa se ratoang ke ’na, le phethe seo ke le rometseng sona.”—Esaia 55:11.
6 Kahoo re hloka ho botsa: Nako ke mang kapa nako e khethiloeng ke efe ponong ea Jehova? Lichaba le batho ba lefatše lee ba kenella joang kemisong ea hae ea nako? Ha e le hantle, uena u kenella joang? Na u rerile bophelo ba hao tumellanong le morero oa Molimo le kemiso ea oona ea nako?
Na Lefatše Lee Le Phethahatsa Morero oa Molimo?
7. Boholo ba batho ba bolumeli bo na le pono efe, empa ke hobane’ng ha e se ea bohlokoa?
7 Batho ba bangata ba ikutloa hore baa akarelletsoa morerong oa Molimo kahobane ba bolela hore ba lumela ho Molimo. Empa, ha u ba kōpa hore ba u bontše ka Lentsoe la Molimo hore na morero oo ke ofe, ba sitoa ho etsa joalo. Ba ea ka tsela ea bona, ’me ho ntse ho le joalo ba ikutloa hore Molimo o tla ba hauhela ka tsela e ’ngoe. Boholo ba babusi ba lefatše bo ’nile ba ba le boikutlo bo tšoanang ho theosa le makholo a lilemo. Ba ’nile ba ikutloa hore Molimo o phethahatsa morero oa oona ka bona, ho sa tsotellehe liketso tsa bona. Empa le bona ba sitoa ho bolela hore na morero oo ke ofe.
8. Ke hobane’ng ha ho sa utloahale ho nahana hore ’Mōpi o ne a ka tsehetsa babusi le batho ba lefatše lee?
8 Na Bibele e bontša hore Molimo o tšehetsa lefatše lee, ho akarelletsa babusi le batho ba nang le bolumeli? Nahana sena: Matla a Molimo ke a tšabehang. O bōpile bokahohle, bo akarelletsang melala e libillione ea linaleli, ’me molala o le mong o e-na le libillione tse ngata tsa linaleli. (Pesaleme ea 147:4) Ho phaella moo, Molimo o na le bohlale bo sa feleng. Haeba Molimo, ka matla a oona le bohlale ba oona, o ne o tšehetsa lichaba, na li ka be li utloa pefo, ntoa, leeme, le mahlomola tse kaale ka lilemo tse makholo a mangata hakaale? Na Molimo o ne o tla tataisa baeta-pele ba lichaba le limillione tsa batho ba bona ho ea ntoeng le ho ea bolaea baeta-pele ba bang ba lichaba le limillione tsa batho ba bona bao le bona ba ipolelang hore ba tataisoa ke Molimo? Na hoo hoa utloahala?
9. Lentsoe la Molimo le re boemo ba moea ba bahlanka ba oona ba ’nete e tlameha ho ba bofe?
9 Ho Bakorinthe ba Pele 14:33 Bibele e re bolella hore “Molimo hase Molimo oa moferefere, empa e le oa khotso.” Ho feta moo, Jehova o bolella bao kannete e leng batho ba hae “Le ke le bolele bohle taba e le ’ngoe; likhaohano li se ke tsa e-ba teng har’a lōna, le mpe le phethehe boikutlong bo le bong le khopolong e le ’ngoe.” (1 Bakorinthe 1:10) Joale ho thoe’ng haeba ho e-na le ba bang har’a batho ba Molimo ba sa lumellaneng le molao oo? Baroma 16:17 e-ea eletsa: “Le iponele ho ba hlahisang likhaohano le likhopiso ka ho senya thuto eo le ithutileng eona, ’me le ba sesefe.” Kahoo likarohano tsa bochaba le tsa bolumeli le likhohlano, ke bopaki bo hlakileng ba hore Molimo ha o tšehetse lichaba tse joalo, baeta-pele ba bolumeli ba joalo le balateli ba bona ba joalo.
10, 11. Mangolo a bontša hore ke mang ea tsehetsang babusi le batho ba lefatše lee?
10 Joale, ha e le hantle ba tsehetsoa ke mang? Johanne oa Pele khaolo ea 3, litemana 10 ho ea ho 12 li re: “Ke hona moo ho bonahalang bao e leng bana ba Molimo le bao e leng bana ba Diabolose: e mong le e mong ea sa etseng ho lokileng hase oa Molimo, leha e le ea sa rateng ngoan’abo. Hobane taba eo le e utloileng, e sa le ho qaleng, ke hore re ratane, ’me re se ke ra ba joale ka Kaine, e neng e le oa e mobe, ’me a bolaile ngoan’abo.” Hape, Johanne oa Pele khaolo ea 4, temana ea 20, e re: “E mong ha a re: Ke rata Molimo, ’me a hloea ngoan’abo, o leshano; hobane ea sa rateng ngoan’abo eo a ’monang, a ka tseba joang ho rata Molimo oo a sa o boneng?” Ke ka hona Jesu a ileng a bea molao ona ho Johanne 13:35: “Seo bohle ba tla tseba hobane le barutuoa ba ka ka sona, ke ha le ratana.”
11 Na u bona setšoano leha e le sefe pakeng tsa lerato le bonngoe tse tlamehang ho ba teng har’a bahlanka ba ’nete ba Molimo le tsela eo baeta-pele ba lefatše le batho ka kakaretso ba e latetseng ka makholo a lilemo? Lekholong la rōna la lilemo feela polao ea batho ba bolumeli ba bolaoa ke batho ba bang ba bolumeli e nkile bophelo ba ba limillione tse baloang ka mashome. Hangata bao ba bolaeanang ke ba bolumeli bo le bong! Hona ke bopaki bo tiileng ba hore Molimo ha o ba tšehetse. Ho e-na le hoo, joalokaha Lentsoe la Molimo le bontša, motsehetsi oa bona ke Satane Diabolose ’me ha ho e mong. Ke ka lebaka leo moapostola Johanne a neng a ka re: “Rea tseba hoba re tsoetsoe ke Molimo, le hoba lefatše lohle le rapaletse ka tlaase ho e mobe.” (1 Johanne 5:19) E, Satane ke “molimo oa lefatše lena.” (2 Bakorinthe 4:4) Ke matla a susumetsang baetapele le batho ba lefatše lena bao liketso tsa bona li bontšang hore batho bana ba ke ke ba tsoa ho Molimo.
Morero oa Molimo Bakeng sa Ba Bonolo
12, 13. Morero oa Molimo ke ofe bakeng sa lefatse lee le bakeng sa batho?
12 Leha ho le joalo, ha Jehova a bōpa batho, o ne a rerile hore lefatše lohle le tla fetoha paradeise e kang tšimo ea Edene, le tlatsitsoe ka batho ba phethahetseng, ba kopaneng le ba thabileng. (Genese 1:26-28; 2:15; Esaia 45:18) Morero oo ha oa ka oa hlakoloa ke batho ba marabele le libopuoa tse khopo tsa moea. Hape, kaha Jehova ke Molimo oa linako le linako tse khethiloeng, morero oa hae o tla phethoa ka nako e khethiloeng eo a e behetseng hona. A ke ke a lumella hore puso ea batho e itokolotseng ho eena e tsoele pele ho loantsana le morero oa hae ho feta nako eo e e baletsoeng.
13 Jesu o ne a e-na le tsepo e feletseng morerong oa Jehova bakeng sa lefatše lena. O ile a re ho sesenyi se seng se neng se bontša tumelo e itseng ho eena: “U tla ba le ’na kajeno Paradeiseng.” (Luka 23:43) Eo e ne e le Paradeise ea lefatšeng e tlang. Ketsahalong ea pejana, Jesu o ne a ile a re: “Ho lehlohonolo ba bonolo; hobane ba tla ja lefa la lefatše.” (Mattheu 5:5) Mona, e ka ’na eaba Jesu o ne a bua ka khopolo e ho Pesaleme ea 37:11, e reng: “Ba bonolo ba tla rua lefatše, ba iketle khotsong e kholo.”
14. Ke batho ba mofuta ofe ba tla ja lefa la lefatše?
14 Baa ba tla ja lefa la lefatše ke bo-mang? Pesaleme ea 37:34 e re: “U itsepise ka Jehova, u tiee litseleng tsa hae, ’me o tla u holisa, u tle u je lefa la lefatše; u tla bona le tšenyeho ea ba babe.” Temana ea 37 le ea 38 lia phaella: “Lemoha ea lokileng, u talime motho oa toka; hobane motho oa khotso o sa tla bona litloholo, empa ba bolotsana ba timela, ’me litloholo tsa ba babe lia felisoa.” Kahoo, batho ba tla ja lefa la lefatše ba lokela ho tseba Jehova, ba lumele litsepiso tsa hae, ’me ba nkoe ke eena ba e-na le toka ’me ba lokile hobane ba mamela melao ea hae. Joalokaha Johanne oa Pele 2:17 e bolela: “Lefatse lea feta, le eona takatso ea lona; empa ea etsang thato ea Molimo, o hlola ka ho sa feleng.”
15. Hore ho tle ho be le liphetoho tsa lefatše tse khōlō tse molemo, ho tlameha ho etsahala ntho efe ea bohlokoa?
15 Leha ho le joalo, hore liphetoho tseo li tle li etsahale ho ne ho tla hlokahala phetoho e kholō ea boemo ba litaba bo teng hona joale. Ka lebaka le le leng, ho ne ho tla bolela ho tlosoa hoa mebuso eohle e teng ea lefatše, kaha puso ea motho ha ho mohla e kileng ea tlisa maemo a lakatsehang. Empa liphetoho tse joalo tse sisinyang lefatše li se ntse li le matleng a Jehova. Ka mohlala, Bibele e re: “Ke oona o hlahisang phetoho ea mehla le linako, o tlosang marena, o phahamisang marena.”—Daniele 2:21.
Ho Tlosa Bahanyetsi
16, 17. (a) Jehova o ile a sebelisana joang le Faro ea neng a hanyetsa morero oa Hae? (b) Lentsoe la Jehova la boprofeta le ile la tiisoa joang?
16 Nahana ka seo Jehova a se entseng ho babusi le masika a marena a matla nakong e fetileng, haholo-holo ho bao ba lekileng ho kena-kenana le merero ea hae. Ba ile ba rojoa ’me ba hasanyetsoa moeeng joaloka lerōle feela, joalokaha ho bile joalo ka mebuso ea bona. Ka mohlala, ho bile le Faro oa Egepeta ea neng a entse batho ba Molimo makhoba. Empa Jehova o ne a e-na le morero ka bahlanka ba hae, ’me a romella Moshe ho ea bolella Faro hore a ba lokolle. Ho e-na le hoo, Faro ka boikakaso a re: “Jehova ke mang hore ke utloe lentsoe la hae?” A phaella: “Jehova ha ke mo tsebe, le Iseraele nke ke ka mo lokolla.”—Exoda 5:2.
17 Jehova o ile a fa Faro menyetla e mengata ea ho fetola maikutlo a hae. Empa leha ho le joalo, nako le nako, joalokaha Exoda 11:10 e bolela, Faro a ’na ‘a thatafala.’ Leha ho le joalo, Jehova o na le matla a ke keng a hanyetsoa. Ha nako ea hae e khethiloeng e fihla, a qoelisa Faro le makhotla a hae Leoatleng le Lefubelu. Exoda 14:28 e re: “Ha hoa ka ha sala le a mong oa bona.” Ka lehlakoreng le leng, bahlanka ba Jehova ba ile ba sireletsoa ‘me ba lokolloa. Ho feta moo, hona hoa tla ka nako e nepahetseng eo lentsoe la boprofeta la Jehova le e profetileng, qetellong ea nako ea lilemo tse 400 eo a neng a buile ka eona ho Abrahama ea tsepahalang lilemo tse makholo-kholo pele.
18. Jehova o ile a etsa eng ka Nebukadnezare oa Babylona? Hobane’ng?
18 Hape ho bile le Morena Nebukadnezare oa Babylona. O ile a ithorisa ka matla a hae le seo a se finyelletseng, joaloka hoja e ne e le molimo. Empa Daniele 4:31 e bolela hore “polelo ha e sa le molomong oa morena, lentsoe la theoha leholimong, la re: Morena Nebukadnezare, u tsebisoa hore borena bo ea tlosoa ho uena.” Jehova o ile a mo bolella hore o ne a tla kokobetsoa joaloka phoofolo ea naha, joalokaha temana ea 32 e bolela, joale o tla tseba “hore Mookameli ea phahameng o na le ’muso holim’a borena ba batho, le hobane a ka bo fa eo a ratang ho mo fa bona.” Ke sona se etsahetseng hantle ka nako eo Jehova a neng a e reretse hona.
19. Ke hobane’ng ha kahlolo ea Jehova e iphetetsang e ile ea tlela Babylona le ’musi oa eona oa ho qetela, Belshatsare?
19 Morena oa ho qetela oa ho busa Babylona e ne e le Belshatsare. Ebile nakong eo, moo e neng e ne e le nako ea Jehova ea hore ’muso oo o moholohali o oe. Hobane’ng? Hobane Bababylona ba ne ba tsoere batho ba Molimo botlamuoeng ’me ba nyefola Jehova. Daniele khaolo ea 5 e bolela hore Belshatsare o ile a etsa mokete o moholo bakeng sa matona a hae a sekete. Eaba Belshatsare o “laela hore ho tlisoe mehope ea gauda le ea silevera eo ntat’ae Nebukadnezare a neng a e hapile tempeleng ea Jerusalema, hore morena, le mahosana a hae, le basali ba hae, le linyatsi tsa hae, ba noe ka mehope eo.” (Daniele 5:2, 3) Hlokomela seo ba ileng ba se etsa kamorao ho moo: “Ba e-noa veine, ba ba ba roka melimo ea bona ea gauda, le ea silevera, le ea koporo, le ea tsepe, le ea mahong, le ea majoe.” (Daniele 5:4) Ka ho sebelisa lijana tse halalelang tse neng li sebelisoa borapeling ba Jehova, ba soma le ho nyefola Jehova. Ka ho rapela melimo ea bona ea bohata, ba ne ba rapela Satane.
20, 21. Daniele o ile a fa Belshatsare molaetsa ofe, ’me o ile oa phethoa joang?
20 Leha ho le joalo, hoa etsahala ntho e tšosang motsotsong oo. Menoana ea letsoho ea bonoa e ngola leboteng la ntlo ea borena! Hoa tšosa morena haholo hoo ‘sefahleho sa morena se ileng sa fetoha hang, mehopolo ea hae ea ferekanngoa; mesifa ea matheka a hae ea hlepha, mangole a hae a otlana.’ (Daniele 5:6) Ha ho le a mong oa baeletsi ba Balshatsare ba bolumeli ea neng a utloisisa mongolo oo, kahoo hoa bitsoa mohlanka oa Jehova Daniele ho tla o hlalosa. Daniele a tsebisa morena hore molaetsa oo o tsoa ho Jehova, ’me e ne e le ona: “Molimo o balile ’muso oa hao, ’me o o khaotse. . . . U lekantsoe ka sekala, ’me ha fumanoa u le chatsi [“u sa tsoanelehe,” NW]. . . . ’Muso oa hao o arotsoe, ’me o neiloe ba-Mede le ba-Persia.”—Daniele 5:26-28.
21 Hona bosiung boo, makhotla a Medo-Persia a futuhela motse a kena ka likhoro tse siiloeng li butsoe ka bohlasoa. Joalokaha Daniele 5:30 e qetella: “Ka bona bosiu boo, Belshatsare, . . . a bolaoa.” Ho oa hoa Babylona hoa lumella batho ba Jehova ho khutlela naheng ea habo bona hantle kamor’a lilemo tse 70 hoba ba be botlamuoeng ba bona. Hoo e ne e le hantle ho latela kemiso ea nako ea Jehova, joalokaha e senotsoe ho Jeremia 29:10.
22, 23. Jehova o ile a sebelisana joang le morena Heroda Agrippa I, ea neng a hanyetsa Bakreste lekholong la pele la lilemo?
22 Lekholong la pele la lilemo, Morena Heroda Agrippa I e bile ’musi oa ho qetela oa Palestina, karolo ea ’Muso oa Roma. Heroda a etsa hore moapostola Petrose a kenngoe teronkong, ’me a hlorisa Bakreste ba bang. O bile a etsa hore moapostola Jakobo a bolaoe. (Liketso 12:1, 2) Heroda o boetse a lokisetsa liloani tse bolaeanang lebaleng la lipapali la Roma le lipontso tse ling tsa bohetene. Tsena tsohle tsa shanofatsa boipolelo ba hae ba hore ke morapeli oa Molimo.
23 Empa, joale, nako e loketseng ea Jehova ea tla bakeng sa ho bolaea mohanyetsi enoa. Liketso 12:21 ho ea ho 23 e-ea re bolella: “Ka letsatsi le beiloeng, Heroda a apara kobo tsa borena, a lula teroneng ea hae; ha a ntse a bua le bona, sechaba sa hoa, sa re: Lentsoe leo ke la Molimo, e seng la motho.” Hoa etsahala’ng kamorao ho moo? Bibele e re: “Lengeloi la Morena la phakisa la mo otla, kahobane ha a ka a busetsa letlōtlo ho Molimo; a jeoa ke libōkō, a ba a shoa.” Mohlala o mong e bile oona ona moo Jehova a “tlosang marena,” joalokaha Daniele 2:21 e boletse.
24. Linnete tseo tsa histori li paka eng?
24 Liketsahalo tse joalo tsa histori li paka hore Jehova o na le nako le linako tsa hae tse khethiloeng bakeng sa merero ea hae. Li boetse li bontša hore ka sebele o na le matla a ho phetha morero oa hae oa ho fetolela lefatše lena paradeiseng moo “ho loka ho ikahetseng teng.”—2 Petrose 3:13.
Na U-ua Hopola?
◻ Ke hobane’ng ha e le hoa bohlokoa hakaale ho tseba nako le linako tse khethiloeng tsa Jehova?
◻ Ke hobane’ng ha e se Molimo o tšehetsang babusi le batho ba lefatše lee?
◻ Ke batho ba mofuta ofe ba tla ja lefa la Paradeise e tlang ea lefatšeng?
◻ Jehova o bontšitse matla a hae joang a ho theola babusi ba mo hanyetsang?