Ho Bula Maliboho Tseleng e Isang Paradeiseng
E NE E le ka Tlhakubele New Jersey, batho ba 4 300 ba ne ba bokane Holong ea Kopano ea Lipaki tsa Jehova ea Motse oa Jersey. Ba ne ba hlaha mabatooeng ’ohle a United States le linaheng tse ling. Seboka seo se khethehileng se susumelitsoe ke liketsahalo tsa lilemong tse 43 tse fetileng ha ho hlongoa sekolo se khethehileng sa ho koetlisa baromuoa tlas’a bohlokomeli ba eo e neng e le mookameli oa Mokhatlo oa Watch Tower Bible and Tract, Nathan H. Knorr.
Seboka seo sa Tlhakubele e ne e le letsatsi la ho ntša mangolo a liithuti tsa Sekolo sa Gileade sa Bibele sa Watchtower bakeng sa sehlopha sa bo80. Empa ke eng se entseng hore bongata boo bo bokane lenaneong leo? Ho ne ho lebeletsoe lenaneo le enneng haholo.
Boikutlo ba Moromuoa—Senotlolo se Isang Katlehong
Molula-setulo oa lenaneo e ne e le Karl Klein, setho sa Sehlopha se Busang sa Lipaki tsa Jehova. A kenyelletsa sebui sa pele lenaneong, Lloyd Barry, eo e neng e le moromuoa Japane, ’me hona joale ke setho sa Sehlopha se Busang, eena a bua sehloohong “Eketsa Tumelo ea Hao ka Mesebetsi.” A eletsa: ‘Kamor’a koetliso e matla ka likhoeli tse hlano, lerato le tumelo tsa lōna li fihlile sehlohlolong sa tsona. Joale le ea likabelong tsa lōna, ’me le lokela ho eketsa tseo ka mesebetsi.’ (Jakobo 2:22, 23) O boletse hore joaleka Jehova ba lokela ho ‘tsoha e sa le hosasa’ le ho sebelisa letsatsi ka ho shoetseng tšebeletsong ea hae.—Jeremia 7:25.
Daniel Sydlik, setho se seng sa Sehlopha se Busang, o fane ka keletso e khothatsang sehloohong “U Ka Hlaolela Boikutlo bo Tsitsitseng.” O itse, boemong bofe kapa bofe, u ka bonahatsa boikutlo bo nyahameng kapa bo tsitsitseng. A theile litlhaloso tsa hae ho Malakia 3:15, 16, a bontša kamoo ho ka bang bonolo kateng ho nyatsa-nyatsa lintho naheng e ncha. “Lieha ho bona liphoso. E ba le boikutlo bo thabileng ba hore Molimo o tla hlohonolofatsa.”
Libui tse ling, ho akarelletsa mongoli oa sekolo Ulysses Glass, tsa totobatsa taba ea hore ho hlokahala mamello, khotsofalo mosebetsing, le sebete. Jack Redford, eo e neng e le moromuoa hape e le e mong oa barupeli sekolong sena, o fane ka keletso e sebetsang mabapi le ho ba le kelello e bulehileng. Hopolang, o its’alo, hore “batho ba bohlale ba fetola mehopolo ea bona, ’me ha ho mohla lithoto li fetolang mehopolo ea tsona!” Ka hona a khothalletsa baromuoa ba bacha ho tenyetseha joaloka moapostola Pauluse, ea neng a bile a tseba ho qotsa baroki ba moo. (Liketso 17:28) A phetha, “Le bee lipalesa moo le tla jaloa teng. . . . Bolokang mohopolo le pelo tse bulehileng.”
Puo ea sehlooho lenaneong leo la ho ntša mangolo a liithuti e fanoe ke mookameli oa Mokhatlo oa Watch Tower, Frederick W. Franz, eo hona joale a leng lemo li 92. Sehloohong “Ho Bula Maliboho Hona Joale Tseleng e Khutlelang Paradeiseng Lefatšeng,” o ile a hlalosa ho theoa ha Sekolo sa Gileade, “lesea le belehiloeng nakong ea ntoa le ngoana oa tumelo” ea qalileng nakong ea Ntoa ea II ea Lefatše. A sebelisa Esaia 62:10 e le sehlooho sa taba ea hae, a bontša kamoo baromuoa bao ba neng ba tla kopanela mosebetsing ona o moholo oa ho etsa tsela e sephara, e tiileng eo batho ba bacha ba ka tsamaeang ho eona ho ea Paradeiseng e tsosolositsoeng. Ha phethoa lenaneo la hoseng ka ho ntšuoa ha mangolo a liithuti tse 24.
Lenaneo la motšehare oa mantsiboea le ne le akarelletsa lintho tseo liithuti li ithutileng tsona sekolong, haesita le lipontšo tsa maemo a phephetsang ao li ka a lebellang. Lenaneo la phethoa ka tšoantšiso ea Bibele e neng e bontša ka ho hlaka kamoo Rahaba le Bagibeone hamorao, ba bontšitseng tumelo e ba pholositseng.—Joshua, likhaolo 2 ho ea ho 6 le 9.
Ha ho akarelletsoa liithuti tse 24 tsa sehlopha sa bo80 sa Sekolo sa Gileade, baromuoa ba 6 234 ba rometsoe lefatšeng lohle ho ea qalisa mosebetsi oa boboleli phethahatsong ea Mattheu 24:14.