Ho Phelela Thato ea Molimo—Kajeno le ka ho sa Feleng
“Le lōna . . . litšiung tse [le] saletseng lefatseng [le] se hlole [le] phelela litakatso tsa botho, empa [le] phelele thato ea Molimo.”—1 PETROSE 4:1, 2, TLP.
1, 2. (a) Ba bangata ba itšoara joang ka khopolo ea ho ikokobeletsa thato ea e mong? (b) Ba bang ba ka ’na ba itšoara joang ka phuthehong ea Bokreste? (c) Ka lebaka leo ho hlaha lipotso life?
UITŠOARA joang ka khopolo ea ho lumella bophelo ba hao hore bo laoloe ke Molimo? Ba bangata kajeno ba nyatsa le eona khopolo feela ea ho ikokobeletsa thato ea e mong. Le har’a mekhatlo ea batho eo ho thoeng ke e tsitsitseng borabele bo ntse bo hōla khahlanong le ba boholong. Merusu, lipontšo tsa nyatso, moferefere le pefo ke phihlelo ea letsatsi le leng le le leng. Tlas’a khatello tsoelopele e-ea thekesela ’me e lahla bokhabane ba eona.—2 Timothea 3:1-3.
2 Ha ho bapisoa, Lipaki tsa Jehova li bontša hore li phelela thato ea Molimo ka botšepehi ba tsona, ka mohlala, tšebeletsong ea tsona ea ntlo le ntlo. Leha ho le joalo, le hona ka phuthehong ea Bokreste, ka linako tse ling moea oa boitaolo o ’nile oa bontšoa ke ba seng bakae. Ba ka ’na ba khopisoa ke khalemelo ea baholo. Ba seng bakae ba bontša ho se hlomphe sehlopha sa “mohlanka ea khabane, ea bohlale” le Sehlopha se Busang sa sona. (Mattheu 24:45-47; Liketso 15:2, 23) Ka lebaka leo ho hlaha lipotso: Ke hobane’ng ha ke lokela ho ikokobeletsa thato, ea Molimo? Ke hobane’ng ha bophelo ba ka bo lokela ho laoloa ke Molimo?
Mohlala o se Nang Boikhabi oa Kreste
3. Petrose o fane ka keletso efe mabapi le maikutlo a rōna?
3 Petrose, ea neng a kopanetse liphihlelong tse ngata le Jesu, o ne a lumela hore ho ne ho e-na le lebaka le letle haholo la ho phelela thato ea Molimo ho e-na le hore motho a iketsetse ea hae. O itse: “Erekaha Kreste a ile a mamella mahlōkō ’meleng, le lōna imatlafatseng ka maikutlo a tšoanang le a hae; hobane ea mameletseng mahlōkō ’meleng o khaohane le sebe, e le hore litšiung tse mo saletseng lefatšeng a se hlole a phelela litakatso tsa botho, empa a phelele thato ea Molimo.”—1 Petrose 4:1, 2, TLP.
4. Jesu o bontšitse ho ikokobeletsa Ntate oa hae joang?
4 Ke hobane’ng ha Jesu a ile a utloa bohloko nameng? Hobane o ne a tšehelitse lehlakore la Ntate oa hae tsekong ea borena ba bokahohle kapa puso. O pakile hore Molimo o na le ’nete ’me Satane o leshano. ’Me hoo o ho entse ka hore a lumelle hore bophelo ba hae ba lefatšeng bo laoloe ke Molimo, le hoja bo ile ba fella ka ho shoela tumelo.—2 Ba-Korinthe 5:14,15.
5. Mohlala oa Jesu o bea phephetso efe ka pel’a rōna?
5 Leha ho le joalo, lefu leo e ne e le pontšo ea lerato la Molimo ka Kreste. (1 Johanne 4:10) Hobane’ng? Hobane le felletse ka hore batho bohle ba buleheloe ke melemo. (Ba-Roma 5:8; 6:23) Empa ke ba bakae ba ratang ho fumana melemo eo? Ke ba bakae ba utloisisang ho etsisa Kreste le ho tela litakatso tsa bona ka ho ikokobeletsa thato ea Molimo?—Ba-Heberu 13:15, 17.
Melemo Hona Joale le Kamoso
6, 7. Melemo ea ho ikokobeletsa thato ea Jehova ke efe?
6 Ka hona memo eo Jehova a ileng a e fetisetsa ho Baiseraele lilemong tse fetileng tse 2 700 e sa ntsane e le e loketseng hakaakang le mehleng ea rōna: “’Na Jehova, Molimo oa hao, ke u ruta se u tšoanelang, ke u tsamaisa ka tsela eo u tšoanetseng ho tsamaea ka eona. Oho! hoja u ka lemoha litaelo tsa ka! khotso ea hao e ka ’na ea phalla joale ka nōka; ho loka ha hao ho ka tlala joale ka maqhubu a leoatle.”—Esaia 48:17, 18; bapisa Genese 22:18.
7 Jehova o re ruta hore re itsoele molemo ka ho phelela thato ea hae—’me melemo eo hase feela khotso le ho loka mona le hona joale. E akarelletsa mahlohonolo a kamoso a bophelo bo sa feleng, feela joalokaha Jesu a tšepisitse: “Ho ratoang ke ea nthomileng ke hore, e mong le e mong ea talimang Mora, ’me a lumela ho eena, a be le bophelo bo sa feleng; ’me ’na, ke tla mo tsosa ka letsatsi la bofelo.”—Johanne 6:40.
8. Tšepiso ea Jesu ea tsoho ke matšeliso ka tsela efe kajeno?
8 Mantsoe ao ke matšeliso a maholo ho Bakreste ba tšepahalang kajeno ba seng ba hōlile lilemong. Tsamaiso ena ea lintho e selemong sa eona sa bo72 ho tloha nakong ea bohlokoa ea 1914. Lefatše la Satane le tšoarelletse halelele ho feta kamoo ba bangata ba neng ba lebelletse. Ha e le hantle, Bakreste ba bang ba tšepahalang ba neng ba lebelletse ho bona Harmagedone le qaleho ea tsamaiso e ncha ea lintho bophelong ba bona ba se ba shoele. Empa bophelo ba bona, bo nehetsoeng thatong ea Molimo, ha se lefeela. Bonneteng ba mantsoe a hae, Jesu o tla ba tsosa ’me a ba nehe molemo oa bophelo bo sa feleng.—Johanne 5:28, 29; 1 Ba-Korinthe 15:58.
Maikutlo a Kreste
9, 10. (a) Re tlameha ho itlhomella ka eng? (Ba-Filippi 2:5-8) (b) Ke eng e khethehileng ka lentsoe la Segerike le ngoliloeng e le “maikutlo a kelello” ho 1 Petrose 4:1?
9 Ke eng e ka re nolofaletsang haholoanyane hore re ikokobelletse thato ea Molimo? Ho latela keletso ea Petrose, e qotsitsoeng serapeng sa 3, re tšoanela ho itlhomella ka “maikutlo a tšoanang” le ao Jesu a neng a e-na le oona.—1 Petrose 4:1, TLP.
10 Mona Petrose o sebelisa lentsoe la Segerike le fumanoang ka makhetlo a mabeli feela Mangolong a Segerike—enʹnoi·a, Le hoja bafetoleli ba bang ba le ngola e le “khopolo,” hase lentsoe le tloaelehileng la Segerike bakeng sa “khopolo,” eo e leng nous. Ka baka leo Petrose, tlas’a tšusumetso, o ne a hopotse ntlha e ’ngoe e tebileng ha a khetha lereo lena le sebelisoang seoelo. Seithuti sa Segerike W. E. Vine o bolela hore enʹnoi·a “e supa morero, sepheo, pakane.” Greek-English Lexicon ea J. H. Thayer e le hlalosa e le “mokhoa oa ho nahana le boikutlo.”
11. Re ka ithuta eng ka mohlala oa Jesu mabapi le tsela eo re sebelisang bophelo ba rōna ka eona?
11 Bohato ba Jesu ba ho itela ka ho hlakileng bo bontšitse morero, kapa pakane ea hae. O ne a sa phele bophelo ba boikaketsi, ho ipatlela menyaka le monate feela. O ne a tseba hore ha a ka a tela bophelo ba hae ba nakong e fetileng leholimong e le hore a tl’o senya lilemo tse seng kae feela lefatšeng a phehella boikhabi. (Bona phapang e ho Genese 6:1, 2, 4, le Juda 6.) Ke kahoo a itseng: “Ke theohile leholimong, e seng ho etsa ho ratoang ke ’na, empa e le ho etsa ho ratoang ke ea nthomileng.” (Johanne 6:38) Maikutlo a Jesu a ne a tsepame feela boinehelong ba hae morerong oa Ntate oa hae, kamehla a o etelletsa pele ho thato ea hae, le ho isa lefung le lihlong.—Luka 22:42.
12, 13. (a) Jesu o bontšitse maikutlo a hae joang selibeng sa Jakobo? (b) Jesu o ne a bolela eng ha a re, “Ke na le sejo seo ke se jang, seo lōna le sa se tsebeng”?
12 Leha a ne a khathetse ’me a lapile, Jesu o bontšitse ka ho hlaka hore na maikutlo a hae ke afe mabapi le thato ea Ntat’ae. Ka lekhetlo le leng, ha barutuoa ba hae ba ile ho ea batla lijo, a phomola selibeng sa Jakobo. Ho e-na le hore a re shoa ho fihlela barutuoa ba khutla, a ikitlaelletsa ho etsa thato ea Molimo. A nka bohato bo sa tloaelehang ho Mojode. A qoqa le mosali oa Mosamaria. A tutubolla mahlo a mosali eo hore a utloisise Molimo oa ‘nete. Ka lebaka leo, “Ba-Samaria ba bangata ba motse oo ba lumela ho eena, ka baka la polelo e boletsoeng ke mosali eo.”—Johanne 4:6-26, 39-42.
13 Ha barutuoa ba hae ba khutla, ba mo phehella hore a je. A ba araba joang? “’Na ke na le sejo seo ke se jang, seo lōna le sa se tsebeng.” Ba ile ba tsietsoa ke karabelo ea hae ho fihlela a phaella ka ho re: “Sejo sa ka ke ho etsa thato ea ea nthomileng, le ho phetha mosebetsi oa hae.” Ka ho hlakileng, Jesu o ne a thabisoa ke ho ikokobelletsa thato ea Ntat’ae. Ka lebaka leo, ho eena ho ne ho tšoana le lijo, ’me joaloka ho ja lijo tse monate, o ne a thabela khotsofalo ea sebele. Haeba re batla ho utloa re khotsofetse ka sebele bophelong ba rona, ha ho letho le molemo leo re ka le etsang ho feta ho latela mohlala oa Jesu Kreste.—Johanne 4:31-38.
Liphello tsa Maikutlo a Kreste
14. Re hloka eng hore re be le maikutlo a Kreste? Bontša.
14 Ho ba le maikutlo a Kreste ho lokela ho re ama joang? Haeba re ithuta ho nahana joaloka Kreste, ke moo re tla ba le matla ka hare ho rōna a tla re tataisa hore re etse seo Jesu a neng a tla se etsa tlas’a maemo afe kapa afe. (Luka 22:42; Ba-Efese 4:23, 24) Matla ana a ke ke a tsoaloa feela ke ho tšaba kotlo, e kang khalemelo e tsoang ho baholo ka phuthehong, empa ho e-na le hoo a tla tsoa kananelong e tebileng bakeng sa melao le melao-metheo ea Jehova. Boemo bona re ka bo bapisa le motho ea utloang melao ea sephethe-phethe feela ha a bona leponesa—o ikokobeletsa tšusumetso e ka ntle feela. Empa motho ea nkang bophelo e le ba bohlokoa, ea ratang moahelani oa hae le ea bonang bohlale ba ho ba le melao ea sephethe-phethe o tla mamela ka lebaka la ho hlompha molao. O na le tšusumetso e matla e hlahang ka hare.—Pesaleme ea 51:10.
15. (a) Ke eng e pakang hore Jesu o ne a e-na le matla a kahare a susumetsang khopolo ea hae? (Ba-Efese 4:23) (b) Ke mehlala efe ea botšepehi e fanang ka bopaki ba maikutlo a kelello a Kreste e bonahatsoang ke Bakreste kajeno?
15 Jesu o ne a e-na le ‘matla ao a ka hare a susumetsang khopolo ea hae.’ Ke kahoo a ileng a tšepahala thatong ea Ntate oa hae, le ho isa lefung. O mameletse bohloko a sa belaele kapa hona ho hlapaola bahlorisi ba hae. (1 Petrose 2:21-24) Ka linako tse ling rōna joaloka Bakreste re ka ’na ra ba tlas’a likhatello tse joalo. Ba boholong ba hanyetsang ba ka ’na ba leka ho thibela mosebetsi oa rōna oa ho bolela le liboka, joalokaha ba ile ba etsa Spain nakong ea Franco le linaheng tse fapa-fapaneng tsa Europe nakong ea puso ea Nazi. Baena ba bangata le bokhaitseli ba ile ba khahlapetsoa ka boiteko ba hore ba eke baena ba ikarabellang liphuthehong tsa habo bona. Ho sa tsotellehe tlhoriso ba bangata ba ema ba tiile. (Bona 1978 Yearbook of Jehovah’s Witnesses, maqephe 171-2, 182-3; 1986 Yearbook of Jehovah’s Witnesses, maqephe 137-59.)
16. Tse ling tsa litsela tseo re ka ‘nang ra lekoa ka tsona kajeno ke life? Re ka li hanela joang?
16 Re ka ’na ra ba khatellong ka lebaka la ho se nke lehlakore hoa rōna hoa Bokreste kapa tšebeliso ea litšelo tsa mali. (Liketso 5:29; 15:28, 29) Joale ho hlaha khang, Na re phelela thato ea Molimo kapa ea motho? Kapa teko e ka ’na ea hlaha litakatsong tsa nama le metsoalleng e mebe. Mohlomong sekolong kapa moo re sebetsang, ho ka ’na hoa hlaha monyetla oa hore re tsube kapa re sebelise lithethefatsi ho se mang kapa mang ea tsebang ka phuthehong. Kapa ho thoe’ng ka moleko oa papali ea chelete ea lottery? Kapa ho etsa bohlola kapa bofebe? Hangata moea oa lefatše oa mosebetsing o ka khothalletsa monahano o mobe le ketso e mpe—ntle leha re e-na le boikemisetso bo kang ba Kreste mabapi le ho etsa thato ea Molimo. U tla etsa joang? Na u tla ba le matla a tiileng a susumetsang mohopolo oa hao e le hore u ka latela boitsoaro ba Kreste tlas’a maemo a joalo?—Ba-Efese 4:17-20; 1 Johanne 2:15, 16.
17, 18. (a) Ke ntlha efe e matla eo Petrose a e hlakisitseng mabapi le bao ba itloaelitseng sebe? (b) Ho hlokahala eng e le hore ho haneloe mecha ea sebe?
17 Petrose o boetse o hatisa bohlokoa ba ho etsa thato ea Molimo ha a eletsa: “Hobane li lekane linako tse fetileng tseo re li phetseng re ntse re etsa ho ratoang ke bahedene, ha re ne re itsamaela ka bootsoa, le ka litakatso, le ka botahoa, le ka meharo ea lijo le ea lino, le ka tšebeletso e manyala ea melimo ea bohata. Ke moo ba makalang ha le sa mathele hammoho le bona khaphatsehong eo ea bohlola, ’me ba le nyefola ke hona. Empa ba tla ikarabela ho ea itokisitseng ho ahlola ba phelang le ba shoeleng.”—1 Petrose 4:3-5.
18 Mona Petrose o hlakisa ntlha e matla—ba hlokomolohang thato ea Molimo ba lokela ho ikarabella. (Bapisa Ba-Roma 14:12 le Ba-Heberu 13:17) Pauluse o fihlela qeto e tsoanang lengolong la hae le eang ho Bakolosse, moo a ngolang: “Le bolaee ke hona litho tsa lona tse leng lefatseng, ke ho re, bofebe, le litšila, le maikutlo a mabe, le litakatso tse mpe, le takatso ea moruo, e leng ho sebeletsa molimo oa bohata. Ke ka baka la ntho tseo bohale ba Molimo bo tlang.” Bohle ba etsang lintho tse joalo ka sebele ha ba phelele thato ea Molimo empa, ho e-na le hoo, ho khotsofatsa seo meharo ea bona e ba qobellang sona. Leha ho le joalo, batho ba ka itokolla boitšoarong bo joalo bo hlephileng, hobane, joalokaha Pauluse a bolela, “Ke tseo le lōna le neng le tsamaea ho tsona pele, ha le ne le sa phela ka tsona.”—Ba-Kolosse 3:5-7; Ba-Efese 4:19; bona le 1 Ba-Korinthe 6:9-11.
Ho Lemoha Seo Thato ea Molimo e Leng Sona
19. Ba bangata ba bontša joang kajeno hore ba phelela thato ea Jehova? (Ba-Roma 12:1, 2)
19 Lilemong tsena tsa ho qetela tsa lekholo la bo20 la lilemo, batho ba fetang limillione tse tharo ba se ba lemohile seo thato ea Molimo e leng sona bakeng sa bona. Ka lebaka leo, ba bolela litaba tse molemo tsa puso ea ’Muso oa Molimo ka cheseho. (Liketso 8:12; Mareka 13:10) Ha ba phelele bona feela, joalokaha ba bangata ba etsa. Ba’a tseba hore Molimo o tla tloha o felisa tsamaiso ena e bolileng, ’me ba itella ho thusa ba bang hore ba fumane tsebo ena e nepahetseng, joalokaha moapostola Pauluse a elelitse: “Iponeleng hore le tsamaee ka kelello, e seng joale ka maoatla, e mpe e be joale ka ba bohlale. Lopollang linako, hobane mehla e se e le mebe. Ka baka leo, le se ke la etsa ka booatla, le mpe le tsebisise hantle ho ratoang ke Morena.”—Ba-Efese 5:15-17.
20, 21. (a) Re lokela ho talima mpho ea bophelo joang? (Jakobo 4:13-17) (b) Re ka qoba ho ipapisa le lefatše joang?
20 Bophelo bo tšoana le mohope oa metsi a phōlileng, a monate. Lilemong tse mashome tse qalang bophelo ba motho, o “noa” ka botebo le ka potlako—ho fihlela a qala ho ipotsa hore na ho setse lilemo tse kae tsa bophelo ka “mohopeng”! Hoo ke qaka ho e mong le e mong! Ke hoa bohlokoa hakaakang, ho phela bophelo ka kutloisiso ea boikarabelo ho Molimo le ho motho e mong. Ke hoa bohlokoa hakaakang ho nahana ka thato ea Molimo e seng thato ea motho feela ea boikhabi!—Mattheu 7:21, 24, 26.
21 Leha ho le joalo, kaha re phela lefatšeng le laoloang ke moea oa Satane, ha ho bonolo kamehla ho phelela thato ea Molimo. (Tšenolo 12:9) O hlahisa likhatello ka linako tsohle ho re bōpa hore re tšoanele thato ea lefatše le khopolo ea lona. Cheseho e feteletseng ea mekhoa ea morao-rao e ka ba ea susumetsa le ba ka phuthehong, hoo ba qalang ho tšoana le batho ba bang ba itseng ba tummeng boithabisong. Kahoo keletso ea Pauluse ke e loketseng hakaakang: “Le se ke la ipapisa le lefatše lena, le mpe le fetohe ka nchafalo ea kelello ea lōna, le tle le lemohe ho ratoang ke Molimo, hore na ke hofe, ho molemo, ho khahlehang, ho phethehileng”!—Ba-Roma 12:2.
22. (a) Thato ea Molimo bakeng sa mehla ea rōna ke efe? (b) Re ka bontša joang hore re phelela thato ea Molimo? (c) Ke tlhohonolofatso efe e emetseng ba phelelang thato ea Molimo?
22 Thato ea Molimo ke hore “litaba tsena tse molemo tsa ’muso” li boleloe lefatšeng ka bophara pele o tlisa bofelo ba tsamaiso ea hona joale ea lefatše. (Mattheu 24:14, NW; Tšenolo 14:6, 7) Hona ho hōlisa lebaka la ho arabela pitsong ea basebeletsi ba eketsehileng ba nako e tletseng haeba maemo a hao a ho lumella. Hape, ke lebaka la hore baholo le bahlanka ba sebeletsang ba iketse ba fumanehang ho fallela liphuthehong tseo e ka ’nang eaba li hloka thuso ea bona. ’Me ke lebaka le fetisisang la hore Paki e ’ngoe le e ’ngoe e be paki ea ’nete ea Mokreste—e seng ho jara lebitso feela empa ho hla e phelela thato ea Molimo hona joale le ka ho sa feleng. Tseba hore ka ho etsa joalo ‘u tlabe u ipokellela letlotlo sebakeng sa kamoso, le nang le motheo o molemo e le hore u ka rua bophelo bo sa feleng.’—1 Timothea 6:19.
U Ka Arabela Joang?
◻ Jesu o bontšitse joang hore o ne a phelela thato ea Molimo?
◻ Ke melemo efe e fumanoang ke ba phelelang thato ea Molimo?
◻ Maikutlo a Kreste e ne e le afe mabapi le thato ea Molimo?
◻ ‘Matla a susumetsang khopolo’ a lokela ho re ama joang?
◻ Re lokela ho talima bophelo joang?
[Setšoantšo se leqepheng la 21]
Na ke ho ananela molao ho u etsang hore u utloe, kapa ke boteng ba leponesa?