Na U na le Khopolo ea Kreste?

“Molimo oa mamello le oa tšeliso o ke o le nee ho ba le khopolo e le ’ngoe e mong ka nģa ho e mong, ho Jesu Kreste”—BA-ROMA 15:5.

1. Haeba motho a ipolela hore ke Mokreste, ke lipotso life tse hlokang karabelo?

BATHO ba fetang billione lefatšeng lohle ho thoe ke Bakreste. Hoo ho fana ka maikutlo afe? A hore, bonyane ka lebitso, ba lumela ho Jesu Kreste ’me ba ipolela hore ke balateli ba hae kapa barutuoa ba hae. (Mattheu 10:24, 25) Empa ho hlokahala eng e le hore motho a ka latela mohlala oa Kreste, kapa mokhoa oo a neng a phela ka oona? Ka ho hlakileng, u lokela ho mo tseba. Na u motho ea hlileng a tsebang Jesu oa Nazaretha? Na u hlaketsoe hantle hore na e ne e le motho oa mofuta ofe ha a sa le lefatšeng moo? Kapa hore na o ne a itšoara joang ho batho maemong a sa tšoaneng? Na u na le “khopolo ea Kreste”?—1 Ba-Korinthe 2:16; Ba-Efese 4:13.

2, 3. Re ka tseba khopolo ea Kreste joang?

² Re ka tseba joang motho ea phetseng lilemo tse ka bang likete tse peli tse fetileng le eo bophelo ba hae ba phatlalatsa e bileng feela lilemo tse ka bang tharo le halofo? Tabeng ea Jesu ho na le lihistori tse ’nè tse tšepahalang tsa bophelo ba hae tse thusang ho bōpa boinahanelo ba hore na e ne e le motho oa mofuta ofe. Ka ho bala ka hloko litlaleho tseo tse ’nè tsa Melaetsa, re ka boetse ra lemoha mokhoa oa no nahana o susumelitseng liketso tsa hae. Kahoo, ho ba Mokreste oa ’nete ho e-na le ho ba eena ka lebitso, ho hlokahala eng? Jesu o ho boletse ka tsela ena: “Bophelo bo sa feleng ke hore ba u tsebe, uena Molimo o ’notši o ’nete, le Jesu Kreste eo u mo romileng.”—Johanne 17:3; 2 Petrose 3:18.

³ Kahoo, Mokreste e mong le e mong o lokela ho ba le tsebo le kutloisiso e tebileng ka Ntate, Jehova, le ea bophelo le lithuto tsa Mora, Kreste Jesu. Ha hoa lekana ho ipitsa paki ea Mokreste ea Jehova. Hore re be le khopolo ea Kreste, kamehla re tlameha ho tlatsa likelello tsa rōna ka kutloisiso ea bophelo ba Jesu le mohlala oa hae. Hona ho bolela hore re hloka thuto ea kamehla le ea sebele ea Mangolo hammoho le lithuso tsa ho ithuta Bibele tse thusang ho hlalosa moelelo le se potolohileng taba. Ho boetse ho hloka ho ba le kelello e nepahetseng e le hore re ka utloisisa le ho amohela karolo ea Kreste mererong ea Molimo.—Johanne 5:39-47; Mattheu 24:45-47.

Motho oa Maikutlo

4. Jesu e ne e le motho oa mofuta ofe?

⁴ Jesu, monna ea mafolo-folo ea koenneng, o entse tšebeletso ea hae qalong ea lilemo tsa hae tse 30. (Luka 3:23) Empa e ne e le motho oa mofuta ofe? Na o ne a se na boikutlo ba botho ’me a le sebakana le ba bang? Ho fapana le hoo, e le Mojode oa Bochabela bo Hare, botho ba hae bo ne bo itlhalosa. O ne a sa sitisoe ke letho e bile e se moikhabi. O ile a bontša phatlalatsa boikutlo ba botho bo sa tšoaneng, bo fapa-fapaneng ka masoabi le kutloelo-bohloko ho ea ho khopeheng le ho halefeng ho lokileng.—Mareka 6:34; Mattheu 23:13-36.

5. Jesu o ile a itšoara joang ha a utloela ka lefu la Lazaro?

⁵ Ka mohlala, Jesu o ile a itšoara joang ha a fumana Maretha le Maria ba llela ho lahleheloa ke ngoan’abo bona Lazaro? Tlaleho ea Johanne ea re bolella: “O ne a amehile ka ho tebileng le ka ho bonahalang, ’me a hlabehile moeeng,” ’me a “lla.” (Johanne 11:33-36, The New Testament, ea William Barclay) O ile a arolelana maikutlo a hae le metsoalle ena e haufi. O ne a sa hlajoe ke lihlong ho lla le bona. Le hoja e ne e le “Mor’a Molimo,” o senotse maikutlo a botho. (Johanne 1:34) Hoo e tlameha e be e bile ho amang hakaakang ho Maretha le Maria!—Bapisa Luka 19:41-44.

6. Ke hobane’ng ha Jesu a ne a se bosali hobane a ile a lla?

⁶ Leha ho le joalo, ba bang kajeno ba ka ’na ba etsa qeto ea hore Jesu o ne a fokola hobane a ile a lla phatlalatsa le basali bano. Ha e le hantle, sengoli sa Mok’hatholike Hilaire Belloc o itse Jesu o ne a le “bosali.” Na hoo ke ’nete? Na Jesu e ne e le motho ea bosali ea atisang ho bontšoa libukeng tsa litšoantšo tsa Bokreste-’mōtoana? Che, likhapha hase hakaalo pontšo ea bofokoli. Joalokaha koranta e ’ngoe ea bongaka e ho boletse: “Thibelo ea pontšo e nepahetseng ea boikutlo bo senolang kameho ha ea loka e bile e kotsi . . . Pontšo ea boikutlo bo senolang kameho, haholo-holo ho lla, ke tšobotsi e ’ngoe eo e leng ea botho ka ho feletseng.”—Bapisa 2 Samuele 13:36-38; Johanne 11:35.

7. Ke ka litsela life mohlala oa botho oa Jesu o ka re thusang kajeno?

⁷ Boitšoaro ba Jesu ha a utloa bohloko ka ’nete e ne e le ba botho le ba kutloelo-bohloko. Bo re thusa ho tšoana le eena le khopolo ea hae. Ha re latele setšoantšo se seng se se nang botho sa tšōmong empa ho e-na le hoo ke mohlala o phethahetseng oa motho ea rometsoeng ke Molimo, “Mor’a Molimo o phelang.” (Mattheu 16:16; Johanne 3:16, 17; 6:68, 69) Ke mohlala o motle hakaakang bakeng sa Bakreste bohle kajeno, haholoholo baholo ba Bakreste, bao hangata ba tlamehang ho tšelisa le ho bontša kutloelo-bohloko linakong tsa ho lahleheloa kapa ho tepella! E, ho ba le khopolo le pelo ea Kreste liketsahalong tse joalo ho ka etsa phapang e kaakang.—1 Ba-Thessalonika 2:7, 8.

Monna ea Sebete oa Ketso

8. Jesu o ile a bontša sebete le ketso ea sebete joang?

⁸ Jesu o boetse o ipontšitse e le monna ea kholisehileng ka mokhoa o sebete le oa liketso tse matla. Ka mohlala, liketsahalong tse peli o ile a phahla ka matla barekisi ba liphoofolo le ba ananyang chelete ka tempeleng. (Mareka 11:15-17; Johanne 2:13-17) Hape ha a ka a qoba ho pepesa phatlalatsa boikaketsi ba bangoli le Bafarisi ba baitokafatsi. Ha a nyatsa ka sebete, o ile a lemosa, “Ho malimabe lōna, bangoli le bafarisi, baikaketsi! hobane le joale ka mabitla a koetlisitsoeng, a nang le ponahalo e ntle kantle, kanthebo, kahare, a tletse masapo a bafu le ho bola hohle.” Ka sebele, ho ne ho se na bofokoli mona!—Mattheu 23:27, 28; Luka 13:14-17.

9, 10. (a) Ke hobane’ng ha Jesu a sa ka a etsa sebe ka ho bontša ho khopeha? (b) Mohlala oa Kreste o lokela ho ama moholo oa Mokreste joang?

⁹ Na khalefo ea Jesu e ne e le bopaki ba ho haelloa ke boitšoaro? Petrose, motsoalle ea haufi-ufi oa Jesu nakong ea tšebeletso ea hae, o re: “Eena ea sa kang a etsa sebe.” (1 Petrose 2:22) Moapostola Pauluse o ngotse: “Hobane moprista e moholo eo re nang le eena, hase ea ka sitoang ho re utloela bohloko mefokolong ea rōna; hobane o lekiloe nthong tsohle joale ka rōna, empa ha a ka a etsa sebe.” (Ba-Heberu 4:15) Ho na le phapang pakeng tsa ho khopeha ho lokileng ho laolehang le bohale bo sa laoleheng.—Bapisa Liproverbia 14:17; Ba-Efese 4:26.

¹⁰ Ka baka leo, ka mohlala ha moholo oa Mokreste e ke ke ea e-ba ‘‘mohalefi,” ka sebele o lokela ho ba le matla a boitšoaro hore a khone “ho hlōla [“khalemela,” NW] bahanyetsi,” le hona “ka thata” haeba ho hlokahala. O tlameha ho tšoaneleha hore a ‘laee, a khalemele, a be a khothatse.’ (Tite 1:7-13; 2 Timothea 4:1, 2) Maemo a mang a itseng a ka ’na a boetse a qholotsa ho khopeha ha hae ho lokileng, haholo-holo haeba a bona tšokelo e hlakileng bonngoeng le bomoeeng ba phutheho, kapa bohloeking ba boitšoaro. Joalokaha Pauluse a boletse, ka linako tse ling ‘hoa hlokahala hore ho thijoe melomo’ ea “ba bolelang mafeela, ba thetsang ba bang” ‘ba lihang matlo kammoho, ba ruta tse sa tšoanelang, ba tle ba ipokellele moruo oa bokhopo.’ Mabakeng a joalo, ho ba le khopolo ea Kreste ho tla thusa baholo hore ba be sebete, ba itekanele ’me ba khone ho etsa qeto.—Bona 1 Ba-Korinthe 5:1-5; Tšenolo 2:20-23; 3:19.

11. Ke lipotso life tse amanang le hore na re etsisa Kreste joang?

¹¹ Maetong a hae ho pholletsa le Galilea, Samaria le Judea, Jesu o ile a kopana le batho ba mefuta eohle—banna, basali, bana, bakuli le bao ba neng ba mo talima e le sera sa bona. O ile a sebetsana joang le bona? Na o ne a le makōkō a bile a ipatla, kapa o ne a atameleha? Na o ne a lemoha mathata a batho le liketso tsa bona? Na o ne a sa tšoarele kapa o ne a le mohau? Likarabelo lipotsong tsena li itšetlehile ka hore re ka etsisa Kreste joang liketsong le boitšoarong ba rōna ba letsatsi le letsatsi.—Ba-Roma 15:5; Ba-Filippi 2:5, NW.

Jesu o Ile A Itšoara Joang ho Bana?

12. Barutuoa le Jesu ba ile ba itšoara joang mabapi le bana ketsahalong e ’ngoe?

¹² Re fumana tlaleho e ntle haholo ea hore na Jesu o ile a itšoara joang ho bana ho Mareka khaolo ea 10, litemana 13-16. E baleha tjena: “Eaba o tlisetsoa bana, hore a ba ame: barutuoa ba hae ba ne ba khalemela ba ba tlisang.” Hore na ke hobane’ng ha barutuoa ba ile ba itšoara ka tsela eo, tlaleho ha e bolele. E ne e le ka selemo sa 33 C.E., ’me Jesu o ne a le tseleng ho tsoa Galilea ho feta Perea ho ea ho seo e neng e tla ba tšebeletso ea hae ea ho qetela ea phatlalatsa Jerusalema le mathokong a eona. Mohlomong ba ile ba nahana hore Jesu e ne e le oa bohlokoa haholo kapa a tšoarehile haholo hore a ka ameha ka bana motsotsong oo. Empa, na eena o ile a bontša hore o tšoarehile haholo? “Jesu, ha a bona hoo, a ba bohale, a re ho bona [barutuoa]: Lesang bana ba tle ho ’na, ’me le se ke la ba thibela; hobane ’muso oa Molimo ke oa ba joale ka bona. . . . ’Me ha a ba sikile, a ba bea matsoho holimo, a ba hlohonolofatsa.”

13. Batho ba ile ba itšoara joang mabapi le Jesu?

¹³ Joale hoo ho boetse ho re ruta eng ka khopolo ea Kreste? Ho bontša ho se sekisetse ha hae ho barutuoa ba hae ba fosang le boikutlo ba hae ba botho ho ba banyenyane. O ile a utloisisa se susumelitseng batsoali hore ba tlise bana ba bona ho eena. Ba ne ba batla hore a ame le ho hlohonolofatsa bana ba bona. ’Me hoo ho re bolella eng ka Jesu? Hore batho ba ne ba sa mo tšabe kapa ba sa mo tšoha. E ne e le motsoalle oa batho, ’me batho ba ne ba rata ho ba le eena. Esita le bana ba ne ba phutholoha moo a leng teng—’me o ne a phutholoha moo bana ba leng teng. Na batho, ho akarelletsa le bana, baa phutholoha moo u leng teng?—Mareka 1:40-42; Mattheu 20:29-34.

14. Mabapi le ho atameleha, ke bo-mang haholoholo ba lokelang ho latela mohlala oa Jesu?

¹⁴ Jesu o bontšitse kameho e mofuthu le mosa. (Mareka 9:36, 37) O ne a e-na le botsoalle a bile a atameleha. Joaloka molateli oa Kreste, na u na le khopolo ea hae ntlheng eo? Balebeli ba Bakreste literekeng, lipotolohong, liphuthehong le liofising tsa makala tsa Mokhatlo oa Watch Tower lefatšeng lohle ba etsa hantle ha ba ipotsa: Na kea hatella e bile ha ke tenyetsehe? Kapa na ke etsa hore ba bang, le bana, ba mphutho-lohele? Na ka ’nete kea atameleha?—Liproverbia 12:18; Moeklesia 7:8.

Litšebelisano tsa Jesu Le Basali

15, 16. Jesu o ne a fapane le Bajode ba bang joang litšebelisanong tsa hae le basali?

¹⁵ Joaloka baholo, bahlanka le baena ka phuthehong ea Bokreste, na re na le khopolo ea Kreste ha re sebelisana le likhaitseli tsa rōna tsa Bakreste le basali ka kakaretso? Kreste, e le lesooa, o ile a itšoara joang tlas’a maemo a sa tšoaneng ha a kopana le basali ba mehleng ea hae?

¹⁶ Sechabeng seo sa Bajode se busoang ke ba batona, Jesu e ne e le moruti ea sa tloaelehang ka hore o ne a utloisisa ho qoqa le basali, esita le basali bao e seng Bajode. (Johanne 4:7-30) Ka mohlala, ha a ne a chaketse lelapa le leng tikolohong ea Balichaba ea Tyre le Sidone, mosali e mong oa Mogerike a mo kōpa hore a thuse morali oa hae ea nang le bademona. Ka tloaelo, Mojode ea bolokang molao a ka be a sa ka a sebelisana le mosali eo. Empa Jesu a mamela ’me a leka tumelo ea hae, ka hore: “Lesa bana [ba Bajode] ba khore pele; hobane ha ho hotle ho amoha bana bohobe, ho bo akhella lintjanyana [tsa Balichaba].” Na molumo oa lentsoe la Jesu e bile o felisang taba? Na ka ho hatella o ile a thibela puisano e tsoelang pele? Ha ho bonahale joalo, hobane mosali eo o ile a arabela ka bohlale: “E, Morena! empa, leha ho le joalo, lintjanyana le tsona li ee li je makumane a bana ka tlas’a tafole.” Jesu a khahloa, ’me a phekola morali oa hae.—Mareka 7:24-30.

17. Re ka ithuta eng tseleng eo Jesu a ileng a sebelisana ka eona le mosali e mong oa moetsalibe?

¹⁷ Jesu o ile a boloka kelello e bulehileng ho basali ’me ha a ka a ahlola ka ponahalo. (Mattheu 22:16) Ketsahalong e ’ngoe, ha a ntse a e-ja ha Mofarisi e mong, a lumella moetsalibe ea tsebahalang, mohlomong e le letekatsi, hore a mo hlatsoe maoto a be a a tlotse ka oli. Ka liketso tsa hae moetsalibe o ile a bontša boikutlo ba ho baka tseleng ea hae ea boetsalibe. (Luka 7:36-50) Jesu ha a ka a mo nyelisa ’me a mo leleka ka sekhobo sa kahlolo kahobane a ne a le boitšoaro bo bobe. (Bona le Johanne 4:7-30.) O ile a mo tšoarela ‘hobane [mosali eo] a ne a rata haholo.’ Hoo ho bontša eng ka khopolo ea Kreste? O ne a utloela mosali eo bohloko a bile a mo utloisisa. Na re ke ke ra ba joalo ka phuthehong le tšebeletsong ea rōna?—Luka 19:1-10; Ba-Roma 14:10-13; 1 Ba-Korinthe 6:9-11.

Litšebelisano tsa Jesu Le Barutuoa ba Hae

18. (a) Ba bang ba itšoara joang mabapi le ba sebetsang tlas’a bona? (b) Jesu o ile a tšoara barutuoa ba hae le ba bang joang? (Mareka 6:54-56)

¹⁸ Ka linako tse ling batho ba boholong ba ikutloa ba tšositsoe ke ba tlas’a bona. Ba bupetsa ka ho bona seo ba nahanang hore ke tlholisano. Boikhohomoso bo hlahella pooaneng. Ba potlakela ho nyatsa ’me ba lieha ho babatsa ba sebetsang tlas’a bona. Lipolelo tsa bona tse nyelisang li hlōleha ho hlompha seriti sa botho sa ba bang. Empa ho thoe’ng ka Jesu—o ile a tšoara joang ba tlas’a hae, barutuoa ba hae? Na ba ne ba etsoa hore ba ikutloe ba le tlaasana, ba sa tšoanelehe, kapa e le lithoto? Kapa, ho e-na le hoo, na ba ile ba ikutloa ba phutholohile ho sebetsa le Jesu?—Bapisa Mattheu 11:28-30; 25:14-23.

19. Johanne 13:1-17 e re ruta eng ka Jesu?

¹⁹ Ntlheng ena, e ’ngoe ea lithuto tse khethehileng tseo Jesu a li rutileng barutuoa ba hae e fumanoa ho Johanne khaolo ea 13. Re u khothaletsa hore u bale litemana ea 1 ho ea ho 17. Mehleng eo litsela li ne li le lerōle, ’me e ne e le tloaelo hore mohlanka a hlatsoe maoto a baeti. Jesu a ipha mosebetsi oo o tlaasana. O ile a totobatsa tšoaneleho efe ka ho hlatsoa maoto a barutuoa ba hae? O ile a ba fa thuto e sebetsang ka boikokobetso. Re ithuta eng moo ka khopolo ea Kreste? Mantsoe a Jesu a fana ka karabelo: “Mohlanka ha a moholo ho morena oa hae, le lenģosa ha le leholo ho ea le romileng. Ekare ha le tseba taba tseo, le lehlohonolo ha le li etsa.”—Johanne 13:16, 17.

20. Ke boitlhahlobo bofe boo re ka bo etsang ho bona hore na re na le khopolo ea Kreste?

²⁰ Na re na le khopolo ea Kreste ntlheng ee? Na re utloisisa ho etsa mesebetsi ea boikokobetso, e tlaasana lapeng le ka phuthehong? Kapa na re batla ho etsa feela lintho tseo ho bonahalang e le tsa “bohlokoa” kapa tse tla re etsa hore re bonahale re “khethehile”? Na re utloisisa ho nka karolo mosebetsing oo ka nako e ’ngoe o kokobetsang oa ho bolela litaba tse molemo ka ntlo le ntlo? Kapa na re batla feela likabelo sethalleng sa Holo ea ’Muso? Ka sebele, ho ba le khopolo ea Kreste ho tla re boloka re ikokobelitse ’me re atameleha, joaloka Jesu.—Ba-Roma 12:3.

21. Jesu o ile a bontša kutloelo-bohloko joang ho baapostola ba hae? Ho letšoele?

²¹ Ketsahalong e ’ngoe, kamor’a phutuho e khethehileng ea ho bolela, Jesu o ile a bontša ho nahanela baapostola haholo. Le hoja a ne a phethahetse, Jesu o ne a sa lebella phetheho ho ba bang. Qetellong ea phutuho ea ho bolela, ha a ka a qophella baapostola ba lokela ho khutlela boboleling ba bona ka potlako le ho etsa hamolemonyana. O ne a nahanela seo ba se hlokang bakeng sa ho phomola ’me a ba isa sebakeng se khutsitseng bakeng sa ho ikhutsa. Empa ha matšoele a ba latela, na Jesu o ile a khopeha ’me a hloka mamello? Che, hobane tlaleho e re bolella hore “pelo ea hae e ile ea ba qenehela.”—Mareka 6:30-34, The New English Bible.

22. Ke eng e tla re thusa ho utloisisa khopolo ea Kreste haholoanyane?

²² Ka mohlala o motle hakaalo, na hoa makatsa hore e be boholo ba baapostola e ne e le balateli ba tšepahalang joalo ba Kreste? Petrose ka sebele o ile a khahloa ke lintho tseo a ithutileng tsona kamanong e haufi-ufi le Jesu. Mohlomong o ile a hlahlella Mareka ka boitsebiso bo bongata bakeng sa tlaleho ea Molaetsa oa hae. ’Me butle-butle empa e le ka tieo Petrose o ile a inkela khopolo ea Kreste. Tlhahlobo ea lengolo la hae la pele e tla re thusa ho latela mohlala oa Kreste haufi-ufi haholoanyane.—Mattheu 16:15-17, 21-23.

Na u sa Hopola?

◻ Re ka ba le khopolo ea Kreste joang?

◻ Jesu e ne e le motho oa mofuta ofe?

◻ Jesu o ile a itšoara joang ho bana? Ho Basali?

◻ Re ithuta eng ka tsela eo Jesu a sebelisaneng le barutuoa ba hae ka eona?

[Setšoantšo se leqepheng la 10]

Jesu o ne a e-na le kutloelo-bohloko ’me ha a ka a pata boikutlo ba hae

[Setšoantšo se leqepheng la 12]

Jesu e ne e le monna oa liketso tse sebete

[Setšoantšo se leqepheng la 15]

Jesu o beile mohlala o khethehileng oa boikokobetso