Lebaka la Hore ke Tele Khopolo ea Ho ea Leholimong

—E Boletsoe ke Yuriko Eto

JOALOKA Momethodiste oa Lejapane, ke ne ke lumela ka ho tebileng hore ho ke ke hoa e-ba le thabo e fetang ea ho ea leholimong. E ne e tla ba ho babatsehang ho ba pel’a Molimo le ho khona ho phela le Morena Jesu Kreste ka ho sa feleng. Ke hobane’ng ha ke ne ke e-na le tabatabelo e matla hakaalo ea ho ea leholimong? Hona ke hobane’ng ha ke ile ka lahla khopolo eo? E re ke u phetele pale ea ka.

Ka makholo a lilemo, ke Boshinto le Bobuddha feela bo neng bo lumelletsoe naheng ea heso ea Japane. Ke hlahile ka 1911, lilemo tse 22 feela hoba ho fanoe ka bolokolohi ba bolumeli. Lelapa leso le ne le fetohile Mamethodiste. Ntate e ne e le rakhoebo. ’Mè e ne e le morali oa moruti. ’Nete ea hore ’mè o ne a lumela Bibele kannete e bile lehlohonolo ho ’na. Ka ho khetheha ke hopola hore motsoalle oa ’mè, eo e neng e le tichere ea sekolo sa banana sa thuto ea bolumeli, o ne a atisa ho re etela. Kamehla o ne a bua ka Bibele, ’me ke ne ke rata ho mamela. Empa kamehla qetellong ea moqoqo o ne a re: “Na hase ho soabisang hore e be Bibele ha e-so ho senoloe le ho utloisisoa?” Kamehla ho ne ho nkhathatsa hore kaha Molimo o entse hore batho ba ngole Bibele, hobane’ng ha o sa etsa hore ba e utloisise?

Ha ke e-tsoa sekolong, ho ne ho se letho leo ke le ratang ho feta ho lula setulong se mabotho-botho ke bala Bibele le ho lora ka leholimo. Ho neng ho susumelitse pelo ea ka ka ho khetheha e ne e le hore mohlomong Kreste o tla tla re khahlanyetsa bophelong ba ka. Jesu Kreste o itšoantša le monyali ’me o re lemosa ka baroetsana ba leshome, ba bahlano ba ne ba khalehile ’me ba ke ke ba khahlanyetsa monyali ’me ba ke ke ba ea leholimong! Kahoo letsatsi le leng le le leng, ke ne ke rapella nako ea ha Morena Jesu a tla tla ho tla re bitsa, le ho rapela hore ho ba teng la bobeli hoa Kreste ha hoa lokela ho lebaloa. Pelong ea ka ke ne ke bolokile lengolo le reng, “Ho lehlohonolo ba pelo li hloekileng; hobane ba tla bona Molimo,” ’me ke ne ke letile ka tšepo. Ha e le hantle, ke ne ke phela joaloka motsamai ea sa amehang lefatšeng lena.—Matheu 25:1-12; 5:8.

Ka 1933 ka nyaloa, ’me kahobane kamehla ke ne ke kenya leholimo meqoqong ea rōna, monna oa ka o ne a atisa ho ntšeha a re, “U-ua leholimo, empa ’na ke oa lefatše lena.” Leha ho le joalo, ntate oa monna oa ka o ne a inehetse Bibeleng ’me o ne a atisa ho re: “E se e batla e le lilemo tse 2 000 hoba Morena Jesu Kreste a tle, kahoo re ka nahana hore ho ba teng la bobeli hoa Kreste ho haufi.” Pelo ea ka ea ’na ea chesa ho ea pele.

Joale hoa qhoma Ntoa ea II ea Lefatše, ’me selemong sa ho qetela sa ntoa eo monna oa ka a shoa. Ka nako eo ke ile ka nahana hore haeba ho na le lihele tse tšabehang, e tlameha e be ke lefatše lena. Kamor’a ntoa, ka nka bana ba ka ba bane (oa ho fela o ne a le likhoeli tse supileng) ’me ra falla ka makhetlo a mangata, kaha Tokyo e ne e sa ferekane. Ke ne nke ke ka mamella Sontaha kaofela ke sa ee kerekeng, kahoo nako e ’ngoe le e ’ngoe ha re falla, ke ne ke e-ea kerekeng e haufi le lehae la rōna. Ke ne ke sa tsotelle hore na ke kereke efe, kaha ke ne ke ikutloa hore Molimo o mong feela le Bibele e ’ngoe feela. Ke ne ke hloile monahano oa ho khomarela bolumeling bo le bong.

Ho Batla Mokhatlo o Hlophisitsoeng oa Molimo

Ha ke ntse ke bona ho se tšoane, butle-butle ka qala ho ipotsa hore na Molimo oona o talima mekha eohle joang. Ka fihlela qeto ea hore Molimo o tseba hamolemo ho feta mang kapa mang hore ho na le liphoso tse ngata malumeling a mangata. Ka tsela e tšoanang le eo tichere e fanang ka lintlha pampiring ea tlhahlobo ea bana ba sekolo, ke ne ke nahana hore Molimo o ne o tla fana ka lintlha ho mokhatlo o hlophisitsoeng o utloisisang Bibele hantle haholo. Ka qala ho ikutloa hore ke tlameha ho fumana mokhatlo o hlophisitsoeng o nepahetseng mahlong a Molimo. Joale Matheu 7:9 ea feta mohopolong oa ka. E re: “Ana motho ke ofe ho lōna ea ka neang mora oa hae lejoe, ha a kōpile bohobe?” Kahobane ke ne ke batla “bohobe” ba ’nete, ka lumela lengolo lena ’me ka qala ho rapela ka ho teba letsatsi le leng le le leng: “Ke kōpa hore ke kopanele le mokhatlo o hlophisitsoeng o nang le kutloisiso e nepahetseng ea Bibele.” Kamor’a selemo hoba ke qale ho rapela ka tsela ena, ka fallela Yokohama. Ke mona moo moqoqo o mong o itseng o ileng oa nkhahla.

Nako le nako ha ke kopana le batho ba bolelang hore ba kena kereke, ke ne ke ba botsa hang-hang, “Kea ipotsa hore na u tseba motho ea utloisisang Bibele ka ho pharaletseng?” Ka letsatsi le leng motseng o mong o haufi ka kopana le setho sa kereke e ’ngoe ’me ka se botsa eona potso eo. Le hoja ho tla fihlela ka nako eo ke ne ke e-so ho fumane karabelo e khotsofatsang, a arabela ka lentsoe le kholisang: “E. Ho na le motho ea joalo. Ka letsatsi le leng moromuoa e mong oa mosali o kile a etela mona. Ke ile ka re a kene ka tlung, ’me ka pele-pele a phetla Bibele ’me a qala ho hlalosa lintho ka ho latellana. Pele a tsamaea a bolela hore o lula ka holim’a leralla lane moo u lulang teng.” Hoba ke utloe hoo, ka tloha ha hae ke thabile. Ka le hlahlamang feela ka etela lehae la boromuoa la Lipaki tsa Jehova.

Nako ea ho Etsa Qeto

Qetellong ka khona ho ba le thuto ea Bibele e qaqileng. Nako e ka bang khoeli ea feta—’me joale hoa tla koluoa! Tichere ea ka ea moromuoa, Jean Hyde (hona joale Nisbet), ea bososela ’me ea re: “Nakong e tlang mohlomong u ke ke ua phela leholimong empa mona lefatšeng.” Ke ile ka tšoha hobane ke ile ka ikutloa eka ke ntšoa leholimong. Ke ne ke hlile ke halefile. Ka mo khobola ka mantsoe, “Ke qala ho kopana le moromuoa ea tala ka hanong joaloka uena. Ke hampe hore ho sa tsotellehe ho lebella hoa ka hore u nthute Bibele, e be boikutlo boo bo felile hona joale. Leha ho le joalo, kaha ke ntse ke batla mokhatlo oa ’nete o hlophisitsoeng hona joale, hape kaha ke beelelitse Molula-Qhooa ’me ke boetse ke na le buka ‘’Nete e be Ea Molimo,’ ke tla ipatlela ka hloko ka bonna. Ha ke tiisitse hore ena ke ’nete, ke tla u khumamela ’me ke tla tla u kōpa thuso hape.”

Jean o ne a sa koata. A tšeha hanyenyane ’me a re, “Ke kōpa u hlahlobe ’nete ka mekhoa eohle.” Eaba o’a tsamaea, empa ka mosa nako le nako o ne a nketela ho botsa, “Na u ntse u hlahloba?” Ke ne ke tšepa hore mokhatlo ona o hlophisitsoeng e ne e le karabelo ea Molimo lithapelong tsa ka, empa joale maikutlo a ka a ne a ferekane ka ho feletseng. Ha ho mohla ke ne nkile ka utloa phapang e etsoa pakeng tsa ba eang leholimong le ba tla phela ka ho sa feleng lefatšeng.

Kamorao ho moo, ka thahasello ka hlahloba lingoliloeng tsa Watch Tower letsatsi le letsatsi. Kamor’a nako molebeli ea tsamaeang oa Lipaki tsa Jehova, Adrian Thompson, a nketela. Ka phakisa ka botsa ka mokhoa oa borabelenyana: “Esita le haeba kamoso ho e-ba le lihlopha tse peli, sa leholimong le sa lefatšeng, na e ke ke ea e-ba Molimo o tlang ho etsa qeto? E ne e tla ba boikhohomoso ha batho ba ne ba ka etsa qeto, na ha ho joalo?” A arabela, “Hantle haholo! Ea etsang qeto ke Molimo.” Le hoja ke ne ke sa utloisise boitsebiso bo eketsehileng, ka tsela e ’ngoe ke ile ka ikutloa ke thabile. ‘Kahoo,’ ka nahana, ‘litebello tsa ka tsa ho ea leholimong ha ke e-so li amohuoe.’ Kamorao ho moo, ka rapela ’me ka tsoela pele ho ithuta ka bonna.

Ka 1954 ka ea Sehopotsong sa lefu la Kreste. Sebui e ne e le Lloyd Barry. Puong ea hae a bolela hore ba “tumellanong ea selekane” e ne e le bona ba lokelang ho ja bohobe le ho noa veine. Kamor’a Sehopotso ke ne ke e-na le lipotso tse ngata, kahoo ka tsamaea le Shizue Seki, Paki e chesehang. A bontša kameho e khōlō ’me a ipha nako ho nkhothatsa hore ke se tele kahobane ke e-na le bothata ntlheng e le ’ngoe, empa ho tiisa hore na lithuto tsohle tse ling li theiloe Bibeleng kapa che.

Ka letsatsi le leng, hoba bana ba ee sekolong, ke ne ke hloekisa ke lokisetsa baeti, ’me ka rapela ke khutsitse, ‘Ke tla ithuta le Lipaki tsa Jehova hape.’ Ha ke tutubolla mahlo, ke ile ka makalla ho bona Lipaki tsa Jehova tse tharo tsa Majapane e seng baeti bao ke neng ke ba lebelletse. Ke maketse, ka ba bolella seo ke qetang ho se rapella. Fumiko Seki a thabile a tlōla-tlōla, a opa liatla a re, “Ke hantle hakaakang!” Ka pele moromuoa e mong, Sonny Dearn, Fumiko a thusa ka phetolelo, a qalisa thuto e thabisang. Lekhetlong lena ba babeli ho bana ba ka ba kopanela thutong le ’na. Leha ho le joalo, kabelo ea Sonny ea fetoha. Joale hoa tla molichaba e mong, Leon Pettitt. Kamehla re ne re mo tšela ka lipotso. Ka bonolo a re bontša mangolo e le hore re ka fihlela qeto e nepahetseng le ho tsoela pele tsebong ea Mangolo.

Ho Ithuta Morero oa Ho Ea Leholimong

Ho fapana le maikutlo a ka a botho, ka ithuta hore ho na le morero ka ho ea leholimong ho feta ho lakatsa ho ba ea haufi le Molimo o khanyang le ho phela le Morena Jesu ka ho sa feleng. Ha ke ntse ke tloaelana le linnete tse ling, pelo ea ka e ne e li amohela hona hoo.

Ntlha ea pele, haeba motho oa pele Adama a ne a sa ka a etsa sebe, ho ne ho ke ke hoa hlokahala hore ho be le motho mang kapa mang ea eang leholimong. Hona ke hobane le pele lefatše le bōptjoa ho ne ho se ho ntse ho e-na le mangeloi a likete tsa likete leholimong.—Jobo 38:4-7; Daniele 7:9, 10.

Ha thuto e ntse e tsoela pele, ka ithuta ho Luka 12:32 hore ke sehlopha se senyenyane feela seo Bibele e se bitsang “mohlatsoana” se eang leholimong. Jesu o itse: “Mohlatsoana, se tšabe, hobane ho khahlile Ntat’a lōna ho le fa ’muso.” Mabapi le morero, na ha ho’a ngoloa ho Tšenolo 20:6 hore “ba tla busa le eena [Kreste] lilemo tse sekete”? ’Me ho Tšenolo 5:10 hore “ba tla busa holim’a lefatše”?

Hape ke ile ka ithuta se boleloang ke Thapelo ea Morena. Jesu o ile a rapela: “Ho tle ’muso oa hao; thato ea hao e etsoe lefatšeng, joale ka ha e etsoa leholimong.” (Mattheu 6:10) Ha ke utloisisa hore hona ho ne ho bolela puso ea ’Muso oa leholimo e entsoeng ka batho ba nkiloeng lefatšeng ho ea busa le Morena Jesu Kreste, ka hlolloa ke bohlale ba Molimo. Ke ne ke kholisehile hore sena ke sona seo re se hlokang, puso e ikhethang le e ncha e tla lokolla batho bohlokong, masoabing le likhatellong tse tlisoang ke Satane. Ke ne ke sitoa ho itšoara ho rorisa Jehova.

Ho feta moo, ha ke ithuta hore palo e eang leholimong e lekanyelitsoe ho ba 144 000, ho ne ho se ntho eo nka e etsang haese feela ho lumellana le hore hona ho’a utloahala. (Tšenolo 14:1, 3) Ka tsela e tšoanang, le palo ea ba boholong pusong ea lefatše e lekanyelitsoe. Ke ile ka ananela hore ho na le mesebetsi ea bohlokoa bakeng sa bao ba eang leholimong. Mosebetsi oa bona kahare ho tokisetso e lerato ea Molimo o akarelletsa ho thabisa bohle ba phelang lefatšeng le ho tsosolosetsa lefatše lena maemong a paradeise.

Ke ne ke tletse kananelo hoo ka thabo ke ileng ka lahla monahano oa ka oa ho ea leholimong. Hona joale ke tletse tšepo ea ho phela paradeiseng lefatšeng. Ha ho pelaelo hore Molimo o senotse se boleloang ke Bibele ka mokhatlo oa oona o hlophisitsoeng. Ke ne ke ntse ke batla ’nete. Ke susumelletseha ho leboha Molimo hore e be o nthusitse ho kopanela le mokhatlo oo o o amohelang.

Tšebeletso e Beang le e Thabisang

Ke ile ka kolobetsoa ka Mphalane 1954. Ho tloha ka 1955, bana ba ka ba babeli ba ’nile ba kopanela ka nako e tletseng tšebeletsong ea ho bolela ka ’Muso le ’na. Mora oa ka Keijiro o sebelelitse e le molebeli ea tsamaeang ka lilemo tse supileng. Hona joale o hlohonolofalitsoe ka bana ba babeli, ’me eena le mosali oa hae ba sebetsa ka cheseho e le baboleli ba nako e tletseng (bo-pula-maliboho). Ke le pula-maliboho e khethehileng, ke kopanetse ho hlomeng liphutheho tsa Lipaki tsa Jehova metseng e tšeletseng.a Haufinyane ke thabetse ho bolela ka lilemo tse ’maloa le morali oa ka e moholo, Hiroko, Sehleke-hlekeng sa Hachijō, se lik’hilomithara tse 300 ho kenella Leoatleng la Pacific ho tloha Tokyo.

Kaha ke ile ka khotsofalla tšepo ea bokamoso bo babatsehang lefatšeng, pono ea ka ka lefatše e fetohile haholo. Sehleke-hlekeng sa Hachijō haholo-holo, re ne re pota-potiloe ke lipalesa tse sa tloaelehang, ’me ha re ntse re e-ea ka ntlo le ntlo, re ne re li boha ha re ntse re bua le beng ba matlo lirapeng tsa bona tse ntle. Ka letsatsi le leng ra kopana le mosali e mong ea tsofetseng a ntse a hlokomela lipalesa tsa hae. Ra babatsa botle ba tsona, empa ka pelo e bohloko a re: “Ha ke tšabe ho shoa, empa ke tepeletsoa ke hore e be ke tla tlameha ho arohana le lipalesa tsena ha ke e-ea lefatšeng le leng.” Ka hlalosa hore tlas’a puso ea ’Muso oa Molimo o tla tsosoa lefung a tsosetsoa lefatšeng la paradeise moo lipalesa li tla thabeloa ka ho sa feleng. A tona mahlo, ’me thuto ea Bibele ea lokisetsoa.

Ke boetse ka huloa ke tsela e bonolo ea bophelo ba batho ba sehleke-hleke seo. Ke barapelihali haholo-holo ha ho tluoa tabeng ea ho hlompha baholo-holo ba bona. Ha motho e mong a e-shoa, e mong le e mong ea motseng oo o tlameha ho ea phupung. Ke lakatsa feela eka batho bana kaofela ba ka tseba Jehova, Ntate oa bophelo, ’me ba utloisise hore ke Molimo o tla etsa hore baholo-holo ba bona ba boele ba phele ha lefatse le tsosolosetsoa paradeiseng. Ke ne ke tla rata hore ba tsebe hore ho na le phapang ea bohlokoa pakeng tsa ho hlompha le ho rapela baholo-holo ba rōna. Re lokela ho rapela feela Ntate oa bophelo, Jehova. Joalokaha Jesu a boletse: “Empa nako ea tla, le joale e setse e le eona, eo barapeli ba ’nete ba tla rapela Ntate ka moea le ka ’nete; hobane Ntate o batla ba mo rapelang joalo. Molimo ke Moea: ba o rapelang e ka khona ba rapele ka moea le ka ’nete.”—Johanne 4:23, 24.

Hona joale kabelong ea ka ea bosupa ea tšimo, ke leboha Jehova ha ke ntse ke tsoela pele ho bolella batho ka morero oa puso ea ’Muso oa leholimo oa Jehova le mahlohonolo a babatsehang ao o tlang ho a tlisetsa rōna ba nang le tokelo e babatsehang ea ho phela ka ho sa feleng lefatšeng.—2 Petrose 3:13; Tšenolo 21:3, 4.

[Mongolo o botlaaseng ba leqephe]

[Setšoantšo se leqepheng la 12]

Yuriko Eto o ithuta le ba bang ka tšepiso ea Bibele ea paradeise ea lefatšeng