Jesu Bophelo le Tšebeletso Tsa Hae

Ke Bo-mang ba Thabileng Kannete?

MOTHO e mong le e mong o batla ho thaba. A hlokometse sena, Jesu o qala Thuto ea hae ea Thabeng ka ho hlalosa bao kannete ba thabileng. Joalokaha re ka lebella, sena kapele se hapa tlhokomelo ea letšoele la hae la bamameli. Leha ho le joalo mantsoe a hae a selelekela a tlameha ho utloahala a loantšana ho ba bangata.

Jesu o qala a tobisitse litlhaloso tsa hae ho barutuoa ba hae: “Ho thabile lōna bafumanehi, hobane ’muso oa Molimo ke oa lōna. Ho thabile lōna ba lapileng joale, hobane le tla khorisoa. Ho thabile lōna ba llang joale, hobane le tla tšeha. Ho thabile lōna neng le neng ha batho ba le hloea . . . Nyakallang letsatsing leo ’me le thenthetse, hobane, bonang! moputso oa lōna o moholo leholimong.”

Ena ke tlaleho ea Luka ea selelekela sa thuto ea Jesu. Empa ho latela tlaleho ea Mattheu, Jesu o boetse o re ba bonolo, ba mohau, ba pelo li hloekileng le ba bōpang khotso ba thabile. Jesu o bontša hore bana ba thabile hobane ba tla rua lefatše, ba tla hauheloa, ba tla bona Molimo ’me ba tla bitsoa bara ba Molimo.

Leha ho le joalo, seo Jesu a se bolelang ka ho thaba ha se feela ho nyakalla kapa ho bobotheha joalokaha motho a natefetsoe. Thabo ea ’nete e tebile haholoanyane, e fana ka khopolo ea ho se ngongorehe, boikutlo ba khotsofalo le ba thabo bophelong.

Ka hona Jesu o bontša hore bao kannete ba thabileng ke batho ba elang hloko seo ba se hlokang moeeng, ba soabisoang ke boemo ba bona ba boetsalibe le ba fihlelang ho tseba le ho sebeletsa Molimo. Ka hona, le haeba ba hloeeloa kapa ba hlorisetsoa ho etsa thato ea Molimo, ba thabile hobane baa tseba hore ba thabisa Molimo ’me ba tla fumana moputso oa hae oa bophelo bo sa feleng.

Leha ho le joalo, boholo ba bamameli ba Jesu, feela joaloka batho ba bang kajeno, bo lumela hore ho ateloa ke lintho le ho thabela menate ke hona ho thabisang motho. Jesu o tseba ka mokhoa o mong. Ha a fana ka papiso e tlamehang ho makatsa boholo ba bamameli ba hae, o re:

“Ho malimabe lōna batho ba ruileng, hobane le se le amohetse matšeliso a lōna. Ho malimabe lōna ba khotšeng hona joale, hobane le tla lapa. Ho malimabe, lōna ba tšehang hona joale, hobane le tla hlomoha le lle. Le malimabe neng le neng ha batho ba le bua hantle, hobane bo-ntat’a bona ba entse baprofeta ba bohata lintho tse joalo.”

Jesu o bolela eng? Ke hobane’ng ha ho ba le maruo, ho phehella menyaka ka thabo le ho thabela lithoriso tsa batho ho tlisa bomalimabe? Ke hobane ha motho a e-na le lintho tsena, ’me a li rata haholo joale ho sebeletsa Molimo, hoo e leng hona feela ho tlisang thabo ea ‘nete, ho qheleloa kathōko bophelong ba hae. Ka nako e tšoanang, Jesu o ne a sa bolele hore ho futsaneha feela, ho lapa le ho hlomoha ho thabisa motho. Leha ho le joalo, hangata batho ba joalo ba haelloang ke lintho tsa bohlokoa ba ka amohela lithuto tsa Jesu ’me ka hona ba hlohonolofatsoa ka thabo ea ’nete.

Kamor’a moo Jesu o re ho barutuoa ba hae: “Le letsoai la lefatše.” Ke ’nete hore ha a bolele hore ke letsoai la sebele. Ho e-na le hoo, letsoai ke sesireletsi. Qubu e khōlō ea lona e ne e le haufi le aletare ea tempele ea Jehova ’me baprista ba sebetsang ba ne ba le sebelisa ho nōka linyehelo.

Barutuoa ba Jesu ke “letsoai la lefatše” ka hore ba na le tšusumetso e sireletsang bathong. Ruri molaetsa oo ba fanang ka oona o tla sireletsa bophelo ba bohle ba o amohelang! O tla etsa hore batho bao e be ba tšoarellang, ba tšepahalang, le ba khabane bophelong hore ba se oele tšenyehong efe kapa efe ea moea kapa ea boitšoaro.

Jesu o bolella barutuoa ba hae, “le leseli la lefatše.” Lebone ha le koaheloe ka nkho empa le lula seluloaneng sa lona, kahoo Jesu o re: “Leseli la lōna le ke le khanyetse batho joalo.” Barutuoa ba Jesu ba etsa sena ka bopaki ba bona ba pontšeng, hammoho le ho sebeletsa e le mehlala e khanyang ea boitšoaro bo lumellanang le melao-metheo ea Bibele. Luka 6:20-26, NW; Mattheu 5:3-16.

◆ Ke bo-mang bao kannete ba thabileng, hona hobane’ng?

◆ Ke bo-mang ba malimabe, hona hobane’ng?

◆ Ke joang barutuoa ba Jesu e leng “letsoai la lefatše” le “leseli la lefatše”?