Jesu Bophelo le Tšebeletso Tsa Hae

Tekanyetso e Phahameng bakeng sa Balateli ba Hae

BAETAPELE ba bolumeli ba talima Jesu e le motlōli oa Molao oa Molimo ka hona ba rera ho ’molaea. Ha Jesu a tsoela pele ka Thuto ea hae ea Thabeng, a hlalosa: “Le se ke la hlōma ekaba ke tlile ho felisa molao, leha e le baprofeta; ha kea tla ho felisa, ke mpa ke tlile ho phetha.”

Jesu o ne a hlonepha haholo Molao ao Molimo ’me a khothalletsa ba bang ho etsa ho tšoanang. Ha e le hantle, o itse: “Ka baka leo, ea tlōlang o mong o monyenyane oa melao eo, ’me a ruta batho ho etsa joalo, o tla bitsoa e monyenyane ’musong oa maholimo,” ho bolelang hore motho ea joalo ho hang a ke ke a kena ’Musong.

Ho e-na le hore Jesu a nyelise Molao oa Molimo, o ne a nyatsa esita le maikutlo a tlatsetsang ho o roba. Kamor’a ho qolla hore Molao o re, “U se ke ua bolaea,” Jesu a eketsa: “Empa ’na, ke re ho lōna: Motho, leha e ka ba mang le mang, ea halefelang ngoan’abo feela, o tla tšoaneloa ke kahlolo.”

Erekaha ha ho halefela motsoalle ho le kotsi, mohlomong le ho isa polaong, Jesu o bontša hore na ke ho fihla boholeng bofe motho a lokelang ho batla khotso. O’a laela: “Ka baka leo, ha u hlahisa kabelo ea hao [ea sehlabelo] aletareng, ’me teng u hopola hobane ngoan’eno o na le taba le uena, siea kabelo ea hao moo, pel’a aletare, u ee ho boelana le ngoan’eno pele, u ntano tla hlahisa kabelo ea hao.”

Ha Jesu a qotsa molao oa bosupa oa Melao e Shome, o tsoela pele: “Le utloile hoba ho boletsoe baholo, ha thoe: U se ke ua feba.” Leha ho le joalo, Jesu o nyatsa le maikutlo a sa fetoheng a isang bofelong. “Motho leha e ka ba mang le mang, ea talimang [“ka ho sa khaotseng,” NW] mosali ho mo lakatsa, o se a mo febile pelong ea hae.”

Jesu ha a buoe ka boikutlo bo fetang bo bobe ba kamano ea liphate empa ka ‘ho talima ho sa khaotseng.’ Ho talimela ruri ho joalo ho tsosa litakatso, tseo ha monyetla o hlaha, li ka isang bofebeng. Motho a ka thibela hona joang? Jesu o bontšitse mehato e matla e ka hlokahalang, ha a re: “Ekare ha leihlo la hao le letona le u lihela, u le honye, ’me u le lahlele hole le uena. . . . Hape, ha letsoho la hao le letona le u lihela, u le pome, ’me u le lahlele hole le uena.”

Hangata batho ba lumela ho tela setho sa ’mele se kulang ho boloka bophelo ba bona. Empa ho ea ka Jesu, ke ha bohlokoa haholo ho ‘lahla’ ntho e ’ngoe le e ’ngoe, esita le ntho e bohlokoa joaloka leihlo kapa letsoho, ho qoba menahano le liketso tse litšila. Ho seng joalo, Jesu o hlalosa hore batho ba joalo ba tla akheloa Gehenna (thotobolong ea matlakala e tukang haufi le Jerusalema), e tšoantšetsang timetso ea ka ho sa feleng.

Hape Jesu o bontšitse kamoo ho ka sebelisanoang le batho ba khopisang. “Le se ke la hanela ea le etsang hampe,” a eletsa. “Empa ekare ha motho a u jabela lerama le letona, u mo sekehele le lona le leng.” Jesu ha a bolele hore motho ha a lokela ho itšireletsa kapa ho sireletsa lelapa la hae ha le hlaseloa. Ho jabela ha ho etsoe ka sepheo sa ho ntša ’mele kotsi, empa, e le ho ntlotlolla motho. Kahoo, seo Jesu a se bolelang ke hore ha e mong a leka ho qhokola ntoa kapa khang, ka ho jabela hoa sebele ka seatla se bulehileng kapa ka mantsoe a nyefolang, ho tla be ho le phoso ho iphetetsa.

Kamor’a hore Jesu a hlokomelise ka molao oa Molimo oa ho rata moahisani, o itse: “Empa ’na, ke re ho lōna . . . ba le hloileng le ba etse hantle, le rapelle ba le tsohelang matla le ba le hlorisang.” Ha a fana ka lebaka le matla la ho etsa sena, o’a eketsa: “[Hore] le tle le be bana ba Ntat’a lōna ea maholimong; hobane o chabisetsa ba babe le ba batle letsatsi la hae.”

Jesu o qetella karolo ena ea thuto ea hae ka ho eletsa: “’Me joale, phethehang, joaleka ha Ntat’a lōna ea maholimong a phethehile.” Jesu ha a bolele hore batho ba tla phetheha ka khopolo e feletseng. Ho e-na le hoo, ka ho etsisa Molimo, ba atolosetsa lerato la bona ho lira tsa bona. Tlhaloso ea mantsoe ana a Jesu ho Luka e re: “’Me joale, e-bang le lereko, joaleka ha Ntat’a lōna le eena a le lereko.” Mattheu 5:17-48; Luka 6:36.

◆ Jesu o bontšitse hlompho e phahameng Molaong oa Molimo joang?

◆ Jesu o fane ka taelo efe e fotholang motso o bakang polao le bofebe?

◆ Jesu o ne a bolela’ng ha a re ho sekeheloe le lerama le leng?

◆ Re ka phethahala joang joaloka ha Molimo o phethahetse?