Ho Hlophisa Hona Joale Bakeng sa Lilemo Tse Sekete Tse Tlang
“Ba tla busa le eena lilemo tse sekete.”—TŠENOLO 20:6.
1. Boemo ba litaba e tla ba bofe lefatšeng nakong ea lilemo tse fetang tse sekete ho tloha hona joale?
ENG! Na re bolela hore nako e fetang lilemo tse sekete ho tloha hona joale, batho ba tla be ba sa ntsane ba le moo lefatšeng? Re bolela sona seo hantle! Ho feta moo, batho bohle ka nako eo ba tla be ba phethahetse ’meleng, pelong, le kelellong—ba tšoana le monna le mosali ba pele ha batho ba ne ba qala ho ba teng lefatšeng lena. E, lilemo tse sekete ho tloha hona joale, batho ba tla be ba le ka setšoantšo sa Molimo le Motsosolosi oa bona ’me ba tšoana le oona. (Genese 1:26-30) Ba tla be ba thabela bophelo ka ho felletseng “tšimong ea Edene,” paradeiseng ea thabo, lefatšeng le hloekisitsoeng le tla beng le sa tlala sepenya sa baahi ba batho. (Genese 2:15) Sena sohle e tla be e le ho phethahatsa morero oa mathomo oa ’Mōpi mabapi le lefatše le ba neng ba tla lula holim’a lona. Phethahatso ena e ntle e tla mo phahamisa e le ea tšepahalang tšepisong ea hae e lerato ea ho hlohonolofatsa batho bohle ho sa tsotellehe khanyetso eohle.
2. Ke joang batho ba lilemong tse fetileng tse makholo a 19 ba bileng le pono ea seo batho ba entsoeng ba phethahetseng ba tlang ho ba sona?
2 Phethahatso eo e hlohonolofetseng e tla ba tlokola ea Puso ea Lilemo tse Sekete ea Molimo ka Mora oa oona ea tlotlisitsoeng, ea ileng a qeta lilemo tse 33 1/2 lefatšeng e le motho ea phethahetseng lilemong tse fetileng tse makholo a 19. Tabeng ea ponahalo eo a ileng a itlhahisa ka eona ka nako eo, rea bala: “Lentsoe le ne le etsoe nama, ’me la aha har’a rōna le tletse mohau le ’nete, ’me re bohile khanya ea lona, e kang khanya ea Mora a ’notši ea tsoang ho Ntate.” (Johanne 1:14) Ka hona ho Jesu Kreste, batho ba Iseraele ka nako eo ba ile ba bona hore na sebopuoa se phethahetseng sa motho se joang. (Luka 3:23, 38) E, lilemong tse fetileng tse makholo a 19 batho ba bang ba ile ba bona hore na batho ba entsoeng ba phethahetseng ba tla ba joang Paradeiseng e tlang ea lefatšeng.
3, 4. (a) Hantle-ntle e tla hle e be ka nako e kae Jehova a tlang ho busa ka Jesu Kreste le 144 000? (b) Ke lentsoe lefe le sebelisetsoang nako eo, ’me see se ile sa bontšoa joang lihloohong tse itseng tsa libuka tsa Watch Tower?
3 Nako eo puso ea ’Muso oa Jehova ka Jesu Kreste le barutuoa ba hae ba tlotlisitsoeng ba 144 000 o tlang ho e nka e ile ea profetoa hore e tla ba lilemo tse sekete. Mabapi le Puso eo ea Lilemo tse Sekete, moapostola Johanne ea seng a hōlile o ile a ngola: “Eaba ke bona literone, ’me ba bang ba lula holim’a tsona, ba filoe matla a ho ahlola; ka bona le meea ea ba khaotsoeng lihlooho ka baka la bopaki ba Jesu le ka baka la lentsoe la Molimo, le ba sa kang ba khumamela sebata, leha e le setšoantšo sa sona, ba sa kang ba amohela letšoao la sona liphatleng tsa bona le matsohong a bona; ba boela ba phela, ’me ba busa le Kreste lilemo tse sekete. Ha e le bafu ba bang, ha ba ka ba tsoha, lilemo tse sekete tseo li e-so ho phethehe. Eo ke tsoho ea pele. Ho lehlohonolo, ho halaletse ba nang le kabelo tsohong ea pele; hobane lefu la bobeli ha le na matla holim’a ba joalo, empa e tla ba baprista ba Molimo le ba Kreste, ’me ba tla busa le eena lilemo tse sekete.”—Tšenolo 20:4-6.
4 Kaha ka Senyesemane bolelele ba nako ea lilemo tse sekete bo ka ’na ba boela ba bitsoa millennium, nako eo e bitsoa Puso ea Kreste ea Millennium. Ba amohelang le ho ruta thuto ena ea Bibele ka linako tse ling ba bitsoa ba-millennium kapa ma-chiliast, ho latela lentsoe la Segerike bakeng sa “sekete.” Ho thahasellisang, meqolo ea Studies in the Scriptures (e kileng ea hatisoa ke Watch Tower Bible and Tract Society) e ne e bitsoa Millennial Dawn. Le buka ea lipina e kileng ea sebelisoa ke Liithuti tsa Bibele tsa Machaba e ne e bitsoa Hymns of the Millennial Dawn.
5. Satane le bademona ba tla ba boemong bofe nakong ea Puso ea Lilemo tse Sekete ea Kreste?
5 Mantsoe “lilemo tse sekete” a ho Tšenolo 20:4 hase tšoantšetso empa a bolela lilemo tse sekete tsa leeto la lefatše ha le pota letsatsi. Nakong eo ea Lilemo tse Sekete, Satane Diabolose le makhotla a hae a bademona o tla be a le ka sekoting, hobane pelenyana feela a bolela ka Puso ea Lilemo tse Sekete ea Kreste, moapostola Johanne o itse: “Ka ntoo bona lengeloi le leng le theoha leholimong, le tšoere senotlolo sa sekoti le lehlaahlela le leholo letsohong la lona. La tšoara drakone, noha ea khale, e leng Diabolose le Satane, ’me la e holehela lilemo tse sekete. La e akhela sekoting, la e koalla teng, ’me la tiisa holim’a sona, hore e se ke ea hlola e khelosa lichaba, lilemo tse sekete li e-so ho phethehe, ka mora’ tseo, e ka khona e lokolleloe motsotso o se mokae.”—Tšenolo 20:1-3.
6. (a) Ba bang ho Baroma ba K’hatholike ba ’nile ba fana ka nako efe bakeng sa ho fela ha Puso ea Lilemo tse Sekete ea Kreste? (b) Haeba sena seo Mak’hatholike a se bolelang e ne e le ’nete, motsotso o se mokae oo Satane a lokolotsoeng mohohlong o se nang bokhutlo ka oona o se o bile molelele hakae?
6 Ba bang ho Baroma ba K’hatholike ba ’nile ba bolela hore Puso ea Lilemo tse Sekete ea Jesu Kreste e ile ea felella ka 1799 ha mabotho a Fora a hapa Roma ’me a theola mopapa hore e se hlole e e-ba ’musi oa eona, hoo a ileng a lelekeloa ka ntle ho naha e le motšoaruoa ho ea Fora, moo a ileng a shoela teng. Baruti ba K’hatholike ba ’nile ba bolela hore Satane le bademona ba hae ka nako eo ba ile ba lokolloa “mohohlong o se nang bokhutlo,” kapa “sekoting,” hore ba nchafatse mosebetsi oa bona oa ho thetsa ka “motsotso o se mokae.” (Tšenolo 20:1-3, Douay Version ea K’hatholike) Haeba seo e ne e le ’nete, se ne se tla bolela hore ‘motsotso o seng mokae’ o se o tsoetse pele ka lilemo tse 190, empa ho sa bonahale hore na o tla fela neng.
7. Bibele e bontša eng ka nako le sebopeho tsa Puso ea Millennium ea Jesu Kreste?
7 Leha ho le joalo, ho latela Mangolo, Puso ea Lilemo tse Sekete ea Jesu Kreste ea sebele ke hona e tla tla. Phethahatso ea hona joale ea boprofeta ba Bibele e bontša hore e haufi haholo. Nakong ea Lilemo tse Sekete tsa sebele, Satane le bademona ba hae ba tla hle ba koalloe ka sekoting, ’me Jesu Kreste le majalefa hammoho le eena a 144 000 ba tla busa holim’a batho bohle ba sa khathatsoe ke letho le tsoang mokhatlong oa Diabolose. Ho phethahatsa selekane sa Jehova le “motsoalle” oa hae Abrahama, tlhohonolofatso ea ka ho sa feleng ea batho bohle ba lopolotsoeng e tla qala ka “bongata bo boholo ba batho,” ba tla pholoha “mahlomola” ao ho seng a tla ke a tšoane le oona ao tsamaiso ena e khopo e tla fela ka ’ona. E tla fetela ho batho ba shoeleng ba libillione ba lopolotsoeng ka “mali a Konyana,” Jesu Kreste. (Jakobo 2:21-23; Tšenolo 7:1-17; Genese 12:3; 22:15-18; Mattheu 24:21, 22) Ntlheng ena, bana ba tla tsosoa borokong ba bona ba lefu mabitleng a khopotso hore ba tle bophelong lefatšeng.—Johanne 5:28, 29.
Mokhatlo o Hlophisitsoeng oa Bokreste
8. Ke mokhatlo o hlophisitsoeng oa mofuta ofe oo buka The New Creation e ileng ea o hlalosa, empa ke mosebetsi ofe oa tlhophiso oo e sa kang ea o bona ka leihlo la kelello?
8 Phethahalong ea morero oa bomolimo, mokhatlo o hlophisitsoeng o mocha o etelletse pele mahlohonolo ao ka lilemo tse makholo. Mabapi le mokhatlo o hlophisitsoeng ona, rea bala: “Motho ha a le ho Kreste, ke ’mōpuoa [“pōpo,” NW] e mocha.” “Ho bolla le boqai hase letho, empa eo e leng taba ke hore motho e be ’mōpuoa [“pōpo,” NW] e mocha.” (2 Ba-Korinthe 5:17; Ba-Galata 6:15) Morao koana ka 1904, buka The New Creation e ile ea hlokomelisa ka mokhatlo ona o hlophisitsoeng o mocha o ileng oa qala ho ba teng lekholong la pele la lilemo C.E. (Studies in the Scriptures, Series VI, Study V, e reng “Mokhatlo o Hlophisitsoeng oa Pōpo e Ncha”) Ka lebaka la maikutlo a eona ka seo ho fela ha Mehla ea Balichaba ka 1914 ho neng ho tla se bolela, buka eo ha ea ka ea bona ka leihlo la kelello mosebetsi o tsotehang oa tlhophiso o neng o lokela ho etsahala ka morao ho liphello tse senyang tsa ntoa ea pele ea lefatše ea histori ea motho.—Luka 21:24, KJ.
9. Masala a pōpo e ncha a ile a ema ho talimana le phephetso ea eng?
9 Ho bolokoa ha masala a pōpo e ncha ea moea ho isa bofelong ba Ntoa ea I ea Lefatše ka 1918 le ho bolokoa ha ’ona a ntse a phela nameng ho kena selemong sa ka morao ho ntoa sa 1919 ho tlile e le mohlolo o tsotoang. Empa maemo a lilemo tse sekete a ne a e-so ho tle. Ka ho totobetseng, he, ho ne ho sa ntsane ho e-na le mosebetsi o mongata bakeng sa masala a pōpo e ncha hore a o etse lefatšeng pele a fumana tšepo ea ’ona ea leholimo ea ho kopanela le Jesu Kreste mosebetsing oa lilemo tse sekete. Ka baka leo, tlhokahalo e khōlō e ne e le ho tsosolosa le ho hlophisa bocha masala ana. Kahoo, ka tumelo e sa senyehang le ka cheseho bakeng sa mosebetsi o thabisang o ka pele, a ile a ema ho talimana le phephetso eo.
10. Ke lipotso life tse ileng tsa phahama mabapi le ba limillione ba neng ba lebelletsoe ho pholohela tsamaisong e ncha ea lintho?
10 Masala a tlotsitsoeng a ne a lebelletse hore ba bang ba batho ba pholohe bofelo bo boima ba tsamaiso ena e khopo lefatšeng le ho fetela Pusong ea Jesu Kreste ea Millennium. Hona ho bile joalo haholo ka morao ho puo ea phatlalatsa e neng e re “Limillione tse Phelang Hona Joale li na le Monyetla oa ho se Shoe le ka Mohla” e ileng ea fanoa Los Angeles, California, selemong sa ntoa sa 1918. Na baa ba limillione ba neng ba tla pholoha Harmagedone ba ne ba lokela ho hlophisoa? (Tšenolo 16:14-16) Pele ba kenngoa ho Millennium hore e be karolo ea “lefatše le lecha,” na ba ne ba tla nka karolo mosebetsing oa ho bolela ka ’Muso hammoho le masala? (2 Petrose 3:13) Lipotso tsena li ne li tla arabeloa ka liketsahalo tsa ka morao ho ntoa.
11. (a) Ho ne ho tla lokela hore ho etsoe joang ka linku tse ling tse neng li lokela ho fetoha mohlape o le mong le masala? (b) Ke hobane’ng ha ho se tšoane ha tšepo e ne e se lebaka la karohano pakeng tsa masala le linku tse ling?
11 Mantsoe a latelang a Molisa ea Molemo, Jesu Kreste, a ile a hlahella hantle ka pele-pele: “Ke sa na le linku tse ling, tsee e seng tsa lesaka lena; le tsona e ka khona ke li tlise, ’me li tla utloa lentsoe la ka, ’me mohlape o tla ba mong, molisa le eena a be mong.” (Johanne 10:16) Haeba ho ne ho tla hlokahala hore masala a tlotsitsoeng a hlophisetsoe mosebetsi oa ka morao ho ntoa ho tloha ka 1919 ho ea pele ’me haeba hamorao linku tse ling li ne li tla fetoha mohlape o le mong le masala a ka lesakeng lena, joale ho ne ho tla etsahala eng? E, linku tseo tse ling le tsona li ne li tla lokela ho hlophisoa hammoho le masala ao! ’Nete ea hore linku tsena tse ling li ne li e-na le tšepo e fapaneng—ea bophelo paradeiseng ea lefatšeng ea thabo—e ne e se lebaka la karohano pakeng tsa tsona le masala. Bohle ba ne ba latetse Molisa a le mong feela, ’me ho ne ho ke ke ha e-ba le karohano pakeng tsa lihlopha tsena tse peli ho fihlela ha masala a tlotsitsoeng a tlotlisoa ’Musong.
12. (a) Ke eng eo e leng ea bohlokoa haholoanyane ho feta polokeho ea batho? (b) Ke neng hona e le ka lebaka lefe ho ileng ha fetoha habohlokoa haholo ho phatlalatsa ka ’Muso?
12 Poloko ea batho sebeng le lefung, ho fela ha khatello ea lefatše la Satane, le ho tsosolosetsoa ha batho ba utloang Paradeiseng e theiloeng bocha lefatšeng ka bophara ke litšobotsi tse hlahelletseng tsa morero o lerato oa Jehova. Leha ho le joalo, ho na le ntho e ’ngoe ea bohlokoa haholoanyane bokahohleng bohle. Ke eng eona eo? Ke ho phahamisoa ha bobusi ba bokahohle ba Jehova Molimo hammoho le ho khethoa ha lebitso le halalelang la hae. Hore ho ne ho le nakong ho phatlalatsa ’Muso oa Jehova o matsohong a Morena Jesu Kreste ea busang, ho ile ha hatisoa ka 1922 kopanong ea bobeli ea Liithuti tsa Bibele tsa Machaba, Cedar Point, Ohio. Kaha Mehla ea Balichaba e ne e ile ea fela ka 1914, e ne e le nako e loketseng ea ho phethahatsa mantsoe a boprofeta a Jesu: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” (Mattheu 24:14) ’Muso o neng o tla phahamisa bobusi ba bokahohle ba Jehova le ho khetha lebitso le halalelang la hae o ne o ile oa theoa leholimong ka 1914, ’me Jesu Kreste o ne a busa har’a lira tsa hae. Tsena e ne e le litaba tse molemo ka ho fetisisa tse neng li lokela ho boleloa ka mekhoa eohle e teng ho phatlalatsa Morena le ’Muso oa hae!
13. Bakeng sa mosebetsi oa ho bolela ka ’Muso, Molimo o ile oa lokisetsa eng, hona hobane’ng?
13 Jehova ke mohlophisi ea akaretsang bokahohleng bohle, hobane ke Ea Holimo-limo, Ea Phahameng ka ho Fetisisa. Joale o ile a hlokomela hore mosebetsi oa ho bolela ka ’Muso oa hae har’a lichaba tsohle pele bofelo ba tsamaiso ena bo e-tla, o hlophisoa mona lefatšeng. Ka baka leo, litho tsa masala a tlotsitsoeng tse ntseng li le teng li ile tsa kopanngoa, ho ba mokhatlo o hlophisitsoeng oa machaba hore li finyelle thato ea hae. Litho tsena li tlameha ho bolella lefatše hore kaha Satane o ile a qholotsa bobusi ba bokahohle ba Jehova, hore bobusi bona ke ntho ea sebele le hore bo na le tokelo ho tlameha ho phahamisoa le ho lokafatsoa ka mehla eohle.
Mokhatlo o Hlophisitsoeng oa Pele ho Millennium
14. (a) Pele ho Mehla e Tloaelehileng ea rōna, ke mokhatlo ofe o hlophisitsoeng o ileng oa fetoha karolo ea mokhatlo o hlophisitsoeng oa bokahohle oa Jehova? (b) Davida o ile a ipaka joang hore ke mohlophisi ea hlahelletseng?
14 Ka lilemo tse makholo a 15 pele ho Mehla e Tloaelehileng ea rōna, Jehova Molimo o ne a e-na le mokhatlo o hlophisitsoeng o bonahalang lefatšeng. O ile a sebelisa moprofeta Moshe e le mokena-lipakeng oa Hae ha a hlophisa sechaba sa Iseraele ka mor’a ho se lopolla Egepeta, ’muso oa pele oa lefatše oa histori ea Bibele. Tlas’a Molao oa Moshe, Iseraele e ile ea fetoha karolo e bonahalang ea mokhatlo o hlophisitsoeng oa bokahohleng oa Jehova. Mohlophisi ea hlahelletseng haholo har’a batho bana ba khethiloeng ba Molimo e ne e le morena le molisa Davida, eo ka eena re balang: “Davida a ba hlophisa [Balevi ba neng ba sebeletsa sehalalelong sa Jehova] ka likarolo, a ba rehella ka Gershone, Kehathe, le Merari, bara ba Levi.” “A ba hlophisa, [baprista] ka ho ba laola ka lotho, kaha ho ne ho e-na le basebeletsi ba halalelang le basebeletsi ba Molimo lesikeng la Eleazare le ho la Ithamare.”—1 Likronike 23:3, 6; 24:1, 5, The New English Bible.
15. (a) Baiseraele ba ile ba tsoa Egepeta ka mokhoa o joang? (b) Ke bafe hape ba ileng ba ikhethela ho tloha Egepeta, ’me na ba ile ba manamana le Baiseraele?
15 Lilemo tse makholo pele ho mehla ea Davida, ha Baiseraele ba tloha Egepeta, ha baa ka ba tsoa ka lepotla-potla ba entse lephehlo-phehlo la bohlanya empa ba ile ba tloha ka mokhoa o laolehileng. Sena se ile sa bontša mosebetsi o motle oa tlhophiso o entsoeng ke mokena-lipakeng oa bona, Moshe. Bongata bo boholo ba batho bao e seng Baiseraele bo ile ba ea le bona, bo ile ba ikhethela ho ema le batho ba Molimo o sebetsang mehlolo, Jehova, o neng o le matla haholo ho feta melimo eohle ea Egepeta. Ho sa tsotellehe mathata a mangata, nakoana hamorao, “letšoele le kopa-kaneng” le neng le khahliloe ke batho ba khethiloeng ba Jehova le ne le sa ntsane le eme le bona lefeelleng le tšabehang la Sinai. (Exoda 12:37-51; Numere 11:4) Ho totobetse hore letšoele leo le kopakaneng le ile la kena hammoho le Baiseraele Lefatšeng la Pallo tlas’a boeta-pele ba mohlahlami oa Moshe, Joshua, hobane Molimo o ile oa ahlola hore ho etsoe tokisetso mono bakeng sa bajaki ba joalo ba basele.
16. (a) Letšoele le kopakaneng le ne le tšoantšetsa bo-mang esale pele? (b) Baa ba lokela ho etsa’ng ho pholoha bofelo ba tsamaiso ee?
16 Letšoele leo le kopakaneng le neng le e-tsoa Egepeta ea Bofaro le tšoantšelitse esale pele bongata bo boholo ba batho ba lekholong lena la bo20 la lilemo. Hase Baiseraele ba moea empa ke linku tse ling tsa Molisa ea Molemo, Jesu Kreste. Tsona hammoho le masala a tlotsitsoeng, li lebelletse ho lopolloa ka ho felletseng ho se neng se tšoantšetsoa ke Egepeta, tsamaiso ea lintho ea lefatše eo Faro e Moholoanyane, Satane Diabolose, e leng molimo oa eona. (Johanne 10:16; 2 Ba-Korinthe 4:4; Tšenolo 7:9) Empa ke eng seo li tlamehang ho se etsa hore li pholohe timetso e mabifi ea lefatše la khale la Satane le ho kena lefatšeng le lecha le tšepisitsoeng tlas’a Joshua e Moholoanyane, Jesu Kreste? (2 Petrose 3:13) Li tlameha ho ipoloka li le tumellanong le litokisetso tsa tlhophiso tsa mokhatlo o hlophisitsoeng o bonahalang oa Jehova, masala a Baiseraele ba moea.
17. Batho ba bongata bo boholo ba itšoara joang lefatšeng lena le mofere-fere, ’me ke eng eo ba e lebelletseng?
17 E bile haholo-holo ho tloha bohareng ba lilemo tsa pele tse mashome a mane tsa lekholo lena la bo20 la lilemo moo bongata bo boholo ba linku tse ling bo ’nileng ba tlisoa mohlapeng o le mong o hlophisitsoeng tlas’a Molisa a le mong ea tlotlisitsoeng, Morena Jesu Kreste ea busang. Har’a lefatše le ntseng le e-ba mofere-fere ka ho eketsehileng ho sa tsotellehe ho ba teng ha mokhatlo oa Machaba a Kopaneng, bao ba bongata bo boholo ba batho ka lipelo tsohle ba tšehetsa masala a tlotsitsoeng ’me kahoo ba fana ka bopaki ba matla a kopanyang a moea o halalelang oa Jehova. Ka boikemisetso, ba tsoela pele ba hlophisitsoe le masala ha ba ntse ba lebelletse tšebeletso e khethehileng lefatšeng nakong ea Puso ea Lilemo tse Sekete ea Jesu Kreste.
Maikutlo a Hao ke Afe?
◻ Mangolo a bontša eng ka nako le sebopeho tsa Puso ea Jesu Kreste ea Millennium?
◻ Ke eng ea bohlokoa haholoanyane ho feta polokeho ea batho?
◻ Pele ho Mehla e Tloaelehileng ea rōna, ke mokhatlo ofe o hlophisitsoeng o ileng oa fetoha karolo ea mokhatlo o hlophisitsoeng oa bokahohleng oa Jehova?
◻ Bao ba ileng ba tšoantšetsoa esale pele ka letšoele le kopakaneng ba pholohela Pusong ea Lilemo tse Sekete joang?