Lula U Phela Hantle Tumelong!
Lintlha tse Khōlō tsa Tite
LIPHUTHEHO tsa Bokreste tse sehleke-hlekeng sa Mediterranean sa Kreta li ne li hloka tlhokomelo ea moea. Ke mang ea neng a ka li thusa? Ke mosebetsi-’moho le Pauluse Tite! O ne a le sebete, a tšoanelehela ho ruta, a chesehela mesebetsi e metle, ’me a phela hantle tumelong.
Pauluse o etetse Kreta pakeng tsa ho kenngoa ha hae teronkong ka lekhetlo la pele le ka lekhetlo la bobeli Roma. O ile a siea Tite sehleke-hlekeng hore a lokise lintho tse ling le ho khetha baholo ba phutheho. Tite o ne a tla boela a bitsoa hore a khalemele baruti ba bohata le ho beha mohlala o motle. Sena sohle se senoloa lengolong la Pauluse le eang ho Tite, leo mohlomong a le rometseng a le Macedonia pakeng tsa 61 le 64 C.E. Ho sebelisa keletso ea moapostola ho ka thusa balebeli le balumeli-’moho ba kajeno ho ba sebete, ho cheseha, le ho phela hantle moeeng.
Ho Hlokahala Eng ho Balebeli?
Ho ne ho hlokahala hore ho khethoe balebeli le ho sebetsana le mathata a mang a tebileng. (1:1-16) Hore monna ea itseng a khetheloe ho ba molebeli, o ne a lokela hore ho se be letho leo a qosoang ka lona, a behe mohlala o motle ka boeena le bophelong ba hae ba lelapa, a be le moea oa ho amohela baeti, e be ea leka-lekaneng, ’me a be le boitšoaro. O ne a lokela ho ruta hoo e leng ’nete ’me a hlokomelise ba hlahisang lipono tse ikhanyetsang le ho ba khalemela. Ho ne ho hlokahala sebete hobane banna ba sa laoleheng ka liphuthehong ba ne ba lokela ho thibeloa. Hona ho ne ho hlokahala haholo-holo ho ba khomaretseng lebollo, hobane ba ne ba khelositse malapa a bona kaofela. Ho ne ho hlokahala khalemelo e boima hore liphutheho li lule li phela hantle moeeng. Kajeno, ho hlokahala hore balebeli ba Bakreste le bona ba be sebete ho fana ka khalemelo le tlhokomeliso, ka morero oa ho haha phutheho.
Sebelisa Thuto e Phelisang Hantle
Tite o ne a lokela ho fana ka thuto e phelisang hantle moeeng. (2:1-15) Banna ba hōlileng ba ne ba lokela ho beha mohlala o motle ho bontšeng ho leka-lekana, ho nkeng litaba ka ho teba, ho hlaphoheloeng kelellong, tumelong, leratong, le mamellong. Basali ba hōlileng ba ne ba lokela hore “ba hlomphehe boitšoarong.” (NW) Joaloka “matichere a se lokileng,” (NW) ba ne ba ka thusa basali ba bacha ho ba le pono e nepahetseng ka mesebetsi ea bona joaloka basali le bo-’mè. Bahlankana ba ne ba lokela ho ba le kelello e hlaphohileng, ’me bahlanka ba ne ba lokela ho ikokobeletsa benghali ba bona ka mokhoa o neng o tla khabisa thuto ea Molimo. Bakreste bohle ba ne ba lokela ho hana ho hloka bomolimo ’me ba phele ka ho hlaphoheloa kelellong tsamaisong ena ea lintho ha ba ntse ba emetse ho bonahatsoa ho khanyang ha Molimo le Jesu Kreste, “ea iteletseng rōna, a tle a re lopolle bokhopong bohle, ’me a re hlatsoe, a tle a iketsetse ka rōna sechaba see e leng sa hae ka sebele, se chesehelang mesebetsi e metle.” Ka ho sebelisa keletso eo e phelisang hantle, le rōna a re ‘khabiseng thuto ea Molimo.’
Keletso ea Pauluse e qetellang e phahamisa bophelo bo botle ba moea. (3:1-15) Ho hlokahala hore ho bontšoe boikokobetso bo loketseng ho babusi le ho hlaolela ho ba le kahlolo e ntle. Bakreste ba na le tšepo ea bophelo bo sa feleng, ’me mantsoe a Pauluse a ne a lokela ho hatisoa hore a ba khothatse le ho boloka likelello tsa bona mesebetsing e metle. Likhang tsa booatla le lintoa tabeng ea Molao li ne li lokela ho qojoa, ’me motho ea hlahisang thuto ea bokhelohi o ne a lokela ho furalloa ka mor’a hore a khalemeloe habeli. Ha baholo ba sebelisa keletso e joalo kajeno, bona le balumeli-’moho le bona ba tla lula ba phela hantle tumelong.
[Lebokose/Setšoantšo se leqepheng la 22]
E se be Lekhoba la Veine: Le hoja basali ba sa tlameha ho ruta banna ka phuthehong, bo-khaitseli ba hōlileng ba ka laea basali ba bacha boinotšing. Empa hore ba atlehe ntlheng ena, basali ba hōlileng ba tlameha ho ela hloko mantsoe a Pauluse: “Basali ba hōlileng ba ke ba hlomphehe boitšoarong, ba se ke ba etselletsa, leha e le ho ba makhoba a veine e ngata, e be matichere a se lokileng.” (Tite 2:1-5, NW; 1 Timothea 2:11-14) Ka lebaka la ho ameha ka liphello tsa ho noa, balebeli, bahlanka ba sebeletsang, le basali ba hōlileng ba tlameha hore ba bontše ho leka-lekana, ba se ke ba inehela veineng e ngata. (1 Timothea 3:2, 3, 8, 11) Bakreste bohle ba tlameha ho qoba botahoa ’me ho hlokahala hore ba qobe ho noa lino tse tahang ha ba etsa “mosebetsi o halalelang” oa ho bolela litaba tse molemo.—Ba-Roma 15:16, NW; Liproverbia 23:20, 21.