“Khutlelang ho ’Na, ’me ke Tla Khutlela ho Lōna”

LELAPA le ne le intšelitse merung ’me le thabile. Eaba Peter, ngoana oa ho fela, oa hlahlathela, a lelekisa mochalla ho theosa le thota. Ka tšohanyetso leholimo la koaheloa ke maru, ’me pula ea qala ho na. Pele e ne e le lefafatsane, empa butle-butle e ile ea phukhumetsa. Lelapa le ile la bokella liphahlo tsa lona ka potlako ’me la mathela koloing ea lona. ’Me bohle ba ne ba ipotsa hore Peter o hokae.

Nakong eo, Peter o ne a leka ho khutlela ho lelapa. Ho ne ho le thata ho bona ka pele, ’me tsela e nyolosang thota e ne e thella ke pula. A sa lebella, lefatše le ne le bonahala eka lea khohlela tlas’a maoto a hae ha a khothometseha ’me a oela ka mokoting o tebileng, o patehileng. O ile a leka ho ngoangoarela hore a tsoe, empa mahlakore a ne a thella haholo.

Metsi a pula a ne a phorosela ho theosa le thota ’me a tlatsa mokoti ka seretse. Peter o ne a le kotsing ea sebele ea ho qabelloa ke seretse. Empa ntate oa hae o ile a mo fumana ’me a mo hulela ka ntle ka ropo. Hamorao, Peter o ile a omanngoa haholo bakeng sa ho hlahlathela. Empa, ho ne ho le bonolo haholo ho amohela ho omanngoa, ha ’mè oa hae a mo sikere ’me a mo phuthetse ka kobo.

Phihlelo ena e bontša se etsahalang ho ba neng ba atisa ho ba har’a batho ba Molimo. Ba oetse ka mokoting o tebileng oa tsamaiso ena ea lintho ’me ka ho hloka tšepo ba leka ho tsoela ka ntle le ho khutlela tširelong ea mokhatlo o hlophisitsoeng oa Jehova. Ke ho thabisang hakaakang ho tseba hore Jehova o mosa ebile o ikemiselitse ho ‘theola ropo’ le ho ba thusa ho khutlela tširelong!

Litšebelisano tse Mosa tsa Jehova

Morao koana mehleng ea Iseraele, ha tempele e qeta ho ahoa, Salomone o ile a etsa thapelo ea khakolo eo ho eona a ileng a qela Jehova ho mamela likōpo tse etsetsoang tempeleng. Joale o ile a re: “Mohla [Baiseraele] ba siteloang, kamoo ho seng motho ea sa sitoeng, ’me u ba halefetse, u ba neetse lireng tsa bona, . . . ha ba ka ikhopola, ba le naheng ea moo ba isitsoeng kholehong, ba sokolohela ho uena, ba u rapela, ba le naheng ea ba ba isitseng kholehong, . . . u mamele thapelo ea bona le kōpo ea bona, u le maholimong, tulong tsa hao, o ba emele nyeoeng ea bona.”—1 Marena 8:46-49.

Kōpo ea Salomone e ile ea phethahatsoa ka makhetlo a mangata historing ea Iseraele. Nako le nako, batho ba Molimo ba ’nile ba fapoha le ho o furalla. Eaba ba lemoha phoso ea bona ’me ba khutla, ba o batla. ’Me Jehova a ba tšoarela. (Deuteronoma 4:31; Esaia 44:21, 22; 2 Ba-Korinthe 1:3; Jakobo 5:11) Ka Malakia, Jehova o ile a akaretsa tšebelisano ea lilemo tse sekete le batho ba Hae ha A ne a re: “Ha e sa le mehleng ea bo-ntat’a lōna, la kheloha litaelo tsa ka, ’me ha lea ka la li boloka; khutlelang ho ’na, ’me ke tla khutlela ho lōna.”—Malakia 3:7.

Lintho tse Khelosang

Joaloka Baiseraele, kajeno batho ba bangata ba Molimo baa fapoha le ho ikarola mokhatlong o hlophisitsoeng oa Jehova. Hobane’ng? Ba bang ba latella ntho e itseng e bonahalang e se na kotsi qalong, joaloka Peter ha a lelekisa mochalla. Sena ke se ileng sa etsahala ka Ada. Oa tlaleha: “E ne e le tloaelo hore rōna kaofela ba sebetsang ’mōho re ee lijong tsa motšehare sebakeng se haufinyane sa ho jela. Kahoo ha ba ne ba ’memela ho noa kofi le bona ka mor’a mosebetsi, ho ne ho se thata ho amohela memo. Ke ile ka ikemela ka hore ha ke sebelise nako eo ke neng ke lokela ho e sebelisetsa liboka kapa boboleli. Ke ne ke sa hlokomele hore sena e ka ’na ea e-ba ho hlōleha ho ela hloko molao-motheo o ho 1 Ba-Korinthe 15:33.

“Kapele, ke ne ke tsamaea le bona ka Meqebelo ho ea palama lipere. Eaba ke se ke ea le bona libaesekopong le holong ea litšoantšiso. Hoo ho ile ha fella ka hore ke se be teng libokeng tse ling. Qetellong, ke ne ke sa ee libokeng leha e le life kapa hona ho kopanela mosebetsing oa boboleli. Ha ke hlokomela se etsahalang, ke ne ke se ke sa kopanele le mokhatlo o hlophisitsoeng.”

Mabakeng a mang lebaka e ka ’na ea e-ba sebe se tebileng se patiloeng se etsang hore motho a ikutloe a sa tšoanelehe ho sebeletsa Molimo. (Pesaleme ea 32:3-5) Kapa motho a ka ’na a khopisoa ke ntho e ileng ea buuoa kapa ea etsoa ke Bakreste-’moho, a sa utloisise, joalokaha Salomone a boletse, hore “ha ho motho ea sa etseng sebe.”—1 Marena 8:46, NW; Jakobo 3:2.

Leha ho le joalo, ba bang ba nyahamisoa ke ho fumana taeo. (Ba-Heberu 12:7, 11) Khoheli ea mokhoa oa bophelo oa lintho tse bonahalang e entse hore ba bangata ba khaotse ho sebeletsa Molimo. Hangata, ka ho batla katleho ea lefatše, ba ile ba kenella ka ho felletseng mosebetsing oa boipheliso hoo ho se nang sebaka sa tšebeletso ea Molimo bophelong ba bona. (Mattheu 13:4-9; 1 Timothea 6:9, 10) Na boemo ba ba joalo bo hlokisa tšepo?

Na u Tla Arabela Memong ea Jehova?

Ka lekhetlo le leng Jesu o ile a bua ntho e itseng eo ho leng thata ho e utloisisa, ’me ba bang ba ile ba khopeha. Tlaleho e re: “Barutuoa ba bangata ba hae ba khutlela morao, ba se ke ba hlola ba tsamaea le eena.” Empa hase bohle ba ileng ba khopeha. Tlaleho ea Bibele e tsoela pele: “Eaba Jesu o re ho ba leshome le metso e ’meli: Na le lōna le rata ho ikela na? Eaba Simone Petrose o mo araba, a re: Morena, re ka ea ho mang? ke uena ea nang le mantsoe a bophelo bo sa feleng.” (Johanne 6:66-68) Ka bohlale baapostola ba Jesu ba ne ba hlokomela hore ho ne ho le kotsi ho tlohela Jesu.

Ba bang ba fapohang ba fihlela qeto e tšoanang qetellong. Baa hlokomela hore ho tlohela mokhatlo o hlophisitsoeng oa Molimo e bile khato e kotsi le hore ke feela ka Jehova le Kreste ba ka fumanang mantsoe a lebisang bophelong. Hang ha ba hlokomela boemo bo joalo, ba lokela ho hlokomela hore nako ea ho inahana hape e sa le teng, ba kōpe tšoarelo ho Jehova, ’me ba khutlele ho eena. Ke Jehova ka boeena ea faneng ka memo: “Khutlelang ho ’na, ’me ke tla khutlela ho lōna.”—Malakia 3:7.

Ha e le hantle, Mokreste ea tšepahalang a ka fumana thabo hokae ntle le ho sebeletseng Jehova? Haeba motho a fapoha ka mor’a ho kopanela le mokhatlo o hlophisitsoeng oa Molimo ka nako e itseng, o emetsoe ke eng lefatšeng le ka ntle? Kapele o tla hlokomela hore joale e se e le karolo ea lefatše le ntseng le e-ba mabifi ka ho eketsehileng. O tla iphumana a se a ameha tsamaisong ea lintho e tletseng boikaketsi, bohata, thetso, le boitšoaro bo bobe, lefatše le kotsi ’me le sa thabise joaloka mokoti o tletseng seretse o neng o behile bophelo ba Peter e monyenyane kotsing. Ha monahano o hlaphoheloa ’me a lemoha hore bophelo ba hae bo sa feleng bo kotsing, ntle ho tšenyo ea nako o lokela ho batla thuso ea ho itšoasolla boemong boo. Leha ho le joalo, ho khutla ho ka ’na ha se be bonolo.

Na u e mong ea ileng a leka ho khutlela ho Jehova empa ua fumana ho le thata? Joale tseba hore u hloka thuso. ’Me lumela hore baena le bo-khaitseli ba hao mokhatlong o hlophisitsoeng oa Molimo ba ikemiselitse ho u thusa. Empa u lokela ho etsa boiteko ba ho bontša Jehova takatso ea hao. Ke nako ea ho ‘hlaphoheloa monahanong’ le ‘ho khutlela ho Jehova.’—1 Marena 8:47, NW.

Ho Thusoa ho Khutla

Ada o hlalosa se mo thusitseng ho khutlela ho Jehova: “Feela ka nako e tšoanelehang, khaitseli ea neng a nkhannela thuto o ile a ’memela ho ea le eena kopanong ea potoloho. O ne a le mosa! ’Me ha a ka a ’nyatsa ho hang! O ne a bontša lerato le leholo. Ke ne ke se ke qetile selemo ke sa ee libokeng, empa ke ne ke nahanisisa ka bofeela ba lefatše le ’nete ea hore khoheli ena e bonahalang e tlisa masoabi, ho ferekana, le boitšoaro bo bobe. Kahoo ke ile ka etsa qeto ea ho ea kopanong. Ha ke fihla holong eo kopano e neng e tšoaretsoe ho eona, ke ile ka ea litulong tse ka morao-rao ’me ka ipata lefifing khosheletsaneng. Ke ne ke sa batle hore baena ba mpone ’me ba ntlhome lipotso.

“Leha ho le joalo, lenaneo le ile la fana ka keletso eo ke neng ke e hloka haholo. Ha kopano e fela, ke ne ke sa ikemisetsa feela ho khutlela bathong ba Jehova empa hape le ho inehela ho eena ka pelo eohle. Baena ba ile ba nkamohela ka mofuthu ’me ‘lehlasoa’ le ne le khutlile.” (Luka 15:11-24) Sena sohle se etsahetse nakong e telele e fetileng, ’me e se e le lilemo tse fetang 25 Ada a le tšebeletsong ea nako e tletseng.

Taba ea e mong ea ileng a fapoha e bile le phello e thabisang ka ho tšoanang. Baholo ba bang ba ile ba neha José keletso e neng e bontša monahano oa bona ho feta melao-motheo ea Bibele. Qetellong, José a nyahame ebile a halefile o ile a khaotsa ho ba mafolo-folo. Lilemong tse robeli o ne a ikarotse bathong ba Molimo, ’me nakong eo o ile a nyala motho ea sa lumelang ’me ea e-ba ntate oa bana, bao e mong oa bona a ileng a mo lumella hore a kolobetsoe Kerekeng ea K’hatholike.

Qetellong, o ile a thuseha ha molebeli oa potoloho a mo etsetsa maeto a bolisa ’me molebeli a khothatsa baholo ho etsa se tšoanang. O ile a tsosolosoa ’me a thabela ho bona mosali oa hae a e-ba le thahasello ’neteng. Hona joale José o sebeletsa joaloka moholo phuthehong. Joalokaha liphihlelo tsena tse peli li bontša, Jehova ha a thibele tlhohonolofatso ho ba arabelang hamolemo memong ea hae e lerato ea ho khutla.

Leha ho le joalo, hore motho a thabele mahlohonolo a joalo, o lokela ho amohela thuso e fanoang le ho arabela ho eona. Liphuthehong tse ngata baena ba hopola ba seng ba se mafolo-folo ’me ba ba etela nako le nako, ba leka ho ba thusa. Ho arabela thusong e joalo ho bontša kananelo bakeng sa mosa oa Jehova.—Jakobo 5:19, 20.

Ka ’nete, ena ke nako ea ho arabela memong ea Jehova: “Khutlelang ho ’na.” (Malakia 3:7; Esaia 1:18) U se ke ua ema halelele ho feta mona. Liketsahalo tsa lefatše li feta ka lebelo le makatsang. Sebaka se molemo linakong tsa mofere-fere tse larileng ka pele ke ho ba ka har’a mokhatlo o hlophisitsoeng oa Jehova, re sireletsehile tlas’a tšireletso ea hae. Ke feela ba tšabelang ho Jehova ba nang le tšepo ea ho patoa khalefong ea letsatsi le leholo la bohale ba hae.—Sofonia 2:2, 3.

[Setšoantšo se leqepheng la 30]

Na u tla arabela memong ea Jehova, “Khutlelang ho ’na”?