Ba Thuseng Hore ba Khutle Kapele!

“Re tla tloha re ee ho mang? Ke uena ea nang le lipolelo tsa bophelo bo sa feleng.”​—JOH. 6:68.

1. Petrose o ile a re’ng ha barutuoa ba bangata ba furalla Jesu?

KA LEKHETLO le leng barutuoa ba bangata ba Jesu Kreste ba neng ba nyatsa e ’ngoe ea lithuto tsa hae ba ile ba mo furalla. O ile a botsa baapostola ba hae a re: “Le lōna ha le batle ho tsamaea, na ha ho joalo?” Petrose o ile a araba a re: “Morena, re tla tloha re ee ho mang? Ke uena ea nang le lipolelo tsa bophelo bo sa feleng.” (Joh. 6:51-69) Ho ne ho se moo ba neng ba ka ea teng. Nakong eo, Tsamaiso ea Bolumeli ea Sejuda e ne e se na “lipolelo tsa bophelo bo sa feleng”, ebile kajeno lipolelo tse joalo ho hang li ke ke tsa fumanoa ho Babylona e Moholo, e leng ’muso oa lefatše oa bolumeli ba bohata. Ho batho bafe kapa bafe ba hlahlatheletseng hōle le mohlape oa Molimo empa ba batla ho khahlisa Jehova, “e se e le nako ea hore [ba] tsohe borokong” ’me ba khutlele lesakeng.​—Bar. 13:11, Bibele—Phetolelo e Ncha.

2. Re lokela ho hopola eng mabapi le litaba tsa lekunutu kapa tsa boahloli?

² Jehova o ile a bontša hore o ne a amehile ka linku tse lahlehileng tsa Iseraele. (Bala Ezekiele 34:15, 16.) Ka tsela e tšoanang, baholo ba Bakreste ba lakatsa ho thusa motho ea kang nku ea hlahlatheletseng hōle le mohlape ebile ba na le boikarabelo ba ho etsa joalo. Haeba ba abela mohoeletsi hore a ithute le motho ea khathetseng moeeng ea batlang ho thusoa, ke sefe se lokelang ho etsoa haeba motho ea khannang thuto a tseba hore motho eo o entse sebe se tebileng? Ho e-na le ho fana ka keletso tabeng leha e le efe ea boahloli kapa ea lekunutu, mohoeletsi o lokela mo eletsa hore a bue le baholo. Haeba a sa etse joalo, mohoeletsi ka boeena o lokela ho tsebisa baholo.​—Lev. 5:1; Bagal. 6:1.

3. Monna ea neng a e-na le linku tse 100 o ile a etsa’ng ha a fumana e neng e lahlehile?

³ Sehloohong se fetileng ho builoe ka papiso ea Jesu ea monna ea neng a e-na le linku tse 100. Ha nku e ’ngoe e ne e le sieo ka sakeng, o ile a siea tse 99 eaba o batla eo e lahlehileng. Monna eo o ile a thaba hakaakang ha a e fumana! (Luka 15:4-7) Re thaba ka tsela e tšoanang ha e ’ngoe ea linku tsa Molimo e neng e le sieo mohlapeng e khutla. Ho ka etsahala hore ebe baholo le litho tse ling tsa phutheho ba ile ba susumetsoa ke lerato hore ba etele motho ea khathetseng moeeng. Le bona ba batla ho bona motho eo a khutlela lesakeng e le hore Molimo a mo thuse, a mo sireletse a be a mo hlohonolofatse. (Deut. 33:27; Pes. 91:14; Liprov. 10:22) Haeba ba e-na le monyetla oa ho thusa motho e mong hore a khutlele phuthehong, ke sefe seo ba ka se etsang?

4. Ke sefe seo re ka ithutang sona ho Bagalata 6:2, 5?

⁴ Mohlomong ba ka khothalletsa motho eo hore a khutlele phuthehong ka hore ka mosa ba mo bontše hore Jehova o rata linku tsa Hae le hore ha a hloke hore re etse lintho tseo re ke keng ra khona ho li etsa. Lintho tsena li akarelletsa ho ithuta Mangolo, ho ba teng libokeng tsa Bokreste le ho bolela litaba tse molemo tsa ’Muso. E ka ’na ea e-ba ho loketseng ho bala Bagalata 6:2, 5 le ho bolela hore Bakreste ba ka thusana ho jarelana meroalo, empa “e mong le e mong o tla jara mojaro oa hae” oa boikarabelo ba moea. Ha ho motho e mong ea ka re etsetsang mosebetsi oa ho tšepahala ho Molimo.

Na “Matšoenyeho a Bophelo” a ba Imetse?

5, 6. (a) Ke hobane’ng ha e le habohlokoa hore re mamele ka hloko ha balumeli-’moho le rōna ba khathetseng moeeng ba tšolla maikutlo a bona? (b) U ka ’na ua khona ho thusa ba khathetseng moeeng joang hore ba hlokomele hore ho se kopanele le batho ba Molimo ho ba baketse mathata?

⁵ E le hore ba lemohe hore na ba ka thusa balumeli-’moho le bona ba khathetseng moeeng joang, baholo le bahoeletsi ba bang ba hōlileng moeeng ba lokela ho mamela ka hloko ha batho bao ba tšolla maikutlo a bona. A re re u moholo ’me u etetse banyalani ba sa beng teng phuthehong hobane ba imetsoe ke “matšoenyeho a bophelo.” (Luka 21:34) E ka ’na eaba mathata a lichelete kapa boikarabelo bo boholo ba lelapa bo entse hore ba khathale moeeng. Ba ka ’na ba ikutloa eka ba hloka ho imoloha, empa u ka ’na ua ba hlokomelisa hore ho itšehla thajana ho ke ke ha ba thusa ka letho. (Bala Liproverbia 18:1.) U ka ’na ua ba botsa ka bohlale: “Na haesale le khaotsa ho ea libokeng le thabile haholo? Na bophelo ba lelapa la lōna bo ntlafetse? Na thabo ea Jehova e sa ntse e le qhobosheane ea lōna?”​—Neh. 8:10.

⁶ Ho nahana ka lipotso tse kang tsena ho ka ’na ha thusa batho ba khathetseng moeeng hore ba hlokomele hore ka lebaka la ho se kopanele le phutheho, thabo ea bona le bomoea ba bona li fokotsehile. (Mat. 5:3; Baheb. 10:24, 25) Ho ka ’na ha etsahala hore re ba thuse ho hlokomela hore ho se bolele litaba tse molemo ke hona ho entseng hore ba felloe ke thabo. (Mat. 28:19, 20) Kahoo, ke sefe seo ho ka bang bohlale hore ba se etse?

7. Re ka khothalletsa ba hlahlatheletseng hōle le mohlape hore ba etse’ng?

⁷ Jesu o ile a re: “Ikeleng hloko hore le ka mohla lipelo tsa lōna li se ke tsa imeloa ke ho ja ho tlōla le ho noa haholo le matšoenyeho a bophelo . . . Le lule le falimehile ka nako eohle le etsa thapeli e le hore le ka atleha ho phonyoha lintho tsena tsohle tse reretsoeng hore li etsahale.” (Luka 21:34-36) Ba hlahlatheletseng hōle le mohlape empa ba batla ho boela ba fumana thabo eo ba kileng ba e-ba le eona, ba ka khothalletsoa hore ba rapelle moea o halalelang le hore Molimo a ba thuse, ba be ba etse seo ba se rapellang.​—Luka 11:13.

Ebe ho na le ea ba Khopisitseng?

8, 9. Moholo a ka tšetlehela motho ea khopisitsoeng mabaka joang?

⁸ Kaha batho ha baa phethahala, ho ka etsahala hore ho be le ho se lumellane ’me sena se ka ’na sa khopisa motho e mong. Ba bang ba ile ba khopeha ha motho e mong eo ba mo hlomphang ka phuthehong a ne a tlōla melao-motheo ea Bibele. Haeba motho ea khathetseng moeeng o ile a ba boemong bo joalo, moholo ea mo etetseng a ka ’na a mo bolella hore Jehova ha a khopise leha e le mang. Ebe ke hobane’ng ha motho a ka qhala setsoalle sa hae le Molimo le batho ba Hae? Ho e-na le hoo, na motho ha aa lokela ho tsoela pele a sebeletsa Molimo a kholisehile hore “Moahloli oa lefatše lohle” o tseba se etsahetseng le hore o tla sebetsa litaba ka tsela e nepahetseng? (Gen. 18:25; Bakol. 3:23-25) Haeba motho a ne a ka khoptjoa eaba oa oa, o ne a ke ke a tjapalla moo fatše ka boomo a sa etse le boiteko ba ho ema feela.

⁹ Ha a leka ho ba thusa moeeng, moholo a ka ’na a bolela hore ha nako e ntse e feta, ba bang ba fumana hore ntho e neng e ba khopisitse ha e sa le bohlokoa hakaalo. Ha e le hantle, ho ka etsahala hore ebe ntho e ba khopisitseng ha e sa le eo. Haeba motho eo o ile a khopeha hobane a khalemetsoe, ho nahanisisa ka taba eo a bile a ntse a rapela ka eona, ho ka etsa hore a hlokomele hore ka tsela e itseng le eena o ne a ntse a fositse, kahoo, o ne a sa lokela ho lumela ho khopisoa ke khalemelo.​—Pes. 119:165; Baheb. 12:5-13.

Ebe o Khopisitsoe ke Thuto e Itseng?

10, 11. Ke mabaka afe a ka ’nang a sebetsa ha re leka ho thusa motho ea neng a utloisisa thuto e itseng ea Bibele ka tsela e fapaneng?

¹⁰ E ka ’na eaba ba bang ba ile ba tloha mohlapeng oa Molimo hobane ba ne ba sa lumellane le thuto e itseng ea Mangolo. Baiseraele ba ileng ba lokolloa botlamuoeng Egepeta ba ile ba “lebala mesebetsi” ea Molimo e neng e entsoe molemong oa bona ’me ha baa ka ba “letela keletso ea hae.” (Pes. 106:13) Ho ka ’na ha e-ba molemo ho hopotsa motho ea khathetseng moeeng hore “lekhoba le tšepahalang le le masene” le fana ka lijo tsa moea tse babatsehang. (Mat. 24:45) Ena ke eona tsela eo qalong motho eo a ithutileng ’nete ka eona. Joale ke hobane’ng ha a sa ikemisetse ho boela a tsamaea ’neteng?​—2 Joh. 4.

¹¹ Ha a leka ho thusa ba hlahlatheletseng hōle le mohlape oa Molimo, moholo a ka ’na a bua ka barutuoa ba ileng ba furalla Jesu hobane ba ne ba nyatsa e ’ngoe ea lithuto tsa hae. (Joh. 6:53, 66) Ka ho khaotsa ho ba le kamano le Kreste le balateli ba hae ba tšepahalang, ba ile ba felloa ke thabo le kananelo ea lintho tsa moea. Na ba khaolitseng ho kopanela le phutheho ea Bokreste ba fumane sebaka se seng seo ho sona ho nang le lijo tsa moea tse enneng? Che, hobane ha se eo!

Ebe o ne a Entse Sebe se Tebileng?

12, 13. Haeba motho ea hlahlatheletseng hōle le mohlape a lumela hore o entse sebe se tebileng ho ka ’na ha khoneha joang hore a thusoe?

¹² Batho ba bang ba khaotsa ho bolela le ho ea libokeng hobane ba entse sebe se tebileng. Ba ka ’na ba nahana hore haeba ba bolella baholo phoso ea bona, ba tla khaoloa. Empa ba ke ke ba lelekoa phuthehong haeba ba khaolitse mokhoa oo o sa lumelloeng ke Mangolo ’me ba bakile e le kannete. (2 Bakor. 7:10, 11) Ho e-na le hoo, ba tla amoheloa ka liatla tse peli ha ba khutla, ’me baholo ba tla ba fa thuso eo ba e hlokang moeeng.

¹³ Haeba u mohoeletsi ea hōlileng moeeng ea kōpiloeng ho thusa motho ea khathetseng moeeng, u lokela ho etsa joang ha a u bolella hore o entse sebe se tebileng? Joalokaha ho boletsoe pejana, ho e-na le hore u kena-kenane le taba eo, mo khothalletse ho bua le baholo. Haeba a sa batle ho etsa joalo, u tla be u bontša hore u tsotella lebitso la Jehova le boemo ba moea ba phutheho ka hore u sebetse litaba tumellanong le tataiso eo Molimo a fanang ka eona litabeng tsa mofuta oo. (Bala Levitike 5:1.) Baholo ba tla tseba hore na ba lokela ho thusa joang motho leha e le ofe ea lakatsang ho khutla ’me a phelele ho etsa thato ea Molimo. Ho ka ’na ha hlokahala hore a khalemeloe ka lerato. (Baheb. 12:7-11) Haeba motho a lumela hore o sitetsoe Molimo, a khaotsa ho etsa phoso ’me a baka e le kannete, baholo ba tla mo thusa ’me Jehova a ka mo tšoarela.​—Esa. 1:18; 55:7; Jak. 5:13-16.

Ha Mora a Khutla ho Ile ha E-ba le Thabo

14. Ka mantsoe a hao, pheta papiso ea mora ea lehlasoa.

¹⁴ E le hore a thuse nku e hlahlathetseng, motho ea kōpiloeng ho e thusa a ka ’na a bua ka papiso ea Jesu e tlalehiloeng ho Luka 15:11-24. Papisong eo, mohlankana e mong o hafa lefa la hae ka ho phela bophelo bo litšila. Qetellong o nyonya bophelo ba ho inehella litakatso tsa nama boo a neng a bo phela. Lephako lea uba, o hlolohetsoe hae, ’me o etsa qeto ea ho khutlela lapeng! Ha a sa ntse a le hōle, ntate oa hae oa mo bona, oa matha ’me o itihela molaleng oa hae, o mo aka ka lerato ’me o thaba haholo. Ho nahana ka papiso ena ho ka ’na ha susumetsa motho ea hlahlathetseng hore a khutlele lesakeng. Kaha tsamaiso ena ea lintho e haufi le ho timetsoa, o lokela ho ‘khutlela lapeng’ kapele.

15. Ke hobane’ng ha ba bang ba hoholehela hōle le phutheho?

¹⁵ Batho ba bangata ba hoholehelang hōle le phutheho ha ba tšoane le mora ea lehlasoa hantle. Ho ba bang, ho hoholehela hōle le phutheho ho etsahala butle-butle feela joaloka sekepe se hoholehang se sesetsang bohareng ba leoatle butle-butle. Ba bang ba imeloa ke matšoenyeho a bophelo hoo ba qetellang ba hlokomolohile kamano ea bona le Jehova. Athe ba bang ba itumella hore ba khopisoe ke setho sa phutheho, kapa ba tlohela phutheho hobane ba sa lumellane le thuto e itseng ea Mangolo. Ba seng bakae ba etsa boitšoaro bo sa lumellaneng le mangolo. Leha ho le joalo, lintlha tseo ho builoeng ka tsona mabapi le taba ena li ka u thusa hore u thuse ba tsoileng lesakeng ka mabaka ana kapa a mang hore ba khutle e le hore ba se ke ba haha serobe phiri e se e jele.

“Mora, re U Amohela ka Mofuthu Mona Lapeng!”

16-18. (a) Moholo e mong o ile a thusa mor’abo rōna ea ileng a khathala moeeng ka lilemo tse ngata joang? (b) Ke hobane’ng ha mora eo oabo rōna a ile a khathala moeeng, ’me o ile a thusoa joang, hona phutheho e ile ea mo amohela joang?

¹⁶ Moholo e mong oa Mokreste o re: “Sehlopha sa rōna sa baholo se sebetsa ’moho ho etela batho ba khathetseng moeeng. Ke ile ka nahana ka mor’abo rōna eo ke neng ke ile ka ithuta le eena ’me ka mo thusa ho tseba ’nete. O ne a ile a khathala moeeng ka lilemo tse ka bang 25 ’me o ne a e-na le bothata bo boholo, ka lebaka leo ke ile ka mo hlalosetsa hore na ho sebelisa melao-motheo ea Bibele ho ne ho ka mo thusa joang. Ka mor’a nako o ile a qala ho tla Holong ea ’Muso ’me a lumela ho khanneloa thuto ea Bibele e le ho mo matlafalletsa hore a khutlele mohlapeng.”

¹⁷ Ke hobane’ng ha mora eo oabo rōna a ile a khathala moeeng? Oa lumela: “Ke ile ka qala ho tsotella lintho tsa lefatše ho feta lintho tsa moea. Joale ke ile ka khaotsa ho ithuta, ho etsa mosebetsi oa boboleli le ho ea libokeng. Eitse ha ke re phapha! ke ne ke se ke se karolo ea phutheho ea Bokreste. Empa kaha moholo e mong o ile a ntsotella e le kannete, seo se ile sa nthusa hore ke khutlele phuthehong.” Mathata a mora enoa oabo rōna a ile a fokotseha ha a ne a lumela ho ithuta Bibele. O re, “Ke hlokometse hore se neng se haella bophelong ba ka ke ho ratoa ke Jehova le ho tataisoa ke eena le mokhatlo oa hae o hlophisitsoeng.”

¹⁸ Mora eo oabo rōna o ile a amoheloa joang phuthehong? O re: “Ke ikutloa ke tšoana le mora ea lehlasoa eo Jesu Kreste a buileng ka eena. Ha e le hantle, morali e mong oabo rōna ea hōlileng ea neng a le teng lilemong tse 30 tse fetileng ’me a ntse a tsoela pele hantle moeeng o ile a re ho ’na, ‘Mora, re u amohela ka mofuthu mona lapeng!’ Seo se ile sa nkama haholo. Ka sebele ke ne ke fela ke le lapeng. Kahoo, ke rata ho leboha lerato, mofuthu, mamello le ho tsotella tseo moholo eo le phutheho kaofela ba ileng ba e-ba le tsona ho ’na. Lerato la bona ho Jehova le ho moahelani le nthusitse e le kannete hore ke khutlele mohlapeng.”

Ba Khothalletse Hore ba Nke Bohato Hang-hang!

19, 20. U ka khothalletsa ba khathetseng moeeng joang hore ba khutlele mohlapeng kapele ’me u ka ba bontša joang hore Molimo ha a lebelle hore re etse seo re ke keng ra se khona?

¹⁹ Re phela matsatsing a ho qetela, ’me bofelo ba tsamaiso ea hona joale ea lintho bo haufi. Ka lebaka leo, khothalletsa batho ba khathetseng moeeng ho ea libokeng tsa Bokreste. Ba khothalletse hore ba ee hang-hang. Ba hopotse hore Satane o leka ho senya kamano ea bona le Molimo ’me o batla hore ba nahane hore ba ka imoloha mathateng a bophelo ka hore ba furalle borapeli ba ’nete. Ba tiisetse hore ba ka fumana khatholoho haeba feela e le balateli ba Jesu ba tšepahalang.​—Bala Matheu 11:28-30.

²⁰ Hopotsa batho ba khathetseng moeeng hore Molimo o lebeletse hore re etse feela seo re ka se khonang. Ha khaitseli ea Lazaro Maria a ne a nyatsuoa ka mor’a ho tlotsa Jesu ka oli e nkhang hamonate e theko e boima, pejana ho lefu la hae, Jesu o ile a re: “Mo tloheleng. . . . O entse seo a neng a ka se khona.” (Mar. 14:6-8) Jesu o ile a rorisa mohlolohali ea hlokang ea ileng a fana ka monehelo o monyenyane tempeleng. Le eena o ne a entse seo a ka se khonang. (Luka 21:1-4) Boholo ba rōna re ka ea libokeng tsa Bokreste ra ba ra kopanela mosebetsing oa ho bolela ka ’Muso. Ka thuso ea Jehova, batho ba bangata ba khathetseng moeeng hona joale le bona ba tla tseba ho etsa lintho tsena.

21, 22. U ka kholisa ba khutlelang ho Jehova hore ho tla etsahala eng?

²¹ Haeba motho ea kang nku ea hlahlathetseng a tšaba ho kopana le bara babo hape, u ka ’na ua mo hopotsa hore na e ile ea e-ba thabo e joang ha mora ea lehlasoa a khutlela hae. Ba khutlelang phuthehong le bona ba tlisa thabo e tšoanang. Ba khothalletse hore ba nke bohato hona joale e le hore ba hanyetse Diabolose ’me ba atamele ho Molimo.​—Jak. 4:7, 8.

²² Batho ba khutlelang ho Jehova ba tla amoheloa ka mofuthu. (Lillo 3:40) Ba ile ba thaba haholo ha ba ne ba sebeletsa Molimo nakong e fetileng. Ba khutlelang mohlapeng kapele ba tla fumana litlhohonolofatso tse khōlō ka moso!

U ka Araba Joang?

• U ka ’na ua thusa Mokreste ea ileng a khopisoa eaba o khathala moeeng joang?

• Ke mabaka afe a ka ’nang a thusa motho ea tlohileng mohlapeng oa Molimo ka lebaka la maikutlo ao a neng a e-na le ’ona mabapi le thuto e itseng?

• Ho ka ’na ha khoneha joang hore motho ea leqe ho khutlela phuthehong a thusoe?

[Setšoantšo se leqepheng la 13]

Mamela ka hloko ha molumeli-’moho le uena ea khathetseng moeeng a tšolla maikutlo a hae

[Setšoantšo se leqepheng la 15]

Ho nahana ka papiso ea Jesu ea mora ea lehlasoa ho ka ’na ha susumelletsa ba bang hore ba khutlele mohlapeng