Khothatsa Mokreste ea Khathetseng

Ka Labobeli la la 11 April, Bakreste ba bangata ba seng ba sa kopanele tšebeletsong ba tla be ba le teng sehopotsong. Ba ile ba qala ho matha peisong ea bophelo empa ka mabaka a fapaneng ba khathala. A mang a mabaka ao a hlalositsoe bukaneng ea Khutlela ho Jehova. (Heb 12:1) Leha ho le joalo, Jehova o ntse a ba rata hobane o ile a ba reka ka mali a Mora oa hae. (Lik 20:28; 1Pe 1:18, 19) Re ka ba thusa joang hore ba khutlele ka phuthehong?

Feela joalokaha molisa a batla nku e lahlehileng a bile a e thusa ho khutlela mohlapeng, baholo ba etsa se tšoanang ka Bakreste ba khathetseng. (Lu 15:4-7) Sena se bontša hore Jehova oa ba rata ebile oa ba tsotella. (Jer 23:3, 4) Le hoja e le mosebetsi oa baholo ho khothatsa Bakreste bana, le rona re ntse re ka ba thusa. Jehova o tla hlohonolofatsa boiteko ba rona ha re ba rata re bile re ba bontša mosa. (Lipr 19:17; Lik 20:35) Kahoo, nahana ka hore na ke mang eo u ka mo khothatsang ’me u etse joalo hang hang.

SHEBELLA VIDEO EA KHOTHATSA BA SENG BA SA KOPANELE TŠEBELETSONG, EBE LE BUISANA KA LIPOTSO TSE LATELANG:

• Abbey o ile a etsa’ng ha a ne a kopana le Paki eo a neng a sa e tsebe?

• Ke hobane’ng ha re lokela ho ea ho baholo pele re thusa motho ea khathetseng?

• Abbey o ile a etsa’ng pele a etela Laura ka lekhetlo la bobeli?

• Abbey o bontšitse boikemisetso, mamello le lerato joang ha a ntse a leka ho khothatsa Laura?

• Re ka ithuta’ng papisong ea Jesu e ho Luka 15:8-10?

• Ho ile ba e-ba le litlhonolofatso li feng ka mor’a hore baholo le Abbey ba leke ho thusa Laura?