Seo Bokreste-’mōtoana bo se Jetseng Afrika

KA 1867, Charles Lavigerie, Mok’hatholike oa Fora, o ile a tla Afrika joaloka moarekabishopo e mocha ea khethiloeng oa Algiers. O ile a re: “Molimo o khethile Fora, ho etsa Algeria qalo ea sechaba se seholo sa Bakreste.”

Toro ea Lavigerie e ile ea fetela ka nģane ho Algeria. Ha e le hantle, o ile a romela baromuoa ho pholletsa le lehoatata ka boikemisetso ba ho “tlisa Afrika Bohareng le Leboea bonngoeng ba bophelo bo tšoanang ba Bokreste-’mōtoana.”

Nakong eona eo likarolong tse ka bophirimela, boroa, le bochabela ba kontinente, baromuoa ba Maprostanta ba ne ba se ba qalile mosebetsi. Ba ile ba ba le sebete sa ho tobana le mathata a mangata, joaloka ho tšoaroa ke malaria khafetsa, le matšoao a eona a ho thothomela, ho fufuleloa, le ho ferekana monahano ka nakoana. Hoba ba fokolisoe ke maloetse a libaka tse chesang, kapele ba bangata ba ile ba shoa ka mor’a ho fihla. Empa ba bang ba ’nile ba tla. Adlai Stevenson o re: “E mong le e mong ea tlang Afrika, hangata o hopola sebete sa baromuoa. . . . Ba ile ba loantša yellow fever, letšollo, lefu le bakoang ke likokoanyana tse phelang ka mali ’me . . . ke bone . . . mabitla a bona—ho pholletsa le Afrika eohle.”

Litholoana Tsa Baromuoa

Ha baromuoa ba kenella hare Afrika, ba ile ba fumana hore meloko e mengata ha e tsebe ho ngola le ho bala. Ram Desai oa hlalosa bukeng ea hae Christianity in Africa as Seen by Africans: “Hoo e ka bang lipuong [tsa Afrika] tse makholo a robeli, ke feela tse ’nè tse neng li ngoloa pele baromuoa ba fihla.” Kahoo baromuoa ba ile ba qapa tsela ea ho ngola lipuo tsena tse sa ngoloeng. Joale ba ile ba etsa libuka tsa ho ithuta ’me ba qala ho ruta batho ho bala. Ka lebaka leo ba ile ba haha likolo Afrika eohle.

Hape baromuoa ba ile ba haha lipetlele. Ram Desai oa lumela: “Ha ho tsamaiso e ’ngoe e ka finyellang tlaleho ea mosebetsi oa bona oa ntšetso-pele ea sechaba.” Ka ntle ho tlhokomelo ea meriana, Maafrika a ne a batla lintho tse bonahalang tsa Europe. Baromuoa ba bang ba ile ba hlahisa mesebetsi ea khoebo, kaha ba ne ba lumela hore sena se tla hohela basokolohi. Ka mohlala, ’Mishone oa Basel o Switzerland o ile oa theha k’hamphani ea thekiso Ghana. O ile ba sibolla hore lifate tsa cacao li hōla hantle moo, ’me kajeno Ghana ke ea boraro e hlahisang cocoa e ngata lefatšeng.

Ntho e hlahelletseng eo baromuoa ba Bokreste-’mōtoana ba e phethileng e bile phetolelo ea bona ea Bibele. Empa ho phatlalatsa molaetsa oa Bibele ho jarisa boikarabelo bo eketsehileng ba bohlokoa. Moapostola oa Mokreste Pauluse o ile a bontša sena ha a botsa: “Uena ea rutang e mong, na ua ithuta? Uena ea bolelang ‘U se ke ua utsoa,’ na ua utsoa?” Bibele e lemosa hore ba rutang Bokreste ba tlameha ho phela ka melao-motheo e metle e boletsoeng Lentsoeng la Molimo.—Ba-Roma 2:21, 24, NW.

Ho thoe’ng ka baromuoa ba Bokreste-’mōtoana Afrika? Na ba hlomphile Molimo oa Bibele, kapa ba sentse lithuto tsa Bakreste lebitso?