Lelapa la Bokreste le Eteletsa Lintho tsa Moea Pele
“Kaofela le be le mohopolo o tšoanang, le bontše kutloelo-bohloko, le be le kameho ea boena, le be le qenehelo e bonolo, le be le mohopolo o ikokobelitseng.”—1 PETROSE 3:8, NW.
1. Kaofela ha rōna re na le khetho efe, hona khetho ea rōna e ka ama bokamoso ba rōna joang?
TEMANA e ka holimo e sebetsa hantle hakaakang tokisetsong ea khale ka ho fetisisa ea batho—lelapa! Hape ke habohlokoa hakaakang hore batsoali ba etelle pele ho bonahatseng litšobotsi tsee! Litšoaneleho tsa bona tse ntle le tse mpe hangata li tla bonahala baneng. Leha ho le joalo, khetho ke ea setho se seng le se seng sa lelapa. Re le Bakreste, re ka khetha ho ba batho ba moea kapa batho ba nama. Re ka khetha ho thabisa Molimo kapa ho mo soabisa. Khetho ena e ka fella ka tlhohonolofatso, bophelo bo sa feleng le khotso—kapa thohako, lefu la ka ho sa feleng.—Genese 4:1, 2; Ba-Roma 8:5-8; Ba-Galata 5:19-23.
2. (a) Petrose o ile a bontša kameho ea hae ka lelapa joang? (b) Bomoea ke eng? (Bona mongolo o botlaaseng ba leqephe.)
2 Mantsoe a moapostola ho 1 Petrose khaolo 3, temana 8, a ngotsoe hang ka mor’a ho fana ka keletso e ntle ho basali le banna. Ruri Petrose o ne a thahasella katleho ea malapa a Bakreste. O ne a tseba hore bomoea bo matla ke senotlolo sa lelapa le kopaneng, le tsotellanang. Ka hona, o ile a bontša temaneng ea 7 hore haeba keletso ea hae ho banna e hlokomolohuoa, phello e tla ba mokoallo oa moea pakeng tsa monna le Jehova.a Lithapelo tsa monna li ka sitisoa haeba a hlokomoloha litlhoko tsa mosali oa hae kapa a mo sithabetsa ka ho hloka mosa.
Kreste—Mohlala o Phethahetseng oa Bomoea
3. Pauluse o ile a totobatsa mohlala oa Kreste joang bakeng sa banna?
3 Bomoea ba lelapa bo itšetlehile ka mohlala o motle. Ha monna e le Mokreste ea mafolo-folo, o etella pele ho bonahatseng litšoaneleho tsa moea. Haeba ho se monna ea lumetseng, hangata ’mè o leka ho jara boikarabelo. Boemong leha e le bofe, Jesu Kreste o fana ka mohlala o phethahetseng o ka lateloang. Ka linako tsohle boitšoaro ba hae, mantsoe a hae, le mohopolo oa hae li ne li haha li bile li khatholla. Khafetsa, moapostola Pauluse o hlokomelisa ’mali ka mohlala oa Kreste o lerato. Ka mohlala, o re: “Monna ke hlooho ea mosali, joalo ka ha Kreste le eena e le hlooho ea [phutheho, NW] ’me ke eena ’moloki oa ’mele oa hae. Lōna banna, ratang basali ba lōna, joalo ka ha Kreste le eena a ratile [phutheho, NW] ’me a iteletse lefu ka baka la eona.”—Ba-Efese 5:23, 25, 29; Mattheu 11:28-30; Ba-Kolosse 3:19.
4. Jesu o behile mohlala ofe oa bomoea?
4 Jesu e bile mohlala o ikhethang oa bomoea le bohlooho bo bontšoang ka lerato, mosa, le kutloelo-bohloko. O ne a itela, a sa thabele ho ikhotsofatsa. Ka linako tsohle o ne a tlotlisa Ntat’ae ’me a hlompha bohlooho ba hae. O ne a latela tataiso ea Ntate, kahoo o ne a ka re: “Ke sitoa ho etsa letho ke ’notši; ke ahlola kamoo ke utloang kateng, ’me kahlolo ea ka e lokile, kahobane ha ke batle ho ratoang ke ’na, ke mpa ke batla ho ratoang ke Ntate ea nthomileng.” “Ha ke etse letho ke ’notši, ke mpa ke bolela litaba tseo joale ka ha Ntate a nthutile.”—Johanne 5:30; 8:28; 1 Ba-Korinthe 11:3.
5. Ha a fepa balateli ba hae, Jesu o fane ka mohlala ofe bakeng sa banna?
5 See se bolela eng ho banna? Se bolela hore mohlala oo ba tlamehang ho o latela linthong tsohle ke Kreste, eo ka linako tsohle a neng a ikokobeletsa Ntat’ae. Ka mohlala, joalokaha Jehova a fane ka lijo bakeng sa mefuta eohle ea lintho tse phelang lefatšeng, le Jesu o fane ka lijo ho balateli ba hae. Ha a ka a hlokomoloha litlhoko tsa bona tsa motheo tsa lintho tse bonahalang. Ho etsa ha hae mohlolo oa ho fepa banna ba 5 000 le ba 4 000 ke bopaki ba hore o ne a tsotella ’me a na le boikarabelo. (Mareka 6:35-44; 8:1-9) Ka ho tšoanang kajeno, lihlooho tsa malapa tse bontšang ho ba le boikarabelo li hlokomela litlhoko tsa nama tsa malapa a tsona. Empa na boikarabelo ba tsona bo fella moo?—1 Timothea 5:8.
6. (a) Ke litlhoko life tsa bohlokoa tsa lelapa tse lokelang ho hlokomeloa? (b) Banna le bo-ntate ba ka bontša kutloisiso joang?
6 Malapa a boetse a na le litlhoko tse ling, tsa bohlokoa haholo, joalokaha Jesu a boletse. A na le litlhoko tsa moea le tsa maikutlo. (Deuteronoma 8:3; Mattheu 4:4) Re sebelisana le ba bang, lapeng le phuthehong. Re hloka tataiso e ntle e tla re susumeletsa ho ba ba hahang. Tabeng ena banna le bo-ntate ba tlameha ho phetha karolo ea bohlokoa—haholo-holo haeba ke baholo kapa bahlanka ba sebeletsang. Batsoali ba se nang balekane ba hloka litšoaneleho tse tšoanang ha ba thusa bana ba bona. Batsoali ha baa tlameha ho utloisisa feela se buuoang ke litho tsa lelapa empa le se sa buuoang. Sena se hloka temoho, nako, le mamello. Ke lebaka le leng le entseng hore Petrose a bolele hore banna ba lokela ho nahanela ’me ba phelisane le basali ba bona ho latela tsebo.—1 Timothea 3:4, 5, 12; 1 Petrose 3:7, NW.
Likotsi tse Tlamehang ho Qojoa
7, 8. (a) Ho hlokahala eng hore lelapa le qobe ho oa moeeng? (b) Ntle le ho qalisa hantle tseleng ea Bokreste ho hlokahala eng hape? (Mattheu 24:13)
7 Ke hobane’ng ha ho le bohlokoa ho lebisa tlhokomelo bomoeeng ba lelapa? Ha re etsa papiso, re ka botsa, Ke hobane’ng ha ho le bohlokoa hore motsamaisi oa sekepe a lebise tlhokomelo e khōlō lichateng tsa hae ha a tsamaisa sekepe metsing a sa tebang ao ho leng kotsi ho tsamaisa sekepe ho oona? Ka August 1992 sekepe se nkang baeti Queen Elizabeth 2 (QE2) se ile sa fihla sebakeng se nang le litutulu tsa lehlabathe le mafika a kotsi e leng sebaka seo ho atisang hore ho etsoe liphoso ho sona ha ho tsamaisoa sekepe. Moahi e mong oa sebaka seo o ile a re: “Batho ba bangata ba feletsoe ke mosebetsi ka lebaka la likotsi tse hlahileng sebakeng seo.” QE2 e ile ea thula mopopotlo o ka tlas’a metsi. Ena e bile phoso e litšenyehelo tse ngata. Karolo ea boraro e ka holimo ea sekepe e ile ea senyeha, ’me sekepe se ile sa tlameha ho khaotsa maeto a sona ka libeke tse ’maloa e le hore se ka lokisoa.
8 Ka ho tšoanang, haeba “motsamaisi” oa lelapa a sa hlahlobe chate ka hloko, Lentsoe la Molimo, ka ho bonolo feela lelapa la hae le ka hlaheloa ke kotsi ea moea. Bakeng sa moholo kapa mohlanka ea sebeletsang, phello e ka ba ho lahleheloa ke litokelo ka phuthehong ’me mohlomong le kotsi e tebileng ho litho tse ling tsa lelapa. Ka lebaka leo, Mokreste e mong le e mong o lokela ho hlokomela hore a se ke a tšoasoa ke boikutlo ba ho se tsotelle lintho tsa moea, a tšepile feela mekhoa ea pele e metle ea ho ithuta le cheseho. Tseleng ea rōna ea Bokreste, ha hoa lekana hore feela ebe re qalile hantle; leeto le tlameha ho phethoa ka katleho.—1 Ba-Korinthe 9:24-27; 1 Timothea 1:19.
9. (a) Thuto ea botho e bohlokoa hakae? (b) Re ka ipotsa lipotso life tse loketseng?
9 E le ho qoba libaka tse sa tebang tsa moea, mafika, le litutulu tsa lehlabathe, ho hlokahala hore re lule re tseba se leng ho “lichate” tsa rōna ka ho ithuta Lentsoe la Molimo ka mehla. Re ke ke ra itšetleha feela ka thuto ea motheo e re tlisitseng ’neteng. Matla a rōna a moea a itšetlehile ka lenaneo la ka mehla le le itekanetseng la ho ithuta le ho kopanela tšebeletsong. Ka mohlala, joalokaha re le Thutong ea Molula-Qhooa ea phutheho re nkile kopi ena, re ka ipotsa, ‘Na ’na, kapa rōna joaloka lelapa, ka sebele re ithutile sehlooho see, ra phetla mangolo le ho thuisa ka mokhoa oa ho a sebelisa? Kapa re mpa re thaletse likarabo feela? Na mohlomong, re sitiloe le ho bala feela sehlooho see pele re tla sebokeng sena?’ Likarabo tse tšepahalang tsa lipotso tsena li ka re susumeletsa hore re nahane ka ho teba tsa ba tsa re susumeletsa ho ntlafatsa—haeba ho hlokahala.—Ba-Heberu 5:12-14.
10. Ke hobane’ng ha ho le bohlokoa ho itlhahloba?
10 Ke hobane’ng ha ho itlhahloba ho joalo ho le bohlokoa? Hobane re phela lefatšeng le busoang ke moea oa Satane, lefatše leo, ka litsela tse ngata tse poteletseng, le lekang ho faposa tumelo ea rōna ho Molimo le litšepisong tsa hae. Ke lefatše le batlang ho re boloka re tšoarehile hoo re hlokang nako ea ho hlokomela litlhoko tsa moea. Ka hona re ka ipotsa, ‘Na lelapa la ka le matla moeeng? Na ke le motsoali ke matla joalokaha ke lokela? Na re le lelapa re hlaolela matla a moea a susumetsang kelello a re thusang ho etsa liqeto tse thehiloeng tšobotsing ea ho loka le botšepehi?’—Ba-Efese 4:23, 24.
11. Ke hobane’ng ha liboka tsa Bokreste li le molemo moeeng? Fana ka mohlala.
11 Bomoea ba rōna bo lokela ho matlafatsoa ke liboka tse ling le tse ling tseo re bang teng ho tsona. Lihora tseo tsa bohlokoa Holong ea ’Muso kapa Thutong ea Buka ea Phutheho li ka re hlasimolla ka mor’a lihora tse telele tseo re li qetileng re leka ho ipoloka re phela lefatšeng la Satane le tletseng bora. Ka mohlala, e bile ho hlasimollang hakaakang ho ithuta buka Motho e Moholo ka ho Fetisisa ea Kileng a Phela! Ho re thusitse ho ba le kutloisiso e molemonyana ka Jesu, bophelo ba hae, le tšebeletso ea hae. Ka hloko re balile mangolo a bontšitsoeng, ra etsa lipatlisiso tsa botho, ’me ra ithuta ho eketsehileng ka mohlala oo Jesu a o behileng.—Ba-Heberu 12:1-3; 1 Petrose 2:21.
12. Tšebeletso ea tšimo e hlahloba bomoea ba rōna joang?
12 Tlhahlobo e molemo ea bomoea ba rōna ke tšebeletsong ea Bokreste. E le hore re ka tiisetsa bopaking ba rōna bo reriloeng le bo sa reroang, hangata e le ho batho ba iphapanyang kapa ba hanyetsang, ho hlokahala hore re be le tšusumetso e nepahetseng, lerato bakeng sa Molimo le lerato bakeng sa moahisani. Ha e le hantle, ha ho motho ea thabelang ho qheleloa thōko, ’me sena se ka etsahala tšebeletsong ea rōna ea tšimo. Empa re lokela ho hopola hore ke litaba tse molemo tse qheleloang thōko, eseng rōna re le batho. Jesu o itse: “Ekare ha lefatše le le hloea, le tsebe hobane le ntlhoile pele ho lōna. Hojane le le ba lefatše, lefatše le ka be le rata se sa lona; ereka ha le se ba lefatše, ke mpa ke le khethile lefatšeng, ka baka leo lefatše le le hloile. . . . Empa ba tla le etsa tsohle tseo ka baka la lebitso la ka, kahobane ha ba tsebe ea nthomileng.”—Johanne 15:18-21.
Liketso li Bua ho Feta Lipolelo
13. Motho a le mong a ka senya bomoea ba lelapa joang?
13 Ho etsahala joang lapeng haeba bohle ntle ho setho se le seng ba batla hore ntlo e hloeke ’me e be makhethe? Ha pula e na, bohle ntle ho enoa ea sa tsotelleng ba hlokomela hore ba se kenye seretse ka tlung. Ho siea liretse hohle moo a hatang ho fana ka bopaki ba hore motho eo ha a tsotelle, o bakela ba bang mosebetsi o eketsehileng. Hoa tšoana le ka bomoea. Motho a le mong feela ea bontšang boithati kapa ea sa tsotelleng a ka senya botumo bo botle ba lelapa. Bohle ka lapeng, e seng feela batsoali, ba lokela ho etsa boiteko ba ho bonahatsa boikutlo ba Kreste ba kelello. Ho hlasimolla hakaakang ha bohle ba sebetsa ’moho ka sepheo sa ho fumana bophelo bo sa feleng! Kelello ea lelapa leo e sekametse linthong tsa moea (empa eseng ho iketsa ba lokileng ho tlōlisa). Ke ka seoelo ho ka bang le matšoao a bontšang ho se tsotelle lintho tsa moea lapeng le joalo.—Moeklesia 7:16; 1 Petrose 4:1, 2.
14. Satane o beha liteko life tsa lintho tse bonahalang tseleng ea rōna?
14 Kaofela ha rōna re hloka lintho tsa motheo tse bonahalang tse tlamehang ho fumanoa ho re boloka re phela letsatsi le leng le le leng. (Mattheu 6:11, 30-32) Empa hangata litlhoko tsa rōna li pupetsoa ke lintho tseo re li batlang. Ka mohlala, tsamaiso ea Satane e re nenesetsa ntho e ’ngoe le e ’ngoe. Haeba ka linako tsohle re batla ho ba le lisebelisoa tsa morao-rao, ha ho mohla re tla khotsofala, kaha lisebelisoa tsa morao-rao ka potlako li felloa ke nako, ’me ho kena tse ncha. Lefatše la khoebo le entse lebili leo ho seng mohla le khaotsang ho potoloha. Le re hohela hore re batle chelete e eketsehileng e tla khotsofatsa lintho tse eketsehileng tseo re li batlang. Sena se ka lebisa “litakatsong tse ngata tse se nang kelello le tse ntšang kotsi,” kapa “lipakaneng tse booatla le tse kotsi.” Se ka fella ka bophelo bo sa leka-lekanang bo ntseng bo fokotsa nako ea mesebetsi ea moea.—1 Timothea 6:9, 10; The Jerusalem Bible.
15. Mohlala o behoang ke hlooho ea lelapa o bohlokoa ka tsela efe?
15 Le tabeng ena, mohlala o behoang ke hlooho ea lelapa la Bokreste ke oa bohlokoa haholo. Boikutlo ba hae bo leka-lekaneng mabapi le boikarabelo ka lintho tsa lefatše le tsa moea bo lokela ho susumetsa le litho tse ling tsa lelapa. Ka sebele e ka ba ho kotsi haeba ntate a ka fana ka taeo e ntle ka molomo empa joale a hlōleha ho phelela mantsoe a hae. Ka potlako bana ba ka hlokomela hore ba bolelloa hore ba etse se nepahetseng empa batsoali ha ba se etse. Ka ho tšoanang, moholo kapa mohlanka ea sebeletsang ea khothaletsang ba bang tšebeletso ea ntlo le ntlo empa a ba le lelapa la hae ka seoelo mosebetsing ona ka potlako o lahleheloa ke tlhompho lapeng le ka phuthehong.—1 Ba-Korinthe 15:58; bapisa le Mattheu 23:3.
16. Re ka ipotsa lipotso life?
16 Ka hona, re ka hlahloba bophelo ba rōna ka tsela e tla re tsoela molemo. Na re tšoarehile haholo ka ho atleha linthong tsa lefatše hoo re hlokomolohang taba ea ho hatela pele moeeng? Na lefatšeng re nka mehato e eang pele empa ka phuthehong re boela morao? Hopola keletso ea Pauluse: “Taba ena ke ea ’nete: Motho ha a rata bolebeli, o lakatsa mosebetsi o motle.” (1 Timothea 3:1) Ho ba le boikarabelo ka phuthehong ho bolela ho hongata ka bomoea ba rōna ho feta ho fuoa maemo a phahameng mosebetsing. Ho hlokahala hore re leka-lekanye lintho ka hloko e le hore batho ba re hirileng ba se ke ba re laola joalokaha eka re inehetse ho bona eseng ho Jehova.—Mattheu 6:24.
Puisano e Nang le Morero e Ntšetsa Bomoea Pele
17. Ke eng se tlatsetsang ho hlaoleleng lerato la sebele ka lapeng?
17 Malapa a limillione kajeno a fetohile libaka tsa marobalo. Joang? Litho tsa lelapa li tlela feela ho tla robala le ho ja, ebe li tsoa ka potlako. Ke ka seoelo li lulang tafoleng ho thabela lijo li le ’moho. Ha ho boikutlo bo mofuthu ba ho atamelana lapeng. Phello e ba efe? Puisano ea haella, ha ho be le moqoqo o nang le moelelo. ’Me sena se ka fella ka hore litho tsa lelapa li se thahasellane, mohlomong li haelloe ke kameho ea sebele. Ha re ratana, re ipha nako ea ho qoqa le ho mamela. Rea khothatsa, ’me rea thusa. Tšobotsi ena ea bomoea e ama puisano e nang le moelelo pakeng tsa banyalani le pakeng tsa batsoali le bana.b E hloka nako le masene ha re leka ho phetla se leng sefubeng sa e mong ka sepheo sa ho abelana thabo, liphihlelo, le mathata.—1 Ba-Korinthe 13:4-8; Jakobo 1:19.
18. (a) Tšitiso e khōlō ea puisano ke efe? (b) Kamano e nang le morero e hahoa holim’a eng?
18 Puisano e molemo e hloka nako le boiteko. E bolela ho behella ka thōko nako ea ho bua le ho mamelana. Tšitiso e ’ngoe e khōlō ka ho fetisisa ho sena ke mochine ona o jang nako o nkoang e le oa bohlokoa ka ho fetisisa malapeng a mangata—TV. Sena se hlahisa phephetso—na TV ea u laola, kapa ua e laola? Ho laola TV ho hloka qeto e tiileng—ho kopanyelletsa le boikemisetso bo tiileng ba ho e koala. Empa ho etsa joalo ho tla re bulela tsela ea hore re le litho tsa lelapa le baena le bo-khaitseli ba moea re atamelane. Kamano e nang le morero e hloka puisano e molemo, ho utloisisana, ho utloisisa litlhoko tsa rōna le lintho tse re thabisang, ho bolellana kamoo re ananetseng ka teng lintho tsohle tseo re li etselitsoeng. Ka mantsoe a mang, puisano e nang le morero e bontša hore re ananela ba bang ’me re ba nka e le ba bohlokoa.—Liproverbia 31:28, 29.
19, 20. Haeba re tsotella bohle ka lapeng, re tla etsa’ng?
19 Ka lebaka leo, haeba re tsotella ba bang tokisetsong ea lelapa—’me sena se akareletsa ho tsotella litho tse sa lumelang tsa lelapa—re tla be re etsa ho eketsehileng mabapi le ho haha le ho boloka bomoea ba rōna. Tokisetsong ea lelapa, re tla be re latela keletso ea Petrose: “Kaofela le be le mohopolo o tšoanang, le bontše kutloelo-bohloko, le be le kameho ea boena, le be le qenehelo e bonolo, le be le mohopolo o ikokobelitseng, le se ke la phetetsa bobe ka bobe le hlapa ka hlapa, empa, ho fapana le seo, le fane ka tlhohonolofatso, hobane le bitselitsoe sona sena, hore le rue lefa la tlhohonolofatso.”—1 Petrose 3:8, 9, NW.
20 Re ka ba le tlhohonolofatso ea Jehova hona joale haeba re etsa boiteko ba ho boloka bomoea ba rōna, ’me sena se ka re thusa hore re rue tlhohonolofatso ea hae nakong e tlang ha re amohela mpho ea bophelo bo sa feleng lefatšeng la paradeise. Ho na le lintho tse ling tseo re ka li etsang re le lelapa ho thusana moeeng. Sehlooho se latelang se tla tšohla melemo ea ho etsa lintho ’moho re le lelapa.—Luka 23:43; Tšenolo 21:1-4.
[Mongolo o botlaaseng ba leqephe]
a Bomoea bo hlalosoa e le “ho ameha kapa ho khomarela melao-motheo ea bohlokoa ea bolumeli: tšoaneleho kapa boemo ba ho ba motho oa moea.” (Webster’s Ninth New Collegiate Dictionary) Motho oa moea o fapane le motho oa nama, ea bophoofolo.—1 Ba-Korinthe 2:13-16; Ba-Galata 5:16, 25; Jakobo 3:14, 15; Juda 19.
b Bakeng sa litlhahiso tse eketsehileng tabeng ea puisano ea lelapa, bona Molula-Qhooa oa September 1, 1991, maqephe 20-2.
Na U sa Hopola?
◻ Bomoea ke eng?
◻ Hlooho ea lelapa e ka etsisa mohlala oa Kreste joang?
◻ Re ka qoba joang lintho tse sokelang bomoea ba rōna?
◻ Ke eng se ka senyang bomoea ba lelapa?
◻ Ke hobane’ng ha ho le bohlokoa ho ba le puisano e nang le morero?
[Setšoantšo se leqepheng la 12]
Ho ba teng Thutong ea Buka ea Phutheho ho matlafatsa lelapa moeeng