Koetliso ea Gileade Tumelong e Halalelang ka ho Fetisisa
“LIITHUTI tsa rōna li koetlisitsoe hantle tumelong e halalelang ka ho fetisisa.” Ana e bile mantsoe a bulang lenaneo la kabo ea mangolo a sehlopha sa bo95 sa Sekolo sa Watchtower sa Bibele sa Gileade, e neng e tšoeroe ka Sontaha, September 12, 1993. Hoseng hoo baeti ba 4 614 le litho tsa lelapa la Bethele tse neng li bokane Holong ea Kopano ea Jersey City li ile tsa etsetsoa thapelo e bulang ke George Gangas. Moena Gangas e bile setho sa lelapa la Bethele ka lilemo tse 65 ’me joalokaha a le lilemo li 97 ke eena setho se hōlileng ka ho fetisisa sa Sehlopha se Busang.
Albert Schroeder, eo le eena e leng setho sa Sehlopha se Busang ’me e le molula-setulo oa lenaneo, o ile a re: “Ka likhoeli tse hlano thupelo ea Gileade e ile ea thehoa tumelong e halalelang ka ho fetisisa.” Empa ‘tumelo e halalelang ka ho fetisisa’ ke eng? O ile a hlalosa hore ‘tumelo ena e halalelang ka ho fetisisa,’ e boletsoeng ho Juda 20, ke ’nete eohle ea Bibele. Kahoo thupelo ea Gileade e thehiloe Lentsoeng la Jehova, Bibele, eo e leng buka ea sehlooho ea ho ithuta.
Liithuti li Amohela Taeo e Eketsehileng
Sebui sa pele e bile John Stuefloten oa Komiti ea Watchtower Farms, ea ileng a bua sehloohong “Ho Rua Molemo Tšusumetsong ea Batho ba Bohlale.” Bibele e bolela hore ea “tsamaeang le ba bohlale o tla hlalefa.” (Liproverbia 13:20) Nakong ea thupelo ea Gileade, liithuti li ile tsa qeta lihora tse fetang 900 li ithuta Bibele. Moena Stuefloten o ile a botsa liithuti: “Tšusumetso ea Jehova e tla le ama joang nakong e tlang? Le ea linaheng tse 18 tseo kakaretso ea baahi ba tsona e ka bang limilione tse 170. Kahoo le tla susumetsa batho bao joang?” Ka ho nahana ka bohlale ba Jehova, baromuoa ba bacha ba tla khona ho thusa ba bang ho fetoha barapeli ba Jehova, Mohloli oa bohlale bo sa lekanngoeng.
“Ho Iketsa Tsohle ho Bohle” e bile sehlooho sa puo e latelang, se ileng sa hōlisoa ke Lloyd Barry oa Sehlopha se Busang. (1 Ba-Korinthe 9:22) Lilemo tse fetileng tse ka bang 45, Moena Barry ka boeena e ne e le seithuti sehlopheng sa bo11 sa Gileade. Joale sehlopha sa bo95 se ile sa ananela ho fumana keletso e sebetsang e tsoang ho eo e kileng ea e-ba moromuoa ea nang le phihlelo ea lilemo tse ngata naheng esele. O ile a khothaletsa liithuti hore ka potlako li itsoakanye le batho ba leng tšimong ea bona e ncha e leng linaheng lisele ka ho tseba mekhoa ea sebaka seo ba leng ho sona le ho ithuta puo ea teng. O ile a bolela hore sena se ka etsoa hamolemohali ka ho itsoakanya le batho ba sebaka seo ba leng ho sona le ka ho sebetsa le bona haesita le ho ithuta meetlo ea bona le ho e sebelisa haeba ho loketse.
Ho ile ha latela Dean Songer oa Komiti ea Fektheri eo puo ea hae e neng e e-na le sehlooho se susumetsang “Ho Lokolloa Mosebetsing.” Ka mor’a lilemo tse fetang 35 a le tšebeletsong ea nako e tletseng, Moena Songer o utloisisa se boleloang ke ho phela bophelo bo tsepamisitsoeng pakaneng e itseng, bophelo bo sa rarahanang, bo lokolohileng kamehong ea lintho tse bonahalang. ’Me sena e ne e le ’moko-taba oa keletso ea hae ho liithuti. Libini tempeleng ea Jehova li ne li lokolotsoe mesebetsing e neng e etsoa ke Balevi ba bang e le hore li ka inehela ka ho feletseng kabelong ea tsona e khethehileng. (1 Likronike 9:33) Ka ho tšoanang, baromuoa ba Gileade ba lokolotsoe litabeng tse tloaelehileng tse kang mosebetsi oa boipheliso e le hore ba ka ameha haholo ka tšebeletso ea bona e khethehileng. Moena Songer o ile a qetella ka khothatso ena: “Bolokang pono ea lōna ka bophelo e tsepame le bophelo ba lōna bo sa rarahana. Boikarabelo ba lōna joaloka batho ba lokolotsoeng mosebetsing ke hore le be mosebetsing motšehare le bosiu, le rorise Jehova.”
Setho sa Sehlopha se Busang Daniel Sydlik o ile a latela ka sehlooho “Ho Ruta ba Bang Kamoo ba ka Fumanang se Molemohali Bophelong.” O ile a khothaletsa liithuti “hore li se ke tsa ruta feela empa li be sebete ka ho lekaneng ho bontša batho seo ba tlamehang ho se etsa e le hore ba ka etsa hore bophelo ba bona bo lumellane le thato ea Molimo.” Matichere a molemo a tlameha ho susumetsa le ho khothatsa. O ile a re: “Amehang ka ho thusa batho hore ba hōlise melao-motheo ea Bokreste ho e-na le ho ba ruta melao le litaelo feela,” ’me ha a qetella o ile a re: “Ka holimo ho tsohle, baena ba ratehang, ithuteng ’me le rute ba bang kamoo ba ka bontšang lerato, hobane ke tlamo e phethahetseng ea bonngoe.”—1 Ba-Korinthe 13:1-3; Ba-Kolosse 3:14, NW.
Ka mor’a likhoeli tse ngata li koetlisoa, liithuti li ile tsa rata ka ho khetheha bakoetlisi ba tsona ba babeli ba Gileade. Jack Redford, eo pele e neng e le moromuoa, o ile a bua pele, sehloohong “Le Entse Khetho e Nepahetseng.” Lefatšeng la boholo-holo la Bajode, pele a fetoha moapostola oa Mokreste, Pauluse o ne a na le boemo bo phahameng, a tumme, a na le tšusumetso e matla, ’me a eme hantle licheleteng. Empa ho Ba-Filippi 3:8, Pauluse o hlalosa lintho tseo tsohle e le “lithōle” kapa “toti,” ho latela phetolelo ea Phillips. O ne a amehile ka ho teba ka tšebeletso, ’me o ile a etsa khetho e nepahetseng. Ho fapana le eena, batho ba bangata kajeno ba bontša ka khetho ea bona bophelong hore ba nka matlotlo a bona a lintho tse bonahalang e le a bohlokoa ho feta bophelo bo sa feleng. Baromuoa ba Gileade ba entse khetho e nepahetseng. Jack Redford o ile a phetha ka ho re: “Ha ho letho leo lefatše la Diabolose le ka le fang lona le ka bapisoang le tšebeletso ea boromuoa. Hlokomelang tokelo ea lōna e ke keng ea lekanngoa, ’me le tlohelle lefatše hore le hlokomele toti ea lona!”
Ka lilemo tse fetileng tse 32, Ulysses Glass e bile morupeli oa Gileade. O ile a neha liithuti keletso ea ha ba tla arohana sehloohong “Ke Molimo Feela ea ka Etsang Sefate,” a thehile puo ea hae ho Pesaleme ea 1:3. Theknoloji ea kajeno ha e e-s’o khone ho etsa ntho e tšoanang le sefate, se entsoeng ke Molimo. Ka mantsoe a mang, Bakreste ba ’nete ba tšoana le lifate, tse lemiloeng le ho nosetsoa ke Jehova. Moena Glass o ile a hlokomela hore ka likhoeli tse hlano, liithuti li ne li “nosetsoa ka mehla ho tsoa selibeng sa metsi a fanang ka bophelo Lentsoeng la Molimo,” joaloka lifate tse leng morung oa moea kapa paradeiseng. Leha ho le joalo, joaloka baromuoa, ba tlameha ho lebela “methapo ea bona ea moea kotsing leha e le efe.” Ba ile ba khothaletsoa hore ba ‘tsoele pele ho noa metsi a bophelo a tsoang ho Jehova hobane ke Molimo feela ea ka etsang sefate.’
Puo ea ho qetela e fanoe ke Carey Barber, setho sa Sehlopha se Busang. Ka mor’a lilemo tse 70 a le tšebeletsong ea nako e tletseng, Moena Barber ka kholiseho o ne a ka bua sehloohong “Nehang Jehova Boinehelo bo Ikhethang.” Batho ba bangata ha baa neha Jehova boinehelo bo ikhethang. (Deuteronoma 5:9) Leha ho le joalo, joalokaha Moena Barber a bontšitse, ho sa tsotellehe ho se phethahale ha rōna, “ho ka etsahala hore re inehele ka ho feletseng ho Molimo.” O ile a phaella: “Ka sebele ha ho ea ka reng: ‘Diabolose o entse hore ke etse sena.’” Empa Diabolose a ka re hlōla haeba re hlōleha ho mo hanyetsa. (Jakobo 4:7) Ho ipoloka re tšoarehile mosebetsing oa Jehova ke tsela e ka sehloohong ea ho hanyetsa Satane le lefatše la hae le ho neha Jehova boinehelo bo ikhethang.
Ho Khethoa e le Baromuoa
Lenaneo la hoseng le phethiloe ka ho khethoa ka molao ha liithuti tse 46 kaofela e le baromuoa. Banyalani ba 23 ba ile ba amohela mangolo a bona a diploma ao karolong e ’ngoe a bolelang hore liithuti “li tšoaneleha ka ho khethehileng ho kopanela mosebetsing oa ho ruta, ho khothaletsa molemo le ho sebeletsa khotso ea ka ho sa feleng le molao oa taolo e phethahetseng le ho loka har’a batho bohle.” Ka sebele sehlopha sa bo95 sa Gileade se tla ikitlaeletsa ho phetha thōmo ena ea bohlokoa linaheng tse 18 tseo li rometsoeng ho tsona. Likabelo tsa tsona li akaretsa lefatše ’me li kopanyeletsa linaha tse Asia, Afrika, Europe, Latin Amerika, le Caribbean.
Thapama, ka mor’a Thuto ea Molula-Qhooa e khutsufalitsoeng e neng e khannoa ke Charles Woody oa Komiti ea Lefapha la Tšebeletso, liithuti tsa Gileade tse ncha tse abetsoeng mangolo li ile tsa etsa lenaneo la tsona la liithuti, ka sehlooho “Gileade e re Lokiselitse ho Ruta re le Baromuoa.” Lenaneo le ile la phethoa ka tšoantšiso “Khetho eo re Tobaneng le Eona.”
Ka mor’a lenaneo lena le hlasimollang, joale baromuoa ba bacha ba ne ba loketse ho romeloa likhutlong tse ’nè tsa lefatše ho kopanela le ba bang “tumelong e halalelang ka ho fetisisa.”
[Lebokose le leqepheng la 26]
Lipalo-palo tsa Sehlopha
Palo ea linaha tse emetsoeng: 7
Palo ea linaha tseo ba abetsoeng ho tsona: 18
Palo ea liithuti: 46
Palo ea banyalani: 23
Karolelano ea lilemo: 30,06
Karolelano ea lilemo ’neteng: 12,92
Karolelano ea lilemo tšebeletsong ea nako e tletseng: 9,4
[Setšoantšo se leqepheng la 26]
Sehlopha sa Bo95 se Abeloang Mangolo sa Sekolo sa Gileade sa Watchtower
Lethathamong le ka tlaase mona mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.