Ho Boulella Borapeli bo Hloekileng ba Jehova
‘Jehova ea bitsoang ea boulelang; ke Molimo o boulelang.’—EXODA 34:14.
1. Tšoaneleho ea Molimo e khōlō ke efe, hona e amana joang le poulelo ea hae?
JEHOVA o itlhalosa hore ke “Molimo o boulelang.” U ka ’na ua ipotsa hore na ke ka lebaka la’ng, kaha lentsoe “poulelo” le akarelletsa meelelo e mebe. Ka sebele, tšoaneleho ea Molimo e khōlō ke lerato. (1 Johanne 4:8) Ka hona maikutlo leha e le afe a hae a poulelo a tlameha a be a le molemong oa moloko oa batho. Ha e le hantle, re tla hlokomela hore poulelo ea Molimo ke ea bohlokoa bakeng sa khotso le kutloano bokahohleng.
2. Litsela tse ling tsa ho fetolela mantsoe a Seheberu a bolelang “poulelo” ke life?
2 Mantsoe a Seheberu a amanang le “poulelo” a hlaha ka makhetlo a fetang 80 Mangolong a Seheberu. Hoo e ka bang halofo ea litšupiso tsena li bua ka Jehova Molimo. G. H. Livingston o-oa hlalosa: “Ha khopolo ea poulelo e lebisoa ho Molimo, ha e fetise moelelo oa maikutlo a sothehileng, empa, ho e-na le hoo, a ho phehella borapeling bo le bong ba Jehova.” (The Pentateuch in Its Cultural Environment) Ka hona, ka linako tse ling New World Translation e fetolela lereho lena la Seheberu e le “ho phehella boinehelo ho a le mong.” (Ezekiele 5:13) Liphetolelo tse ling tse loketseng ke “mahlaha-hlaha” kapa “cheseho.”—Pesaleme ea 79:5, NW; Esaia 9:7.
3. Ka linako tse ling poulelo e ka ba molemo joang?
3 Motho o entsoe a e-na le matla a ho boulela, empa ho oela ha moloko oa batho sebeng ho feletse ka ho khopamisoa ha poulelo. Leha ho le joalo, poulelo ea motho e ka ba molemo. E ka susumelletsa motho hore a sireletse moratuoa litšusumetsong tse mpe. Ho feta moo, batho ba ka bontša poulelo e loketseng bakeng sa Jehova le borapeli ba hae. (1 Marena 19:10) E le ho fetisa kutloisiso e nepahetseng ea poulelo e joalo bakeng sa Jehova, lereho la Seheberu le ka fetoleloa e le “ho se mamelle tlhōlisano” malebana le eena.—2 Marena 10:16, NW.
Namame ea Khauta
4. Ke taelo efe e amang poulelo e lokileng e neng e totobetse Molaong oa Molimo ho Iseraele?
4 Mohlala oa poulelo e lokileng ke se etsahetseng ha Baiseraele ba amohela Molao Thabeng ea Sinai. Ka makhetlo, ba ne ba ’nile ba lemosoa ho se rapele melimo e entsoeng ke motho. Jehova o ile a ba bolella: “’Na Jehova Molimo oa hao ke Molimo ea batlang boinehelo ho a le mong [kapa, “Molimo ea boulelang (ea chesehang); Molimo ea sa mamelleng tlhōlisano”].” (Exoda 20:5, NW, mongolo o botlaaseng ba leqephe; bapisa le Exoda 20:22, 23; 22:20; 23:13, 24, 32, 33.) Jehova o ile a etsa selekane le Baiseraele, a tšepisa hore o tla ba hlohonolofatsa le ho ba tlisa Naheng e Tšepisitsoeng. (Exoda 23:22, 31) Sechaba se ile sa re: “Tseo tsohle Jehova a li boletseng, re tla li etsa le ho li utloa.”—Exoda 24:7.
5, 6. (a) Ke joang Baiseraele ba ileng ba etsa sebe ka ho tebileng ha ba hlomme litente Thabeng ea Sinai? (b) Jehova le barapeli ba hae ba tšepahalang ba ile ba bontša poulelo e loketseng joang Sinai?
5 Leha ho le joalo, kapele Baiseraele ba ile ba siteloa Molimo. Ba ne ba ntse ba hlomme litente tlas’a Thaba ea Sinai. Moshe o ne a bile ka holim’a thaba ka matsatsi a mangata, a fumana taeo e tsoelang pele e tsoang ho Molimo, eaba sechaba se hatella moholoane oa Moshe, Aarone, hore a se etsetse molimo. Aarone o ile a lumela ’me a etsa namane ka khauta eo sechaba se ileng sa fana ka eona. Ho ile ha boleloa hore setšoantšo sena se emela Jehova. (Pesaleme ea 106:20) Letsatsing le hlahlamang ba ile ba nehela mahlabelo ’me ba ’na “ba e khumamela.” Eaba ba ba le “nako e monate.”—Exoda 32:1, 4, 6, 8, 17-19, NW.
6 Moshe o ile a theoha thabeng nakong ea ha Baiseraele ba entse mokete. Ha a bona boitšoaro ba bona bo lihlong, o ile a hoeletsa: “Ke mang ea ka lehlakoreng la Jehova?” (Exoda 32:25, 26, NW) Bara ba Levi ba ile ba phuthehela ho Moshe, ’me a ba laela hore ba nke lisabole ’me ba bolaee barapeli bao ba litšoantšo ba entseng moketjana o lerata. Balevi ba ile ba bontša ho boulella ha bona borapeli bo hloekileng ba Molimo, ba bolaea baena ba bona ba ka bang 3 000 ba leng molato. Jehova o ile a matlafatsa ketso ena ka ho tlisetsa baphonyohi lefu la seoa. (Exoda 32:28, 35) Eaba Molimo o pheta taelo e reng: “Ha u na ho khumamela molimo osele, etsoe Jehova a bitsoa ea boulelang; ke Molimo o boulelang.”—Exoda 34:14.
Baale oa Peore
7, 8. (a) Baiseraele ba bangata ba ile ba oela joang borapeling bo tebileng ba litšoantšo ba Baale oa Peore? (b) Seoa se tsoang ho Jehova se ile sa fela joang?
7 Lilemo tse mashome a mane hamorao, ha sechaba sa Iseraele se ne se tla tloha se kena Naheng e Tšepisitsoeng, basali ba Moabe le ba Midiane ba neng ba le batle ka mokhoa o hapang maikutlo ba ile ba hohela Baiseraele ba bangata hore ba tle ’me ba thabele kamohelo ea bona e mofuthu ea baeti. Banna bana ba ka be ba ile ba hana botsoalle bo haufi le barapeli ba melimo ea bohata. (Exoda 34:12, 15) Ho e-na le hoo, ba ile ba matha joaloka ‘likhomo tse eang tlhabong,’ ba etsa bohlola le basali ’me ba ikopanya le bona ho khumamela Baale oa Peore.—Liproverbia 7:21, 22; Numere 25:1-3.
8 Jehova o ile a romela seoa ho bolaea ba ileng ba ameha borapeling bona bo lihlong ba likamano tsa botona le botšehali. Molimo o boetse a laela hore Baiseraele ba se nang molato ba bolaee baena ba bona ba molato. Ka phephetso e tellang, morena e mong oa Iseraele ea bitsoang Zimri o ile a tlisa khosatsana ea Midiane tenteng ea hae ho tla ba le likamano le eena. Ha a bona sena, Finease, moprista ea tšabang Molimo, o ile a bolaea batho bao ba babeli ba itšoereng hampe. Seoa sa khaotsa, ’me Molimo a re: “Finease . . . o khelositse bohale ba ka holim’a bana ba Iseraele, kahobane a mpouletse har’a bona; ke ka baka leo ke sa kang ka timetsa bana ba Iseraele poulelong ea ka.” (Numere 25:11) Le hoja sechaba se ile sa bolokoa timetsong, bonyane ho ile ha e-shoa Baiseraele ba 23 000. (1 Ba-Korinthe 10:8) Ba ile ba lahleheloa ke tšepo eo ba bileng le eona ka nako e telele ea ho kena Naheng e Tšepisitsoeng.
Thuto ea Temoso
9. Sechaba sa Iseraele le Juda se ile sa hlaheloa ke eng ka lebaka la hore se ne se sa boulelle borapeli bo hloekileng ba Jehova?
9 Ka masoabi, kapele Baiseraele ba ile ba lebala lithuto tsena. Ha baa ka ba boulella borapeli bo hloekileng ba Jehova. “Ba baka . . . poulelo ea [Molimo] ka litšoantšo tsa melimo ea bona.” (Pesaleme ea 78:58) Ka lebaka la sena, Jehova o ile a lumella meloko e leshome ea Iseraele hore e isoe botlamuoeng ke Baassyria ka 740 B.C.E. ’Muso oa meloko e ’meli e setseng ea Juda le oona o ile oa hlaheloa ke kotlo e tšoanang nakong eo motse-moholo oa oona oa Jerusalema o ileng oa timetsoa ka selemo sa 607 B.C.E. Ho ile ha bolaoa ba bangata, ’me baphonyohi ba ile ba isoa botlamuoeng Babylona. Ke mohlala o lemosang hakaakang ho Bakreste bohle kajeno!—1 Ba-Korinthe 10:6, 11.
10. Ho tla etsahala joang ka barapeli ba litšoantšo ba sa bontšeng pako?
10 Karolo ea boraro ea baahi ba lefatše—limilione tse ka bang 1 900—hona joale e ipolela hore ke Bakreste. (1994 Britannica Book of the Year) Boholo ba bona bo tsoa likerekeng tse sebelisang litšoantšo tse ferefiloeng, litšoantšo le lifapano borapeling ba bona. Jehova ha aa ka a qenehela batho ba hae ba ileng ba mo etsa hore a tlale poulelo ka borapeli ba bona ba litšoantšo. ’Me a ke ke a qenehela ba ipitsang Bakreste ba rapelang ka thuso ea lintho tse bonahalang. Jesu Kreste o itse: “Molimo ke Moea: ba o rapelang e ka khona ba rapele ka moea le ka ’nete.” (Johanne 4:24) Ho feta moo, Bibele e lemosa Bakreste hore ba itebele khahlanong le borapeli ba litšoantšo. (1 Johanne 5:21) Barapeli ba litšoantšo ba sa bontšeng pako ba har’a ba ke keng ba e-ja lefa la ’Muso oa Molimo.—Ba-Galata 5:20, 21.
11. Mokreste a ka ba molato oa ho rapela litšoantšo joang empa a sa khumamela setšoantšo, hona motho o tla thusoa ke eng ho qoba borapeli bo joalo ba litšoantšo? (Ba-Efese 5:5)
11 Le hoja ho se mohla Mokreste oa ’nete a ka khumamelang setšoantšo, o tlameha ho qoba ntho leha e le efe eo Molimo a e nkang e le borapeli ba litšoantšo, eo a e nkang e sa hloeka ’me e le sebe. Ka mohlala, Bibele e-ea lemosa: “Le bolaee ke hona litho tsa lōna tse leng lefatšeng, ke ho re, bofebe, le litšila, le maikutlo a mabe, le litakatso tse mpe, le takatso ea moruo, e leng ho sebeletsa molimo oa bohata. Ke ka baka la ntho tseo bohale ba Molimo bo tlang holim’a bana ba ho se lumele.” (Ba-Kolosse 3:5, 6, mongolo o tšekaletseng ke oa rōna.) Ho mamela mantsoe ana ho hloka ho hana boitšoaro bo bobe. Sena se hloka ho qoba boithabiso bo etselitsoeng ho tsosa takatso e litšila ea boitšoaro ba likamano tsa botona le botšehali. Ho e-na le ho khotsofatsa takatso e joalo, Bakreste ba ’nete ba boulella borapeli bo hloekileng ba Molimo.
Mehlala ea Morao ea Poulelo ea Bomolimo
12, 13. Jesu o ile a beha mohlala o hlaheletseng joang ha a bontša hore o boulella borapeli bo hloekileng ba Molimo?
12 Mohlala o hlahelletseng ka ho fetisisa oa motho ea bontšitseng ho boulella borapeli bo hloekileng ba Molimo ke Jesu Kreste. Selemong sa pele sa tšebeletso ea hae, o ile a bona bo-rakhoebo ba meharo ba sebetsa mabaleng a tempele. Ho ka etsahala hore ebe Bajode ba baeti ba ne ba hloka litšebeletso tsa ba ananyang lichelete bakeng sa lichelete tsa bona tsa linaha lisele hore ba fumane chelete e neng e tla amoheleha e le lekhetho la tempele. Ho ne ho boetse ho hlokahala hore ba reke liphoofolo le linonyana bakeng sa ho etsa mahlabelo a hlokoang ke Molao oa Molimo. Litšebelisano tse joalo tsa khoebo li ne li tlameha ho etsetsoa kantle ho mabala a tempele. Ho hobe le ho feta, ka ho totobetseng bahoebi ba ne ba sebelisa litlhoko tsa baena ba bona hampe ka ho beha litheko tse feteletseng. A jeloe ke ho boulella borapeli bo hloekileng ba Molimo, Jesu o ile a sebelisa sephali ho phahla linku le likhomo. Hape o ile a phethola litafole tsa ba ananyang lichelete, a re: “Ntlo ea Ntate le se ke la e etsa ntlo ea ho rekela.” (Johanne 2:14-16) Ka hona Jesu o ile a phethahatsa mantsoe a Pesaleme ea 69:9: “Cheseho [kapa, “poulelo,” Byington] ea ntlo ea hao e ntjele.”
13 Lilemo tse tharo hamorao Jesu a boela a bona bahoebi ba meharo ba rekisa tempeleng ea Jehova. Na o ne a tla e hloekisa ka lekhetlo la bobeli? Poulelo ea hae ka borapeli bo hloekileng ba Molimo e ne e ntse e le matla joaloka nakong ea ha a ne a qala tšebeletso ea hae. O ile a leleka ka bobeli barekisi le bareki. ’Me o ile a fana ka lebaka le matla haholoanyane bakeng sa liketso tsa hae, a re: “Ha ke re, ho ngoliloe, ho thoe: Ntlo ea ka e tla bitsoa ntlo ea thapelo ea lichaba tsohle? athe lōna, le e entse lehaha la masholu!” (Mareka 11:17) E bile mohlala o tsotehang hakaakang oa ho phehella ho bontša poulelo ea bomolimo!
14. Ho boulella ha Jesu borapeli bo hloekileng ho lokela ho re ama joang?
14 Botho ba Morena Jesu Kreste eo hona joale a tlotlisitsoeng ha boa fetoha. (Ba-Heberu 13:8) Lekholong lena la bo20 la lilemo, o ntse a boulella borapeli bo hloekileng ba Ntate oa hae joaloka nakong ea ha a ne a le lefatšeng. Sena se ka bonoa melaetseng ea Jesu e tlalehiloeng bukeng ea Tšenolo e eang ho liphutheho tse supileng. E sebetsa haholo hona joale, ‘letsatsing la Morena.’ (Tšenolo 1:10; 2:1–3:22) Ponong moapostola Johanne o ile a bona Jesu Kreste ea tlotlisitsoeng a e-na le ‘mahlo a kang khabo ea mollo.’ (Tšenolo 1:14) Sena se bontša hore ha ho letho leo Kreste a sa le hlokomeleng ha a hlahloba liphutheho ho tiisa hore li lula li hloekile ’me li loketse tšebeletso ea Jehova. Ho hlokahala hore Bakreste ba kajeno ba hopole temoso ea Jesu khahlanong le ho leka ho sebeletsa benghali ba babeli—Molimo le maruo. (Mattheu 6:24) Jesu o ile a bolella litho tsa phutheho ea Laodicea tse ratang lintho tse bonahalang: “Ereka ha u le fofo, u sa bate, u sa chese, ke tla u hlatsa molomong oa ka. . . . U be le cheseho hle, ’me u bake.” (Tšenolo 3:14-19) Ka lipolelo le ka mohlala, baholo ba khethiloeng ba phutheho ba lokela ho thusa balumeli-’moho le bona ho qoba leraba la lerato la lintho tse bonahalang. Baholo ba boetse ba tlameha ho sireletsa mohlape khahlanong le boitšoaro bo hlephileng ba lefatše lena le ratang likamano tsa botona le botšehali. Ho feta moo, batho ba Molimo ho hang ha ba batle ho mamella tšusumetso leha e le efe ea Jezebele ka phuthehong.—Ba-Heberu 12:14, 15; Tšenolo 2:20.
15. Moapostola Pauluse o ile a etsisa Jesu joang ha a bontša hore o boulella borapeli ba Jehova?
15 Moapostola Pauluse e ne e le moetsisi oa Kreste. E le ho sireletsa Bakreste ba sa tsoa kolobetsoa khahlanong le litšusumetso tse sa haheng moeeng, o itse: “Ke le boulela ka poulelo ea Molimo.” (2 Ba-Korinthe 11:2) Pele ho sena, poulelo ea Pauluse ka borapeli bo hloekileng e ne e ile ea mo susumelletsa hore a laee eona phutheho ena hore e khaole sehlola se sa bontšeng pako se neng se e-na le tšusumetso e senyang. Litaelo tse bululetsoeng tse fanoeng ketsahalong ena e bile thuso e khōlō ho baholo kajeno ha ba leka ka tieo ho boloka liphutheho tse fetang 75 500 tsa Lipaki tsa Jehova li hloekile.—1 Ba-Korinthe 5:1, 9-13.
Poulelo ea Molimo e Tsoela Batho ba Hae Molemo
16, 17. (a) Ha Molimo a ne a otla Juda ea boholo-holo, lichaba li ile tsa bontša boikutlo bofe? (b) Ka mor’a lilemo tse 70 Juda e le botlamuoeng, Jehova o ile a bontša joang hore o boulella Jerusalema?
16 Ha Molimo a ne a otla sechaba sa Juda ka ho lumella hore se isoe botlamuoeng Babylona, se ile sa songoa. (Pesaleme ea 137:3) Ka poulelo e tletseng lehloeo, Baedomo ba bile ba thusa Bababylona hore ba tlisetse sechaba sa Molimo tlokotsi, ’me Jehova o ile a hlokomela sena. (Ezekiele 35:11; 36:15) Baphonyohi ba ile ba bontša pako ha ba le botlamuoeng, ’me ka mor’a lilemo tse 70 Jehova o ile a ba khutlisetsa naheng ea habo bona.
17 Qalong, sechaba sa Juda se ne se le maqakabetsing a tiileng. Motse oa Jerusalema le tempele ea oona e ne e le lesupi. ’Me lichaba tse se potolohileng li ile tsa hanyetsa boiteko bohle ba ho haha tempele hape. (Esdrase 4:4, 23, 24) Jehova o ile a ikutloa joang ka see? Tlaleho e bululetsoeng e re: “Ho itsoe ke Jehova oa makhotla: Ke boulela Jerusalema le Sione ka poulelo e kholo; ke bile ke halefetse ka khalefo e kholo lichaba tse iketlileng; hobane ke ne ke halefetse sechaba sa ka hakhutšoanyane, empa tsona tsa tlatsa ho se etsa hampe. Ka baka leo, ho bolela Jehova, ke boela ho Jerusalema ka mohau, ntlo ea ka e tla hahuoa teng, ho bolela Jehova oa makhotla.” (Zakaria 1:14-16) Joalokaha a tšepisitse, tempele le motse oa Jerusalema li ile tsa hahoa hape ka katleho.
18. Bakreste ba ’nete ba ile ba hlaheloa ke eng ntoeng ea pele ea lefatše?
18 Phutheho ea ’nete ea Bokreste e bile le phihlelo e tšoanang lekholong la bo20 la lilemo. Ntoeng ea pele ea lefatše, Jehova o ile a laea batho ba hae hobane ba ne ba sa bontša ho se nke lehlakore ka tieo qhoebeshanong eo ea lefatše. (Johanne 17:16) Molimo o ile a lumella mebuso ea lipolotiki hore e ba hatelle, ’me baruti ba Bokreste-’mōtoana ba ile ba thabela tlokotsi ena. Ha e le hantle, baruti ba ne ba etelletse pele taba ea hore bo-ralipolotiki ba thibele mosebetsi oa Liithuti tsa Bibele, joalokaha Lipaki tsa Jehova li ne li tsejoa joalo ka nako eo.—Tšenolo 11:7, 10.
19. Jehova o bontšitse joang hore o boulella borapeli ba hae ho tloha ka 1919?
19 Leha ho le joalo, Jehova o ile a bontša ho boulella borapeli ba hae ’me a khutlisetsa batho ba hae ba bontšitseng pako mohaung oa hae selemong sa ka mor’a ntoa sa 1919. (Tšenolo 11:11, 12) Ka lebaka leo, palo ea barorisi ba Jehova e ile ea eketseha ho tloha ho ba ka tlaase hanyenyane ho 4 000 ka 1918 ho ea ho ba ka bang limilione tse hlano kajeno. (Esaia 60:22) Kapele, poulelo ea Jehova ka borapeli ba hae bo hloekileng e tla bonahatsoa ka litsela tse matla haholoanyane.
Liketso Tsa Nako e Tlang Tsa Poulelo ea Molimo
20. Ke eng seo haufinyane Molimo a tla se etsa ho bontša hore o boulella borapeli bo hloekileng?
20 Ka makholo a lilemo likereke tsa Bokreste-’mōtoana li ’nile tsa latela tsela ea bakoenehi ba Bajode ba ileng ba susumelletsa Jehova poulelong. (Ezekiele 8:3, 17, 18) Kapele Jehova Molimo o tla nka bohato ka ho kenya khopolo e matla ka lipelong tsa litho tsa Machaba a Kopaneng. Sena se tla susumelletsa mebuso ea lipolotiki hore e ripitle Bokreste-’mōtoana le bolumeli bohle ba bohata. (Tšenolo 17:16, 17) Barapeli ba ’nete ba tla pholoha ho lihuoa ha kahlolo ena e tšosang ea bomolimo. Ba tla arabela mantsoeng a libōpuoa tsa leholimo tse reng: “Rorisang Jah! . . . Kaha o phethahalitse kahlolo holim’a seotsoa se seholo [bolumeli ba bohata] se ileng sa bolisa lefatše ka bohlola ba sona [lithuto tsa sona tsa bohata le ho tšehetsa lipolotiki tse litšila], ’me o phetelelitse mali a makhoba a hae letsohong la sona.”—Tšenolo 19:1, 2, NW.
21. (a) Satane le tsamaiso ea hae ba tla etsa eng ka mor’a hore bolumeli ba bohata bo felisoe? (b) Molimo o tla arabela joang?
21 Ho tla etsahala eng ka mor’a ho felisoa ha ’muso oa lefatše oa bolumeli ba bohata? Satane o tla susumelletsa mebuso ea lipolotiki hore e hlophise tlhaselo ea lefatše lohle khahlanong le batho ba Jehova. Molimo oa ’nete o tla arabela joang boitekong bona ba Satane ba ho felisa borapeli ba ’nete lefatšeng? Ezekiele 38:19-23 e-ea re bolella: “[’Na Jehova] ke rialo poulelong ea ka le chesehong ea khalefo ea ka. . . . [Satane] ke tla mo tsekisa ke tšoere lefu la seoa le mali; ke tla mo nesetsa lipula tsa likhohola le majoe a sefako, le mollo le sebabole, ke li nesetse le makhotla a hae le lichaba tse ngata tse leng ho eena. ’Me ke tla itlotlisa, ke be ke ikhalaletse, ke itsebahatse mahlong a lichaba tse ngata; ’me ba tla tseba hoba ke ’na Jehova.”—Bona le Sofonia 1:18; 3:8.
22. Re ka bontša joang hore re boulella borapeli bo hloekileng ba Jehova?
22 Ho tšelisa hakaakang ho tseba hore ’Musi oa bokahohle ka poulelo o hlokomela barapeli ba hae ba ’nete! Ka lebaka la kananelo e tebileng bakeng sa mosa oa hae o sa tšoanelang, a re boulelleng borapeli bo hloekileng ba Jehova Molimo. Ka cheseho, ese eka re ka tsoela pele ho bolela litaba tse molemo le ho letela ka tšepo letsatsi le leholo la ha Jehova a hōlisa le ho halaletsa lebitso la hae le leholo.—Mattheu 24:14.
Lintlha Bakeng sa ho Thuisa
◻ Ho bolela eng ho boulella Jehova?
◻ Re ka ithuta eng mohlaleng o behiloeng ke Baiseraele ba boholo-holo?
◻ Re ka qoba joang ho susumelletsa Jehova poulelong?
◻ Molimo le Kreste ba bontšitse joang hore ba boulella borapeli bo hloekileng?
[Lebokose le leqepheng la 12]
Lerato ha le Boulele
MABAPI le mohono, setsebi sa lekholong la bo19 la lilemo Albert Barnes se ile sa ngola: “Ke e ’ngoe ea lipontšo tse tloaelehileng haholo tsa bokhopo, ’me e bontša ka ho hlakileng tšenyeho ea motho.” O ile a phaella ka ho re: “Ea neng a ka batla mohloli oa lintoa le liqabang le merero ea lefatše—mekhoa eohle esita le merero leha e le efe ea ba ipitsang Bakreste, e sentseng bolumeli ba bona haholo le ho bo etsa bo nang le monahano oa lefatše—o tla makala ho fumana hore boholo ba oona ke mohono. Re utloa bohloko hore ba bang ba atlehile ho re feta; re lakatsa ho ba le seo ba bang ba nang le sona, le hoja re se na tokelo ea sona; ’me sena se lebisa mekhoeng e mengata e fosahetseng e phehelloang ho etsa hore ba se ke ba se thabela, kapa hore re iphumanele sona, kapa ho bontša hore ha baa rua kamoo ka tloaelo ho nahanoang hore ba ruile kateng. . . . hobane ka ho etsa joalo moea oa mohono o ka lifubeng tsa rōna o tla khotsofatsoa.”—Ba-Roma 1:29; Jakobo 4:5.
Ka ho fapaneng, Barnes o ile a bua mantsoe a thahasellisang mabapi le lerato, le sa “honoheleng.” (1 Ba-Korinthe 13:4, King James Version) O ile a ngola: “Lerato ha le honohele ba bang ka thabo eo ba nang le eona; le thabela katleho ea bona; ’me ha thabo ea bona e eketseha . . . , ba susumetsoang ke lerato . . . ba ke ke ba fokotsa thabo eo; ba ke ke ba ba soabisa ka lebaka la seo ba nang le sona; ba ke ke ba soabisoa ke thabo eo; ba ke ke ba belaela kapa ba khopisoa ke hore bona ha baa fumana monyetla o phahameng joalo. . . . Haeba re rata ba bang—haeba re thabisoa ke thabo ea bona, ha rea lokela ho ba honohela.”
[Setšoantšo se leqepheng la 10]
Finease o ne a boulella borapeli bo hloekileng ba Jehova