Na Molimo o Tla Pele Lapeng la Hao?

“U rate Morena, Molimo oa hao, ka pelo ea hao eohle.”—MAREKA 12:29, 30.

1. Ke habohlokoa hakae hore re rate Jehova?

MONGOLI e mong o ile a botsa Jesu a re: “Molao oa pele ho melao eohle ke ofe na?” Ho e-na le hore Jesu a fane ka maikutlo a hae, o ile a araba potso ea hae ka ho qotsa Lentsoeng la Molimo ho Deuteronoma 6:4, 5. O ile a araba: “Molao oa pele ho melao eohle ke o reng: Utloa, Iseraele; Morena, Molimo oa rōna, ke Morena a ’notsi, ’me u rate Morena, Molimo oa hao, ka pelo ea hao eohle, le ka moea oa hao oohle, le ka khopolo ea hao eohle, le ka matla a hao ’ohle.”—Mareka 12:28-30.

2. (a) Jesu o ile a tlameha ho talimana le khanyetso efe? (b) Ke eng seo ka nako e ’ngoe se ka etsang hore ho be thata ho khahlisa Jehova?

² Ho utloa seo Jesu a ileng a re ke molao oa pele—oa bohlokoa ka ho fetisisa—ho hloka hore kamehla re etse se khahlisang Jehova. Jesu o ile a ho etsa, le hoja ka lekhetlo le leng moapostola Petrose a ile a hanyetsa tsela ea Jesu, ’me ka le leng a hanyetsoa le ke beng ka eena ba haufi. (Mattheu 16:21-23; Mareka 3:21; Johanne 8:29) Ho thoe’ng haeba u iphumana u le boemong bo tšoanang le boo? Nka hore litho tsa lelapa li batla hore u khaotse ho ithuta Bibele le ho kopanela le Lipaki tsa Jehova. Na u tla etelletsa Molimo pele ka ho etsa se mo khahlisang? Na Molimo o tla pele, esita leha litho tsa lelapa li ka ’na tsa hanyetsa boiteko ba hao ba ho mo sebeletsa?

Leraba la Khanyetso ea Lelapa

3. (a) Liphello tsa thuto ea Jesu e ka ’na ea e-ba life ho lelapa? (b) Litho tsa lelapa li ka bontša joang hore na li rata mang haholo?

³ Jesu ha aa ka a nyenyefatsa bothata bo ka ’nang ba hlaha ha ba bang ka lapeng ba hanyetsa setho se amohelang lithuto tsa hae. Jesu o itse: “Le bafo [“ba lelapa,” NW] ba motho e tla ba lira ho eena.” Empa, ho sa tsotellehe phello eo e bohloko, Jesu o ile a bontša hore na ke mang ea lokelang ho tla pele ha a re: “Ea ratang ntat’ae leha e le ’m’ae haholo ho ’na, ha a ntšoanele; le ea ratang mor’a hae, leha e le morali oa hae haholo ho ’na, ha a ntšoanele.” (Mattheu 10:34-37) Re etelletsa Jehova Molimo pele ka ho latela lithuto tsa Mora oa hae Jesu Kreste, eo e leng “setšoantšo sa boleng ba oona [Molimo].”—Ba-Heberu 1:3; Johanne 14:9.

4. (a) Jesu o itse ke’ng se amehang tabeng ea ho ba molateli oa hae? (b) Bakreste ba lokela ho hloea litho tsa lelapa ka kutloisiso efe?

⁴ Ka lekhetlo le leng ha Jesu a ne a bua ka se hlileng se amehang tabeng ea ho ba molateli oa hae oa ’nete, o ile a re: “Ekare ha e mong a e-tla ho ’na, a sa hloee ntat’ae, le ’m’ae, le mosali oa hae, le bana ba hae, le banab’abo, le bo-khaitselie, le bona bophelo [“soule,” NW] ba hae, o sitoa ho ba morutuoa oa ka.” (Luka 14:26) Ho hlakile hore Jesu o ne a sa bolele hore balateli ba hae ba lokela hore ba hloee litho tsa malapa a bona ka tsela ea sebele, kaha o ile a laela batho hore ba rate esita le lira tsa bona. (Mattheu 5:44) Ho e-na le hoo, Jesu mona o ne a bolela hore balateli ba hae ba tlameha ho rata litho tsa lelapa hanyenyane ho feta kamoo ba ratang Molimo kateng. (Bapisa le Mattheu 6:24.) Tumellanong le kutloisiso eo, Bibele e re Jakobo o ne a ‘hloile’ Lea ’me a rata Ragele, e leng se neng se bolela hore o ne a sa rate Lea ka lerato le lekanang le leo a neng a rata ngoan’abo, Ragele ka lona. (Genese 29:30-32) Jesu o itse, esita le “soule” ea rōna kapa bophelo e lokela ho hlouoa, kapa ho ratoa hanyenyane, ho feta Jehova!

5. Satane ka mano o sebelisa tokisetso ea lelapa joang?

⁵ E le ’Mōpi le Monehi-Bophelo, Jehova o lokeloa ke boinehelo bo feletseng ba bahlanka ba hae kaofela. (Tšenolo 4:11) Moapostola Pauluse o ile a ngola: ‘Ke khumama pel’a Ntate, eo leloko [“lelapa,” NW] le leng le le leng le maholimong le lefatšeng le bitsoang ka eena.’ (Ba-Efese 3:14, 15) Jehova o entse tokisetso ea lelapa ka tsela e babatsehang hoo litho tsa lelapa li nang le kameho e lerato ea tlhaho se seng ho se seng. (1 Marena 3:25, 26; 1 Ba-Thessalonika 2:7) Leha ho le joalo, Satane Diabolose ka mano o sebelisa kameho ena e lerato ea tlhaho bakeng sa lelapa hampe, e leng se akarelletsang takatso ea ho khahlisa baratuoa. O eketsa malakabe a khanyetso ea lelapa, ’me ba bangata ha ba talimane le eona ba hlokomela hore ho emela linnete tsa Bibele ka tieo ke phephetso.—Tšenolo 12:9, 12.

Ho Talimana le Phephetso ka Katleho

6, 7. (a) Litho tsa lelapa li ka thusoa joang ho ananela bohlokoa ba thuto ea Bibele le ho kopanela le Bakreste? (b) Re ka bontša joang hore re rata litho tsa lelapa la rōna e le kannete?

⁶ U tla etsa’ng haeba u tlameha ho etsa khetho pakeng tsa ho khahlisa Molimo kapa ho khahlisa setho sa lelapa? Na u tla ikemela ka hore Molimo ha aa lebella hore re ithute Lentsoe la hae le ho sebelisa melao-motheo ea hae haeba ho etsa joalo ho baka ho se utloane ka lapeng? Empa ak’u ho nahane. Haeba u inehela ’me u khaotsa thuto ea hao ea Bibele kapa ho kopanela le Lipaki tsa Jehova, baratuoa ba sa tla utloisisa joang hore tsebo e nepahetseng ea Bibele ke taba ea lefu le bophelo?—Johanne 17:3; 2 Ba-Thessalonika 1:6-8.

⁷ Re ka ’na ra etsa mohlala oa boemo bona ka tsela ena: Mohlomong setho se seng sa lelapa se na le takatso e feteletseng ea tahi. Na ho hlokomoloha bothata ba hae ba ho noa kapa ho bo nyenyefatsa ho tla mo tsoela molemo oa sebele? Na ho ne ho ka ba molemo ho boloka khotso ka ho inehela le ho se etse letho ka bothata boo? Che, mohlomong u-ua lumela hore ho ne ho tla ba molemo haholo ho leka ho mo thusa ho hlōla bothata ba hae ba ho noa, le hoja ho bolela ho talimana le khalefo ea hae le litšokelo ka sebete. (Liproverbia 29:25) Ka ho tšoanang, haeba u rata litho tsa lelapa la hao e le kannete, u ke ke ua inehela boitekong ba tsona ba ho u thibela ho ithuta Bibele. (Liketso 5:29) Ke feela ka ho ema u tiile ho ka etsahalang hore u li thuse ho utloisisa hore ho phela ka lithuto tsa Kreste ho bolela bophelo ba rōna ka bobona.

8. Re rua molemo joang ’neteng ea hore Jesu o ile a etsa thato ea Molimo ka botšepehi?

⁸ Ho etelletsa Molimo pele ho ka ’na ha e-ba thata haholo ka linako tse ling. Empa hopola, Satane o ile a boela a thatafalletsa Jesu ho etsa thato ea Molimo. Empa le ka mohla Jesu ha aa ka a tela; o ile a mamella esita le bohloko bo otlang pelo thupeng ea tlhokofatso bakeng sa rōna. Bibele e re: “Jesu Kreste [ke] ’Moloki oa rōna.” ‘O re shoetse.’ (Tite 3:6; 1 Ba-Thessalonika 5:10) Na ha re ananele hore ebe Jesu ha aa ka a inehela khanyetsong? Kahobane o ile a mamella lefu la sehlabelo, re na le tebello ea bophelo bo sa feleng lefatšeng le lecha le ho loka le nang le khotso ka ho bontša tumelo maling a hae a tšolotsoeng.—Johanne 3:16, 36; Tšenolo 21:3, 4.

Moputso o Enneng o ka Finyelloang

9. (a) Bakreste ba ka ba le karolo joang ho pholoseng ba bang? (b) Boemo ba lelapa labo Timothea e ne e le bofe?

⁹ Na u hlokometse hore le uena u ka ba le karolo tabeng ea ho pholosa ba bang, ho akarelletsa beng ka uena bao u ba ratang haholo? Moapostola Pauluse o ile a phehella Timothea: “Boloka lintho tsena [tseo u li rutiloeng]‚ hobane ka ho etsa joalo u tla ipholosa ’me u pholose le ba u mamelang.” (1 Timothea 4:16, NW) Timothea o ne a lula lelapeng le arohaneng, kaha ntate oa hae oa Mogerike o ne a sa lumela. (Liketso 16:1; 2 Timothea 1:5; 3:14) Le hoja re sa tsebe hore na ntate oa Timothea e kile ea e-ba molumeli, monyetla oa hore e ka ’na eaba e bile eena o ile oa eketsoa haholo ke boitšoaro bo khabane ba mosali oa hae, Eunice le ba Timothea.

10. Bakreste ba ka etsa’ng molemong oa balekane ba bona ba sa lumelang?

¹⁰ Mangolo a senola hore banna le basali bao ka tieo ba khomarelang ’nete ea Bibele ba ka tlatsetsa tabeng ea ho pholosa balekane ba bona bao e seng Bakreste ka ho ba thusa hore e be balumeli. Moapostola Pauluse o ile a ngola: “Moena e mong, ekare ha a e-na le mosali ea sa lumelang, a se ke a mo hlala, ha mosali a ratile ho lula le eena. ’Me mosali ea nang le monna ea sa lumelang, ekare ha monna a lumela ho lula le eena, a se ke a mo hlala. Hobane uena mosali, u tseba ka’ng hobane u tla pholosa monna ao hao na? Le uena monna, u tseba ka’ng hobane u tla pholosa mosali oa hao na?” (1 Ba-Korinthe 7:12, 13, 16) Moapostola Petrose o ile a hlalosa kamoo basali, ha e le hantle, ba neng ba ka pholosa banna ba bona, ha a phehella: “Le utloe banna bao e leng ba lōna joalo, hore leha ba bang ba ka ba teng ba sa lumeleng lentsoe, ba mpe ba hapuoe, leha e ke ke ea e-ba ka lentsoe, e be ka metsamao ea basali ba bona.”—1 Petrose 3:1.

11, 12. (a) Bakreste ba likete ba fumane moputso ofe, ’me ba ile ba etsa’ng hore ba tle ba o fumane? (b) Pheta phihlelo ea setho sa lelapa se fumanang moputso oa ho mamella ka botšepehi.

¹¹ Lilemong tsa morao tjena batho ba likete tse ngata ba fetohile Lipaki tsa Jehova ka mor’a hore ba hanyetse mosebetsi oa Bokreste oa mong ka bona oa Paki ka likhoeli tse ngata, esita le lilemo. Sena ke moputso o mokaakang oa Bakreste ba ileng ba tsoela pele ho tiea, ’me ke tlhohonolofatso e kaakang ho bao pele e neng e le bahanyetsi! Ka lentsoe le bontšang ho sisinyeha maikutlo, moholo oa Mokreste ea lilemo li 74 o ile a re ka ho qaqileng: “Ke atisa ho leboha mosali oa ka le bana bakeng sa ho khomarela ’nete lilemong tseo ke neng ke ba hanyetsa ka tsona.” O ile a bolela hore ka lilemo tse tharo ka manganga o ne a hana esita le ho lumella mosali oa hae ho bua le eena ka Bibele. O itse: “Empa o ile a khetha nako eo ka eona ho neng ho ka etsahala hore ke amohele seo a se buang, ’me o ile a qala ho mpakela ha a ntse a silila maoto a ka. Ke leboha hakaakang hore ebe ha aa ka a inehela khanyetsong ea ka!”

¹² Monna e mong ea neng a hanyetsa lelapa la hae o ile a ngola: ‘Ke ne ke le sera sa mosali oa ka se sebe haholo hobane ka mor’a hore a fumane ’nete, ke ile ka mo etsetsa litšoso, ’me re ne re phehisana khang letsatsi le leng le le leng; ke hore, ke ne ke qala khang kamehla. Empa seo ha sea ka sa atleha; mosali oa ka o ile a khomarela Bibele. Kahoo lilemo tse 12 li ile tsa feta ke ntse ke tsoela pele ka ntoa ea ka e mabifi khahlanong le ’nete le mosali oa ka le ngoana. Ke ne ke le sebōpehong sa Diabolose ho bona ka bobeli.’ Qetellong monna enoa o ile a qala ho hlahlobisisa boitšoaro ba hae. O ile a hlalosa: ‘Ke ile ka bona hore ke ne ke khohlahetse hakae. Ke ile ka bala Bibele, ’me ka lebaka la thuto ea eona, hona joale ke Paki e kolobelitsoeng.’ Nahana ka moputso o moholo oa mosali oa hae, e, ka hore ebe o ile a thusa ‘ho pholosa monna oa hae’ ka ho mamella ka botšepehi khanyetso ea hae ka lilemo tse 12!

Ho Ithuta ho Jesu

13. (a) Banna le basali ba lokela ho ithuta thuto efe ea sehlooho tseleng ea Jesu ea bophelo? (b) Batho ba fumanang ho ikokobelletsa thato ea Molimo ho le boima ba ka rua molemo joang mohlaleng oa Jesu?

¹³ Thuto ea sehlooho eo banna le basali ba lokelang ho ithuta eona tseleng ea Jesu ea bophelo ke ea ho utloa Molimo. Jesu o itse: “Ke ntse ke etsa ka mehla se mo khahlisang.” “Ha ke batle ho ratoang ke ’na, ke mpa ke batla ho ratoang ke Ntate ea nthomileng.” (Johanne 5:30; 8:29) Esita le ha Jesu a kile a fumana tšobotsi e itseng ea thato ea Molimo e le e sa rateheng, o ile a bontša kutlo. O ile a rapela: “Hoja u ka rata ho suthisa senoelo sena pel’a ka.” Empa ka potlako o ile a phaella: “Empa ho se ke ha etsoa thato ea ka, ho etsoe ea hao.” (Luka 22:42) Jesu ha aa ka a kōpa Molimo hore a fetole thato ea Hae; o ile a bontša hore o rata Molimo e le kannete ka hore ka kutlo a ikokobelletse eng kapa eng e neng e le thato ea Molimo bakeng sa hae. (1 Johanne 5:3) Ho etelletsa thato ea Molimo pele ka linako tsohle, joalokaha Jesu a ile a etsa, ke habohlokoa bakeng sa katleho e seng feela bophelong ba bosooa empa hape le bophelong ba lenyalo le ba lelapa. Hlokomela hore na ke hobaneng ha ho le joalo.

14. Bakreste ba bang ba ikemela joang ka tsela e sa nepahalang?

¹⁴ Joalokaha ho bontšitsoe pele, ha ba lumetseng ba etelletsa Molimo pele, ba batla ho lula le balekane ba bona ba sa lumelang ’me hangata ba khona ho ba thusa hore ba tšoanelehe bakeng sa ho pholoha. Esita leha balekane ka bobeli ba lumetse, lenyalo la bona le ka ’na la se ke la e-ba molemo. Ka lebaka la litšekamelo tsa boetsalibe, hase kamehla banna le basali ba bang le menahano e lerato e mong ka e mong. (Ba-Roma 7:19, 20; 1 Ba-Korinthe 7:28) Ba bang ba ea le bohōleng ba ho batla molekane e mong, le hoja ba se na mabaka a Mangolo bakeng sa tlhalo. (Mattheu 19:9; Ba-Heberu 13:4) Ba ikemela ka hore sena ke se molemo bakeng sa bona, hore thato ea Molimo ea hore banna le basali ba lule hammoho e boima haholo. (Malakia 2:16; Mattheu 19:5, 6) Ha ho pelaelo hore boemo bona ke bo bong boo ho bona ho nahanoang ka tsela ea batho ho e-na le ea Molimo.

15. Ke hobane’ng ha ho etelletsa Molimo pele e le tširelo?

¹⁵ Ho etelletsa Molimo pele ke tširelo e kaakang! Banyalani ba etsang joalo ba tla leka ho khomarelana le ho rarolla mathata a bona ka ho sebelisa keletso ea Lentsoe la Molimo. Ka tsela eo ba qoba mefuta eohle ea masisa-pelo a bang teng ha thato ea hae e hlokomolohuoa. (Pesaleme ea 19:7-11) Sena se bontšoa ke banyalani ba bacha bao, ha ba ne ba le makhatheng a ho hlalana, ba ileng ba etsa qeto ea ho latela keletso ea Bibele. Lilemo hamorao ha mosali a nahana ka thabo eo a neng a ile a ba le eona lenyalong la hae, o ile a re: “Ke tlameha ho lula fatše ebe kea lla ha ke nahana hore ho ka be ho ile ha etsahala hore ebe re ile ra lula re arohane le monna oa ka lilemo tsena kaofela. Joale ke rapela Jehova Molimo le ho mo leboha bakeng sa keletso ea hae le tataiso tse ileng tsa re kopanya hammoho kamanong e thabileng hakana.”

Banna, Basali—Etsisang Kreste!

16. Jesu o behetse banna le basali mohlala ofe?

¹⁶ Jesu, ea neng a beha Molimo pele ka linako tsohle, o behile mohlala o babatsehang bakeng sa banna le basali, ’me ba etsa hantle ha ba o ela hloko ka ho fetisisa. Banna ba phehelloa ho etsisa tsela eo ka eona Jesu a sebelisang bohlooho ka bonolo ho litho tsa phutheho ea Bokreste. (Ba-Efese 5:23) ’Me basali ba Bakreste ba ka ithuta mohlaleng oa Jesu o se nang sekoli oa ho ikokobelletsa Molimo.—1 Ba-Korinthe 11:3.

17, 18. Jesu o behetse banna mohlala o motle ka litsela life?

¹⁷ Bibele e-ea laela: “Lōna banna, ratang basali ba lōna, joalo ka ha Kreste le eena a ratile Kereke, ’me a iteletse lefu ka baka la eona.” (Ba-Efese 5:25) Tsela ea bohlokoa eo ka eona Jesu a ileng a bontša lerato bakeng sa phutheho ea balateli ba hae e bile ka ho ba motsoalle oa bona ea haufi. Jesu o itse: “Ke le bitsitse metsoalle, kahobane ke le tsebisitse tsohle tsee ke li utloileng ho Ntate.” (Johanne 15:15) Nahana ka nako eohle eo Jesu a ileng a e qeta a bua le barutuoa ba hae—lipuisano tse ngata-ngata tseo a bileng le tsona le bona—le kamoo a neng a ba tšepa kateng! Na oo hase mohlala o motle haholo bakeng sa banna?

¹⁸ Jesu o ne a e-na le thahasello ea sebele ho barutuoa ba hae ’me o ne a e-na le lerato la sebele bakeng sa bona. (Johanne 13:1) Ha ba ne ba sa hlakeloe ke lithuto tsa hae, ka mamello o ne a nka nako a hlakisa litaba lekunutung. (Mattheu 13:36-43) Banna, na boiketlo ba moea ba basali ba lōna ke ba bohlokoa bo tšoanang ho lōna? Na le qeta nako le bona, le tiiseha hore bobeli ba lōna le hlaketsoe ke linnete tsa Bibele likelellong le lipelong? Jesu o ne a tsamaea le baapostola ba hae tšebeletsong, mohlomong a koetlisa e mong le e mong oa bona ka bomong. Na u tsamaea le mosali oa hao tšebeletsong, ha u e-ea ka ntlo le ntlo le ha u khanna lithuto tsa Bibele?

19. Tsela eo Jesu a ileng a sebetsana le mefokolo ea baapostola ba hae e hlahellang hape e behela banna mohlala joang?

¹⁹ Jesu o behetse banna mohlala o ikhethang haholo-holo ha a sebetsana le ho se phethahale ha baapostola ba hae. Lijong tsa ho qetela tseo a li jeleng le baapostola ba hae, o ile a hlokomela moea oa tlhōlisano o ileng oa boela oa hlahella. Na o ile a ba tšoaea phoso ka bohale? Che, empa ka boikokobetso o ile a hlatsoa maoto a e mong le e mong. (Mareka 9:33-37; 10:35-45; Johanne 13:2-17) Na u mamella mosali oa hao ka tsela eo? Ho e-na le ho belaela ka bofokoli bo hlahellang hape, na ka mamello u leka ho mo thusa le ho finyella pelo ea hae ka mohlala oa hao? Ho ka etsahala hore basali ba arabele qenehelong e joalo e lerato, joalokaha baapostola ba ile ba qetella ba entse.

20. Basali ba Bakreste ha baa lokela ho lebala eng le ka mohla, hona ho fanoe ka mang e le mohlala oa bona?

²⁰ Ho hlokahala hore basali le bona ba talime Jesu, eo le ka mohla a sa kang a lebala hore “[hlooho] ea Kreste ke Molimo.” O ne a ikokobelletsa Ntate oa hae oa leholimo kamehla. Ka ho tšoanang, basali ha baa lokela ho lebala hore “hlooho ea mosali ke monna,” e, hore banna ba bona ke lihlooho tsa bona. (1 Ba-Korinthe 11:3; Ba-Efese 5:23) Moapostola Petrose o ile a phehella basali ba Bakreste ho talima mohlala oa “basali ba halalelang” ba mehleng ea boholo-holo, haholo-holo oa Sara, ea neng “a utloa Abrahama, a ’mitsa morena oa hae.”—1 Petrose 3:5, 6.

21. Ke hobane’ng ha lenyalo la Abrahama le Sara le ile la atleha empa la Lota le mosali oa hae le ile la hlōleha?

²¹ Ho hlakile hore Sara o ile a tela lehae le mabotho-botho motseng o atlehileng moruong a ea lula litenteng naheng esele. Hobane’ng? Na o ne a thabela mokhoa oo oa bophelo? Ha ho bonahale ho le joalo. Na ke hobane monna oa hae o ile a mo kōpa ho ea? Ntle ho pelaelo lena e ne e le lona lebaka, kaha Sara o ne a rata Abrahama a bile a mo hlompha ka lebaka la litšoaneleho tsa hae tsa bomolimo. (Genese 18:12) Empa lebaka le ka sehloohong leo ka lona a ileng a tsamaea le monna oa hae e ne e le lerato la hae ho Jehova le takatso ea hae e tiileng ea ho latela tataiso ea Molimo. (Genese 12:1) O ile a fumana thabo ka ho utloa Molimo. Ka lehlakoreng le leng, mosali oa Lota, o ile a qea-qea ho etsa thato ea Molimo ’me ka tsela eo a hetla morao ka ho laba-labela lintho tseo a li siileng motseng oa habo oa Sodoma. (Genese 19:15, 25, 26; Luka 17:32) Lenyalo leo le ile la fela habohloko hakaakang ka lebaka la ho se utloe Molimo ha hae!

22. (a) Litho tsa lelapa li tla etsa boitlhahlobo bofe ba botho ka bohlale? (b) Re tla hlahloba eng thutong ea rōna e latelang?

²² Ka hona, joaloka monna kapa mosali, ke habohlokoa hore u ipotse, ‘Na Molimo o tla pele lapeng la rōna? Na ka ’nete ke leka ka matla ho phetha karolo eo Molimo a nkabetseng eona ka lapeng? Na ke etsa boiteko ba sebele ba ho rata molekane oa ka le ho mo thusa ho ba le kamano e ntle le Jehova kapa ho e boloka?’ Malapeng a mangata ho boetse ho na le bana. Nakong e tlang re tla hlahloba karolo ea batsoali le tlhokahalo ea hore bona hammoho le bana ba bona ba etelletse Molimo pele.

Na U sa Hopola?

◻ E ka ’na eaba lithuto tsa Jesu li bile le liphello life malapeng a mangata?

◻ Bakreste ba likete ba tiileng ba fumane moputso ofe?

◻ Balekane ba tla thusoa ke’ng ho qoba boitšoaro bo bobe le tlhalo?

◻ Banna ba ka ithuta eng mohlaleng oa Jesu?

◻ Basali ba ka tlatsetsa joang lenyalong le thabileng?

[Setšoantšo se leqepheng la 10]

Sara o ile a tlatsetsa joang katlehong ea lenyalo la hae?