Li Tšehelitsoe ke Motsoalle oa Tsona e Moholo ka ho Fetisisa
KA HO khetheha, ke setsoalle se le seng se tšehetsang Lipaki tsa Jehova. Ke kamano ea bohlokoa le Motsoalle oa tsona e moholo ka ho fetisisa, Jehova Molimo. (Bapisa le Jakobo 2:23.) O li fa matla nakong ea liteko tse khōlō tsa tumelo.
Tlaleho ea botšepehi ba Lipaki tlas’a lipuso tsa bohatelli e ’nile ea rorisoa ke bashebelli ba bangata. E mong oa bona ke Jiří Krupička, setsebi sa filosofi le saense ea tsa tlhaho ea ileng a falla Czechoslovakia ka 1968 ka mor’a ho qeta lilemo tse ngata likampong tsa mahloriso tsa Bokomonisi. Bukeng ea hae Renesance rozumu (Ho Khutla Bocha ha Matla a ho Nahana), o hlalosa mahlomola le ho tiea ha Lipaki tse koalloang chankaneng ka lebaka la ho se jele paate ha tsona.
Tlas’a ’muso oa Bokomonisi, Lipaki tse ngata li ile tsa ahloleloa chankaneng ka lebaka la tumelo ea tsona. Le hoja li ne li koalloa chankaneng, li ile tsa hana ho rafa uranium bakeng sa merero ea ntoa. (Esaia 2:4) Krupička o hlalosa ketsahalo eo a ileng a e bona ho e meng ea merafo ena ka 1952. O ile a bona batho ba babeli ba emeng joaloka liemahale tse letseng leqhoa serameng se batang ka ho fetisisa sa mariha. Meqomo ea tšepe e ne e koahetse lihlooho le karolo e kaholimo ea ’mele ea bona.
Krupička oa ngola: “Ba ne ba eme moo ba apere malabu-labu a chankana esale ho tloha hoseng haholo. Ba ile ba khona joang ho ema nako e telele hakaalo ka maoto a hoammeng? Ka matla a tumelo. Meqomo e ne e le ea khale ’me e le mafome. Motho e mong ea khopo o ile a ba otla lihloohong le mahetleng ka matla hoo molomo o matsutla-tsutla oa moqomo o ileng oa seha baki ea e mong ’me oa fetela letlalong, ’me mali a ne a ntse a rotha letsohong la baki ea hae.
“Molebeli o ile a emisa mola oa rōna ka pel’a bona, ’me molaoli a bua le rōna hakhutšoanyane. O ile a re, ho hana ho sebetsa ke borabele ’me ka hona ho tsamaea le kotlo. Ha ho na maikutlonyana a sa utloahaleng ka ntoa le ho bolaea a tla thusa bahanyetsi bana, lira tsena tsa bososhiale.”
Molaoli o ile a nka molangoana oa tšepe ’me a otla moqomo o mong. Monna ea neng a le kamoo o ile a oela fatše moqomo o ntse o mo khurumelitse hlooho. Se ileng sa etsahala ka mor’a moo se hatisehile ka ho teba mohopolong oa Krupička.
Oa tlaleha: “Ho ile ha utloahala ’mino o tsoang ka hare ho meqomo. Mantsoe a bonolo, thapelo e hoesheletsoang ho Molimo, e leng eena ea ka utloang ntho leha e le efe e e-tsoa kae kapa kae—esita le boiteko ba ho bina ka hare ho meqomo ea uranium e tsofetseng, e mafome. O e utloa ho feta sefela se binoang kerekeng e khōlō.”
Ka la 1 September, 1993, mosebetsi oa Lipaki tsa Jehova Rephabliking ea Czech o ile oa amoheloa ka molao. Hona joale Lipaki tsa Czech li thabela ho tsoela pele ka mosebetsi oa tsona o rutang oa Bokreste ka bolokolohi. E, li utloa monate oa ho bolella ba bang ka Jehova, Motsoalle oa tsona e moholo ka ho fetisisa.
[Setšoantšo se leqepheng la 7]
Ba tlileng kopanong Rephabliking ea Czech