Ba Ile ba Etsa Thato ea Jehova
Moroetsanyana ea Ileng a Bua ka Sebete
LEKHOLONG la leshome la lilemo B.C.E., maqhama lipakeng tsa Iseraele le Syria a ile a senyeha. Ho qhoma ha ntoa ho ile ha ata hoo ha lilemo tse tharo li ne li feta ho se ntoa, e bileng taba e tlalehoang historing.—1 Marena 22:1.
Ho neng ho tšosa ka ho fetisisa mehleng eo e ne e le mabotho a futuhang a Basyria, a mang a ne a entsoe ka masole a makholo. Bahlabani bana ba ne ba ee ba hlasele ’me ba tlatlape Baiseraele, ba koetele ’me ba etsa ba bangata makhoba—esita le bana.
Tlhaselong e ’ngoe, “moroetsanyana” e mong o ile a arohangoa ka sehlōhō le lelapa labo le tšabang Molimo. (2 Marena 5:2) E le motšoaruoa Syria, o ile a qobelloa ho phela har’a batho bao mohlomong a neng a ba tšaba ’me a sa ba tloaela—batho ba neng ba rapela letsatsi, khoeli, linaleli, lifate, limela esita le majoe. Ba ne ba fapane hakaakang le ba lelapa labo le metsoalle, ba neng ba rapela Molimo a le mong oa ’nete, Jehova! Leha ho le joalo, esita le tikolohong ena eo a sa e tloaelang, moroetsanyana enoa o ile a bontša sebete se totobetseng mabapi le borapeli ba Jehova. Ka lebaka leo, o ile a fetola bophelo ba ofisiri e phahameng e neng e sebeletsa tlas’a morena oa Syria. A re ke re boneng hore na joang.
Sebete sa ho Ntša Maikutlo ka Bolokolohi
Lebitso la moroetsanyana enoa ha lea boleloa tlalehong ea Bibele. E ile ea e-ba lekhabunyane la mosali oa Naamane, molaoli ea sebete oa mabotho tlas’a Morena Ben-hadade II. (2 Marena 5:1) Le hoja a ne a hlompshoa haholo, Naamane o ne a e-na le lefu le sa rateheng la lepera.
Mohlomong ke mekhoa e metle e hlomphang ea moroetsanyana enoa e ileng ea susumeletsa mosali oa Naamane ho mo bolella makunutu a hae. E ka ’na eaba mosali eo o ile a botsa moroetsanyana, ‘Ho etsoa’ng ka balepera Iseraeleng?’ Lekhabunyane lena la Moiseraele ha lea ka la hlajoa ke lihlong ho bua ka sebete: “Hoja mong a ka a ka itlhahisa ho moporofeta ea leng Samaria, o ba a ka mo folisa lepera la hae.”—2 Marena 5:3.
Mantsoe a moroetsanyana enoa ha aa ka a lahloa feela tjee joaloka lipuo tsa bongoana. Ho e-na le hoo, a ile a tlaleheloa Morena Ben-hadade, ea ileng a romela Naamane le ba bang leetong la lik’hilomithara tse ka bang 150 ho ea Samaria ho ea batla moprofeta enoa.—2 Marena 5:4, 5.
Pholiso ea Naamane
Naamane le banna ba hae ba ile ba ea ho Morena Jehorame oa Iseraele, ba nkile lengolo la boitsebahatso le tsoang ho Ben-hadade le mpho e khōlōhali ea chelete. Ka ho sa makatseng, Morena Jehorame ea rapelang namane ha aa ka a bontša tumelo eo lekhabunyane le neng le e bontšitse ho moprofeta oa Molimo. Ho e-na le hoo, o ile a nahana hore Naamane o tlile ho tla baka leqhoko. Ha moprofeta oa Molimo Elisha a utloa kamoo Jehorame a itšoereng kateng, o ile a romela molaetsa hang-hang o kōpang hore a romele Naamane tlung ea hae.—2 Marena 5:6-8.
Ha Naamane a fihla tlung ea Elisha, moprofeta o ile a romela lenģosa la hae le ileng la ’molella: “E-ea u itlhatsoe hasupa Jordane, ’me nama ea hao e tla boela ho uena e nchafetse, u hloeke.” (2 Marena 5:9, 10) Naamane o ile a halefa haholo. A lebeletse pontšo ea mohlolo le e bonahalang ho bohle, o ile a botsa: “Ana Abana le Parpare, linoka tsa Damaseka, ha li ntle ho feta metsi ’ohle a Iseraele na? Ana ke ne nke ke ka itlhatsoa teng, ka hloeka na?” Naamane o ile a furalla ntlo ea Elisha a halefile. Empa qetellong ha bahlanka ba Naamane ba behelana mabaka le eena, o ile a lumellana le bona. Ka mor’a ho itlhatsoa hasupa Nōkeng ea Jordane, “nama ea hae ea boela ea e-ba joalo ka nama ea ngoana e monyenyane, a hla a hloeka.”—2 Marena 5:11-14.
Ha a khutlela ho Elisha, Naamane o ile a re: “Bona, kea tseba hobane ha ho Molimo lefatšeng lohle, ha e se Iseraeleng.” Naamane o ile a ikana hore “ha a sa tla etsetsa molimo osele secheso, leha e le sehlabelo, ha e se Jehova feela.”—2 Marena 5:15-17.
Thuto ho Rōna
Naamane o ne a sa tl’o ea ho moprofeta Elisha haeba lekhabunyane le lenyenyane le ne le sa ka la bua ka sebete. Kajeno, bacha ba bangata ba etsa se tšoanang. Sekolong, e ka ’na eaba ba pota-potiloe ke baithuti ba sa thahaselleng ho sebeletsa Molimo. Leha ho le joalo, ba ntša maikutlo a bona ka bolokolohi ka seo ba se lumelang. Ba bang ba bona ba qalella ho etsa joalo ba sa le lilemong tse tlaase haholo.
Nka Alexandra, ngoananyana ea lilemo li hlano oa Australia. Ha a qala ho ea sekolong, ’mè oa hae o ile a etsa tokisetso ea ho ea hlalosetsa tichere litumelo tsa Lipaki tsa Jehova. Empa ’mè oa Alexandra o ile a makala. Tichere e ile ea re: “Ke se ke ntse ke tloaelane haholo le litumelo tsa lōna, hammoho le seo Alexandra a tlang ho se etsa le seo a ke keng a se etsa mona sekolong.” ’Mè oa Alexandra o ne a hloletsoe, kaha ho ne ho se ngoana e mong oa Paki sekolong seo. Tichere e ile ea hlalosa: “Alexandra o se a re hlaloselitse.” E, ngoananyana enoa o ne a se a ile a ba le puisano e masene le tichere ea hae.
Bana ba banyenyane joalo ba bua ka sebete. Kahoo ba nka bohato tumellanong le Pesaleme ea 148:12, 13: “Bahlankana le baroetsana, maqheku hammoho le bana! A ba ke ba rorise lebitso la Jehova, hobane lebitso la hae ke lona le inotši le phahamileng, bokhabane ba hae bo phahamile ho fetisa lefatše le maholimo.”