Na ka Sebele U ka Rata Molimo?
MOLIMO o re: “Ha ho motho ea ka mponang, ’me a phela.” (Exoda 33:20) Ho feta moo, ho tloha mehleng ea Bibele, ha ho e-s’o ka ho e-ba le bopaki ba motho leha e le ofe ea kileng a ba le puisano e tobileng le eena. Na ha ho bonahale ho le thata—esita le ho ba ho ke keng ha khoneha—ho hlaolela boikutlo bo tebileng bo mofuthu bakeng sa motho eo le ka mohla u e-song ho ka u mo bona kapa ho mo utloa? Na ka sebele hoa khoneha ho ba le botsoalle bo lerato le ’Mōpi oa bokahohleng?
Ha hoa lokela ho ba le pelaelo ea hore hoa khoneha ho hlaolela kamano ea botho e mofuthu le Molimo. Ho Deuteronoma 6:5 re bala hore sechaba sa Iseraele se ile sa laeloa: “Rata Jehova, Molimo oa hao, ka pelo ea hao eohle, le ka [soule ea hao eohle, NW], le ka matla a hao ’ohle.” Hamorao Jesu Kreste o ile a boela a tiisa molao ona ho balateli ba hae ’me a phaella: “Ena ke eona taelo e khōlō ka ho fetisisa le ea pele.” (Matheu 22:37, 38) Na Bibele e ne e ka re phehella ka matla hore re rate Molimo haeba botsoalle bo joalo bo ne bo sa fumanehe?
Empa na Jehova o lebelletse hore re mo rate hobane feela a laetse joalo? Che. Molimo o ile a bōpa batho ba pele ba babeli ba e-na le matla a ho mo rata. Adama le Eva ba ne ba sa qobelloa ho ba le botsoalle bo lerato le ’Mōpi oa bona. Ho e-na le hoo, Molimo o ile a ba beha maemong a tšoanelehang ao ho ’ona ba neng ba ka hōlisa boikutlo bo tebileng bo mofuthu bakeng sa hae. Khetho e ne e le ea bona—ho ba haufi-ufi le Molimo kapa ho ikhula ho eena.
Adama le Eva ba ile ba khetha ho ba bafetoheli. (Genese 2:16, 17; 3:6, 7) Leha ho le joalo, bana ba bona ba ne ba tla ba le matla a ho hōlisa botsoalle bo lerato le ’Mōpi.
Ho Tsamaea le Molimo oa ’Nete
Ka mohlala, ka Bibeleng ho buuoa ka Abrahama e le “motsoalle” oa Molimo. (Jakobo 2:23) Leha ho le joalo, ho hang hase Abrahama feela ea ileng a thabela botsoalle bo haufi-ufi le Molimo. Bibele e bua ka batho ba bang ba bangata ba sa phethahalang ba ileng ba bontša boikutlo ba sebele bo mofuthu bakeng sa Jehova ’me ba “tsamaea le Molimo.”—Genese 5:24; 6:9; Jobo 29:4; Pesaleme ea 25:14; Liproverbia 3:32.
Bahlanka ba Molimo ba boholo-holo ba ne ba sa tsoaloa ba e-na le lerato le boikutlo bo mofuthu ka Molimo. Ba ile ba tšoanela ho bo hlaolela. Joang? Ka ho tseba lebitso la hae la botho, Jehova. (Exoda 3:13-15; 6:2, 3) Ka ho lemoha boteng le Bomolimo ba hae. (Baheberu 11:6) Ka ho thuisa ka liketso tsa hae tse lerato nako le nako. (Pesaleme ea 63:6) Ka ho hlalosetsa Molimo mehopolo ea bona e tebileng ka thapelo. (Pesaleme ea 39:12) Ka ho ithuta melemo ea hae. (Zakaria 9:17) Ka ho hlaolela tšabo e molemo ea ho se mo fosetse.—Liproverbia 16:6.
Na u ka ba motsoalle oa Molimo ’me ua tsamaea le eena? Ke ’nete hore u ke ke ua bona Molimo kapa ua utloa lentsoe la hae. Leha ho le joalo, Jehova o u mema hore u be ‘moeti tenteng ea hae,’ u be motsoalle oa hae. (Pesaleme ea 15:1-5) Ka hona, hoa khoneha hore u rate Molimo. Empa ke joang u ka hlaolelang botsoalle bo haufi-ufi le bo nang le boikutlo bo mofuthu le eena?