Ho Fana ka Liphallelo Har’a Masupi

BOITEKO ba motho ba ho fana ka liphallelo hang ka mor’a koluoa ruri boa babatseha. Mananeo a mangata a liphallelo a thusitse ho tsosa matlo, ho kopanya malapa, ’me ka holim’a tsohle, ho pholosa bophelo.

Ha koluoa e hlasela, Lipaki tsa Jehova li sebelisa—li bile li thabela—litokisetso leha e le life tse etsoang ke mananeo a liphallelo a lefatše. Ka nako e tšoanang, li na le tlamo ea Mangolo ea ho ‘sebetsa se molemo . . . haholo-holo ho ba amanang le [tsona] tumelong.’ (Bagalata 6:10) E, Lipaki li ikutloa eka lia amana; li talimana joaloka “lelapa.” Ke ka lebaka leo li bitsanang “mor’eso” le “morali’eso.”—Bapisa le Mareka 3:31-35; Filemone 1, 2.

Ka hona, ha koluoa e ama sebaka sa boahisani, baholo har’a Lipaki tsa Jehova ba etsa boiteko bo matla ba ho fumana hantle hore na setho ka seng sa phutheho se hokae le hore na se hloka eng ’me ba etse litokisetso bakeng sa thuso e hlokahalang. Hlokomela hore na sena e bile ’nete joang Accra, Ghana; San Angelo, U.S.A.; le Kobe, Japane.

Accra—“Letsatsi le Lenyenyane la Noe”

Pula e ile ea qala ho na hoo e ka bang ka hora ea 11 bosiu, ’me e ile ea tšoloha e sa khaotse ka lihora-hora. “E ne e e-na ka matla hoo lelapa lohle la ka le ileng la hlobaela,” ho bolela John Twumasi, e mong oa Lipaki tsa Jehova Accra. Daily Graphic e ile ea e bitsa “Letsatsi le lenyenyane la Noe.” John o tsoela pele: “Re ile ra leka ho nyollela tse ling tsa lintho tsa bohlokoa mokatong o ka holimo, empa ha re bula monyako o lebang litepising, metsi a likhohola a ile a bilohela ka hare.”

Ba boholong ba ile ba phatlalatsa temoso ea hore batho ba tlohe sebakeng seo, leha ho le joalo ba bangata ba ile ba tsila-tsila, ba tšaba hore ntlo e se nang motho—esita le haeba e tletse metsi—e ka ’na ea mema masholu. Ba bang ba ne ba sa khone ho tloha esita leha ba ne ba rata. Ngoanana e mong ea bitsoang Paulina o re: “’Na le ’Mè re ne re sa khone ho bula monyako. Metsi a ile a ’na a phahama, kahoo re ile ra ema holim’a meqomo ea lehong ’me ra itšoarella balakeng. Qetellong, hoo e ka bang ka hora ea bohlano hoseng, baahisani ba rōna ba ile ba re pholosa.”

Kapele kamoo ho ka khonehang, Lipaki tsa Jehova li ile tsa kena tšebetsong. Morali’abo rōna oa Mokreste ea bitsoang Beatrice oa pheta: “Baholo ba phutheho ba ne ba re batla, ’me ba ile ba re fumana ntlong ea Paki-’moho le rōna, moo re neng re tšabetse teng. Matsatsi a mararo feela ka mor’a moroallo, baholo le litho tse nyenyane tsa phutheho ba ile ba re tšehetsa ’me ba horula seretse se ka hare le se ka ntle ho ntlo ea rōna. Mokhatlo oa Watch Tower o ne o fane ka sesepa, lithibela-mafu, pente, materase, likobo, masela le liaparo tsa bana. Barab’abo rōna ba ile ba re romella lijo ka matsatsi a mangata. Ke ile ka ameha ka ho teba!”

John Twumasi ea qotsitsoeng pejana, oa tlaleha: “Ke ile ka bolella bahiri ba bang ba ntlo hore Mokhatlo oa rōna o re romeletse sesepa le lithibela-mafu—tse lekaneng ho hloekisa ntlo eohle. Bahiri ba ka bang 40 ba ntlo ba ile ba thusa ho hloekisa. Ke ile ka fa baahisani ba ka se seng sa sesepa, ho kopanyelletsa le monna e mong eo e leng moprista oa kereke sebakeng sena. Ka phoso, basebetsi-’moho le ’na ba ne ba nahanne hore Lipaki tsa Jehova li bontša lerato ho batho ba tsona feela.”

Bara le barali babo rōna ba Bakreste ba ile ba ananela haholo thuso e lerato eo ba e filoeng. Mor’abo rōna Twumasi oa phetha: “Le hoja lintho tse ntahlehetseng moroallong e ne e le tsa chelete e phahameng ho feta thepa ea liphallelo, ’na le lelapa la ka re ikutloa hore re fumane ho fetang hōle se re lahlehetseng ka lebaka la tokisetso ena e amang maikutlo e tsoang ho Mokhatlo.”

San Angelo—“Ho ne ho Utloahala eka Lefatše Lea Fela”

Lifefo tse matla tse ileng tsa harasoanya San Angelo ka la 28 May, 1995, li ile tsa motsula lifate, tsa roba lipalo tsa motlakase ’me tsa betsetsa mehala ea motlakase mebileng. Meea e ne e puputla ka lebelo la lik’hilomithara tse 160 ka hora, e senya mehaho ea sechaba. Motlakase o ile oa tima malapeng a fetang 20 000. Eaba ho latela sefako. National Weather Service (Tšebeletso ea Sechaba ea tsa Boemo ba Leholimo) e ile ea tlaleha “sefako se boholo ba bolo ea golf,” joale ea ba “sefako se boholo ba softball” ’me qetellong, “sefako se boholo ba lamunu.” Molumo oa sona e ne e le o thibang litsebe. E mong oa baahi o ile a re: “Ho ne ho utloahala eka lefatše lea fela.”

Khutso e sokelang e ile ea latela sefefo seo. Butle-butle batho ba ile ba tsoa matlong a bona a ruthuthiloeng bakeng sa ho hlahloba tšenyo. Lifate tse neng li sa ntse li eme li ne li fohlehile makhasi. Matlo a neng a ntse a eme a ne a bonahala eka a qaqapololitsoe. Libakeng tse ling sefako se ne se koahetse fatše ka liqubu tsa botebo ba mithara. Lifensetere tse likete tse malapeng le tsa likoloi li ne li pshatlehile sefefong seo, ka hona makumane a likhalase tse pshatlehileng a ne a phatsima mabapa le sefako se neng se kupelitse fatše. Mosali e mong o re: “Ha ke fihla hae, ke ile ka lula ka koloing ea ka tselaneng e lebang ntlong ’me ka lla. Tšenyo e ne e tšabeha, e ile ea nthoba litho.”

Mananeo a liphallelo le lipetlele a ile a fana ka thuso ea lichelete ka potlako, thepa ea ho haha, phekolo ea meriana le likeletso. Ka ho babatsehang, batho ba bangata bao ka bobona e neng e le bahlaseluoa ba sefefo seo ba ile ba etsa seo ba ka se khonang ho thusa ba bang.

Liphutheho tsa Lipaki tsa Jehova le tsona li ile tsa nka khato. Aubrey Conner, moholo oa San Angelo, oa tlaleha: “Hang ha sefefo se emisa, re ne re le founung re batlana. Re ile ra thusana ’me ra thusa le baahisani ba rōna bao e seng Lipaki hore re koale lifensetere ka mapolanka, ra rulela ka lipolasetiki ’me ra leka ka hohle kamoo re khonang ho sireletsa mahae a rōna maemong a leholimo. Joale re ile ra boloka tlaleho ea batho bohle ba phutheho bao mahae a bona a neng a amehile. Matlo a ka bang lekholo a ne a hloka ho lokisoa ’me thepa e neng e fanoa ke lekala la liphallelo e ne e sa lekana. Kahoo, re ile ra reka thepa e eketsehileng ’me ra lokisetsa ho sebetsa. Kaofela, Lipaki tse ka bang 1 000 li ile tsa ithaopela ho thusa, tse ka bang 250 mafelo-beke a mang le a mang. Li ne li e-tsoa bohōle ba limaele tse 460 [lik’hilomithara tse 740]. Tsohle li ile tsa sebetsa li sa khathale, hangata e le boemong ba mocheso oa likhato tse 100 [likhato tse ka bang 40 tsa Celsius]. Esita le morali’abo rōna ea lilemo li 70 o ile a sebetsa le rōna mafelo-bekeng ’ohle ntle ho a le mang, ’me hoo e ne e le ha ho ne ho lokisoa lehae la hae. ’Me mafelo-bekeng ao, o ne a le holimo marulelong a hae a thusa ho lokisa!

“Hangata re ile ra utloa lipolelo tsa batho ba shebeletseng tse kang, ‘Na e ne e ke ke ea e-ba ho hotle haeba malumeli a mang a ne a ka etsa see bakeng sa litho tsa ’ona?’ Baahisani ba rōna ba ne ba hlolloa ke ho bona sehlopha sa baithaopi ba 10 ho ea ho 12 (ho akarelletsa le baralib’abo rōna) se fihla lapeng la Paki-’moho le sona hoseng ha Labohlano, e se e le malala-a-laotsoe bakeng sa ho lokisa kapa esita le ho rulela bocha ntle ho tefo. Maemong a mangata mosebetsi o ile oa phethoa ka mafelo-beke a le mang. Ka linako tse ling, ha sehlopha sa rōna se fihla ntlong, sehahi sa ka ntle se ntlong e mabapi le eo e ne e ee e be sea rulela. Re tla rulolla re be re rulele bocha, re be re hloekise jarete pele sona le basebetsi ba sona ba ka qeta ho rulela. Ka linako tse ling ba ne ba emisa mosebetsi oa bona e le hore feela ba ka re shebella!”

Mor’abo rōna Conner oa phetha: “Kaofela ha rōna re tla hloloheloa liphihlelo tseo re li thabetseng hammoho. Re tsebane ho tsoa liponong tse fapa-fapaneng ka ho bontša le ho bontšoa lerato la bara ba motho ho feta leha e le neng pele. Re nahana hore sena e mpa feela e le mohlala oa hore na ho tla ba joang lefatšeng le lecha la Molimo, ha bara le barali babo rōna ba tla be ba thusana ka lebaka la hobane ba hlile ba rata ho etsa joalo.”—2 Petrose 3:13.

Kobe—“Ho Soahlamana ha Patsi, Samente le ’Mele ea Batho”

E ne e lokela hore ebe baahi ba Kobe ba ne ba itokisitse. Ka sebele, letsatsi le leng le le leng la la 1 September ba keteka Disaster Prevention Day (Letsatsi la ho Thibela Koluoa). Bana ba sekolo ba ikoetlisetsa tšisinyeho ea lefatše, masole a itlhakisetsa mosebetsi oa ho pholosa ka helikopthara ’me mafapha a tsa mollo a tla le mechine e etsisang tšisinyeho ea lefatše, eo ho eona baithaopi ba ikoetlisetsang mekhoa ea ho pholoha ka har’a lebokose le boholo ba kamore le reketlang le ho thothomela feela joalokaha eka ke ntho ea sebele. Empa ha ntho ea sebele e ne e etsahala ka la 17 January, 1995, litokisetso tsohle li ile tsa bonahala e ne e le tsa lefeela. Marulelo a likete tse mashome a ile a oa—ntho e sa kang ea etsahala ka mechineng ea tšisinyeho ea maiketsetso. Literene li ile tsa phethoha; likarolo tsa litsela tse khōlō tsa senyeha; lipeipi tse khōlō tsa khase le metsi tsa phunyeha; matlo a putlama joaloka k’hateboto. Makasine ea Time e hlalositse ketsahalo eo e le “ho soahlamana ha patsi, samente le ’mele ea batho.”

Joale ho ile ha qhoma mello. Mehaho e ile ea apareloa ke malakabe ha litima-mollo tse ferekaneng li ntse li thibeletsoe ke sepenya sa sephethe-phethe ka lik’hilomithara. Tse neng li finyella moo ho tukang hangata li ne li fumana hore ha ho moo li ka fumanang metsi tsamaisong e senyehileng ea metsi ea motse. Ofisiri e ’ngoe e ile ea re: “Letsatsi la pele e bile la tšabo ka ho feletseng. Ha ke e-s’o ka ke ikutloa ke fokola hakaalo bophelong ba ka, ke tseba hore ho na le batho ba bangata hakaalo ba neng ba kateletsoe ka matlong ao a chang. ’Me ke ne ke tseba hore ha ho letho leo nka ka le etsang ka hona.”

Kaofela, batho ba ka bang 5 000 ba ile ba shoa, ’me mehaho e batlileng ho ba 50 000 ea sala e le masupi. Kobe e ne e e-na le karolo ea boraro feela ea lijo tseo e neng e li hloka. Bakeng sa ho fumana metsi, ba bang ba ile ba okola mokeli-keli o litšila o ka tlas’a lipeipi tse phunyehileng tsa metsi. Ba bangata ba ba se nang mahae ba ile ba balehela maphepheng, moo ba bang ba neng ba arolelana lijo, ba fa motho ka mong thathana ea reisi letsatsi ka leng. Ka potlako ho se khotsofale ho ile ha nama. Monna e mong o ile a tletleba: “Ba boholong ha baa etsa letho. Haeba re ka tsoela pele ho itšetleha ka bona, re tla lapa ho fihlela re e-shoa.”

Liphutheho tsa Lipaki tsa Jehova tse Kobe le libakeng tse haufi li ile tsa itlhophisa kapele-pele. Motsamaisi oa helikopthara ea ileng a bona ka mahlo mosebetsi oa tsona o ile a re: “Ke ile ka ea sebakeng sa koluoa letsatsing leo tšisinyeho e etsahetseng ka lona ’me ka qeta beke teng. Ha ke fihla lephepheng le leng, ntho e ’ngoe le e ’ngoe e ne e ferekane. Ho ne ho se mosebetsi leha e le ofe oa liphallelo o neng o etsoa. Lipaki tsa Jehova e ne e le tsona feela tse ileng tsa potlakela sebakeng seo, li etsa lintho tse hlokahalang.”

Ka sebele, mosebetsi o ne o le mongata. Liholo tsa ’Muso tse leshome li ne li senyehile hoo li neng li sa tšoanelehele ho sebelisoa, ’me Lipaki tse fetang 430 li ne li hloka mahae. Mahae a eketsehileng a 1 206 ao li neng li lula ho ’ona a ne a hloka ho lokisoa. E seng hoo feela, empa malapa a 15 a Lipaki tse neng li shoele koluoeng eo a ne a hloka matšeliso a feletseng.

Lipaki tse ka bang 1 000 ho potoloha naha li ile tsa nehelana ka nako ea tsona bakeng sa ho thusa mosebetsing oa ho lokisa. Mor’abo rōna e mong oa hlalosa: “Ha re ne re sebetsa matlong a liithuti tsa Bibele tse e-song ho ka li kolobetsoa, kamehla re ne re botsoa, ‘Re lokela ho lefa bokae bakeng sa see sohle?’ Ha re li bolella hore mosebetsi o ne o tšehetsoa ke liphutheho, li ne li re leboha, li re, ‘Seo re ithutileng sona joale ke ntho ea sebele!’”

Ba bangata ba ile ba khahloa ke karabelo e potlakileng le e feletseng ea Lipaki malebana le koluoa eo. Motsamaisi ea qotsitsoeng pejana o re: “Ke ile ka khahloa ka ho tebileng. Le bitsana ‘mor’eso’ le ‘morali’eso.’ Ke bone kamoo le thusanang kateng; ka sebele lōna le lelapa.”

Lipaki ka botsona li ithutile thuto ea bohlokoa tšisinyehong eo. Morali’abo rōna e mong o ile a lumela: “Kamehla ke ’nile ka nahana hore ha mokhatlo o e-ba moholoanyane, ho ba thata haholoanyane ho bontša thahasello ea botho.” Empa tlhokomelo e lerato eo a e fumaneng e fetotse pono ea hae. “Joale kea tseba hore Jehova ha a re hlokomele feela joaloka mokhatlo empa hape o re hlokomela re le batho ka bomong.” Leha ho le joalo, thuso ea ka ho sa feleng bakeng sa likoluoa e larile ka pele.

Thuso Ea Ka Ho Sa Feleng Haufinyane!

Lipaki tsa Jehova li lebeletse ka thabo nako eo ka eona bophelo ba motho le mokhoa oa ho iphelisa li ke keng tsa hlola li fokotsoa ke likoluoa. Lefatšeng le lecha la Molimo, batho ba tla rutoa ho sebelisana hantle le tikoloho ea lefatše. Ha batho ba tlohela litloaelo tsa boithati, ba ke ke ba pepesehela hakaalo likotsi tsa tlhaho.

Ho feta moo, Jehova Molimo—’Mōpi oa matla a tlhaho—o tla etsa bonnete ba hore lelapa la hae la batho le pōpo ea lefatše le ka mohla li se ke tsa boela tsa sokeloa ke matla a tlhaho. Joale, ka sebele lefatše e tla ba paradeise. (Esaia 65:17, 21, 23; Luka 23:43) Boprofeta ba Tšenolo 21:4 bo tla phethahatsoa ka mokhoa o khanyang: “O tla hlakola meokho eohle mahlong a bona, ’me lefu ha le sa tla hlola le e-ba teng, leha e le ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”

[Setšoantšo se leqepheng la 5]

Beatrice Jones (ka ho le letšehali) o bontša kamoo eena le ba bang ba ileng ba iketsa mokoloko o tlamahaneng bakeng sa ho tšela metsi a likhohola

[Setšoantšo se leqepheng la 6]

Mosebetsi oa liphallelo ka mor’a sefefo se matla