Baboleli ba ’Muso Baa Tlaleha
Ho Balehela Mokhatlong oa Jehova oa Puso ea Bomolimo
KHALE-KHALE, moprofeta Esaia o ile a susumelletsoa ho bolela: ‘Rorisang Jehova lihlekehlekeng tsa leoatle.’ (Esaia 24:15) Lipaki tsa Jehova li nka lihlekehleke tsa leoatle e le karolo ea ‘lefatše leo ho ahiloeng ho lona’ leo Jesu a ileng a re “litaba tse molemo li lokela ho boleloa” ho lona.—Matheu 24:14; Mareka 13:10.
Lihlekehleke tsa Marquesas li fumaneha lik’hilomithara tse 1400 ka leboea-bochabela ho Tahiti. Ke karolo ea sehlopha se hōle sa lihlekehleke tsa Pacific Boroa tse bitsoang French Polynesia. Limela li atleha haholo lihlekehlekeng tsena ka lebaka la mobu o nonneng, oa seretse se foqohileng thabeng le boemo ba leholimo bo mofuthu le bo mongobo. Leha ho le joalo, lihlekehleke tsa Marquesas li boetse li beha litholoana tsa mofuta o mong. Nahana ka taba ea lelapa le leng le ileng la arabela hantle molaetseng oa ’Muso sehlekehlekeng sa Hiva Oa.
Jean, le mosali oa hae Nadine, ba ne ba sa thabele bophelo bo bitsoang ba tsoelo-pele ba moo ba neng ba lula teng, Europe Bophirimela. Kahoo, ba ile ba etsa qeto ea ho tloha mokhoeng oo o phathahaneng oa bophelo eaba ba fallela Lihlekehlekeng tsa Marquesas le ngoana oa bona. Ntlo ea bona e ncha e neng e hahiloe ka leqala, e ne e le phuleng e hōle. Ba ne ba lokela ho tsamaea lihora tse peli tseleng e matsutla-tsutla ea thaba e le hore ba ka fihla ho baahisani ba bona ba haufinyane. Motse o neng o le haufi haholoanyane o neng o e-na le ngaka, sekolo le lebenkele o ne o le bohōle ba lihora tse tharo ha u tsamaea ka jipi.
Jean le Nadine ba ne ba sa thahaselle bolumeli. Empa leha ho le joalo, ba ne ba ee ba buisane ka tšimoloho ea bophelo. Hangata ba ne ba qapolla likhopolo tse rarahaneng tsa ho iphetola ha lintho. Empa ha ho le e ’ngoe ea likhopolo tseo tsa bona e ileng ea ba khotsofatsa.
Ka mor’a ho lula ba le bang ka lilemo tse tšeletseng, ba ile ba makala ha ba eteloa ke Lipaki tsa Jehova tse peli. Lipaki tseo li ne li ile tsa utloela ka Jean le Nadine ho batho ba lulang motseng o haufinyane. Joalokaha ho ka lebelloa, moqoqo o ile oa lebisa ho buisaneng ka khopolo ea ho iphetola ha lintho. Banyalani bao ba ile ba thabisoa ke hore ebe Lipaki tseo li nkile kopi ea buka ea Life—How Did It Get Here? By Evolution or by Creation?, e hatisitsoeng ke Lipaki tsa Jehova. Jean le Nadine ba ile ba thabela ho ba le buka e neng e hlahlobisisa hore na bophelo bo bile teng joang.
Nakoana ka mor’a moo, ho ile ha qalisoa thuto ea Bibele. Ka lilemo tse ka bang tharo, Jean le Nadine ba ile ba hatela pele butle-butle. Ba ile ba kholiseha hore haufinyane lefatše lohle le tla etsoa paradeise. Ka mor’a hore lelapa la bona le be le bana ba bararo, ho tsamaea lihora tse ’nè bakeng sa ho ea libokeng tsa Bokreste Holong ea ’Muso e ile ea e-ba bothata ba sebele. Leha ho le joalo, seo ha sea ka sa ba thibela ho kopanela. Qetellong Jean le Nadine ba ile ba bonahatsa boinehelo ba bona ho Jehova ka kolobetso ea metsing. Ba ile ba etsa sena kopanong e neng e tšoaretsoe motseng o moholo, eo ho eona bohle ba neng ba le teng e bileng batho ba 38!
E le hore le ka thusa sehlopha se senyenyane sa bahoeletsi ba ’Muso, lelapa lena le ile la etsa qeto ea ho tloha lehaeng leo le hōle. Le ile la fallela motseng o nang le baahi ba ka bang sekete, moo hona joale Jean e leng mohlanka ea sebeletsang phuthehong ea moo ea Lipaki tsa Jehova. Lelapa lena le ileng la balehela lihlekehlekeng ho phema bophelo ba tsoelo-pele, le ho nka e le tokelo hore ebe le fumane setšabelo se le seng feela sa ’nete, mokhatlo oa Jehova oa puso ea bomolimo.