Ba Ile ba Etsa Thato Ea Jehova

Ntate ea Ikemiselitseng ho Tšoarela

E ’NILE ea bitsoa pale e khutšoanyane ka ho fetisisa e kileng ea ngoloa—e le ka lebaka le utloahalang. Setšoantšo sa Jesu sa lerato leo ntate a neng a rata mora oa hae ea lahlehileng ka lona se tšoana le fensetere eo ka eona re bonang hantle kutloelo-bohloko e hlollang eo Molimo a nang le eona ho baetsalibe ba bakang.

O ne a Lahlehile ’me a Fumanoa

Monna e mong o ne a e-na le bara ba babeli. E monyenyane o ile a re ho eena: ‘Ke batla lefa la ka hona joale, ho e-na le hore ke u emele ho fihlela u e-shoa.’ Ntate oa hae o ile a lumela, mohlomong a mo fa karolo ea boraro ea sohle seo a neng a e-na le sona—karolo eo ka molao e neng e fuoa e monyenyane ho bara ba babeli. (Deuteronoma 21:17) Ka lehlaphahlapha mocha eo o ile a phutha tseo e leng tsa hae ’me a ea sebakeng se hōle moo a ileng a sebelisa chelete eohle ea hae a phela bophelo ba boitšoaro bo hlephileng ka ho feteletseng.—Luka 15:11-13.

Joale ho ile ha oa tlala ea sekoboto. A tsietsoe, mohlankana eo o ile a amohela mosebetsi oa ho lisa likolobe—mosebetsi o neng o eiseha ho Bajuda. (Levitike 11:7, 8) Ho ne ho le thata ho fumana lijo hoo a ileng a qala ho khalla makhapetla ao e neng e le lijo tsa likolobe! Qetellong, mohlankana eo o ile a hlaphoheloa kelellong. O ile a nahana, ‘Bahlanka ba ntate ba ja hantle ho mpheta! Ke tla khutlela hae, ke ipolele libe ’me ke kōpe ho ba e mong oa banna ba hiriloeng ke ntate.’a—Luka 15:14-19.

Mohlankana o ile a tsamaea leeto le lelelele ho khutlela hae. Ha ho pelaelo hore ponahalo ea hae e ne e fetohile haholo. Leha ho le joalo, ntate oa hae o ile a mo lemoha “a sa ntse a le hōle.” A mo hauhela, o ile a mathela mora oa hae, a mo kopa ka matsoho ’me a “mo aka ka bonolo.”—Luka 15:20.

Kamohelo ena e mofuthu e ile ea nolofalletsa mohlankana ho ikimolla. O ile a re: “Ntate, ke entse sebe khahlanong le leholimo le khahlanong le uena. Ha ke sa tšoanela ho bitsoa mora oa hao. Nketse ea joaloka e mong oa banna ba hao ba hiriloeng.” Ntate o ile a bitsa makhoba a hae. O ile a fana ka taelo: “Kapele! tlisang seaparo se selelele sa ka holimo, se setlehali, ’me le mo apese sona, ’me le kenye lesale letsohong la hae le meqathatso maotong a hae. ’Me le tlise pohoana e nontšitsoeng, le e hlabe ’me a re jeng ’me re ithabise, hobane enoa mora oa ka o ne a shoele ’me a boela a phela; o ne a lahlehile ’me a fumanoa.”—Luka 15:21-24.

Ho ile ha etsoa mokete oa semetletsa, o neng o akarelletsa ’mino le motjeko. Mora e moholo o ile a utloa lerata ha a khutla masimong. O ile a halefa ha a utloa hore moen’ae o khutlile ’me o etselitsoe mokete. O ile a tletleba ho ntate oa hae: ‘Ke u sebelelitse ka lilemo tse ngata ’me ha ho mohla nkileng ka se u mamele, leha ho le joalo, ha ho mohla u kileng ua mpha potsanyane hore nke ke ithabise le metsoalle ea ka. Empa hang ha mora oa hao ea sentseng leruo la hao a khutla, u mo etsetsa mokete.’ Ka bonolo ntate oa hae o ile a mo araba, ‘Ngoana, u ’nile ua ba le ’na ka mehla, ’me lintho tsohle tseo e leng tsa ka ke tsa hao. Empa re ne re mpa re tlameha ho thaba hobane mor’eno o ne a shoele ’me o ile a phela. O ne a lahlehile eaba oa fumanoa.’—Luka 15:25-32.

Seo re ka Ithutang Sona

Ntate ea setšoantšong seo sa Jesu o emela Molimo oa rōna ea mohau, Jehova. Joaloka mora ea lahlehileng, batho ba bang ba tlohela tšireletso ea ntlo ea Molimo ka nakoana empa hamorao ba khutle. Jehova o talima ba joalo joang? Ba khutlelang ho Jehova ka pako ea sebele ba ka kholiseha hore “a ke ke a lula a fumana phoso ka linako tsohle, ebile a ke ke a koetla tšito ka ho sa eeng kae.” (Pesaleme ea 103:9, NW) Setšoantšong, ntate o ile a mathela mora oa hae ho mo amohela. Ka tsela e tšoanang, hase feela hore Jehova o ikemiselitse ho tšoarela baetsalibe ba bakang empa, o boetse o labalabela ho etsa joalo. O ‘lula a loketse ho tšoarela’ ’me o “tšoarela haholo.”—Pesaleme ea 86:5, NW; Esaia 55:7; Zakaria 1:3.

Setšoantšong seo sa Jesu, lerato la sebele la ntate le ile la nolofalletsa mora hore a be le sebete sa ho khutla. Empa nahana: Ho ka be ho etsahetse eng haeba ntate a ne a latotse moshanyana eo kapa eba ka khalefo o ile a mo bolella hore a se hlole a khutla? Boitšoaro bo joalo mohlomong bo ka be bo entse hore mohlankana eo a tsamaele ruri.—Bapisa le 2 Bakorinthe 2:6, 7.

Kahoo, ho isa bohōleng bo itseng, ha ba arohana, ntate o ile a bula tsela bakeng sa hore mora oa hae a ka khutla. Kajeno, ka linako tse ling baholo ba Bakreste ba tlameha ho tlosa baetsalibe ba sa bakeng ka phuthehong. (1 Bakorinthe 5:11, 13) Nakong eo ba mo tlosang, ba ka hla ba bula tsela ea hore moetsalibe eo a tle a khutle ka hore ka lerato ba mo bolelle mehato eo a ka e nkang bakeng sa ho khutlisetsoa ka moso. Ho hopola kōpo e tiileng joalo ea baholo ho ’nile ha susumelletsa ba bangata ba lahlehileng moeeng hore hamorao ba bake ’me ho ba khannetse hore ba khutlele ntlong ea Molimo.—2 Timothea 4:2.

Ntate o ile a boela a bontša kutloelo-bohloko ha mora oa hae a khutla. Ha hoa ka ha mo nka nako hore a hlokomele pako ea sebele ea mora. Kahoo, ho e-na le hore a tsitlallele hore mora oa hae a thathamise ka ho hlaka libe tsa hae kaofela, o ile a tsoela pele ka mosebetsi oa ho mo amohela, ’me o ile a thabela ho etsa joalo haholo. Bakreste ba ka etsisa mohlala ona. Ba lokela ho thabela hore ea neng a lahlehile o fumanoe.—Luka 15:10.

Tsela eo ntate enoa a ileng a itšoara ka eona e hlakisa hantle hore e ne e le khale a letetse ho khutla ha mora oa hae ea neng a tsoile tseleng. Ka sebele, seo e mpa feela e le tšoantšetso ea tabatabelo eo Jehova a nang le eona bakeng sa bohle ba tlohetseng ntlo ea hae. Ha “a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Ka hona, ba bakelang libe tsa bona ba ka kholiseha hore ba tla hlohonolofatsoa ka “linako tse khathollang . . . ho tsoa ho Jehova ka boeena.”—Liketso 3:19.

[Mongolo o botlaaseng ba leqephe]