Kamoo U ka Lulang U Thabile Tšebeletsong ea Nako e Tletseng
HO PHETHAHALA ha boprofeta ba Bibele ho bontša hantle hore re phela matsatsing a ho qetela a tsamaiso ena ea batho ba sa tšabeng Molimo. Ba hlokomela sena, bahlanka ba Jehova Molimo ba qeta nako e ngata ka hohle kamoo ba ka khonang kateng ba phatlalatsa litaba tse molemo tsa ’Muso oa hae. Lipaki tsa Jehova tse ka holimo ho 600 000 li hlophisitse bophelo ba tsona e le hore li ka kopanela tšebeletsong ea nako e tletseng. Tse ling tsa tsona ke baboleli ba nako e tletseng ba ’Muso ba bitsoang bo-pula-maliboho. Tse ling ke baithaopi ba Bethele ntlo-khōlō ea Mokhatlo oa Watch Tower kapa liofising tsa eona tsa makala. Tse ling hape ke baromuoa le balebeli ba tsamaeang.
Bibele e bontša hore matsatsing a ho qetela, ho tla ba le “linako tse mahlonoko tseo ho leng thata ho sebetsana le tsona.” (2 Timothea 3:1-5) Bibele ea Segerike e sebelisa polelo e ka fetoleloang e le “linako tse khethiloeng tse mabifi” temaneng eo. Kahoo, ha ho ea tlamehang ho lebella bophelo bo se nang mathata mehleng ena ea rōna. Bakeng sa basebeletsi ba bang ba Bakreste, mathata a bonahala a tebile hoo ba ka ipotsang, ‘Na nka tsoela pele ka tšebeletso ea nako e tletseng kapa ke khaotse?’
Ke maemo afe a ka etsang hore motho a boele a hlahlobisise boemo ba hae e le pula-maliboho, moithaopi oa Bethele, molebeli ea tsamaeang kapa moromuoa? Ka mohlomong ho hlaha boloetse bo tebileng. Ho ka etsahala hore mong ka motho ea hōlileng, kapa ea kulang, a hloke ho hlokomeloa kamehla. E ka ’na ea e-ba taba ea hore banyalani ba qala ho ba le bana. Motho leha e le ofe ea khaotsang tšebeletso ea nako e tletseng ka mabaka a joalo le ka lebaka la seo Mangolo a mo tlamang hore a se etse ha aa lokela ho hlajoa ke lihlong ka ho etsa phetoho eo.
Leha ho le joalo, ho thoe’ng haeba e mong o rera ho khaotsa tšebeletso ea nako e tletseng hobane a sa thaba? Mohlomong pula-maliboho o fumana karabelo e fokolang tšebeletsong ea eona ’me oa ipotsa, ‘Ke hobane’ng ha ke tsoela pele ka bophelo ba boitelo empa ho mamela methoaela feela?’ Mohlomong moithaopi oa Bethele ha a hlile ha a thabele kabelo ea hae. Kapa e ka ’na ea e-ba taba ea hore, le hoja boloetse bo sa foleng bo sa thibele tšebeletso ea bopula-maliboho, qetellong bo felisa thabo ea motho. Ke joang batho ba joalo ba ka lulang ba thabile? A re hlahlobeng seo basebeletsi ba bang ba nang le phihlelo ba se bolelang.
Ho Sebetsana ka Katleho le ho Soetseha
Anny oa Switzerland o ile a ba teng Sekolong sa Bibele sa Gileade sa Watchtower ka 1950. O ne a lebeletse ka cheseho kabelo ea boromuoa mose ho maoatle. Anny o ile a soetseha ha a boela a abeloa ho sebeletsa Bethele ea Europe. Leha ho le joalo, o ile a amohela kabelo ea hae Lefapheng la Phetolelo ’me o ntse a etsa mosebetsi oo. O ile a hlōla ho soetseha hoo ha hae joang? Anny oa hlalosa: “Ho ne ho e-na le mosebetsi o mongata o lokelang ho etsoa, ’me o sa ntse o le teng. Maikutlo a ka le lintho tseo ke li ratang ha li bohlokoa joaloka mosebetsi ona.”
Haeba mosebetsi oa rōna o re soetsa, mohlomong re ka hlaolela boikutlo bo tšoanang le ba Anny. Ntho eo re e ratang ka ho khetheha hase ea bohlokoa bo fetisisang. Seo e leng sa bohlokoa ke hore mesebetsi eohle e amanang le ho boleloa ha molaetsa oa ’Muso, ka ho fapana ha eona, e phethoe hantle. Liproverbia 14:23 e re bolella hore “mosebetsi ka mong o na le moputso.” Ho sa tsotellehe mosebetsi oo re o filoeng, ho o phetha ka botšepehi ho tlatsetsa ho finyelloeng ha mosebetsi oa ’Muso. ’Me ho ka ba le khotsofalo e khōlō—e, thabo—mosebetsing o joalo o fanoeng ke Molimo.—Bapisa le 1 Bakorinthe 12:18, 27, 28.
Ho Sebelisana Hantle le ba Bang
Tšebeletso ea nako e tletseng e akarelletsa ho sebelisana le batho ba mefuta eohle—tšebeletsong ea tšimo, Bethele, lehaeng la baromuoa kapa ho eteleng phutheho e ’ngoe ka mor’a e ’ngoe joaloka molebeli ea tsamaeang. Kahoo, thabo e itšetlehile haholo ka ho sebelisana le ba bang hantle. Leha ho le joalo, ‘linako tse mabifi’ tse ileng tsa boleloa esale pele bakeng sa matsatsi ana a ho qetela li etsa hore ho be boima hore batho ba sebelisane hantle. Mosebeletsi a ka qoba ho lahleheloa ke thabo joang le haeba a khopisitsoe ke e mong? Mohlomong re ka ithuta ho itseng ho Wilhelm.
Wilhelm e ile ea e-ba setho sa lelapa la Bethele ea Europe ka 1947. Ka mor’a moo, o ile a qeta nako mosebetsing oa bopula-maliboho le tšebeletsong ea ho ba molebeli ea tsamaeang. Wilhelm oa hlalosa: “Haeba ’na le mosali oa ka re hlokomela lintho tseo re nahanang hore li fosahetse kapa tse re tšoenyang, re bolella Jehova kamoo re ikutloang kateng ebe joale re tlohella boemo ho eena hore a bo rarolle.”—Pesaleme ea 37:5.
Mohlomong boitšoaro ba Mokreste-’moho le uena ea ileng a u buisa ka tello kapa ka ho se nahanele bo u utloisitse bohloko. Hopola hore kaofela ha rōna re khoptjoa hangata lipuong tsa rōna. (Jakobo 3:2) Joale ke hobane’ng ha u sa sebelise boemo boo hore u atamele haufi le ‘Ea Utloang lithapelo’? (Pesaleme ea 65:2) Bua le Jehova ka taba ena, joale u e siee matsohong a hae. Haeba Molimo a rata ho etsa liphetoho, o tla li etsa. Ba lulang lehaeng la baromuoa ba lokela ho lula ba hopola sena haeba ho hlaha bothata bo tšoanang, kaha sena se tla ba thusa hore ba lule ba thabile tšebeletsong ea Jehova.
Ha Bophelo bo Fokola
Ke batho ba fokolang ba phelang hantle ’meleng. Esita le bacha ba ka hlaseloa ke ho tepella maikutlo kapa lefu le itseng. Ho kula ho tlama ba bang hore ba khaotse tšebeletso ea nako e tletseng, empa ka mor’a moo, ba ntse ba etsa mosebetsi o babatsehang e le bahoeletsi ba ’Muso. Leha ho le joalo, ba bang ba khona ho tsoela pele ka tšebeletso ea nako e tletseng ho sa tsotellehe ho kula. Ka mohlala, nahana ka Hartmut le Gislind.
Hartmut le Gislind ke banyalani ba qetileng lilemo tse 30 e le bo-pula-maliboho, e le baromuoa, hape le mosebetsing oa ho tsamaea. Bobeli ba bona ba ’nile ba mamella litlhaselo tsa bokuli bo tebileng boo ka linako tse ling bo ’nileng ba ba siea ba fokola ’meleng le maikutlong. Leha ho le joalo, ba entse mosebetsi o babatsehang ’me ba khonne ho khothatsa ba bang ba fetang litekong tse tšoanang. Ba fana ka keletso efe? “Talima nakong e tlang, eseng nakong e fetileng. Etsa sohle seo u ka se khonang boemong bo bong le bo bong. Letsatsi ka leng le ka ’na la hlahisa monyetla o le mong feela oa ho rorisa Jehova. Sebelisa monyetla oo ’me u o thabele.”
Nahana ka boemo ba Hannelore. O ’nile a khathatsoa ke boloetse bo tsohang khafetsa ka lilemo tse 30 tseo a li qetileng e le pula-maliboho, e le moromuoa, ha a le mosebetsing oa ho tsamaea le monna oa hae le ha a le tšebeletsong ea Bethele. Hannelore o re: “Ke tsepamisa mohopolo oa ka tsekong e ileng ea phahamisoa ke Satane—ea hore batho ba sebeletsa Jehova feela ha lintho li ba tsamaela hantle. Ka ho mamella liteko, nka tlatsetsa ho pakeng hore Satane o fositse.” Ena e ka ba tšusumetso e matla. Hopola hore ho tšepahala ha hao ho Jehova ha u le tekong ke habohlokoa ho eena.—Jobo 1:8-12; Liproverbia 27:11.
Ha u leka ho etsa qeto e leka-lekaneng mabapi le boemo ba bophelo ba hao, nahana ka litšobotsi tse peli tsa boprofeta ba Jesu Kreste bo mabapi le bofelo ba tsamaiso ena ea lintho. Jesu o ile a bolela esale pele ka mafu a seoa sebakeng se seng ho ea ho se seng. O ile a boela a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona.” (Matheu 24:3, 14; Luka 21:11) Jesu o ne a tseba hore matsatsing a ho qetela, balateli ba hae ba ne ba tla loantšana le ho kula. Empa o ile a lebella hore mosebetsi oa ho bolela o ne o tla phethoa, eseng feela ke batho ba phelang hantle, empa le ke batho ba kulang ka ho tebileng. Haeba re khona ho tsoela pele ka tšebeletso ea nako e tletseng ho sa tsotellehe ho kula, Jehova a ke ke a lebala lerato leo re le bontšang bakeng sa lebitso la hae.—Baheberu 6:10.
Ho Lula U Thabile ho sa Tsotellehe ho se Thahaselle ha Batho
Boikutlo ba rōna bo ka angoa ke tsela eo batho ba arabelang ka eona mosebetsing oa ho bolela ka ’Muso. Mosebeletsi e mong ea nang le phihlelo o itse: “Bo-pula-maliboho le bona ba ntse ba thatafalloa ke ho qalisa moqoqo le mong’a ntlo. Kaofela ha rōna re lokela ho ikitlaetsa ka matla ho lula re thabile.” E, ho se thahaselle ha batho ho ka felisa thabo ea rōna tšebeletsong ea tšimo. Ka hona, ke joang pula-maliboho ea tobanang le boiphapanyo kamehla a ka lulang a thabile? Basebeletsi ba nang le phihlelo ba fana ka litlhahiso tse latelang tse ’nileng tsa lekoa ’me tsa sebelisoa.
Ho se thahaselle ho hlahisa phephetso, empa ha ho bolele ho hlōloa. Boiphapanyo bo atileng ka bobona hase lebaka la ho khaotsa tšebeletso ea nako e tletseng. Haeba re behella nako e lekaneng ka thōko bakeng sa ho ithuta Mangolo ka botlalo, re ka lula re thabile ha re tobana le ho se thahaselle. Mangolo a re ‘hlomella bakeng sa mosebetsi o mong le o mong o molemo,’ ’me seo se kopanyelletsa ho bua le ba ithibang litsebe bakeng sa litaba tse molemo. (2 Timothea 3:16, 17) Le hoja batho ba sa ka ba rata ho mamela moprofeta Jeremia, seo ha sea ka sa etsa hore a khaotse. (Jeremia 7:27) Ha re ithuta Bibele ka thuso ea lingoliloeng tsa Bokreste, re ka rua molemo o moholo haeba re hlokomela mehopolo e re matlafatsang tumelo le e re thusang ho sebetsana le ho se thahaselle.
Re lumela hore ho se thahaselle ke phephetso, a re hlahlobeng boikutlo ba rōna mabapi le batho bao re ba bolellang. Ke hobane’ng ha ba iphapanya? Ka mohlala, tlaleho e soabisang ea bolumeli ba bohata ke lebaka le leng le etsang hore ho ate ho se thahaselle likarolong tse ling tsa Europe. Batho ha ba sa na maikutlo a hore bolumeli bo na le sebaka bophelong ba bona, leha e le ho rata ntho leha e le efe e amanang le bona. Ho hlokahala hore re tenyetsehe, re bue le batho ka lintho tse ba amang, lintho tse kang ho hlokeha ha mosebetsi, bophelo, tlōlo ea molao, ho hloka mamello ha batho, tikoloho le tšoso ea ntoa.
Kenyelletsong ea rōna ho mong’a ntlo, re ka ’na ra bua ka ntho e hapileng maikutlo a batho sebakeng seo. Ke seo Dietmar a ileng a se leka ha a ne a bolela motseng oo a neng a hlile a sa atlehe ho oona. Moahi e mong o ile a mo bolella ka sehlōhō se neng se etsahetse motseng moo ka letsatsi la maobane. Ka mor’a moo, ntlong e ’ngoe le e ’ngoe Dietmar o ile a bontša kutloelo-bohloko ka ketsahalo eo e sehlōhō. O itse: “Ka potlako, batho ba ile ba qala ho bua. Tlokotsi eo e ne e amme maikutlo a motho e mong le e mong. Ke ile ka ba le moqoqo o monate le batho letsatsing leo kaha ke ile ka bontša thahasello bophelong ba bona.”
Ho hlokahala hore re fe batho bopaki ba ’Muso kae kapa kae moo re ba fumanang. Bopaki bo sa reroang bo ka beha litholoana, ’me re ka ikoetlisa mosebetsing ona ka ho sebelisa litlhahiso tse fanoeng likhatisong tse thehiloeng Bibeleng. Mantsoe a seng makae a botsoalle ho mong’a ntlo kapa ho mo tsamaisetsa likopi tsa limakasine tsa Molula-Qhooa le Tsoha! li ka fella ka thabo. Haeba re ile ra etsa maeto a ho boela ho motho ea thahasellang ’me re qalisitse ho khanna thuto ea Bibele, re ka ’na ra lebisoa ho motho e mong ka ho botsa: “Na ho na le motho e mong eo u mo tsebang ea ka thabelang ho ithuta Bibele?” Sena se ka ’na sa lebisa ho beng le thuto e ’ngoe ea Bibele ea lehae. Ho sa tsotellehe se etsahalang, a re beng le boikutlo bo nepahetseng, re itšetlehe ka Jehova ka thapelo, re se lumelle ho se thahaselle ha batho ho re nyahamisa.
Khothatso e Fanoang ke ba Bang
Jürgen le Christiane ba ’nile ba bula maliboho le ho ba mosebetsing oa ho tsamaea ka lilemo tse ka holimo ho 30. Ka nako e ’ngoe ba kile ba ba le kabelo e neng e kopanyelletsa ho bolela sebakeng seo ho sona boholo ba batho bo neng bo sa thahaselle ’me bo le manganga. Jürgen le mosali oa hae ba ne ba labalabela khothatso hakaakang! Leha ho le joalo, ka mabaka a itseng, ba bang ka phuthehong ha baa ka ba ba fa seo ba neng ba se hloka.
Kahoo, ho tsoa phihlelong, Jürgen oa tseba hore “bo-pula-maliboho ba bang ba bothateng. Ba hloka khothatso e eketsehileng e tsoang ho baholo le ho bahoeletsi ba bang.” Molimo o ile a bolella Moshe hore a khothatse Joshua le ho mo matlafatsa. (Deuteronoma 3:26-28) ’Me Bakreste ba lokela ho khothatsana. (Baroma 1:11, 12) Bahoeletsi ba ’Muso ba ka khothatsa ba tšebeletsong ea nako e tletseng ka mantsoe a hahang le ka hore nako le nako ba kopanele le bona tšebeletsong.
Thabo ea Jehova—Matla a Rōna
Bakreste ba qetileng boholo ba bophelo ba bona e le bo-pula-maliboho kapa baromuoa, ba sebeletsa Bethele kapa ba etela liphutheho mosebetsing oa ho tsamaea, ba hlokometse hore mathata a mangata ke a nakoana, empa a mang a nka nako e telele. Esita le mathata a seng makae a bonahalang eka a ke ke a fela, ha aa lokela ho re amoha thabo ea rōna. Ramon ea sebelelitseng kabelong ea naha esele ka lilemo tse fetang 45 o fana ka tlhahiso ea hore neng le neng ha re hlokofatsoa ke mathata, “re lokela ho nahana ka litlhohonolofatso tse ngata tseo re nang le tsona le ka batho ba likete ba fetang mathateng a maholoanyane.” Ka sebele, balumeli-’moho le rōna lefatšeng ka bophara ba na le mahlomola, ’me ruri, Jehova oa re hlokomela kaofela ha rōna.—1 Petrose 5:6-9.
Ka hona, haeba maemo a rōna a re lumella ho kopanela tšebeletsong ea nako e tletseng le ho se e lahle, a re luleng re thabile ka ho itšetleha ka Ntate oa rōna oa leholimo. O matlafatsa bahlanka ba hae, ’me kaofela re lokela ho hopola hore ‘thabo ea Jehova ke matla a rōna.’—Nehemia 8:10.
[Setšoantšo se leqepheng la 21]
“Maikutlo a ka le lintho tseo ke li ratang ha li bohlokoa joaloka mosebetsi ona”
[Setšoantšo se leqepheng la 22]
“Re bolella Jehova kamoo re ikutloang kateng ebe joale re tlohella boemo ho eena”
[Setšoantšo se leqepheng la 23]
“Etsa sohle seo u ka se khonang boemong bo bong le bo bong. Letsatsi ka leng le ka ’na la hlahisa monyetla o le mong feela oa ho rorisa Jehova”
[Setšoantšo se leqepheng la 23]
“Ka ho mamella liteko, nka tlatsetsa ho pakeng hore Satane o fositse”
[Setšoantšo se leqepheng la 24]
“Bo-pula-maliboho ba bang ba bothateng. Ba hloka khothatso e eketsehileng e tsoang ho baholo le ho bahoeletsi ba bang”
[Setšoantšo se leqepheng la 24]
“Re lokela ho nahana ka litlhohonolofatso tse ngata tseo re nang le tsona”