Baboleli ba ’Muso Baa Tlaleha
“Batho ba Hao ba Tla Inehela ka ho Rata”
NAAMANE, molaoli ea matla oa mabotho a Syria, o tšoeroe ke lepera. Haeba le sa phekoloe, lefu lena le tšabehang le tla mo senya libōpeho ’me le mo bolaee. Naamane o tla etsa joang? Har’a ba ntlo ea Naamane, ho na le moroetsanyana ea ‘thopiloeng naheng ea Iseraele.’ O bua ka sebete ’me o bolela hore moprofeta Elisha ke eena ea ka phekolang Naamane.—2 Marena 5:1-3.
Ka lebaka la sebete sa moroetsanyana enoa, Naamane o batla Elisha ’me oa phekoloa. Ho phaella moo, Naamane o fetoha morapeli oa Jehova! Phihlelo ena e tlalehiloeng ka Bibeleng, e etsahetse lekholong la bo10 la lilemo B.C.E. (2 Marena 5:4-15) Kajeno, bacha ba bangata ba bontša sebete se tšoanang ha ba buella lithahasello tsa ’Muso. Phihlelo e latelang e hlahang Mozambique e tiisa sena.
Nuno ea lilemo li tšeletseng ke mohoeletsi ea sa kolobetsoang oa litaba tse molemo. Esita le pele e e-ba mohoeletsi ea sa kolobetsoang, Nuno o ne a bokella bana ba baahelani, a rapela ’me a ba ruta Bibele a sebelisa Buka ea ka ea Lipale tsa Bibele.
Hangata Nuno o tsoha esale hoseng ka Moqebelo ’me o hopotsa lelapa labo: “Tsatsing lena re ea tšebeletsong ea tšimo.” Ho chesehela ha hae tšebeletso ho bonahala ka litsela tse ling. Ha a ntse a tsamaea le batsoali ba hae tšebeletsong ea seterata Maputo, hangata Nuno o atamela batho a le mong. Ketsahalong e ’ngoe e joalo, rakhoebo e mong o ile a mo atamela ’me a mo botsa: “Ke hobane’ng ha u rekisa limakasine tsee?” Nuno o ile a re: “Ha ke rekise limakasine tsena, empa ke amohela menehelo e le hore e tle e thuse mosebetsing oa ho bolela.” Rakhoebo eo o ile a arabela: “Le hoja ke sa thahaselle, ke khahloa ke boikutlo ba hao le tsebo ea hao. Ke lakatsa ho etsa monehelo bakeng sa mosebetsi ona.”
Ketsahalong e ’ngoe, Nuno o ile a atamela monna e mong seterateng ’me a mo fa buka ea Khotso ea ’Nete le Tšireletseho—U Ka Li Fumana Joang? Monna eo o ile a botsa: “Na ha u kene sekolo mola?” Nuno o ile a arabela: “E, ke kena sekolo moo, empa kajeno ke fana ka molaetsa oa bohlokoa o tsoang bukeng ena. E u bontša hore u ka phela lefatšeng le lecha leo Molimo a tla le tlisa, joalokaha setšoantšo sena se bukeng se bontša.” Nuno o ne a sa hlokomele hore monna enoa eo a buang le eena ke tichere sekolong seo a kenang ho sona. Tichere ha ea ka ea amohela buka feela, empa hona joale e boetse e amohela kamehla limakasine tsa Molula-Qhooa le Tsoha! ho Nuno.
Ha Nuno a botsoa hore na ke hobane’ng ha a rata ho kopanela mosebetsing oa ho bolela, o re: “Ke batla ho bua le batho le ho ba ruta ka Jehova le Mora oa hae, Jesu Kreste.” Oa phaella: “’Me haeba batho ba sa rate ho mamela, ha ho na lebaka la hore ke khopehe.”
Lefatšeng lohle, bacha ba likete ba kang Nuno ba “inehela ka ho rata” bakeng sa ho ruta le ho bolela ka ’Muso oa Molimo. (Pesaleme ea 110:3, NW) Empa sena ha se etsahale ka lehlohonolo. Batsoali ba rutang bana ba bona ka Jehova ho tloha boseeng, ba behang mohlala o motle tšebeletsong le ba hahamallang lithahasello tsa ’Muso ka cheseho, ba tla putsoa haholo.