“Tiisang Lipelo Tsa Lōna”

“Ho hlokahala hore le be le mamello, e le hore, ka mor’a hore le etse thato ea Molimo, le ka amohela phethahatso ea tšepiso.”—BAHEBERU 10:36.

1, 2.(a) Ke’ng se ileng sa etsahalla Bakreste ba ’maloa lekholong la pele la lilemo? (b) Ke hobane’ng ha ho le bonolo hore tumelo e fokole?

HAR’A bangoli bohle ba Bibele, ha ho ea buileng ka tumelo hangata joaloka moapostola Pauluse. ’Me hangata, o buile ka bao tumelo ea bona e fokolang kapa e shoeleng. Ka mohlala, Hymenease le Alexandere ba ile “ba senyeheloa ke tumelo joaloka sekepe se soahlamaneng.” (1 Timothea 1:19, 20) Demase o ile a siea Pauluse kahobane a “ile a rata tsamaiso ea lintho ea hona joale.” (2 Timothea 4:10) Ba bang, ka liketso tsa bona tseo e seng tsa Bokreste, tse hlokang boikarabelo ba “latotse tumelo.” Ba bang ba thetsitsoe ke bohlale ba bohata ’me ba “khelohile tumelo.”—1 Timothea 5:8; 6:20, 21.

² Ke hobane’ng ha Bakreste bao ba tlotsitsoeng ba ile ba hlōleha ka litsela tsee? Ha e le hantle, “tumelo ke tebello e tiisitsoeng ea lintho tseo ho nang le tšepo bakeng sa tsona, bopaki bo totobetseng ba lintho tsa sebele le hoja li sa bonoe.” (Baheberu 11:1) Re bontša tumelo nthong eo re ke keng ra e bona. Ha re e hloke bakeng sa lintho tse bonoang. Ho batla ho le bonolo ho sebeletsa leruo la lintho tse bonahalang ho feta la lintho tse sa bonahaleng tsa moea. (Matheu 19:21, 22) Lintho tse ngata tse bonahalang—tse kang “takatso ea nama le takatso ea mahlo”—li ipiletsa ka matla nameng ea rōna e sa phethahalang ’me li ka fokolisa tumelo ea rōna.—1 Johanne 2:16.

3.Mokreste o lokela ho hlaolela tumelo ea mofuta ofe?

³ Leha ho le joalo, Pauluse o re, “ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” Moshe o ne a e-na le tumelo e joalo. “O ile a talima ka hloko tefong ea moputso” ’me “a tsoela pele a tiile joalokaha eka o bona Ea sa bonahaleng.” (Baheberu 11:6, 24, 26, 27) Mokreste o hloka tumelo ea mofuta ona. Joalokaha re hlokometse sehloohong se ka pele, Abrahama e bile mohlala o motle ntlheng ena.

Mohlala oa Abrahama oa Tumelo

4.Tsela eo Abrahama a ileng a phela ka eona e ile ea angoa ke tumelo ea hae joang?

⁴ Abrahama o ne a le Ure ha a ne a amohela tšepiso ea Molimo ea hore o ne a tla tsoala peō e neng e tla hlohonolofatsa batho ba lichaba tsohle. (Genese 12:1-3; Liketso 7:2, 3) Ka lebaka la tšepiso eo, Abrahama o ile a mamela Jehova, a fallela Harane ’me hamorao a fallela Kanana. Ha a le moo, Jehova o ile a etsa tšepiso ea ho fa peō ea Abrahama naha eo. (Genese 12:7; Nehemia 9:7, 8) Leha ho le joalo, boholo ba seo Jehova a neng a se tšepisitse se ne se lokela ho phethahala ka mor’a lefu la Abrahama. Ka mohlala, Abrahama ka boeena ha aa ka a rua karolo e itseng ea Kanana—haese lehaha la Makpela, leo a ileng a le reka e le sebaka sa mabitla. (Genese 23:1-20) Ho ntse ho le joalo, o ne a e-na le tumelo lentsoeng la Jehova. Ka holimo ho tsohle, o ne a e-na le tumelo ‘motseng oo e leng hona o tlang o nang le metheo ea sebele, oo sehahi le moetsi oa oona e leng Molimo.’ (Baheberu 11:10) Tumelo e joalo e ile ea mo tšehetsa bophelong bohle ba hae.

5, 6. Tumelo ea Abrahama e ile ea lekoa ka tsela efe mabapi le tšepiso ea Jehova?

⁵ Sena se bonahala ka ho khetheha mabapi le tšepiso ea hore peō ea Abrahama e ne e tla fetoha sechaba se seholo. E le hore sena se etsahale, ho ne ho hlokahala hore Abrahama a be le mora, ’me o ile a leta nako e telele pele a hlohonolofatsoa ka eena. Ha re tsebe hore na o ne a le lilemo li kae ha a ne a qala ho utloa tšepiso eo ea Molimo, empa nakong eo a nkang leeto le lelelele la ho ea Harane, Jehova o ne a e-s’o mo fe ngoana. (Genese 11:30) O ile a qeta nako e telele Harane ka ho lekaneng hore a ‘bokelle thepa le ho fumana meea,’ ’me ha a fallela Kanana, o ne a le lilemo li 75 ’me Sara a le lilemo li 65. Le nakong eo, ba ne ba ntse ba se na mora. (Genese 12:4, 5) Ha Sara a le lilemo tse ka bang 75, o ile a fihlela qeto ea hore o se a tsofetse haholo hore a ka tsoalla Abrahama ngoana. Kahoo, ho ea ka tloaelo ea mehleng eo, o ile a fana ka lekhabunyane la hae Hagare ho Abrahama, ’me la mo tsoalla mora. Empa enoa e ne e se ngoana ea tšepisitsoeng. Hagare le ngoana oa hae, Ishmaele, ba ile ba qetella ba lelekiloe. Leha ho le joalo, ha Abrahama a ba kopela mohau, Jehova o ile a tšepisa hore o tla hlohonolofatsa Ishmaele.—Genese 16:1-4, 10; 17:15, 16, 18-20; 21:8-21.

⁶ Ka nako ea Molimo e loketseng—nako e telele haholo ka mor’a hore ba qale ho utloa tšepiso—Abrahama ea lilemo li 100 le Sara ea lilemo li 90 ba ile ba ba le ngoana oa moshemane, Isaka. E tlameha ebe e bile ntho e hlollang hakaakang! Ho banyalani bana ba tsofetseng, ho bile joalokaha eka ke tsoho ea bafu ha ’mele ea bona e ‘shoeleng’ e ne e hlahisa bophelo bo bocha. (Baroma 4:19-21) Ba ne ba letile ka nako e telele, empa qetellong ha tšepiso e phethahala, ho leta hoo ho ile ha putsoa.

7. Mamello e hokahanngoa le tumelo joang?

⁷ Mohlala oa Abrahama o re hopotsa hore tumelo ha ea lokela ho ba ea nakoana. Pauluse o ile a hokahanya tumelo le mamello ha a ne a ngola: “Ho hlokahala hore le be le mamello, e le hore, ka mor’a hore le etse thato ea Molimo, le ka amohela phethahatso ea tšepiso. . . . Ha re mofuta o ikhulang ho ea timetsong, empa re mofuta o nang le tumelo hore soule e bolokoe e phela.” (Baheberu 10:36-39) Ba bangata ba letetse ho phethahala ha tšepiso ka nako e telele. Ba bang ba letile nako eohle ea bophelo ba bona. Tumelo ea bona e matla e ba tšehelitse. ’Me, joaloka Abrahama, ba tla fumana moputso ka nako ea Jehova e loketseng.—Habakuke 2:3.

Ho Mamela Molimo

8. Re mamela Molimo joang kajeno, hona ke hobane’ng ha seo se tla matlafatsa tumelo ea rōna?

⁸ Bonyane tumelo ea Abrahama e ile ea matlafatsoa ke lintho tse ’nè, ’me tsona lintho tseo li ka re thusa le rōna. Ea pele, o ile a bontša hore o ‘lumela hore Molimo o teng’ ka ho mamela ha Jehova a bua. Kahoo o ne a fapane le Bajuda ba mehleng ea Jeremia, ba neng ba lumela ho Jehova empa ba se na tumelo mantsoeng a hae. (Jeremia 44:15-19) Kajeno, Jehova o bua le rōna ka maqephe a Bibele, e leng Lentsoe la hae le bululetsoeng, leo Petrose a boletseng hore le joaloka “lebone le khanyang sebakeng se lefifi . . . ka lipelong tsa lōna.” (2 Petrose 1:19) Ha re bala Bibele ka kelo-hloko, re ‘feptjoa ka mantsoe a tumelo.’ (1 Timothea 4:6; Baroma 10:17) Ho phaella moo, mehleng ena ea qetello, “lekhoba le tšepahalang le le masene” le fana ka lijo tsa moea “ka nako e tšoanetseng,” e leng tataiso ea ho sebelisa melao-motheo ea Bibele le ea ho utloisisa boprofeta ba Bibele. (Matheu 24:45-47) Ho mamela Jehova ka mecha ena ke habohlokoa haholo ho beng le tumelo e matla.

9. Phello e tla ba efe haeba re hlile re lumela tšepo ea Bokreste?

⁹ Tumelo ea Abrahama e ne e amana haufi-ufi le tšepo ea hae. “Motheong oa tšepo o ile a ba le tumelo, e le hore e ka ba ntate oa lichaba tse ngata.” (Baroma 4:18) Ena ke ntho ea bobeli e ka re thusang. Le ka mohla ha rea lokela ho lebala hore Jehova ke “moputsi oa ba mo batlang ka tieo.” Moapostola Pauluse o ile a re: “Re sebetsa ka thata ’me rea ikitlaetsa, hobane re behile tšepo ea rōna ho Molimo ea phelang.” (1 Timothea 4:10) Haeba re hlile re e-na le tumelo tšepong ea Bokreste, tsela eohle ea bophelo ba rōna e tla bontša tumelo ea rōna, joalokaha ho bile joalo ka Abrahama.

Ho Bua le Molimo

10.Ke thapelo ea mofuta ofe e tla matlafatsa tumelo ea rōna?

¹⁰ Abrahama o ile a bua le Molimo, ’me ena ke ntho ea boraro e ileng ea matlafatsa tumelo ea hae. Kajeno, le rōna re ka buisana le Jehova, ka ho sebelisa mpho ea thapelo ka Jesu Kreste. (Johanne 14:6; Baefese 6:18) E bile ka mor’a hore a etse papiso ho totobatsa bohlokoa ba ho rapela kamehla moo Jesu a ileng a botsa: “Ha Mora oa motho a fihla, na ka sebele o tla fumana tumelo lefatšeng?” (Luka 18:8) Thapelo e hahang tumelo hase e etsoang ka ho se nahane kapa e peteketsoang feela. E na le morero o tebileng. Ka mohlala, thapelo e tlohang botebong ba pelo ke ea bohlokoa ha re tobane le ho etsa liqeto tsa bohlokoa kapa re le tlas’a khatello e khōlō.— Luka 6:12, 13; 22:41-44.

11. (a) Abrahama o ile a matlafatsoa joang ha a tšollela pelo ea hae ho Molimo? (b) Re ka ithuta eng phihlelong ea Abrahama?

¹¹ Ha Abrahama a ntse a tsofala ’me Jehova a ntse a e-s’o mo fe peō e tšepisitsoeng, o ile a buisana le Molimo ka kameho ea hae. Jehova o ile a mo tiisetsa. Ka phello efe? Abrahama o ile a “lumela Jehova, ’me Jehova a ’malla ho lumela ha hae hore ke ho loka.” Eaba Jehova o mo fa pontšo ho tiisa mantsoe a hae. (Genese 15:1-18) Haeba re tšollela lipelo tsa rōna ho Jehova ka thapelo, re amohela litšepiso tsa Jehova tse ka Lentsoeng la hae, Bibele, ’me re mo mamela ka tumelo e feletseng, joale Jehova le eena o tla matlafatsa tumelo ea rōna.—Matheu 21:22; Jude 20, 21.

12, 13. (a) Abrahama o ile a hlohonolofatsoa joang ha a ne a latela tataiso ea Jehova? (b) Ke liphihlelo tsa mofuta ofe tse tla matlafatsa tumelo ea rōna?

¹² Ntho ea bone e ileng ea matlafatsa tumelo ea Abrahama e bile tšehetso eo Jehova a ileng a mo fa eona ha a ne a latela tataiso ea Molimo. Ha Abrahama a ne a il’o lopolla Lota ho marena a futuhileng, Jehova o ile a mo fa tlhōlo. (Genese 14:16, 20) Le hoja Abrahama a ne a phela joaloka moahi oa nakoana naheng eo peō ea hae e neng e tla e rua, Jehova o ile a mo hlohonolofatsa ka lintho tse bonahalang. (Bapisa le Genese 14:21-23.) Jehova o ile a tataisa boiteko ba mohlanka oa hae ba ho fumanela Isaka mosali ea tšoanelehang. (Genese 24:10-27) E, Jehova o ne a “hlohonolofalitse Abrahama linthong tsohle.” (Genese 24:1) Ka lebaka leo tumelo ea hae e ile ea e-ba matla haholo ’me a ba le botsoalle bo haufi-ufi le Jehova Molimo hoo Jehova a ileng a mo bitsa “motsoalle oa ka.”—Esaia 41:8, NW; Jakobo 2:23.

¹³ Na le rōna kajeno re ka ba le tumelo e matla joalo? E. Haeba joaloka Abrahama, re beha Jehova tekong ka ho mamela litaelo tsa hae, le rōna o tla re hlohonolofatsa, ’me seo se tla matlafatsa tumelo ea rōna. Ka mohlala, ha u sheba Tlaleho ea Selemo sa Tšebeletso sa 1998 e bontša hore ba bangata ba hlohonolofalitsoe ka mokhoa o babatsehang ha ba mamela taelo ea hae ea ho bolela litaba tse molemo.—Mareka 13:10.

Tlaleho ea Tumelo Kajeno

14. Jehova o ile a hlohonolofatsa phutuho ka Kingdom News No. 35 joang?

¹⁴ Moraonyana ka October 1997, phutuho ea lefatšeng ka bophara ka Kingdom News No. 35 e bile e atlehileng ka ho ikhethang, ka lebaka la cheseho le mafolofolo a Lipaki tse limilione ka bomong. Mohlala oa sena ke se etsahetseng Ghana. Ho ile ha abjoa likopi tse ka bang limilione tse 2,5 ka lipuo tse ’nè, ’me ka lebaka leo ha etsoa likōpo tse ka bang 2 000 tsa lithuto tsa Bibele. Cyprus, Lipaki tse peli ha li ntse li aba Kingdom News li ile tsa hlokomela hore moprista o li setse morao. Ka mor’a nakoana, li ile tsa mo neha kopi ea Kingdom News. O ne a se a fumane kopi ’me a re: “Ke khahliloe haholo ke molaetsa oa eona hoo ke batlang ho babatsa bahlophisi ba eona.” Denmark, ho ile ha abjoa likopi tse limilione tse 1,5 tsa Kingdom News ’me ha e-ba le liphello tse ntle. Mosali e mong ea sebetsang setsing sa ntlafatso ea likamano tsa sechaba moo o ile a re: “Pampitšana ena e na le molaetsa ho motho e mong le e mong. Ho bonolo ho e utloisisa, ’me e u susumelletsa le ho u lakalisa ho tseba ho eketsehileng. Ka sebele e otla taba botsekeng!”

15. Ke liphihlelo life tse bontšang hore Jehova o hlohonolofalitse boiteko ba ho finyella batho libakeng tsohle?

¹⁵ Ka 1998 ho ile ha etsoa boiteko ba ho bolela ho batho eseng malapeng a bona feela empa libakeng tsohle. Côte d’Ivoire, banyalani ba bang ba baromuoa ba ile ba etela likepe tse 322 tse emeng koung. Ba ile ba tsamaisa libuka tse 247, limakasine tse 2 284, libukana tse 500 le lipampitšana tse makholo, hammoho le livideo e le hore basesisi ba likepe ba li shebelle ha ba le leoatleng. Canada, Paki e ’ngoe e ile ea ea karacheng eo ho etsoang ho bileng ho lokisoang bokantle ba likoloi. Mong’a eona o ile a bontša thahasello, ’me mor’abo rōna a qeta lihora tse ’nè le halofo a le moo, le hoja nako ea ho paka eo a e qetileng e ne e ka ba hora feela ka lebaka la bareki. Qetellong, ho ile ha lokisetsoa ho tšoara thuto ka hora ea 10:00 bosiu. Leha ho le joalo, ka linako tse ling, e ne e lieha ho qala ho fihlela e e-ba har’a khitla ’me e tsoele pele ho fihlela ka hora ea bobeli hoseng. Mohlomong kemiso ena e ne e le phephetso, empa ho ile ha kotuloa litholoana tse molemo. Monna eo o ile a etsa qeto ea ho koala karache ea hae ka Lisontaha e le hore a be teng libokeng. Ka mor’a nakoana eena le ba lelapa la hae ba ile ba tsoela pele hantle.

16. Ke phihlelo efe e bontšang hore bukana ea Seo Molimo a se Hlokang le buka ea Tsebo ke likofuto tse matla mosebetsing oa boboleli le oa ho ruta?

¹⁶ Bukana ea Ke Eng Seo Molimo a se Hlokang ho Rōna? le buka ea Tsebo e Isang Bophelong bo sa Feleng li tsoela pele ho ba likofuto tse matla haholo mosebetsing oa boboleli le oa ho ruta. Italy, moitlami e mong ea neng a emetse bese o ile a amohela kopi ea Kingdom News. Letsatsi le hlahlamang, o ile a atameloa hape ’me a amohela bukana ea Seo Molimo a se Hlokang. Letsatsi le leng le le leng ka mor’a moo, o ile a ba le thuto ea Bibele e nkang metsotso e 10 ho isa ho e 15 seemelong sa libese. Ka mor’a khoeli le halofo, o ile a etsa qeto ea ho tlohela boitlami le ho khutlela hae Guatemala ho ea ntšetsa pele thuto ea hae. Malawi, motho e mong ea khothaletseng ho ea kerekeng ea bitsoang Lobina o ile a halefa ha barali ba hae ba qala ho ithuta Bibele le Lipaki tsa Jehova. Leha ho le joalo, banana bao ba ile ba ’na ba abela ’mè oa bona ’nete ea Bibele neng le neng ha maemo a ba lumella. Ka June 1997, Lobina o ile a bona buka ea Tsebo ’me a hoheloa ke poleloana e reng “Tsebo e Isang.” Ka July o ile a lumela ho ba le thuto ea Bibele. Ka August o ile a ea kopanong ea setereke ’me a mamelisisa lenaneo lohle ka hloko. Ha khoeli eo e fela, o ne a se a tsoile kerekeng ’me a tšoaneleha e le mohoeletsi ea sa kolobetsoang. O ile a kolobetsoa ka November 1997.

17, 18. Livideo tsa Mokhatlo li ipakile li le molemo joang ho thuseng batho ka bomong ho “bona” lintho tsa moea?

¹⁷ Livideo tsa Mokhatlo li thusitse ba bangata ho “bona” lintho tsa moea. Mauritius, monna e mong o ile a tsoa kereke ea hae ka lebaka la likarohano tse ka har’a eona. Moromuoa e mong o ile a mo bontša bonngoe bo teng har’a Lipaki tsa Jehova, a sebelisa video ea United by Divine Teaching. Ka ho ameha, monna eo o ile a re: “Lōna Lipaki tsa Jehova le se le ntse le le Paradeiseng!” O ile a lumela ho tšoareloa thuto ea Bibele. Morali’abo rōna e mong, Japane, o ile a bontša monna oa hae ea sa lumelang video ea Jehovah’s Witnesses—The Organization Behind the Name ’me monna a susumelletseha ho tšoareloa thuto ea Bibele ea kamehla. Ka mor’a ho shebella United by Divine Teaching, o ile a batla ho ba e mong oa Lipaki tsa Jehova. Letoto le likarolo li tharo tlas’a sehlooho se reng The Bible—A Book of Fact and Prophecy le ile la mo thusa ho sebelisa melao-motheo ea Bibele bophelong ba hae. Qetellong, video ea Jehovah’s Witnesses Stand Firm Against Nazi Assault e ile ea mo bontša hore Jehova o matlafatsa batho ba Hae khahlanong le litlhaselo tsa Satane. Monna eo o ile a kolobetsoa ka October 1997.

¹⁸ Tsena e mpa e le tse seng kae feela tsa liphihlelo tse ngata tse ileng tsa thabeloa selemong se fetileng sa tšebeletso. Li bontša hore Lipaki tsa Jehova li na le tumelo e phelang le hore Jehova o matlafatsa tumelo eo ka ho hlohonolofatsa mosebetsi oa tsona.—Jakobo 2:17.

Hlaolela Tumelo Kajeno

19. (a) Re boemong bo molemonyana ho feta ba Abrahama joang? (b) Ke ba bakae ba ileng ba bokana ’moho selemong se fetileng ho ikhopotsa lefu la Jesu la sehlabelo? (c) Ke linaha life tse bileng le lenane le ikhethang la ba bileng teng Sehopotsong selemong se fetileng? (Bona chate e leqepheng la 12 ho ea ho la 15.)

¹⁹ Rōna kajeno re boemong bo molemo ho feta boo Abrahama a neng a le ho bona ka litsela tse ngata. Rea tseba hore Jehova o ile a phethahatsa litšepiso tsohle tsa hae ho Abrahama. Litloholo tsa Abrahama li ile tsa rua Kanana e le lefa, ’me li ile tsa fetoha sechaba se seholo. (1 Marena 4:20; Baheberu 11:12) Ho feta moo, lilemo tse ka bang 1 971 hoba Abrahama a tlohe Harane, setloholo sa hae, Jesu, se ile sa kolobetsoa metsing ke Johanne Mokolobetsi ’me ka mor’a moo sa kolobetsoa ka moea o halalelang ke Jehova ka seqo hore e be Mesia, Peō ea Abrahama ka kutloisiso e feletseng ea moea. (Matheu 3:16, 17; Bagalata 3:16) Ka la 14 Nisane, 33 C.E., Jesu o ile a nehelana ka bophelo ba hae ho ba thekollo ho ba neng ba tla sebelisa tumelo ho eena. (Matheu 20:28; Johanne 3:16) Hona joale ba limilione ba ka itlhohonolofatsa ho eena. Selemong se fetileng, ba 13 896 312 ba ile ba bokana ’moho ka la 14 Nisane ho ikhopotsa ketso ena e babatsehang ea lerato. Ke ho tlosoa qoso ho hokaakang ho Jehova, Mophethahatsi e Moholo oa litšepiso!

20, 21. Batho ba lichaba tsohle ba ile ba itlhohonolofatsa joang ka Peō ea Abrahama lekholong la pele la lilemo, hona ba itlhohonolofatsa joang kajeno?

²⁰ Lekholong la pele la lilemo, batho ba bangata ba lichaba tsohle—ho qala ka Iseraele ea nama—ba ile ba sebelisa tumelo Peōng ena ea Abrahama ’me ba fetoha bara ba Molimo ba tlotsitsoeng, litho tsa “Iseraele ea Molimo” ea moea, e ncha. (Bagalata 3:26-29; 6:16; Liketso 3:25, 26) Ba ne ba lebeletse ka kholiseho bophelo ba moea ba ho se shoe maholimong e le babusi-’moho ’Musong oa Molimo. Ke ba 144 000 feela ba tlang ho hlohonolofatsoa ka tsela ena, ’me ke ba seng bakae feela ba bona ba setseng. (Tšenolo 5:9, 10; 7:4) Selemong se fetileng, ba 8 756 ba ile ba fana ka bopaki ba hore ba lumela hore ke ba palo ena ka ho ja litšoantšetso nakong ea mokete oa Sehopotso.

²¹ Boholo ba Lipaki tsa Jehova kajeno ke tsa “bongata bo boholo” bo profetiloeng ho Tšenolo 7:9-17. Kaha li itlhohonolofatsa ka Jesu, li na le tšepo ea bophelo bo sa feleng lefatšeng la paradeise. (Tšenolo 21:3-5) Ba 5 888 650 ba kopanetseng mosebetsing oa boboleli ka 1998 ke bopaki ba hore bongata bona e fela e le “bo boholo.” E bile ho thabisang ka ho khetheha ho bona Russia le Ukraine li tlaleha bahoeletsi ba fetang 100 000 ka lekhetlo la pele. Ho ikhethang hape, ke tlaleho ea United States—ea bahoeletsi ba 1 040 283 ka August! Tsena e mpa e le linaha tse tharo feela ho tse 19 tse tlalehileng bahoeletsi ba fetang 100 000 selemong se fetileng.

Tšepo e Tla Phethahala Haufinyane

22, 23. (a) Ke hobane’ng ha re lokela ho tiisa lipelo tsa rōna kajeno? (b) Re ka paka joang hore re tšoana le Abrahama, eseng batho ba se nang tumelo bao Pauluse a buileng ka bona?

²² Ba neng ba le teng Sehopotsong ba ile ba hopotsoa kamoo re seng re le haufi kateng le ho phethahala ha litšepiso tsa Jehova. Ka 1914, Jesu o ile a behoa teroneng e le Morena oa ’Muso oa Molimo oa leholimo, ’me a qala ho ba teng ha hae matleng a ’Muso. (Matheu 24:3; Tšenolo 11:15) E, hona joale Peō ea Abrahama e busa leholimong! Jakobo o ile a re ho Bakreste ba mehleng ea hae: “Sebelisang ho se fele pelo; tiisang lipelo tsa lōna, hobane ho ba teng ha Morena ho atametse.” (Jakobo 5:8) Joale, ho ba teng hoo ke ha sebele hona joale! Ke lebaka le matla hakaakang la hore re tiise lipelo tsa rōna!

²³ E se eka kholiseho ea rōna litšepisong tsa Molimo e ka lula e nchafatsoa ke ho ithuta Bibele le ho etsa thapelo e nang le morero kamehla. E se eka le ka mohla re ke ke ra khaotsa ho latsoa tlhohonolofatso ea Jehova ha re ntse re mamela Lentsoe la hae. Kahoo, re tla ba joaloka Abrahama, eseng joaloka bao tumelo ea bona e ileng ea fokola ’me ba shoa, joaloka bao Pauluse a buileng ka bona. Ha ho letho le tlang ho re arohanya le tumelo ea rōna e halalelang ka ho fetisisa. (Jude 20) Re rapella hore sena ebe ’nete ho bahlanka bohle ba Jehova selemong sena sa tšebeletso sa 1999 le ho isa nakong e tlang e sa feleng.

Na Ua Utloisisa?

◻ Re ka mamela Molimo joang kajeno?

◻ Ke melemo efe e tlisoang ke lithapelo tse nang le morero ho Molimo?

◻ Haeba re latela tataiso ea Jehova ka hloko, tumelo ea rōna e tla matlafatsoa joang?

◻ Ke lintlha life tsa tlaleho ea selemo (leqepheng la 12 ho ea ho la 15) tseo u fumaneng li thahasellisa ka ho khetheha?

[Chate e leqepheng la 12-15]

TLALEHO EA SELEMO SA TŠEBELETSO SA 1998 EA LIPAKI TSA JEHOVA LEFATŠENG LOHLE

(Sheba boitsebiso bo hlophisitsoeng hantle khatisong)

[Setšoantšo se leqepheng la 16]

Haeba re mamela Lentsoe la Jehova, kholiseho ea rōna litšepisong tsa hae e tla nchafala

[Setšoantšo se leqepheng la 18]

Tumelo ea rōna ea matlafala ha re kopanela tšebeletsong