Malapa a Maholo a Kopane Tšebeletsong ea Molimo
Mopesaleme O Ile A Ngola: “Bara Ke Lefa La Jehova, ’Me Tholoana Ea Popelo Ea Mosali Ke Moputso. Bana Ba Bocha Ba Rōna Ba Joalo Ka Metsu Letsohong La Mohale. Ho Lehlohonolo Motho Eo Khohlopo Ea Hae E Tletseng Bona.”—Pesaleme Ea 127:3-5.
E,BANA e ka ba tlhohonolofatso e tsoang ho Jehova. Feela joalokaha setsomi se khotsofatsoa ke ho tseba ho nepa ka metsu e ka khohlopong ea sona, batsoali le bona ba thabisoa ke ho tsamaisa bana ba bona tseleng e lebisang bophelong bo sa feleng.—Matheu 7:14.
Mehleng ea khale, malapa ao ‘likhohlopo tsa ’ona li neng li tletse’ bana a ne a tloaelehile har’a batho ba Molimo. Ka mohlala, nahana ka lilemo tseo ba neng ba le botlamuoeng Egepeta ka tsona: “Bana ba Iseraele ba ata, ba ngatafala, ba anafala, ba natlafala haholo-holo, ’me naha ea Egepeta ea tlala bona.” (Exoda 1:7) Ho bapisoa ha lenane la Baiseraele ba ileng ba kena Egepeta le lenane la ba ileng ba tsoa ho hlahisa maikutlo a hore ka karolelano malapa a ne a e-na le bana ba leshome!
Hamorao, Jesu o ile a hōlela lelapeng leo ba bangata kajeno ba ka ’nang ba nahana hore le leholo. Jesu e ne e le letsibolo, empa Josefa le Maria ba ile ba ba le bara ba bang ba bane le barali ba itseng. (Matheu 13:54-56) Taba ea hore ba ne ba e-na le bana ba bangata e ka ’na ea hlalosa lebaka leo ka lona Maria le Josefa ba ileng ba tloha Jerusalema ba sa hlokomele hore Jesu ha a eo sehlopheng sa bona.—Luka 2:42-46.
Malapa a Maholo Kajeno
Kajeno, Bakreste ba bangata ba khetha ho lekanyetsa boholo ba malapa a bona ka lebaka la lithahasello tsa moea, maemo a moruo, maemo a bophelo le mabaka a mang. Leha ho le joalo, malapa a maholo a ntse a tloaelehile lichabeng tse ngata. Ho ea ka The State of the World’s Children 1997, sebaka se nang le bana ba bangata ka ho fetisisa ke Afrika e ka boroa ho Sahara. Moo, mosali ka ho tloaelehileng a bang le bana ba tšeletseng.
Ho batsoali ba Bakreste ba nang le malapa a maholo, ha ho bonolo ho hōlisa bana ba bona e le hore ba ka rata Jehova, empa ba bangata baa atleha. Katleho e itšetlehile ka ho kopana ha lelapa borapeling bo hloekileng. Mantsoe a moapostola Pauluse ho phutheho ea Korinthe a sebetsa ka tsela e tšoanang ho malapa a Bakreste kajeno. O ile a ngola: “Joale kea le eletsa, barab’eso, . . . hore kaofela le bue ka tumellano, le hore ho se ke ha e-ba le likarohano har’a lōna, empa hore le ka kopana ka ho loketseng kelellong e tšoanang le mokhoeng o tšoanang oa ho nahana.” (1 Bakorinthe 1:10) Kopano e joalo e ka finyelloa joang?
Batsoali e Lokela ho ba Batho ba Moea
Ntlha ea bohlokoa ke hore batsoali ba lokela ho inehela ka ho feletseng ho Molimo. Nahana ka seo Moshe a ileng a se bolella Baiseraele: “Utloa, Iseraele! Molimo oa rōna ke Jehova, Jehova a ’notši. Rata Jehova, Molimo oa hao, ka pelo ea hao eohle, le ka moea oa hao oohle, le ka matla a hao ’ohle. Litaelo tseo ke u laelang tsona kajeno, li be pelong ea hao. U tlo u li rute bana ba hao, ’me u bue ka tsona, ha u lutse tlung ea hao, leha u le tseleng u tsamaea, leha u ea robala, leha u tsoha.”—Deuteronoma 6:4-7.
Hlokomela hore Moshe o ile a bontša hore litaelo tsa Molimo li ne li lokela ho ba ‘ka lipelong’ tsa batsoali. Ke hona feela moo batsoali ba neng ba ka ba le tšekamelo ea ho ruta bana ba bona lintho tsa moea kamehla. Ha e le hantle, ha batsoali ba le matla moeeng, ba labalabela ho rupela bana ba bona ka lintho tsa moea.
Hore motho e be motho oa moea ’me a rate Jehova ka pelo eohle ea hae, ke habohlokoa ho bala, ho thuisa le ho sebelisa Lentsoe la Molimo kamehla. Mopesaleme o ile a ngola hore motho ea ithabelang molaong oa Jehova le ea o balang “motšehare le bosiu” o tla ba ‘joaloka sefate se hlomiloeng pel’a metsi a kollang, se behang litholoana tsa sona ka khoeli ea tsona, seo mahlaku a sona a sa foforeheng; see a se etsang kaofela sea mo atla.’—Pesaleme ea 1:2, 3.
Feela joalokaha sefate se beha litholoana tse ntle haeba se nosetsoa kamehla, ka ho tšoanang malapa a fepehileng hantle moeeng a beha litholoana tsa bomolimo, e leng ho rorisang Jehova. Mohlala oa sena ke lelapa la Uwadiegwu, ea phelang Afrika Bophirimela. Le hoja Uwadiegwu le mosali oa hae ba e-na le bana ba robeli, bobeli ba bona ba sebeletsa e le bo-pula-maliboho ba kamehla, kapa basebeletsi ba nako e tletseng ba Lipaki tsa Jehova. O re: “Lelapa la rōna le bile le thuto ea Bibele ea lelapa ea kamehla ka lilemo tse fetang 20. Re ’nile ra ruta bana Lentsoe la Molimo ho tloha boseeng, eseng feela nakong ea thuto ea lelapa empa le tšebeletsong le ka linako tse ling. Bana bohle ba rōna ke baboleli ba litaba tse molemo tsa ’Muso, ’me ke oa ho fela feela, ea lilemo li tšeletseng, ea e-song ho kolobetsoe.”
Ho Sebelisana ’Moho
Bibele e re: “Ntlo e hahuoa ka bohlale.” (Liproverbia 24:3) Ka lapeng, bohlale bo joalo bo hlahisa tšebelisano-’moho. “Motsamaisi” ka lapeng ke ntate; ke eena hlooho ea lelapa e khethiloeng ke Molimo. (1 Bakorinthe 11:3) Moapostola Pauluse ea bululetsoeng o ile a hatisa ho teba ha boikarabelo ba bohlooho ha a ne a ngola: “Haeba leha e le mang a sa lokisetse hore ho be le lintho tse hlokahalang [nameng le moeeng] bakeng sa bao e leng ba hae, ’me haholo-holo bakeng sa bao e leng litho tsa lelapa la hae, o latotse tumelo ’me o mobe ho feta motho ea se nang tumelo.”—1 Timothea 5:8.
Tumellanong le keletso ena e tsoang Lentsoeng la Molimo, banna ba Bakreste ba lokela ho hlokomela bomoea ba basali ba bona. Haeba basali ba imeloa ke mesebetsi ea lelapa, ba tla hula ka thata moeeng. Naheng e ’ngoe ea Afrika, Mokreste e mong ea sa tsoa kolobetsoa o ile a tletlebela baholo ba phutheho ka hore mosali oa hae o bonahala a hloka thahasello linthong tsa moea. Baholo ba ile ba eletsa ka hore mosali oa hae o hloka ho thusoa ka tsela e sebetsang. Kahoo, monna o ile a qala ho mo thusa ka mesebetsi ea lelapa. Hape a ipha nako ea ho mo thusa ho ntlafatsa tsebo ea hae ea ho bala le ea Bibele. Mosali o ile a ananela seo, ’me hona joale lelapa lohle le kopane tšebeletsong ea Molimo.
Bo-ntate ba boetse ba lokela ho ameha ka bomoea ba bana ba bona. Pauluse o ile a ngola: “Lōna, bo-ntate, le se ke la ba ba halefisang bana ba lōna, empa le tsoele pele ho ba hōlisa ka taeo le kelello e laoloang ke Jehova.” (Baefese 6:4) Ha batsoali ba ela hloko keletso ea hore ba se halefise bana ba bona, ’me ba latela tataiso ea ho ba koetlisa, bana ba ikutloa e le karolo ea tšebelisano-’moho ea lelapa. Ka hona, ho ka etsahala hore bana ba thusane le hona ho khothatsana hore ba finyelle lipakane tsa moea.
Tšebelisano-’moho e akarelletsa ho fa bana boikarabelo ba lintho tsa moea ha ba se ba le boemong ba ho bo jara. Ntate e mong eo e leng moholo oa Mokreste ea nang le bana ba 11, o tsoha esale ka matjeke ho khannela bana ba hae ba ’maloa thuto pele a e-ea mosebetsing. Ka mor’a hore ba baholo ba kolobetsoe, ba fapanyetsana ka ho thusa banab’abo bona ba banyenyane, e leng ho akarelletsang ho kopanela ho ba ruteng Bibele. Ntate o ntse a ba beha leihlo, a babatsa boiteko ba bona. Ba tšeletseng ba bana bao ba se ba kolobelitsoe, ’me ba bang ba tsoela pele ho sebeletsa pakane eo.
Puisano e Ntle, Lipakane Tse Tšoanang
Ntho ea bohlokoa ho malapa a kopaneng ke puisano e lerato le ho ba le lipakane tse tšoanang tsa moea. Gordon, moholo e mong oa Mokreste ea phelang Nigeria, ke ntate oa bana ba supileng ba lilemo tse lipakeng tsa 11 le 27. Ba tšeletseng ba bona ke bo-pula-maliboho ho tšoana le batsoali ba bona. Oa ho fela, ea sa tsoa kolobetsoa, o kopanela le ba bang bohle ba lelapa kamehla mosebetsing oa ho etsa barutuoa. Bara ba hae ba babeli ba baholo ke bahlanka ba sebeletsang ka phuthehong.
Gordon ka boeena o khannetse e mong le e mong oa bana ba hae thuto ea Bibele. Ntle ho moo, lelapa le na le lenaneo le akaretsang la thuto ea Bibele. Hoseng ho hong le ho hong le bokana ’moho ho hlahloba temana ea Bibele le ho lokisetsa liboka tsa phutheho.
E ’ngoe ea lipakane tseo setho se seng le se seng sa lelapa se e behetsoeng ke ho bala lihlooho tsohle tse hlahang makasineng ea Molula-Qhooa le ea Tsoha! Morao tjena, ba kenyellelitse le ’malo oa Bibele oa letsatsi le letsatsi kemisong ea bona. Ka ho bua ka seo ba se balileng, litho tsa lelapa li khothalletsana ho ntšetsa pele mokhoa ona.
Thuto ea lelapa ea Bibele ea beke le beke e tsitsitse hoo ho seng le ea mong ea hlokang hore a hopotsoe—bohle ba e lebella ka thabo. Ha lilemo li ntse li e-ea, boitsebiso, mokhoa le nako bakeng sa thuto ea lelapa li ile tsa ’na tsa fetoha ho ea ka lilemo le litlhoko tsa bana. Lelapa le tloaelane le bahlanka ba bang ba tšepahalang ba Molimo, ’me sena se bile le phello e molemong baneng.
E le lelapa, ba etsa lintho hammoho le ho behela ka thōko nako ea boikhathollo. Hang ka beke ba thabela “mantsiboea a lelapa,” ao ka ’ona ba botsanang lipotso, ba etsang metlae e tšehisang, ba bapalang piano, ba qoqelanang lipale le ho ikhatholla ka litsela tse ling. Ka linako tse ling, ba ea lebōpong la leoatle le libakeng tse ling tsa boikhathollo.
Ho Itšetleha ka Jehova
Ha ho le ea mong oa batho ba boletsoeng ka holimo ea bebofatsang bothata ba ho hōlisa lelapa le leholo. Mokreste e mong o ile a re: “Ke phephetso e khōlō ho ba ntate ea molemo ho bana ba robeli. Ho hlokahala lijo tse ngata tsa nama le tsa moea ho ba fepa; ke tlameha ho sebetsa ka thata ho fumana chelete e lekaneng ho ba phelisa. Bana ba baholo ba lilemo tse lipakeng tsa 13 le 19, ’me ba le robeli joalo ba kena sekolo. Kea tseba hore koetliso ea moea ke ea bohlokoa, empa bana ba bang ba ka ba manganga ba bile ha ba mamele. Ba nkutloisa bohloko, empa kea tseba hore le ’na ka linako tse ling ke etsa lintho tse utloisang Jehova bohloko, ’me oa ntšoarela. Ke kahoo ke lokelang ho tsoela pele ke khalemela bana ba ka ka mamello ho fihlela ba iphumana.
“Ke leka ho latela mohlala oa Jehova oa ho re mamella hobane a lakatsa hore bohle re finyelle pakong. Ke ithuta le lelapa la ka, ’me ba bang ba bana ba ka ba sebeletsa ho finyella pakane ea kolobetso. Ha ke itšetlehe ka matla a ka hore ke finyelle katleho; matla a ka a ka finyella ho fokolang feela. Ke leka ka matla ho ba haufi le Jehova ka thapelo le ho sebelisa maele a reng: ‘U tšepe Jehova ka pelo ea hao eohle, u se ke ua itšepa hlalefo ea hao. U mo kenye mererong ea hao eohle, ’me o tla u tsamaisa litseleng tsohle tsa hao.’ Jehova o tla nthusa ho atleha koetlisong ea bana ba ka.”—Liproverbia 3:5, 6.
U se ke ua Tela le ka Mohla!
Ka linako tse ling ho koetlisa bana ho ka ’na ha bonahala eka ke mosebetsi oo ho se nang teboho ho oona, empa u se ke ua tela! Tsoela pele! Le haeba bana ba hao ba sa arabele hantle kapa ba sa bontše ho ananela boiteko boo u bo etsang hona joale, mohlomong hamorao ba tla bo ananela. Ho nka nako hore ngoana a hōle ho ba Mokreste ea behang litholoana tsa moea.—Bagalata 5:22, 23.
Monica, ea lulang Kenya, ke e mong oa bana ba leshome. O re: “Batsoali ba ka ba ile ba re ruta ’nete ea Bibele ho tloha boseeng. Ntate o ne a ithuta lingoliloeng tsa Bokreste le rōna beke e ’ngoe le e ’ngoe. Ka lebaka la mosebetsi oa hae, thuto e ne e sa tšoaroe ka letsatsi le tšoanang, kamehla. Ka linako tse ling, ha a tsoa mosebetsing, a re bona re ntse re bapala ka ntle o ne a ee a re bolelle hore ka mor’a metsotso e mehlano re kene ka tlung ho tla tšoara thuto ea rōna ea Bibele. Ka mor’a thuto ea rōna ea Bibele, re ne re khothalletsoa ho botsa lipotso kapa ho tšohla bothata leha e le bofe boo re nang le bona.
“O ne a netefatsa hore re tloaelana le bana ba tšabang Molimo. Ntate o ne a tloaetse ho etela sekolong ho ea botsa matichere ka boitšoaro ba rōna. Ketelong e ’ngoe o ile a utloa ho thoe bo-abuti ba ka ba bararo ba ile ba loana le bashemane ba bang le hore ka linako tse ling ha ba hlomphe. Ntate o ile a ba fa kotlo ka lebaka la ho tsoa tseleng ha bona, empa a boela a ipha nako ea ho ba hlalosetsa lebaka la Mangolo leo ka lona ba lokelang ho itšoara ka tsela ea bomolimo.
“Batsoali ba rōna ba ile ba re bontša bohlokoa ba ho ba teng libokeng ka ho re thusa ho lokisetsa liboka. Re ile ra koetlisetsoa ho ba basebeletsi ka ho ba le mananeo a boitlhakiso lapeng. Ho tloha boseeng re ile ra tsamaea le batsoali ba rōna tšebeletsong ea tšimo.
“Hona joale, bo-abuti ba ka ba babeli ke bo-pula-maliboho ba khethehileng, moen’a ka e mong ke pula-maliboho oa kamehla, ’me ausi oa ka ea nyetsoeng ea nang le lelapa, ke Paki e chesehang. Baena ba ka ba bang ba babeli, e mong o lilemo li 18 ’me e mong li 16, ke bahoeletsi ba kolobelitsoeng. Ba banyenyane babeli ba bashemane ba ntse ba koetlisoa. Ke se ke qetile lilemo tse tharo ke sebetsa ofising ea lekala ea Lipaki tsa Jehova e Kenya. Ke rata batsoali ba ka ’me kea ba ananela hobane ke batho ba moea; ba re behela mohlala o motle.”
Ho sa tsotellehe hore na u na le bana ba bakae, le ka mohla u se ke ua tela ho ba thusa ho tsamaea tseleng e isang bophelong bo sa feleng. Ha Jehova a ntse a hlohonolofatsa boiteko ba hao, u tla pheta mantsoe a moapostola Johanne ka bana ba hae ba moea: “Ha ke na lebaka le leholoanyane la ho leboha ho feta lintho tsena, hore ebe ke utloa hore bana ba ka ba tsoela pele ho tsamaea ’neteng.”—3 Johanne 4.