Phutheho ea Bokreste—Mohloli oa Thuso e Matlafatsang

MOROETSANA e mong ea lilemong tse qalang tsa bo-20 ea bitsoang Popi, o ne a ferekane haholo ka lebaka la boemo bo bohloko ba lelapa labo mabapi le ho haella ha puisano e bulehileng lipakeng tsa hae le batsoali ba hae.a Ka mor’a hore a tšollele pelo ea hae ho moholo e mong oa Mokreste le mosali oa hae, o ile a ba ngolla: “Ke leboha haholo ha le ile la ipha nako ea ho bua le ’na. Ha le tsebe hore na ho bolela ho hoholo hakaakang ho ’na ho bona hore lea tsotella. Ke leboha Jehova ka ho mpha batho bao nka ba tšepang le bao nka buang le bona.”

Toula, mosali eo e sa tsoa ba mohlolohali ka bana ba babeli ba lilemong tsa bocha, o ile a iphumana a tetebetse mathateng a sithabetsang a maikutlo le a lichelete. Eena le bana ba hae ba ne ba lula ba fumana liketelo tse matlafatsang tsa lelapa le leng la Bakreste ka phuthehong. Ka mor’a hore a sebetsane le boemo boo ba hae ka katleho, o ile a ba romela karete, a itse: “Ke lula ke le hopola lithapelong tsa ka. Ke hopola makhetlo a mangata ao le ileng la nthusa ka ’ona le ho ntšehetsa.”

Na ka linako tse ling u ikutloa u ‘imetsoe’ ke likhatello tse eketsehang tsa lefatše lee? (Matheu 11:28) Na “nako le ketsahalo e sa lebelloang” li sentse bophelo ba hao ka liphihlelo tse bohloko? (Moeklesia 9:11) Joale ha u mong. Ho e-na le hoo, joalokaha ba likete ba sithabetseng ba se ba fumane, le uena u ka fumana thuso e molemo ka phuthehong ea Bokreste ea Lipaki tsa Jehova. Lekholong la pele la lilemo C.E., moapostola Pauluse o ile a fumana hore ka ho khetheha, balumeli ba bang ’moho le eena e ne e le “thuso e matlafatsang” ho eena. (Bakolose 4:10, 11) U ka ba le phihlelo e tšoanang.

Tšehetso le Thuso

Mangolong a Segerike a Bakreste, lentsoe “phutheho” le fetoletsoe ho tsoa lentsoeng la Segerike ek·kle·siʹa, le bolelang sehlopha sa batho ba bokaneng hammoho. Motheo oa lentsoe leo ke khopolo ea bonngoe le ho tšehetsana.

Phutheho ea Bokreste e emela ’nete ea Lentsoe la Molimo ’me e phatlalatsa litaba tse molemo tsa ’Muso oa hae. (1 Timothea 3:15; 1 Petrose 2:9) Leha ho le joalo, phutheho le eona e boetse e tšehetsa le ho thusa ba kopanelang ho eona. Ka hare ho eona, motho a ka fumana sehlopha sa metsoalle e lerato, e tsotellang le e hlokomelang, e loketseng le e ikemiselitseng ho thusa le ho tšelisa ba bang linakong tseo ba sithabetseng ka tsona.—2 Bakorinthe 7:5-7.

Kamehla, barapeli ba Jehova ba ’nile ba fumana poloko le tšireletso ka phuthehong ea hae. Mopesaleme o ile a bontša hore o ne a fumana thabo le boikutlo ba tšireletseho har’a batho ba phuthehileng ba Molimo. (Pesaleme ea 27:4, 5; 55:14; 122:1) Ka ho tšoanang kajeno, phutheho ea Bokreste ke mokhatlo oa balumeli-’moho ba hahanang le ba khothatsanang.—Liproverbia 13:20; Baroma 1:11, 12.

Litho tsa phutheho li rutoa hore li ‘sebetse se molemo ho bohle, empa haholo-holo ho ba amanang le tsona tumelong.’ (Bagalata 6:10) Thuto e thehiloeng Bibeleng eo li e fumanang e li susumelletsa hore li bontšane lerato la bana ba motho le kameho e mofuthu. (Baroma 12:10; 1 Petrose 3:8) Bara le barali babo rōna ba moea ka phuthehong ba susumelletseha ho ba mosa, ho ba le khotso le ho ba le qenehelo e nahanelang. (Baefese 4:3) Ho e-na le ho ba barapeli feela ba tloaelehileng, ba bontša kameho e lerato bakeng sa ba bang.—Jakobo 1:27.

Ka hona, ba hatellehileng ba fumana sebaka se mofuthu se kang tikoloho ea lelapa ka phuthehong. (Mareka 10:29, 30) Boikutlo ba ho ba har’a sehlopha se momahaneng le se lerato joalo hoa ba matlafatsa. (Pesaleme ea 133:1-3) Ka phutheho, “lekhoba le tšepahalang le le masene” le fana ka ‘lijo tse hahang tsa moea ka nako e tšoanetseng.’—Matheu 24:45.

Thuso e Tsoang ho Balebeli ba Lerato

Litho tsa phutheho ea Bokreste li ka lebella ho fumana ka hare ho eona balisa ba lerato, ba utloisisang le ba tšoanelehang ba fanang ka tšehetso le khothatso ea moea. Balisa ba nang le litšoaneleho tseo ba joaloka “tšireletso ha moea o foka, joalo ka lehaha ha sefefo se e-tla.” (Esaia 32:1, 2) Baholo ba khethiloeng ke moea, kapa balebeli, ba hlokomela batho ba Molimo ba kang linku, ba khothatsa ba kulang le ba tepeletseng maikutlo, ’me ba batla ho lokisa ba fositseng.—Pesaleme ea 100:3; 1 Petrose 5:2, 3.

Ke ’nete hore sehlopha sa baholo ba phutheho hase basebetsi ba litsebo tse itseng tsa phekolo kapa lingaka tsa bophelo, tse khonang ho phekola mathata a bophelo a ’mele kapa a kelello ao balumeli-’moho le sona ba tobanang le ’ona. Tsamaisong ena ea lintho, ba kulang ba ntse ba ‘hloka ngaka.’ (Luka 5:31) Leha ho le joalo, balisa ba joalo ba ka thusa ba hlokang moeeng. (Jakobo 5:14, 15) Kae le kae moo ho khonehang, baholo ba boetse ba lokisetsa ho fana ka lithuso tse ling.—Jakobo 2:15, 16.

Ke mang ea tšehetsang tokisetso e lerato joalo? Ke Jehova Molimo ka boeena! Moprofeta Ezekiele o hlalosa ha Jehova a re: “Ke tla batla linku tsa ka ’me ke li hlokomele. . . . Ke tla li lopolla libakeng tsohle tseo li hasantsoeng ho tsona . . . Ke tla fepa linku tsa ka, ’me ke tla li bothisa.” Molimo o boetse o amehile ka linku tse tšeremang le tse fokolang.—Ezekiele 34:11, 12, 15, 16, NW.

Thuso ea Sebele ka Nako e Tšoanelehang

Na ruri thuso ea sebele e teng ka phuthehong ea Bokreste? E, ’me mehlala e latelang e bontša maemo a fapa-fapaneng ao ho ’ona phutheho e ipakang e le thuso ho ’ona.

◆ Ho lahleheloa ke moratuoa. Monna oa Anna o ile a shoa ka mor’a ho kula lefu le sa foleng. O re: “Ka mor’a moo, ke ’nile ka fumana lerato le mofuthu mokhatlong oa bara ba motho oa Bokreste. Mantsoe a mosa a tšehetso le khothatso ao balumeli-’moho le ’na ba lulang ba mpolella ’ona, ho kopanyelletsa le ho nkopa ha bona ka matsoho ho tsoang botebong ba pelo, li ’nile tsa ’matlafatsa ho e-na le hore ke ikutloe ke tepeletse maikutlo ka ho feletseng, ’me ke leboha Jehova. Lerato la bona le entse hore ke ikutloe ke tšehelitsoe haholo, ke phahamisitsoe qetellong ’me ke hlokometsoe ka mofuthu.” Le uena e ka ’na eaba u bile le phihlelo ena e sithabetsang ea ho lahleheloa ke moratuoa oa hao ka lefu. Linakong tse joalo, litho tsa phutheho li ka fana ka matšeliso a hlokahalang haholo le tšehetso ea maikutlo.

◆ Ho kula. Arthur, molebeli ea tsamaeang oa Poland, o lula a etela liphutheho tsa Central Asia bakeng sa ho li matlafatsa moeeng. Ka lekhetlo le leng la liketelo tsena, o ile a kula haholo ’me a thulana le bothata bo tebileng ba ho fola. Arthur o hopola ka kananelo e tebileng: “Ke rata ho le bolella kamoo bara le barali beso [ba motseng oa Kazakhstan] ba ileng ba ntlhokomela kateng. Bara le barali beso, bao boholo ba bona ke sa ba tsebeng—esita le ba thahasellang—ba ile ba mpha chelete, lijo le meriana. . . . ’Me ba ile ba etsa joalo ka thabo e khōlō.

“Inahanele kamoo ke ileng ka ikutloa kateng ha ke fumana enfelopo e nang le chelete le lengolo le latelang: ‘Mor’eso ea ratehang, ke u lumelisa ka mofuthu. ’Mè o ile a mpha chelete ea ice cream, empa ke ile ka etsa qeto ea hore ke u fe eona hore u reke moriana ka eona. E se eka u ka fola. Jehova o batla hore re phele nako e telele. E se eka lintho li ka u tsamaela hantle. Hape u re bolelle lipale tse eketsehileng tse monate, tse rutang. Vova.’” E, joalokaha mohlala ona o bontšitse, ba banyenyane le ba baholo ka phuthehong ba ka fana ka thuso e matlafatsang nakong eo motho a kulang.—Bafilippi 2:25-29.

◆ Khatello ea maikutlo. Teri o ne a e-na le takatso e matla ea ho sebeletsa e le pula-maliboho, kapa ’moleli oa ’Muso oa nako e tletseng. Leha ho le joalo, ka lebaka la mathata, o ile a tlameha ho khaotsa ho bula maliboho. O re: “Ke ile ka ikutloa ke le molato haholo ka ho leka ho sebeletsa boemong bona, ebe ke hlōleha feela le ho qeta selemo.” Teri o ne a e-na le maikutlo a fosahetseng a hore kamohelo ea Jehova e itšetlehile fela ka tekanyo ea tšebeletso ea hae ho eena. (Bapisa le Mareka 12:41-44.) A nyahame haholo, o ile a ikarola. Empa leha ho le joalo, thuso e khathollang e ile ea hlaha ka phuthehong.

Teri oa hopola: “Morali’abo rōna ea seng a hōlile o ile a nthusa ’me a ’mamela ha ke tšollela maikutlo a ka ho eena. Ha ke tloha ha hae, ke ile ka utloa eka ke imolotsoe boima bo itseng. Ho tloha ka nako eo ho ea pele, morali enoa oeso, le monna oa hae eo e leng moholo ka phuthehong, ba ’nile ba mpha thuso ea bohlokoa. Ke ne ke fumana thelefono e tsoang ho bona kamehla ba mpotsa hore na ke ea joang. . . . Ka linako tse ling ba ne ba ntumella hore ke be le bona thutong ea bona ea lelapa, e leng ntho e hatisitseng ka ho ’na bohlokoa ba malapa a lulang a momahane.”

Ke ntho e tloaelehileng ho ba bangata—esita le ho Bakreste ba inehetseng—hore ba tepelle maikutlo, ba nyahame le ho ba bolutung. Re ka thaba hakaakang hore ebe ka phuthehong ea Molimo ho na le thuso e lerato, e se nang boithati!—1 Bathesalonika 5:14.

◆ Likoluoa le likotsi. Ipehe boemong ba lelapa la batho ba bane ba ileng ba lahleheloa ke thepa eohle ea bona ha ntlo ea bona e e-cha. Ka potlako, ba ile ba e-ba le seo ba se bitsang “phihlelo e khothatsang e tla lula e ba ama maikutlo le e ileng ea lula likelellong tsa bona ea lerato la ’nete har’a batho ba Jehova.” Baa hlalosa: “Kapelenyana, re ile ra hlolloa ke lithelefono tse se nang boikaketsi tseo re neng re li fumana tsa bara le barali babo rōna ba moea tse neng li re tšehetsa le ho re utloela bohloko. Thelefono e ne e lla nako le nako. Kameho ea sebele ea e mong le e mong le lerato la bona li ile tsa re ama hoo re ileng ra llisoa ke ho ananela.”

Kapelenyana, baholo ba phutheho ba ile ba hlophisa sehlopha se seholo sa barab’abo rōna, ’me ka matsatsi a ’maloa, ba ile ba hahela lelapa lena ntlo e ncha. Moahisani e mong o ile a khotsa: “U lokela ho iponela! Batho ba sebetsang moo ke ba mefuta eohle—banna, basali, batho ba batšo le Maspanishe!” Bona e bile bopaki bo hlakileng ba lerato la bara ba motho.—Johanne 13:35.

Bakreste-’moho ba ile ba boela ba fa lelapa leo liaparo, lijo le chelete. Ntate oa lelapa leo o re: “Sena se etsahetse nakong ea Keresemese eo ka eona motho e mong le e mong a fanang ka limpho, empa ka sebele re ka re ha ho na motho ea ileng a fuoa ka tsela e bulehileng ea pelo eohle le e hlollang, joalo ka rōna.” ’Me baa phaella: “Mehopolo ea mollo oo e ea e fela ’me e nkeloa sebaka ke mehopolo e ratehang ea liketso tse mosa le metsoalle e molemo. Liteboho tsa rōna re li lebisa ho Ntate oa rōna ea lerato oa leholimo, Jehova, ka hore ebe re na le lelapa la bara ba motho ba tsotehang le ba momahaneng hakana lefatšeng, ’me re thabela hore ebe re karolo ea lona haholo!”

Ho hlakile hore ho kenella ho joalo hase ntho e ka etsahalang, kapa ea lebelloa tlokotsing e ’ngoe le e ’ngoe. Empa ketsahalo ena ka sebele e re etsetsa mohlala oa tšehetso eo phutheho e ka fanang ka eona.

Bohlale bo Tsoang Holimo

Ba bangata ba fumane mohloli o mong oa thuso le oa matla ka phuthehong ea Bokreste. Ke ofe? Lingoliloeng tse hlophisoang ke “lekhoba le tšepahalang le le masene.” Tse hlaheletseng har’a tsona ke likoranta tsa Molula-Qhooa le Tsoha! E le hore li fane ka keletso e nang le temoho le tataiso e sebetsang, lingoliloeng tsena li itšetlehile ka ho feletseng bohlaleng ba bomolimo bo fumanoang ka Bibeleng. (Pesaleme ea 119:105) Boitsebiso ba Mangolo bo tlatseletsoa ka lipatlisiso tse tšepahalang le tse amohelehang litabeng tse kang tsa khatello ea maikutlo, ho hlaphoheloa ka mor’a ho hlekefetsoa, mathata a sa tšoaneng a maemo a bophelo le a moruo, liphephetso tse tobaneng le bacha le mathata a ikhethang a linaheng tse hōlang moruong. Ka holimo ho tsohle, lingoliloeng tsena li phahamisa tsela ea Molimo e le eona tsela e molemo ka ho fetisisa ea bophelo.—Esaia 30:20, 21.

Selemo se seng le se seng, Mokhatlo oa Watch Tower o fumana mangolo a likete a kananelo. Ka mohlala, mabapi le Tsoha! e neng e bua ka ho ipolaea, mohlankana e mong oa Russia o ile a ngola: “Ka lebaka la tšekamelo ea ka ea ho hatelleha maikutlong, . . . ke ’nile ka nahana ho ipolaea ka makhetlo a mangata. Sehlooho sena se matlafalitse tumelo ea ka ea hore Molimo o tla nthusa hore ke sebetsane le mathata a ka. O batla ke phele. Kea mo leboha ka tšehetso ea hae eo a faneng ka eona ka sehlooho sena.”

Haeba mathata a sa khaotseng a lefatše lena a bonahala a le mabifi hore u ka sebetsana le ’ona, u ka kholiseha hore ho na le sebaka se sireletsehileng ka phuthehong ea Bokreste. Ka sebele, haeba lehoatata le omeletseng la tsamaiso ena e se nang lerato le u qeta matla, u ka fumana setšabelo se tla u fa matla hape mokhatlong oa Jehova. Ka mor’a ho ba le tšehetso e joalo, le uena u ka pheta mantsoe a mosali e mong oa Mokreste ea ileng a sebetsana ka katleho le bokuli bo tebileng ba monna oa hae ’me a ngola: “Ka lebaka la lerato le tlhokomelo tseo re li bontšoang, ke utloa eka Jehova o re tataisitse ka seatla sa hae bothateng bona. Ke leboha hakaakang hore ebe ke karolo ea mokhatlo o hlollang oa Jehova!”

[Mongolo o botlaaseng ba leqephe]

[Litšoantšo tse leqepheng la 26]

Re ka fana ka thuso e matlafatsang ho ba kulang, ba shoetsoeng le ba bang