Ho Fokotsa Tlokotsi ea ho se Leka-lekane

Haufinyane ’Mōpi o tla tlisa ho leka-lekana hoo batho ba ho labalabelang. Ho fihlela seo se etsahala, bonyane re ka nka mehato ea ho fokotsa tlokotsi ea ho se leka-lekane e amang rōna le malapa a rōna. Joalokaha Nelson Mandela, eo e kileng ea e-ba mopresidente oa Afrika Boroa, a hlokometse, “se etsang hore motho e mong a fapane le e mong, ke seo a se etsang ka seo a nang le sona, eseng seo a se fuoang.”

HISTORI e netefatsa mantsoe ao a hae. Ho na le banna le basali ba bangata bao eitseng ha ba hlaha ba ileng ba fuoa ho fokolang, empa ka hore ba sebelise seo ba neng ba e-na le sona, ba ileng ba finyella katleho e entseng hore ba fapane le lithaka tsa bona tseo mohlomong li neng li filoe ho hongata ha li hlaha. Ka lehlakoreng le leng, batho ba bang ba neng ba hlohonolofalitsoe ka melemo e itseng ha ba hlaha, ba sentse seo ba neng ba e-na le sona ’me ba hlōleha ho se sebelisa hamolemo kamoo ba neng ba ka khona.

Sebelisa Seo U Nang le Sona Hamolemo!

Lipaki tsa Jehova li thahasella haholo ho thusa batho hore ba fumane tsebo ka merero ea Molimo ka thuto ea Bibele. Leha ho le joalo, lia hlokomela hore, hore ba fumane molemo ka botlalo boitsebisong ba Bibele, batho ba lokela ho tseba ho bala le ho ngola. Ka lebaka leo, Lipaki tsa Jehova li rutile batho ba likete tse mashome ho bala le ho ngola, ho akarelletsa le batho ba 23 000 (ho tloha bohareng ba lilemo tsa bo-1990) naheng e ’ngoe ea Afrika Bophirimela feela. Ha e bua ka tšebeletso e hlaheletseng eo Lipaki tsa Jehova li fanang ka eona sechabeng, San Francisco Examiner e itse: “U ka li talima e le baahi ba behang mohlala. Li lefa makhetho ka khothalo, li hlokomela bakuli, li loantša ho se tsebe ho bala le ho ngola.”

Ho phaella moo, ka thupelo e tsoelang pele ea ho bua phatlalatsa, Lipaki tsa Jehova li koetlisitse batho ba makholo a likete hore ba fetohe libui tse tšoanelehang, tse khonang ho itlhalosa ka bolokolohi phatlalatsa. Har’a bana ba likete ho na le ba bang bao pele ba neng ba e-na le mathata a tebileng a ho bua. Nahana ka monna e mong oa Afrika Boroa ea ngolang tjena: “Ho hoeleketsa ha ka ho ne ho le matla hoo ke neng ke fetohile motho ea itholetseng, hangata ke itšetlehile ka ba bang hore ba mpuelle. . . . Eitse ha ke kopanela Sekolong sa Tšebeletso sa Puso ea Molimo ’me ke lokela ho etsa ’malo oa Bibele ka pel’a bamameli ba seng bakae . . . , ke ile ka hoeleketsa ka matla hoo ke sa kang ka khona ho qeta kabelo eo ka nako e behiloeng. Ka mor’a seboka, ka mosa [moeletsi] o ile a mpha keletso e sebetsang. O ile a etsa tlhahiso ea hore ke ikoetlise ka ho ipalla ka lentsoe le phahameng. Ke ile ka etsa joalo, letsatsi le letsatsi ke qeta nako ke bala Bibele ea ka le makasine ea Molula-Qhooa.” Monna enoa o ile a tsoela pele hantle hoo hona joale a fanang ka lipuo tsa phatlalatsa ho bamameli ba makholo-kholo, esita le ba likete.

Ho Thabela ho Leka-lekana Har’a Barab’abo Rōna

Maemo a fapana haholo har’a Lipaki tsa Jehova mabapi le thuto, tlhokomelo ea bophelo, boemo ba lichelete le boemo sechabeng. Phapang ena e mpa feela e bontša maemo a sa phethahalang a lefatše leo li phelang ho lona. Empa ho fapana le lihlopha tse ling tsa malumeli, khethollo ea morabe, ea boemo sechabeng le licheleteng e batla e ntšitsoe ka metso har’a tsona.

Li finyelletse sena ka hore li etse sohle se matleng a tsona ho sebelisa seo li ithutang sona Bibeleng. Ka lipelo tsohle, li amohela melao-motheo ea Bibele e kang ena: “Jehova ha a bone kamoo motho a bonang kateng; hobane motho o talima tšobotsi, empa Jehova eena o talima pelo.” (1 Samuele 16:7) “Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.” (Liketso 10:34, 35) “Le se ke la busetsa bobe ka bobe ho mang kapa mang. Lokisetsang hore ho be le lintho tse ntle mahlong a batho bohle. Haeba ho khoneha, ho fihlela moo ho itšetlehileng ka lōna, le be le khotso le batho bohle.”—Baroma 12:17, 18; bona le 1 Timothea 6:17-19; Jakobo 2:5, 9.

Kaha li khomarela melao-motheo ena ea Bibele e khothalletsang bonngoe, Lipaki tsa Jehova ha li lumelle tšebeliso leha e le efe ea ho se leka-lekane ho itšetlehileng ka morabe, boemo sechabeng kapa ho fapana ka maemo a lichelete har’a tsona. Ka mohlala, maemo ana ha a phethe karolo ea letho ha ho etsoa qeto ea hore na ke mang ea fuoang litokelo tsa tšebeletso ka phuthehong ea Bokreste. Maemo a boikarabelo, a kang a ho ruta le bolebeli, a fanoa feela motheong oa hore na motho o na le litšoaneleho tsa moea.—1 Timothea 3:1-13; Tite 1:5-9.

Ho batho ba ’nileng ba utloisoa bohloko ke ho se leka-lekane lefatšeng lena le leeme, ke ho khathollang hakaakang hore ba bang ba ba tšoare hantle e le bara le barab’abo bona ba nang le boemo bo lekanang ka pel’a ’Mōpi oa bona! Martina a ka netefatsa sena. Ka mor’a hore ntat’ae a siee lelapa, o ile a hōlisetsoa lelapeng le futsanehileng la motsoali a le mong. Hangata o ne a tšoaroa joaloka molahloa sechabeng, a sa itšepe hakaalo ’me o ne a thatafalloa ke ho phelisana le batho ba bang. O ile a ba le boikutlo ba ho se tsotelle. Leha ho le joalo, lintho li ile tsa fetoha ka mor’a hore a qale ho ithuta Bibele le ho ba e mong oa Lipaki tsa Jehova. O re: “Ke ntse ke tlameha ho loantša monahano o mobe, empa hona joale ke khona ho sebetsana le bothata boo hamolemo. Boitlhompho ba ka bo ntlafetse, ’me ke se ke bua ka kholiseho e khōloanyane. ’Nete e entse hore ke ikutloe ke e-na le boikarabello. Hona joale kea tseba hore Jehova oa nthata le hore ehlile ho phela ho monate.”

E le sehlopha sa machaba sa Bakreste, Lipaki tsa Jehova tse linaheng tse fetang 230 li thabela ho leka-lekana ka tekanyo eo ruri e ikhethang lefatšeng la kajeno. Na mokhatlo leha e le ofe o mong oa bolumeli o ka bolela seo ’me oa se tšehetsa ka linnete?

Ho hlakile hore Lipaki tsa Jehova li talima lintho ka tsela ea sebele. Ntle ho tikatiko lia lumela hore kaha li hlahetse boemong ba ho se phethahale, li ke ke tsa khona ho felisa ho se leka-lekane ha batho ka ho feletseng ho feta ba bang bao ka makholo a lilemo ba ’nileng ba leka ho etsa joalo—’me ba hlōleha. Leha ho le joalo, lia thaba hore ebe har’a tsona, li entse ho hoholo ho fokotsa tlokotsi ena e kotsi haholo. Kaha li na le tumelo e matla tšepisong ea Molimo, li lebeletse lefatše le lecha la ho loka moo ho se leka-lekane e tla ba ntho ea nako e fetileng ka ho sa feleng.

E, haufinyane batho bohle ba mamelang ba tla khutlisetsoa moo ba lekanang ‘ka seriti le litokelo’ tseo ’Mōpi oa bona a neng a rerile hore ba li thabele qalong. Eo ke khopolo e ntle hakaakang! ’Me lekhetlong lena e tla hle e phethahale!

[Setšoantšo se leqepheng la 7]

Lipaki tsa Jehova li loantša ho se tsebe ho bala le ho ngola ka ho ruta batho ba mashome a likete ho bala le ho ngola

[Setšoantšo se leqepheng la 8]

’Nete ea Bibele ea thusa hore ho ntšoe ka metso khethollo ea morabe, ea boemo sechabeng le licheleteng