Na re Kulisoa ke Diabolose?

BOLOETSE BO NE BO SA LOKELA HO BA TENG HO HANG. Molimo o ne a re bōpetse hore re phele ka ho sa feleng re e-na le bophelo bo phethahetseng. Ke Satane, sebōpuoa sa moea, ea ileng a baka boloetse, bohloko le lefu bakeng sa ho hlokofatsa lelapa la motho ha a ne a etsa hore batsoali ba rōna ba pele, Adama le Eva, ba etse sebe.—GENESE 3:1-5, 17-19; BAROMA 5:12.

NA SEE se bolela hore boloetse bo bong le bo bong bo ba teng ka lebaka la ho kenella ha meea ka ho toba? Joalokaha re bone sehloohong se tlileng pele ho sena, ba bangata ba nahana joalo. Nkhono oa Owmadji e monyenyane o ne a nahana joalo. Empa na letšollo la Owmadji—boloetse boo ka linako tse ling bo bolaeang bana banyenyane linaheng tse chesang tse mongobo—le ne le hlile le bakiloe ke meea e sa bonahaleng?

Karolo eo Satane a e Phethang

Bibele e araba potso ena ka tsela e hlakileng haholo. Taba ea pele, e bontša hore meea ea baholo-holo ba rōna e ke ke ea ama batho ba phelang. Ha batho ba e-shoa, “ha ba tsebe letho leha le le leng.” Ha ba na meea e pholohang lefu. Ba robetse mabitleng, moo ho se nang “mosebetsi, leha e le morero kapa tsebo, kapa bohlale.” (Moeklesia 9:5, 10) Ho hang bafu ba ke ke ba kulisa batho ba phelang!

Leha ho le joalo, Bibele e senola hore ehlile meea e khopo e teng. Lerabele la pele bokahohleng bohle ke sebōpuoa sa moea seo hona joale se tsejoang e le Satane. Libōpuoa tse ling li ile tsa ikopanya le eena ’me tsa bitsoa bademona. Na Satane le bademona ba ka baka boloetse? Ho se ho hlile ho etsahetse joalo. Mehlolo e meng ea Jesu ea ho folisa e ne e akarelletsa ho leleka bademona. (Luka 9:37-43; 13:10-16) Leha ho le joalo boholo ba seo Jesu a ileng a se phekola e ne e se boloetse bo bakiloeng ke bademona ka ho toba. (Matheu 12:15; 14:14; 19:2) Ka ho tšoanang le kajeno, ka kakaretso, boloetse bo bakoa ke lisosa tsa tlhaho, eseng lintho tse phahametseng tlhaho.

Ho thoe’ng ka boloi? Liproverbia 18:10 ea re tiisetsa: “Lebitso la Jehova ke qhobosheane e thata; ea lokileng o balehela ho eona, ’me o lula phahameng.” Jakobo 4:7 e re: “Le hanyetse Diabolose, ’me o tla le balehela.” E, Molimo a ka sireletsa batho ba hae ba tšepahalang boloing le matleng leha e le afe a mang a phahametseng tlhaho. Ona ke mohopolo o mong o boleloang ke mantsoe a Jesu: “’Nete e tla le lokolla.”—Johanne 8:32.

Ba bang ba ka ’na ba botsa, ‘Empa ho thoe’ng ka Jobo? Na hase moea o khopo o ileng oa mo kulisa?’ E, Bibele e bolela hore boloetse ba Jobo bo ne bo bakiloe ke Satane. Empa taba ea Jobo e ne e le mokhelo. Ka nako e telele Jobo o ne a ntse a sirelelitsoe ke Molimo tlhaselong ea bademona. Eaba Satane o phephetsa Jehova hore a hlasele Jobo, ’me kaha ho ne ho ameha litseko tse khōlō, ka tekanyo e itseng Jehova o ile a tlosa tšireletso ea hae ho morapeli oa hae tabeng ena.

Leha ho le joalo, Molimo o ile a beha meeli. Ha a ne a lumella Satane hore a hlokofatse Jobo, Satane o ne a ka kulisa Jobo ka nakoana, empa o ne a ke ke a mo bolaea. (Jobo 2:5, 6) Qetellong, mahlomola a Jobo a ile a fela, ’me Jehova a mo putsa ka ho enneng bakeng sa botšepehi ba hae. (Jobo 42:10-17) Melao-motheo e bonahalitsoeng ke botšepehi ba Jobo e tlalehiloe khale ka Bibeleng ’me e totobetse ho bohle. Ha ho sa hlokahala teko e joalo e ’ngoe.

Satane o Sebetsa Joang?

Hoo e batlang e le ketsahalong e ’ngoe le e ’ngoe, kamano feela e teng pakeng tsa Satane le ho kula ha batho ke taba ea hore ebe Satane o ile a leka banyalani ba pele ba batho, ’me ba oela sebeng. Eena le bademona ba hae hase bona ba bakang boloetse bo bong le bo bong ka ho toba. Leha ho le joalo, ehlile Satane o leka ho re susumelletsa hore re etse liqeto tse booatla ’me re sekisetse tumelo ea rōna, e leng ho ka ’nang ha fella ka ho re ntša kotsi bophelong. Ha aa ka a loea, a bolaea, kapa a betsa Adama le Eva ka boloetse bo itseng. O ile a susumetsa Eva hore a se ke a utloa Molimo, ’me Adama o ile a mo latela tseleng ea hae ea ho hloka kutlo. Ho kula le lefu e ne e le karolo ea liphello.—Baroma 5:19.

Moprofeta ea sa tšepahaleng ea bitsoang Balaame o kile a hiroa ke morena oa Moabe hore a rohake sechaba sa Iseraele, se neng se hlomme liahelo meeling ea Moabe ka tsela e tšosang. Balaame o ile a leka ho rohaka Iseraele, empa a hlōleha hobane sechaba seo se ne se sirelelitsoe ke Jehova. Joale Bamoabe ba rera ho hohela Baiseraele hore ba rapele litšoantšo le ho etsa boitšoaro bo bobe ba botona le botšehali. Leqheka lena le ile la atleha, ’me Jehova ha aa ka hlola a sireletsa Iseraele.—Numere 22:5, 6, 12, 35; 24:10; 25:1-9; Tšenolo 2:14.

Re ka ithuta thuto ea bohlokoa ketsahalong eo ea boholo-holo. Barapeli ba tšepahalang ba Molimo ba sireletsoa ka thuso ea bomolimo tlhaselong e tobileng ea meea e khopo. Leha ho le joalo, Satane a ka ’na a leka ho etsa hore batho ka bomong ba sekisetse tumelo ea bona. A ka ’na a leka ho ba hohela hore ba etse boitšoaro bo bobe. Kapa, joaloka tau e purumang, a ka ’na a leka ho ba tšosa hore ba etse lintho ka tsela eo Molimo a tla tlosa tšireletso ea hae ho bona. (1 Petrose 5:8) Ke ka lebaka leo moapostola Pauluse a bitsang Satane hore ke “ea nang le mokhoa oa ho baka lefu.”—Baheberu 2:14.

Nkhono oa Owmadji o ile a leka ho susumetsa Hawa hore a sebelise lithatho le litlhare e le ho itšireletsa boloetseng. Ho ka be ho etsahetse’ng hoja Hawa o ne a sekiselitse? A ka be a bontšitse ho hloka tšepo e feletseng ho Jehova Molimo, ’me o ne a ke ke a hlola a kholiseha hore o tla mo sireletsa.—Exoda 20:5; Matheu 4:10; 1 Bakorinthe 10:21.

Satane o ile a leka ho susumetsa Jobo ka ho tšoanang. Ho ne ho sa lekana ha a mo amohile lelapa la hae, leruo la hae le ho phela hantle ’meleng. Jobo o ile a boela a fuoa keletso e mpe haholo ke mosali oa hae ha a ne a re: “Rohaka Molimo ’me u shoe!” (Jobo 2:9) Joale a eteloa ke “metsoalle” e meraro eo hammoho e ileng ea leka ho mo kholisa hore ke eena ea lokelang ho jara molato ka boloetse boo ba hae. (Jobo 19:1-3) Ka tsela ena Satane o ile a sebelisa monyetla nakong eo ka eona Jobo a fokolang ho leka ho mo nyahamisa le ho sisinya tšepo ea hae ho lokeng ha Jehova. Leha ho le joalo, Jobo o ile a tsoela pele ho itšetleha ka Jehova e le eena feela tšepo ea hae.—Bapisa le Pesaleme ea 55:22.

Ha re kula, le rōna re ka ’na ra ba le khatello ea maikutlo. Ha re le boemong bo joalo, Satane o potlakela ho leka ho etsa hore re itšoare ka tsela e itseng eo ka eona re tlang ho sekisetsa tumelo ea rōna. Kahoo, ha re hlaseloa ke boloetse, ke habohlokoa ho hopola hore sesosa sa motheo sa ho kula ha rōna mohlomong ke ho se phethahale hoo re ho futsitseng ho fapana le tšusumetso e itseng e phahametseng tlhaho. Hopola hore Isaka ea tšepahalang o ile a foufala ka lilemo tse ngata pele a e-shoa. (Genese 27:1) Sesosa e ne e le botsofali eseng meea e khopo. Ragele o ile a shoa ha a beleha, eseng ka lebaka la Satane, empa ka lebaka la bofokoli ba botho. (Genese 35:17-19) Qetellong, batho bohle ba tšepahalang ba khale ba ile ba shoa—eseng ka lebaka la ho louoa kapa ho betsoa empa ka lebaka la ho se phethahale ho futsitsoeng.

Ho nahana hore meea e sa bonahaleng e ba le tšusumetso e tobileng boloetseng bo bong le bo bong boo re bang le bona ke leraba. Ho ka ’na ha re susumetsa hore re be le tšabo e sa hlokahaleng ea meea. Joale, ha ho etsahala hore re kule, re ka ’na ra oela tekong ea ho leka ho khutsisa bademona ho e-na le ho lulella hōle le bona. Haeba Satane a ka re tšosa hoo re ka retelehelang mekhoeng ea tšebelisano le meea, hoo e ne e tla ba ho se tšepahale ho Molimo oa ’nete, Jehova. (2 Bakorinthe 6:15) Re lokela hore re tataisoe ke ho tšaba Molimo ka tsela e nang le tlhompho, eseng ho tšaba Mohanyetsi oa hae ka tsela ea litumela-khoela.—Tšenolo 14:7.

Owmadji e monyenyane o na le tšireletso e molemo ka ho fetisisa e ka fumanehang khahlanong le meea. Ho ea ka moapostola Pauluse, Molimo o mo talima a “halalela” kaha ’mè oa hae ke molumeli, ’me a ka mo rapella ho Molimo hore a be le morali oa hae ka moea o halalelang. (1 Bakorinthe 7:14) Kaha Hawa o ne a hlohonolofalitsoe ka tsebo e joalo e nepahetseng, o ile a khona ho batla phekolo e sebetsang bakeng sa Owmadji ho e-na le ho tšepa lithatho.

Lisosa Tse sa Tšoaneng Tsa Boloetse

Batho ba bangata ha ba lumele ho meea. Ha ba kula, ba ea ngakeng—haeba ba khona. Ke ’nete hore motho ea kulang a ka ea ngakeng ’me ha etsahala hore a se ke a fola. Lingaka li ke ke tsa etsa mehlolo. Empa batho ba bangata ba ratang litumela-khoela ba ka beng ba hlaphohetsoe ba ea ngakeng feela ha metsotso e se e jele babeli. Ba ka leka mekhoa ea ho phekola ea tšebelisano le meea pele, ’me ha mekhoa eo e sa atlehe ba ea ngakeng e se e le eona feela tšepo ea ho qetela ea ho fumana thuso. Ba bangata ba shoa ho sa hlokahale.

Ba bang ba shoa pele ho nako ka lebaka la ho hloka tsebo. Ha ba hlokomele matšoao a mafu a itseng ’me ha ba tsebe hore na ke mehato efe e sebetsang eo ba ka e nkang ho thibela boloetse. Tsebo ea thusa ho thibela mahlomola a sa hlokahaleng. Ke ntho e hlokomelehang hore bo-’me ba tsebang ho bala le ho ngola ba shoeloa ke bana ba fokolang ka lebaka la boloetse ho feta ba sa tsebeng ho bala le ho ngola. E, ho hloka tsebo ho ka bolaea.

Sesosa se seng sa boloetse ke ho se tsotelle. Ka mohlala, batho ba bangata baa kula kahobane ba lumella likokoanyana hore li tsamaee lijong pele li jeoa kapa batho ba lokisang lijo ha ba hlape matsoho pele. Ho boetse ho kotsi hore motho a robale a sa ikoahela ka letanta le thibelang menoang libakeng tseo ho nang le lefu la malaria.a Ha ho tluoa litabeng tsa bophelo, hangata ke ’nete hore ‘boiteko bo fokolang ba ho thibela boloetse ke ba bohlokoa joaloka boiteko bo matla ba ho bo phekola.’

Mokhoa oa bophelo o booatla o entse hore ba limilione ba kule ’me ba shoe pele ho nako. Botahoa, boitšoaro bo bobe ba botona le botšehali, tšebeliso e mpe ea lithethefatsi le ho sebelisa koae li sentse bophelo ba batho ba bangata. Haeba motho a inehela mekhoeng ena e litšila ’me joale a kula, na ke hobane a louoe ke motho e mong kapa a hlasetsoe ke moea? Che. Ke eena ea lokelang ho jarisoa molato ka ho kula ha hae. Ho jarisa meea molato e tla be e le ho hana ho amohela boikarabelo ka lebaka la mokhoa oa bophelo o booatla.

Ho hlakile hore re ke ke ra laola lintho tse ling. Ka mohlala, re ka ’na ra pepesetsoa likokoana-hloko tse bakang boloetse kapa ra pepesetsoa tšilafalo. Sena ke se ileng sa etsahala ho Owmadji. ’Mè oa hae o ne a sa tsebe hore na ke’ng e bakang letšollo. Bana ba hae ha ba kule hangata joaloka bana ba bang hobane o boloka ntlo ea hae le jarete li hloekile ’me kamehla o hlapa matsoho pele a lokisa lijo. Empa bana bohle baa kula ka nako e itseng. Ho na le likokoana-hloko tse sa tšoaneng tse ka bang 25 tse ka bakang letšollo. Mohlomong ha ho na motho ea sa tla hlola a tseba hore na ke efe e neng e baketse Owmadji bothata.

Tharollo ea Nako e Telele

Hase molato oa Molimo hore ebe boloetse bo teng. “Molimo a ke ke a lekoa ka lintho tse mpe leha e le hore eena ka boeena o leka leha e le mang ka tsona.” (Jakobo 1:13) Ha e mong oa barapeli ba hae a kula, Jehova o mo tšehetsa moeeng. “Jehova o tla mo tšehetsa, ha a le liphateng tsa boloetse; u lokisa malao a hae kaofela bohlokong ba hae.” (Pesaleme ea 41:3) E, Molimo o na le kutloelo-bohloko. O batla ho re thusa, eseng ho re utloisa bohloko.

Ka sebele, Jehova o na le tharollo ea nako e telele bakeng sa boloetse—lefu la Jesu le tsoho ea hae. Ka sehlabelo sa Jesu sa thekollo, batho ba lipelo li lokileng ba lopolloa boemong ba bona ba boetsalibe ’me qetellong ba tla fumana bophelo ba ’mele bo phethahetseng le ho phela ka ho sa feleng lefatšeng la paradeise. (Matheu 5:5; Johanne 3:16) Mehlolo ea Jesu e ne e le ponelo-pele ea pholiso ea ’nete eo ’Muso oa Molimo o tla e tlisa. Molimo o tla boela a tlose Satane le bademona ba hae. (Baroma 16:20) Ruri Jehova o boloketse ba sebelisang tumelo ho eena lintho tse babatsehang. Ho hlokahala feela hore re se fele pelo ’me re mamelle.

Ho sa ntse ho le joalo, Molimo o fana ka bohlale bo sebetsang le tataiso ea moea ka Bibele le mokhatlo oa bara ba motho oa barapeli ba tšepahalang lefatšeng ka bophara. O re bontša kamoo re ka qobang mekhoa e mebe e bakang mathata bophelong. ’Me o re fa metsoalle ea ’nete e tlang ho re thusa ha ho hlaha mathata.

Ak’u nahane ka Jobo hape. Ho ea ho ngakana-ntšonyana e ne e ka ba ntho e mpe ka ho fetisisa eo Jobo a neng a ka e etsa! Ho ne ho tla etsa hore Molimo a se ke a mo sireletsa, ’me o ne a tla lahleheloa ke litlhohonolofatso tsohle tse neng li mo letetse ka mor’a mahlomola a hae. Molimo ha aa ka a lebala Jobo, ’me a ke ke a re lebala. “Le utloile ka mamello ea Jobo ’me le bone phello eo Jehova a ileng a fana ka eona,” ho rialo morutuoa Jakobo. (Jakobo 5:11) Haeba re sa tele, le rōna re tla fumana litlhohonolofatso tse babatsehang ka nako e loketseng ea Molimo.

Ho ile ha etsahala’ng ka Owmadji e monyenyane? ’Mè oa hae o ile a hopola sehlooho se seng makasineng ea Tsoha!, eo e leng motsoalle oa Molula-Qhooa, se buang ka phekolo ea ho khutlisetsa metsi ’meleng.b O ile a latela litaelo tsa sona ’me a etsetsa Owmadji motsoako oo hore a o noe. Hona joale ngoananyana eo o phela hantle.

[Mongolo o botlaaseng ba leqephe]

[Litšoantšo tse leqepheng la 7]

Jehova o lokiselitse tharollo e sa feleng bothateng ba ho kula