Mokhoa oa ho Fumana Thabo ea Sebele

MOETA-PELE oa bolumeli oa Mobuddha, Dalai Lama, o itse: “Ke lumela hore seo e hlileng e leng morero oa bophelo ba rōna ke ho batla thabo.” Eaba o hlalosa hore o lumela hore thabo e ka finyelloa ka ho koetlisa, kapa ho laea kelello le pelo. A re: “Kelello ke eona e ka sehloohong eo ho hlokahalang hore re e sebelise ho fumana thabo e feletseng.” O nahana hore ho lumela ho Molimo ha ho hlokahale.a

Ho fapana le hoo, nahana ka Jesu, ea neng a e-na le tumelo e matla ho Molimo le eo lithuto tsa hae li ammeng batho ba limilione tse makholo ho theosa le makholo a lilemo. Jesu o ne a thahasella hore batho ba thabe. O ile a qala Thuto ea hae ea Thabeng e tsebahalang ka liphatlalatso tse robong—lipolelo tse robong tseo mantsoe a tsona a qalang a reng: “Ho thaba . . . ” (Matheu 5:1-12) Thutong eona eo, o ile a ruta bamameli ba hae ho lekola, ho hloekisa le ho laea likelello le lipelo tsa bona—ho leleka menahano e mabifi, ea boitšoaro bo bobe le ea boithati ’me ba e nkele sebaka ka ea khotso, e hloekileng le e bontšang lerato. (Matheu 5:21, 22, 27, 28; 6:19-21) Joalokaha e mong oa barutuoa ba hae a ile a fana ka keletso e matla hamorao, re lokela ho ‘tsoela pele ho nahana ka’ lintho tsa ‘’nete, tseo ho amehoang ka tsona ka botebo, tse lokileng, tse hloekileng, tse ratehang, tse buuoang hantle, tse khabane, tse lokeloang ke thoriso.’—Bafilipi 4:8.

Jesu o ne a tseba hore thabo ea ’nete e kopanyelletsa le likamano tsa motho le ba bang. Ka tlhaho rōna batho re na le botsoalle, ka hona re ke ke ra thaba e le kannete haeba re itšehla thajana kapa haeba re lula re hohlana le ba re potolohileng. Re ka thaba hafeela re ikutloa hore rea ratoa le haeba re rata ba bang. Jesu o rutile hore ntho e ka sehloohong leratong le joalo ke kamano ea rōna le Molimo. Ka ho khetheha tabeng ena, thuto ea Jesu e fapana le ea Dalai Lama, hobane Jesu o rutile hore batho ba ke ke ba thaba e le kannete ha ba ikarotse ho Molimo. Ke hobane’ng ha ho le joalo?—Matheu 4:4; 22:37-39.

Nahana ka Litlhoko Tsa Hao Tsa Moea

E ’ngoe ea liphatlalatso tsa Thuto ea Thabeng ke ena: “Ho thaba ba elang hloko tlhoko ea bona ea moea.” (Matheu 5:3) Ke hobane’ng ha Jesu a ne a rialo? Hobane rōna, ho fapana le liphoofolo, re na le litlhoko tsa moea. Kaha re bōpiloe ka setšoantšo sa Molimo, ka tekanyo e itseng re ka hlaolela litšoaneleho tsa bomolimo, tse kang lerato, toka, mohau le bohlale. (Genese 1:27; Mikea 6:8; 1 Johanne 4:8) Seo re se hlokang moeeng se akarelletsa hore re be le morero bophelong.

Re ka finyella litlhoko tseo tsa moea joang? Eseng ka ho thuisa ka ho fetisisa kapa ho itlhahloba feela. Ho e-na le hoo, Jesu o itse: “Motho a ke ke a phela ka bohobe feela, empa o tla phela ka polelo e ’ngoe le e ’ngoe e tsoang molomong oa Jehova.” (Matheu 4:4) Hlokomela hore Jesu o itse Molimo ke mohloli oa “polelo e ’ngoe le e ’ngoe” e hlokahalang bophelong ba rōna. Lipotso tse ling ke Molimo feela ea ka re thusang ho li araba. Ho utloisisa seo ho nakong ka ho khetheha kajeno, kaha ho atile likhopolo tse mabapi le morero oa bophelo le tsela e lebisang thabong. Mabenkele a libuka a entse likarolo tse khethehileng tsa libuka tse tšepisang babali ho phela ba sa kule, leruo le thabo. Ho entsoe likarolo tsa Internet tseo ka ho khetheha li buang ka thabo.

Leha ho le joalo, monahano oa motho o atisa ho leba hosele likarolong tsena. O batla o lumella litakatso tsa boithati kapa boiphahamiso. O thehiloe tsebong le phihlelong e fokolang, ’me hangata o itšetleha ka motheo oa bohata. Ka mohlala, tloaelo e hōlang har’a bangoli ba libuka tse fanang ka keletso ke ea ho theha maikutlo a bona khopolong ea “ho iphetola ha lintho,” e nkang hore maikutlo a motho a simolohile liphoofolong tseo ho nkoang hore re tsoa ho tsona. Ke ’nete hore boiteko leha e le bofe ba ho fumana thabo bo thehiloeng khopolong e hlokomolohang karolo e phethoang ke ’Mōpi oa rōna e ke ke ea e-ba bo utloahalang ’me bo tla qetella ka masoabi. Moprofeta oa boholo-holo o itse: “Ba bohlale ba hlabiloe ke lihlong. . . . Bonang! Ba lahlile lentsoe la Jehova, ’me ba na le bohlale bofe?”—Jeremia 8:9.

Jehova Molimo o tseba sebōpeho sa rōna le se tla re thabisa e le kannete. Oa tseba hore na ke hobane’ng ha a behile motho holim’a lefatše le hore na bokamoso bo tšoere eng, ’me o re fa boitsebiso boo ka Bibeleng. Seo a se senolang bukeng eo e bululetsoeng se etsa hore batho ba nang le tšekamelo e nepahetseng ba arabele, ’me se tlisa thabo. (Luka 10:21; Johanne 8:32) Ho bile joalo ho barutuoa ba Jesu ba babeli. Ba ne ba nyahame ka mor’a lefu la hae. Empa ka mor’a hore Jesu ea tsositsoeng a ba bolelle ka karolo eo a e phethang morerong oa Molimo mabapi le poloko ea moloko oa batho, ba ile ba re: “Na lipelo tsa rōna li ne li sa chese ha a ntse a bua le rōna tseleng, ha a ntse a re bulela Mangolo ka botlalo?”—Luka 24:32.

Thabo e joalo ea tota ha re lumella ’nete ea Bibele ho re tataisa bophelong. Tabeng ena, thabo e ka tšoantšoa le mookoli. O hlaha ha maemo a leholimo a loketse, empa o khanya haholoanyane—le hona e ba ’meli—ha maemo a tšoaneleha. Joale, a re hlahlobeng mehlala e seng mekae ea kamoo ho phela tumellanong le lithuto tsa Bibele ho ka etsang hore re thabe haholoanyane.

Nolofatsa Bophelo ba Hao

Taba ea pele, ela hloko keletso ea Jesu tabeng ea leruo. Ka mor’a hore a fane ka keletso khahlanong le ho etsa hore ho lelekisa leruo e be ntho e ka sehloohong bophelong, o ile a bua polelo e sa tloaelehang. A re: “Haeba leihlo la hao le talima nģa e le ’ngoe, ’mele oohle oa hao o tla khanya.” (Matheu 6:19-22) Ha e le hantle, o ne a re haeba ka meharo re lelekisa leruo, bolaoli kapa pakane leha e le efe ho tseo batho ba li hahamallang, re tla hlōleha ho finyella lintho tsa bohlokoa haholoanyane. Etsoe, joalokaha Jesu a boletse ka nako e ’ngoe, “esita le ha motho a e-na le ho hongata haholo bophelo ba hae ha bo hlahe linthong tseo a nang le tsona.” (Luka 12:15) Haeba re etelletsa pele lintho tseo e hlileng e leng tsa bohlokoa, tse kang kamano ea rōna le Molimo, litaba tsa lelapa le litaba tse ling tse kang tseo, joale ‘mahlo’ a rōna a tla “talima nģa e le ’ngoe,” eseng hohle.

Hlokomela hore Jesu o ne a sa buelle hore motho a itšoare ka thata-thata kapa hore a itime lintho tsohle. Etsoe Jesu ka boeena o ne a sa itšoara ka thata-thata. (Matheu 11:19; Johanne 2:1-11) Ho e-na le hoo, o ne a ruta hore ba talimang bophelo e le feela monyetla oa ho bokella leruo ha e le hantle ba itima menyetla e monate bophelong.

Ha ngaka e phekolang mathata a kelello ea San Francisco, U.S.A., e bua ka ba bang ba neng ba hafa ka nkatana ba sa le banyenyane, e boletse hore ho bona chelete ke “mohloli oa khatello ea kelello le pherekano.” E ile ea phaella ka hore batho bana ba “reka matlo a mabeli kapa a mararo, koloi, ba hafotsa chelete. ’Me ha seo se sa ba thuse ho fumana seo ba se batlang [ke hore, se sa ba thabisa,] ba tepella maikutlo, ba ikutloa ba se na thuso ba bile ba sa tiiseha ka seo ba lokelang ho se etsa ka bophelo ba bona.” Ho fapana le seo, ba elang hloko keletso ea Jesu ea ho phela bophelo bo bonolo tabeng ea lintho tse bonahalang le ho ipha nako ea lintho tsa moea ba na le monyetla o moholoanyane oa ho fumana thabo ea sebele.

Tom oa sehahi ea lulang Hawaii, o ile a ithaopela ho ea thusa ho haha libaka tsa borapeli lihlekehlekeng tsa Pacific moo batho ba itšokolang. Tom o ile a hlokomela ntho e ’ngoe ka batho bana ba ikokobelitseng. A re: “Bara le barali beso ba Bakreste ba lihlekehlekeng tsena ba ne ba thabile e le kannete. Ba ile ba nthusa ho bona ka ho hlaka haholoanyane hore chelete le maruo hase lekunutu la thabo.” O ile a boela a hlokomela baithaopi ba neng ba sebetsa le eena lihlekehlekeng tsena ’me a bona kamoo ba neng ba khotsofetse kateng. Tom o ile a re: “Ba ka be ba fumana chelete e ngata. Empa ba ikhethetse ho etelletsa lintho tsa moea pele le ho phela bophelo bo sa rarahanang.” Ka lebaka la ho susumetsoa ke mehlala ena, Tom o ile a nolofatsa bophelo ba hae e le hore a sebelise nako e eketsehileng lelapeng la hae le ho phehelleng lintho tsa moea—e leng bohato boo ho seng mohla a kileng a ikoahlaela bona.

Thabo le ho Ikutloa U le Motho oa Bohlokoa

Ntho ea bohlokoa bakeng sa ho ba le thabo ke boikutlo ba ho ba seriti, kapa ba ho ikutloa u le motho oa bohlokoa. Ka lebaka la ho se phethahale le bofokoli boo ho bo bakang, ba bang ba itšoaea liphoso le ho tšoaea ba bang liphoso, ’me ba bangata ba ba le boikutlo bo joalo ho tloha bongoaneng. Ho ka ’na ha e-ba thata ho hlōla boikutlo bo metseng ka metso, empa bo ka hlōloa. Tharollo ke ho phela tumellanong le Lentsoe la Molimo.

Bibele e hlalosa kamoo ’Mōpi a ikutloang kateng ka rōna. Na pono ea hae hase ea bohlokoa ho feta ea motho ofe kapa ofe—esita le ea hao? Kaha Molimo ke mothofatso oa lerato, o re talima ntle ho leeme kapa lonya. O bona seo re leng sona, hammoho le seo re ka bang sona. (1 Samuele 16:7; 1 Johanne 4:8) Ha e le hantle, o talima ba batlang ho mo khahlisa e le ba bohlokoa, e, ba lakatsehang ho sa tsotellehe mefokolo ea bona.—Daniele 9:23; Hagai 2:7.

Ka sebele, Molimo ha a hlokomolohe mefokolo ea rōna le libe life kapa life tseo re li etsang. O lebeletse hore re leke ka matla ho etsa se nepahetseng, ’me oa re tšehetsa ha re etsa joalo. (Luka 13:24) Ho ntse ho le joalo, Bibele e re: “Joalokaha ntate a bontša mohau ho bara ba hae, Jehova o bontšitse mohau ho ba mo tšabang.” E boetse e re: “Haeba u ne u talima liphoso, Jah, Jehova, ke mang ea neng a ka ema? Etsoe ho na le tšoarelo ea ’nete ho uena, e le hore u ka tšajoa.”—Pesaleme ea 103:13; 130:3, 4.

Ka hona, ithute ho ipona kamoo Molimo a u bonang kateng. Ho tseba hore o talima ba mo ratang e le ba khahlehang le hore oa ba tšepa—le hoja bona ba ka ’na ba italima ba sa tšoanelehe—ho ka etsa ho hongata ho eketsa thabo ea motho.—1 Johanne 3:19, 20.

Tšepo—Ke ea Bohlokoa Bakeng sa Thabo

Khopolo e tloaelehileng morao tjena e bitsoang ho kholiseha kelellong, e bolela hore tebello ea ho atleha e hlahisoang ke ho nahana lintho tse molemo le ke hore motho a sebeletse litšoanelehong tsa hae tse ntle, e ka tlisa thabo. Ke ba seng bakae ba ka hanang hore ho ba le tebello ea ho atleha bophelong ba hona joale le ba nako e tlang e eketsa thabo ea rōna. Leha ho le joalo, tebello eo ea ho atleha e lokela ho thehoa nthong ea sebele eseng takatsong feela. Ntle le moo, tebello ea ho atleha le maikutlo a matle li ke ke tsa felisa ntoa, tlala, boloetse, tšilafalo, botsofali, ho kula kapa lefu—e leng lintho tse hlokisang ba bangata hakana thabo. Leha ho le joalo, tebello ea ho atleha e na le sebaka sa eona.

Hoa thahasellisa hore ebe Bibele ha e sebelise poleloana tebello ea ho atleha; e sebelisa tšepo—e leng lentsoe le matla haholoanyane. Vine’s Complete Expository Dictionary e hlalosa “tšepo” joalokaha e sebelisoa ka Bibeleng e le “tebello e molemo le e tiileng, . . . ho lebella se molemo ka thabo.” Moo Bibele e sebelisitseng tšepo, hase feela tebello ea ho atleha boemong bo itseng. E boetse e bolela ntho eo tšepo e behiloeng ho eona. (Baefese 4:4; 1 Petrose 1:3) Ka mohlala, tšepo ea Bokreste ke hore lintho tsohle tse mpe tse boletsoeng serapeng se etellang sena pele, li tla tloha li felisoa. (Pesaleme ea 37:9-11, 29) Empa e kopanyelletsa se eketsehileng.

Bakreste ba lebeletse ka thabo nako eo ka eona batho ba tšepahalang ba tla rua bophelo bo phethahetseng lefatšeng la paradeise. (Luka 23:42, 43) Ha Tšenolo 21:3, 4 e qaqisa tšepo eo e re: “Bonang! Tente ea Molimo e ho moloko oa batho, o tla lula le bona, ’me e tla ba batho ba hae. . . . O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”

Mang kapa mang ea lebeletseng ho ba le bokamoso bo joalo o na le mabaka ’ohle a ho thaba, le haeba maemo a hae a hona joale a se molemo kamoo a neng a ka rata kateng. (Jakobo 1:12) Ka hona, ke hobane’ng ha u sa fuputse Bibeleng ’me u fumane hore na ke hobane’ng ha u ka e lumela? Matlafatsa tšepo ea hao ka ho qeta nako letsatsi ka leng u bala Bibele. Ho etsa joalo ho tla u matlafatsa moeeng, ho u thuse ho qoba lintho tse hlokisang batho thabo, ’me ho etse hore u khotsofale haholoanyane. E, lekunutu le leholo ka ho fetisisa la thabo ke ho etsa thato ea Molimo. (Moeklesia 12:13) Bophelo bo thehiloeng ho pheleng tumellanong le litaelo tsa Bibele ke bophelo bo thabileng, hobane Jesu o itse: “Ho thaba ba utloang lentsoe la Molimo ’me ba le boloka!”—Luka 11:28.

[Mongolo o botlaaseng ba leqephe]

[Litšoantšo tse leqepheng la 5]

Thabo e ke ke ea fumanoa ka ho bokella leruo, ho itšehla thajana, kapa ho tšepela tsebong ea motho e fokolang

[Setšoantšo se leqepheng la 6]

Bophelo bo thehiloeng ho pheleng tumellanong le Lentsoe la Molimo ke bophelo bo thabileng

[Setšoantšo se leqepheng la 7]

Tšepo ea Bokreste e thabisa motho