Beha Kelello Linthong Tsa Moea ’me U Phele!
“Ho beha kelello [linthong tsa moea] ho bolela bophelo le khotso.”—BAROMA 8:6.
1, 2. Bibele e bontša phapang efe lipakeng tsa ‘nama’ le ‘moea’?
HA HO bonolo hore motho a lule a hloekile boitšoarong ka pel’a Molimo ha a le har’a batho ba boitšoaro bo hlephileng ba etelletsang pele ho khotsofatsa litakatso tsa nama. Leha ho le joalo, Mangolo a bapisa ‘nama’ le ‘moea,’ ’me a bontša phapang e hlakileng lipakeng tsa litholoana tse mpe tsa ha motho a itumella ho laoloa ke nama ea boetsalibe le liphello tse monate tsa ho inehela tšusumetsong ea moea o halalelang oa Molimo.
2 Ka mohlala, Jesu Kreste o itse: “Ke moea o fanang ka bophelo; nama ha e na thuso ho hang. Lipolelo tseo ke le boleletseng tsona ke moea ’me ke bophelo.” (Johanne 6:63) Moapostola Pauluse o ile a ngolla Bakreste ba Galatia a re: “Nama e khahlanong le moea takatsong ea eona, ’me moea o khahlanong le nama; kaha tsena lia hanyetsana.” (Bagalata 5:17) Pauluse o ile a boela a re: “Ea jalang ka sepheo sa ho jalla nama ea hae o tla kotula ho bola nameng ea hae, empa ea jalang ka sepheo sa ho jalla moea o tla kotula bophelo bo sa feleng moeeng.”—Bagalata 6:8.
3. Ho hlokahala eng e le hore re itokolle litakatsong le litšekamelong tse fosahetseng?
3 Moea o halalelang oa Jehova—matla a hae a sebetsang—o ka atleha ho ntša ka metso “litakatso tsa nama” le taolo e senyang ea nama ea rōna ea boetsalibe. (1 Petrose 2:11) E le hore re ka itokolla bokhobeng ba litšekamelo tse fosahetseng, ho bohlokoa hore re fumane thuso ea moea oa Molimo, kaha Pauluse o ile a ngola a re: “Ho beha kelello [linthong tsa nama] ho bolela lefu, empa ho beha kelello [linthong tsa moea] ho bolela bophelo le khotso.” (Baroma 8:6) Ho beha kelello linthong tsa moea ho bolela’ng?
‘Ho Beha Kelello Linthong Tsa Moea’
4. ‘Ho beha kelello linthong tsa moea’ ho bolela’ng?
4 Ha Pauluse a ne a ngola mabapi le ‘ho beha kelello linthong tsa moea,’ o sebelisitse lentsoe la Segerike le bolelang “mokhoa oa ho nahana, (ho beha) kelello, . . . sepheo, tabatabelo, ho phehella.” Leetsi le amanang le leo le bolela “ho nahana, ho ba le kelello e sebetsang ka mokhoa o itseng.” Kahoo, ho beha kelello linthong tsa moea ho bolela ho laoloa, ho busoa le ho susumetsoa ke matla a Jehova a sebetsang. Ho bolela hore ka ho rata re lumella monahano oa rōna, litšekamelo le litabatabelo hore li susumetsoe ka ho feletseng ke moea o halalelang oa Molimo.
5. Re lokela ho ikokobelletsa tšusumetso ea moea o halalelang ho isa hokae?
5 Hore na re lokela ho ikokobelletsa tšusumetso ea moea o halalelang ho isa hokae ho ile ha hatisoa ke Pauluse ha a ne a bua ka ho ba ‘makhoba ka moea.’ (Baroma 7:6) Motheong oa tumelo ea bona sehlabelong sa thekollo sa Jesu, Bakreste ba lokolotsoe pusong ea sebe ’me ka tsela eo ba ‘shoele’ mabapi le boemo ba bona ba pele ba ho ba makhoba a sona. (Baroma 6:2, 11) Ba shoeleng ka tšoantšetso joalo ba sa ntse ba phela nameng ’me hona joale ba lokolohile hore ba ka latela Kreste e le “makhoba a ho loka.”—Baroma 6:18-20.
Phetoho e Khōlō
6. Ba fetohang “makhoba a ho loka” ba feta phetohong efe?
6 Ho tlohela ho ba “makhoba a sebe” le ho fetohela ho sebeletseng Molimo ka ho ba “makhoba a ho loka” ka sebele ke phetoho e khōlō. Pauluse o ile a ngola mabapi le ba ileng ba fetoha ka tsela eo, a re: ‘Le hlatsoitsoe hore le hloeke, le halalelitsoe, ho boletsoe hore le lokile ka lebitso la Morena oa rōna Jesu Kreste le ka moea oa Molimo oa rōna.’—Baroma 6:17, 18; 1 Bakorinthe 6:11.
7. Ke hobane’ng ha e le habohlokoa ho ba le pono ea Jehova ea litaba?
7 E le hore re fete phetohong e joalo e hlollang, ho hlokahala hore re qale ka ho ithuta hore na Jehova o na le pono efe ea litaba. Makholong a lilemo a fetileng, mopesaleme Davida o ile a rapela Molimo ka tieo a re: “Ntsebise litsela tsa hao, Jehova . . . Ntsamaise ’neteng ea hao ’me u nthute.” (Pesaleme ea 25:4, 5) Jehova o ile a mamela Davida, ’me A ka boela a araba thapelo e joalo ea bahlanka ba hae ba kajeno. Kaha litsela tsa Molimo le ’nete ea hae li hloekile li bile lia halalela, ho nahanisisa ka tsona ho tla ba molemo haeba re tleloa ke moleko oa ho khotsofatsa litakatso tsa nama tse sa hloekang.
Karolo ea Bohlokoa e Phethoang ke Lentsoe la Molimo
8. Ke hobane’ng ha e le habohlokoa hore re ithute Bibele?
8 Lentsoe la Molimo, Bibele, le hlahisitsoe ke moea oa hae. Kahoo, tsela e ’ngoe e molemo ea ho etsa hore moea oo o sebetse ho rōna ke ho bala le ho ithuta Bibele—kamehla haeba ho khoneha. (1 Bakorinthe 2:10, 11; Baefese 5:18) Ho tlatsa likelello le lipelo tsa rōna ka linnete le melao-motheo ea Bibele ho tla re thusa hore re hanyetse lintho tse hlaselang bomoea ba rōna. E, ha re tleloa ke meleko ea hore re kopanele boitšoarong bo bobe, moea oa Molimo o ka re hopotsa Mangolo le melao-motheo e tataisang e ka re matlafalletsang hore re ikemisetse ho phetha thato ea Molimo. (Pesaleme ea 119:1, 2, 99; Johanne 14:26) Ka lebaka leo, ha re thetsehe hore re khelohele tseleng e fosahetseng.—2 Bakorinthe 11:3.
9. Ho ithuta Bibele ho matlafatsa boikemisetso ba rōna ba ho boloka kamano ea rōna le Jehova joang?
9 Ha re tsoela pele ho ithuta Mangolo ka khothalo le ka tieo ka thuso ea lingoliloeng tse thehiloeng Bibeleng, moea oa Molimo o susumetsa likelello le lipelo tsa rōna, o etsa hore re hlomphe litekanyetso tsa Jehova ka ho teba. Kamano ea rōna le Molimo e ba ntho ea bohlokoa ka ho fetisisa bophelong ba rōna. Ha re talimane le moleko, ha re lule re nahana ka tsela eo ka eona ho etsa phoso ho ka ’nang ha e-ba monate kateng. Ho e-na le hoo, re potlakela ho ameha ka ho lula re tšepahala ho Jehova. Ha re ananela ka matla kamano ea rōna le eena re susumelletseha ho loantša tšekamelo efe kapa efe e ka ’nang ea e senya kapa ea e felisa.
“Molao oa Hao ke o Rata Hakaakang!”
10. Ke hobane’ng ha ho boloka molao oa Jehova ho hlokahala bakeng sa ho beha kelello linthong tsa moea?
10 Tsebo ea Lentsoe la Molimo ha ea lekana bakeng sa hore re behe likelello linthong tsa moea. Morena Solomone o ne a utloisisa litekanyetso tsa Jehova hantle haholo, empa o ile a hlōleha ho li phetha karolong ea ho qetela ea bophelo ba hae. (1 Marena 4:29, 30; 11:1-6) Haeba re sekametse linthong tsa moea, re tla bona hore ha ho hlokahale hore re tsebe seo Bibele e se buang feela empa ho boetse ho hlokahala hore re boloke molao oa Molimo ka pelo eohle. Seo se bolela ho hlahloba litekanyetso tsa Jehova ka hloko le ho leka ka matla ho li boloka. Mopesaleme o ne a e-na le maikutlo a joalo. O ile a bina a re: “Molao oa hao ke o rata hakaakang! Ke nahanisisa ka oona letsatsi lohle.” (Pesaleme ea 119:97) Ha re hlile re amehile ka ho boloka molao oa Molimo, re susumelletseha ho bontša litšoaneleho tsa Molimo. (Baefese 5:1, 2) Ho e-na le hore liphoso li re hohele hoo re sitoang ho itšireletsa, re bonahatsa litholoana tsa moea, ’me takatso ea ho khahlisa Jehova e etsa hore re furalle “mesebetsi [e litšila] ea nama.”—Bagalata 5:16, 19-23; Pesaleme ea 15:1, 2.
11. U ka hlalosa joang hore molao oa Jehova o hanelang bohlola oa re sireletsa?
11 Re ka hlaolela tlhompho e tebileng le lerato joang bakeng sa molao oa Jehova? Tsela e ’ngoe ke hore re hlahlobe molemo oa oona ka hloko. Nahana ka molao oa Molimo o laelang hore ke lenyalong feela moo ho ka kopaneloang liphate le o thibelang bohlola le bofebe. (Baheberu 13:4) Na ho na le ntho e molemo eo ho boloka molao oo ho re amohang eona? Na Ntate ea lerato oa leholimo a ka etsa molao o re amohang ntho e molemo? Le hanyenyane! Bona se etsahalang bophelong ba ba bangata ba sa pheleng tumellanong le litekanyetso tsa Jehova tsa boitšoaro. Ho ima ho sa batloeng ho atisa ho etsa hore ba ntše limpa kapa mohlomong ba nyalane pele ho nako le hore manyalo a bona e be a sa thabang. Ba bangata ba tlameha ho hōlisa bana ntle ho monna kapa mosali. Ho feta moo, ba etsang bohlola ba ipepesetsa mafu a tšoaetsanoang ka likamano tsa botona le botšehali. (1 Bakorinthe 6:18) Ho etsa bohlola ha mohlanka oa Jehova ho ka ba le liphello tse sithabetsang maikutlo. Ho leka ho hatella letsoalo le molato ho ka etsa hore motho a se robale bosiu a be a tšoenyehe kelellong. (Pesaleme ea 32:3, 4; 51:3) Joale, na ha hoa totobala hore molao oa Jehova o hanelang bohlola o etselitsoe ho re sireletsa? E, ka sebele ho lula u hloekile boitšoarong ho molemo haholo!
Rapella Thuso ea Jehova
12, 13. Ke hobane’ng ha re lokela ho rapela ha re hlaseloa ke litakatso tsa boetsalibe?
12 Ke ’nete hore ho beha kelello linthong tsa moea ho hloka thapelo e tlohang pelong. Ho loketse ho kōpa thuso ea moea oa Molimo, hobane Jesu o itse: “Haeba lōna . . . le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!” (Luka 11:13) Ha re rapela, re ka bolela hore re itšetlehile ka moea hore o re thuse mefokolong ea rōna. (Baroma 8:26, 27) Haeba re hlokomela hore litakatso tsa boetsalibe kapa maikutlo a boetsalibe lia re ama, kapa haeba molumeli-’moho le rōna ea lerato a re hlokomelisa sena, e ka ba bohlale ho toba bothata lithapelong tsa rōna ’me re kōpe thuso ho Molimo hore re hlōle litšekamelo tsena.
13 Jehova a ka re thusa hore re amehe haholo ka lintho tse lokileng, tse hloekileng, tse khabane le tse lokeloang ke thoriso. Ho loketse hakaakang ho mo rapela ka tieo e le hore “khotso ea Molimo” e tle e lebele lipelo tsa rōna le matla a likelello tsa rōna! (Bafilipi 4:6-8) Ka lebaka leo, a re rapelleng thuso ea Jehova e le hore re “phehelle ho loka, boinehelo ba bomolimo, tumelo, lerato, mamello, maikutlo a bonolo.” (1 Timothea 6:11-14) Ka thuso ea Ntate oa rōna oa leholimo, matšoenyeho le meleko li ke ke tsa eketseha ho fihlela moo li sa laoleheng. Ho e-na le hoo, bophelo ba rōna bo tla ba le khutso eo Molimo a fanang ka eona.
U se ke Ua Soabisa Moea
14. Ke hobane’ng ha moea oa Molimo e le matla a susumelletsang bohloeking?
14 Bahlanka ba Jehova ba hōlileng tsebong ba sebelisa keletso ea Pauluse e reng: “Le se ke la tima mollo oa moea.” (1 Bathesalonika 5:19) Kaha moea oa Molimo ke “moea oa khalalelo,” o hloekile, ha oa tsoakoa, oa halalela. (Baroma 1:4) Ha o sebetsa ho rōna, moea oo o re susumelletsa ho halalela kapa ho hloeka. O re thusa ho lula tseleng ea bophelo e hloekileng eo ba tsamaeang ho eona ba tsebahalang ka ho mamela Molimo. (1 Petrose 1:2) Mokhoa ofe kapa ofe o sa hloekang o bontša ho hlokomoloha moea oo, ’me seo se ka ba le liphello tse senyang. Ka tsela efe?
15, 16. (a) Re ka soabisa moea oa Molimo joang? (b) Re ka qoba ho soabisa moea oa Jehova joang?
15 Pauluse o ile a ngola a re: “Le se ke la soabisa moea o halalelang oa Molimo, oo le tiisitsoeng ka oona bakeng sa letsatsi la ho lokolloa ka thekollo.” (Baefese 4:30) Mangolo a bontša hore moea oa Jehova ke tiiso kapa ‘pontšo ea se tlang ho tlela’ Bakreste ba tlotsitsoeng ba tšepahalang. Seo ke bophelo ba ho se shoe leholimong. (2 Bakorinthe 1:22; 1 Bakorinthe 15:50-57; Tšenolo 2:10) Moea oa Molimo o ka tataisa batlotsuoa le metsoalle ea bona e nang le tšepo ea ho phela lefatšeng hore ba phele bophelo ba botšepehi ’me o ka ba thusa ho qoba mesebetsi ea boetsalibe.
16 Moapostola enoa o ile a lemosa ka litšekamelo tsa ho qala leshano, ho utsoa, boitšoaro bo hlabisang lihlong le lintho tse ling tse joalo. Haeba re ka itumella ho hoheloa ke lintho tse joalo, re tla be re hanyetsa keletso ea Lentsoe la Molimo e bululetsoeng ke moea. (Baefese 4:17-29; 5:1-5) Kahoo, re ka soabisa moea oa Molimo ka tsela e itseng, ’me ke ’nete hore eo ke ntho eo re batlang ho e qoba. Ka lebaka leo, haeba mang kapa mang ho rōna a ka qala ho hlokomoloha keletso ea Lentsoe la Jehova, a ka ’na a qala ho ba le maikutlo kapa mekhoa e ka fellang ka sebe sa ka boomo, ’me a hlōloa ka ho feletseng ho fumana mohau oa Molimo. (Baheberu 6:4-6) Le hoja e ka ’na eaba ha re etse sebe hona joale, ho ka etsahala hore ebe re lebile tseleng eo. Re ka soabisa moea ka ho tsoela pele re etsa lintho tse hanyetsang tataiso ea oona. Hape re tla be re hanyetsa re bile re soabisa Jehova, mohloli oa moea o halalelang. Kaha re rata Molimo, ha ho mohla re batlang ho etsa joalo. Ho e-na le hoo, e se eka re ka rapella thuso ea Jehova e le hore re se ke ra soabisa moea oa hae empa re khone ho isa tlotla lebitsong la hae le halalelang ka ho tsoela pele ho beha likelello tsa rōna linthong tsa moea.
Tsoela Pele ho Beha Kelello Linthong Tsa Moea
17. Re ka ’na ra ipehela lipakane life tsa moea, hona ke hobane’ng ha e ka ba bohlale ho sebeletsa ho li finyella?
17 Tsela e khethehileng eo ka eona re ka tsoelang pele ho beha likelello linthong tsa moea ke ho ipehela lipakane tsa moea le ho sebeletsa ho li finyella. Ho itšetlehile ka litlhoko tsa rōna le maemo, lipakane tsa rōna li ka ’na tsa akarelletsa ho ntlafatsa mekhoa ea rōna ea ho ithuta, ho eketsa karolo ea rōna mosebetsing oa ho bolela, kapa ho hahamalla tokelo e itseng ea tšebeletso, e kang tšebeletso ea nako e tletseng ea bopula-maliboho, tšebeletso ea Bethele, kapa mosebetsi oa boromuoa. Sena se tla boloka likelello tsa rōna li tšoarehile linthong tsa moea ’me se tla re thusa hore re se ke ra inehela mefokolong ea rōna ea nama kapa hona ho susumetsoa ke ho lelekisa matlotlo le ho lakatsa lintho tseo Mangolo a li hanelang tse tloaelehileng tsamaisong ena ea lintho. Ka sebele ena ke tsela eo ho leng bohlale ho e latela, hobane Jesu o ile a phehella a re: “Khaotsang ho ipolokela matlotlo lefatšeng, moo tšoèlè le mafome li jang, le moo masholu a thuhang ’me a utsoe. Ho e-na le hoo, le ipolokele matlotlo leholimong, moo tšoèlè kapa mafome li sa jeng, le moo masholu a sa thuheng ’me a utsoe. Etsoe moo letlotlo la hao le leng teng, le pelo ea hao e tla ba hona teng.”—Matheu 6:19-21.
18. Ke hobane’ng ha e le habohlokoa hakaale ho tsoela pele ho beha likelello linthong tsa moea matsatsing aa a ho qetela?
18 Ho beha kelello linthong tsa moea le ho hatella litakatso tsa lefatše ka sebele ke tsela e bohlale ‘matsatsing ana a ho qetela.’ (2 Timothea 3:1-5) Etsoe, “lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.” (1 Johanne 2:15-17) Ka mohlala, haeba mocha oa Mokreste a hahamalla pakane ea tšebeletso ea nako e tletseng, sena se ka ’na sa mo tataisa lilemong tse thata tsa bocha kapa tsa ha a se a batla a tiile. Ha motho ea joalo a hatelloa hore a sekisetse, o tla ba le pono e hlakileng ea seo a batlang ho se finyella tšebeletsong ea Jehova. Motho ea joalo ea sekametseng linthong tsa moea o tla bona ho se bohlale, ebile e le bothoto, ho hlōleha ho finyella lipakane tsa moea ka lebaka la ho lelekisa matlotlo kapa monyaka ofe kapa ofe oo sebe se tšepisang ho mo fa oona. Hopola hore Moshe ea sekametseng linthong tsa moea ‘o ile a khetha ho tšoaroa hampe hammoho le sechaba sa Molimo ho e-na le hore a thabele sebe ka nakoana.’ (Baheberu 11:24, 25) Ebang re bacha kapa re hōlile, re etsa khetho e tšoanang ha re tsoela pele ho beha likelello linthong tsa moea ho e-na le ho li beha linthong tsa nama ea boetsalibe.
19. Re tla thabela melemo efe haeba re tsoela pele ho beha likelello linthong tsa moea?
19 ‘Ho beha kelello linthong tsa nama ho bolela bora ho Molimo,’ empa ‘ho beha kelello linthong tsa moea ho bolela bophelo le khotso.’ (Baroma 8:6, 7) Haeba re tsoela pele ho beha likelello linthong tsa moea, re tla ba le khotso e khōlō. Lipelo tsa rōna le matla a likelello tsa rōna li tla sireletsoa ka ho feletseng haholoanyane tšusumetsong ea boemo ba rōna ba boetsalibe. Re tla khona hamolemo ho hanela meleko ea ho etsa liphoso. Molimo o tla re thusa hore re atlehe ho hlōla ntoa e tsoelang pele e pakeng tsa nama le moea.
20. Ke hobane’ng ha re ka kholiseha hore re ka hlōla ntoa e pakeng tsa nama le moea?
20 Ha re tsoela pele ho beha likelello linthong tsa moea, re boloka kamano e ntle le Jehova, mohloli oa bophelo le moea o halalelang. (Pesaleme ea 36:9; 51:11) Satane Diabolose le mahlahana a hae ba etsa sohle seo ba ka se khonang ho felisa kamano ea rōna le Jehova Molimo. Ba leka ho laola likelello tsa rōna, ba tseba hore haeba re inehela, sena se tla fella ka hore re be lira tsa Molimo ’me se lebise lefung. Empa re ka hlōla ntoa ena e pakeng tsa nama le moea. Pauluse o ile a feta boemong bo tšoanang, hobane ha a ngola litaba tsa ntoa eo a neng a e loana, o ile a qala ka ho botsa: “Ke mang ea tla mpholosa ’meleng ona o fetang lefung lee?” Joale ha a bontša hore a ka pholoha, o ile a re: “Ho lebohuoe Molimo ka Jesu Kreste Morena oa rōna!” (Baroma 7:21-25) Le rōna re ka leboha Molimo ka Kreste ha a re fa mokhoa oa ho atleha ho sebetsana le mefokolo ea nama le hore re tsoele pele ho beha likelello linthong tsa moea re e-na le tšepo e babatsehang ea bophelo bo sa feleng.—Baroma 6:23.
Na Ua Hopola?
•Ho beha kelello linthong tsa moea ho bolela’ng?
•Ke joang re ka lumellang moea oa Jehova ho sebetsa ho rōna?
•Hlalosa hore na ke hobane’ng ha ntoeng ea rōna khahlanong le sebe e le habohlokoa ho ithuta Bibele, ho boloka molao oa Jehova le ho mo rapela.
•Ho ipehela lipakane tsa moea ho ka re boloka tseleng ea bophelo joang?
[Setšoantšo se leqepheng la 16]
Ho ithuta Bibele ho re thusa ho ema ka tieo khahlanong le lintho tse hlaselang bomoea ba rōna
[Setšoantšo se leqepheng la 17]
Ho loketse ho rapella thuso ea Jehova bakeng sa ho hlōla litakatso tsa boetsalibe
[Litšoantšo tse leqepheng la 18]
Lipakane tsa moea li ka re thusa ho lula re behile likelello linthong tsa moea