Kamoo Bohlolohali bo Ammeng Basali ba Babeli Kateng

SANDRA ke mosali oa mohlolohali ea lulang Australia. Ha monna oa hae a ne a e-shoa lilemong tse itseng tse fetileng, Sandra o ile a ferekana ka nako le motsotso. “Ha ke elelloa hore ka tšohanyetso ke shoeletsoe ke molekane oa ka le motsoalle oa hlooho ea khomo, ke ile ka ferekana. Ha ke hlile ha ke khone ho hopola hore na ke qeteletse ke fihlile hae joang ha ke e-tsoa sepetlele le hore na ke’ng seo ke ileng ka se etsa ho fihlela letsatsi le likela. Libekeng tse seng kae tse latelang, tšabo ea ka e ile ea mpakela lehlaba le sa feleng.”

Sandra o na le motsoalle ea hōlileng, e leng Elaine, eo e bileng mosali oa mohlolohali ka lilemo tse ka bang tšelela. Elaine o ile a oka monna oa hae David ka likhoeli tse tšeletseng ho fihlela a bolaoa ke kankere. O ile a sareloa haholo hoo kapele ka mor’a lefu la monna oa hae, a ileng a foufala ka nakoana. Ka mor’a lilemo tse peli o ile a akheha pontšeng. Ngaka ea hae ha ea ka ea fumana pontšo leha e le efe ea hore oa kula ’meleng. Leha ho le joalo, o ile a fumana hore Elaine o ne a bipelitse ho sareloa ha hae, ka hona, e ile ea khothalletsa hore a ee hae ’me a leke ka thata hore a lle. Elaine oa lumela, o re: “Ho nkile nako e telele hore ke hlōle ho sareloa,” ’me tabeng ea ho jeoa ke bolutu o eketsa ka ho re, “Ke ne ke atisa ho ea ka kamoreng ea ho robala ebe ke ikoahela hlooho ka liaparo tsa David.”

E, lefu la molekane ea ratoang le ka etsa hore motho a itšoare ka litsela tse sa tšoaneng, hobane ha e le hantle bohlolohali hase feela hore mosali a hloke monna. Ka mohlala, ka nako e itseng Sandra o ile a ikutloa a sa itsebe. Joaloka basali ba bahlolohali ba bangata ba sa tsoa shoelloa ke banna, le eena o ile a ba le maikutlo a hore a ka hlaseloa habonolo le hore ha aa sireletseha. Sandra oa hopola: “Kaha ke ne ke tloaetse hore ke monna oa ka ea etsang liqeto tsa ho qetela, ka tšohanyetso ke ne ke setse ke le mong ke lokela ho etsa liqeto tseo. Ke ne ke hlobaela. Ke ne ke khathala ke bile ke felloa ke matla. Ho ne ho le thata ho tseba hore na ha e le hantle ke lokela ho etsa eng.”

Letsatsi le letsatsi ho hlaha maemo a tšoanang le a Sandra le Elaine lefatšeng lohle. Ho kula, likotsi, lintoa, tlhoekiso ea morabe le pefo, ka kakaretso li eketsa palo ea basali ba bahlolohali.a Boholo ba basali bana bo utloela bohloko ka hare, bo sa tsebe hore na bo etse’ng. Metsoalle ea mosali oa mohlolohali le beng ka eena ba ka etsa eng ho mo thusa ho tloaelana le boemo ba hae? Sehlooho se latelang se na le litlhahiso tse ka ’nang tsa thusa.

[Mongolo o botlaaseng ba leqephe]