Lipotso Tse Tsoang ho Babali
“Sehalalelo sa Lihalalelo” se ile sa tlotsoa neng, joalokaha ho boletsoe esale pele ho Daniele 9:24?
Daniele 9:24-27 ke boprofeta bo mabapi le ho hlaha ha “Mesia Moeta-pele”—Kreste. Kahoo, ho tlotsoa ho boletsoeng esale pele ha “Sehalalelo sa Lihalalelo,” ha ho bolele ho tlotsoa ha kamore ea Sehalalelisiso sa tempele e Jerusalema. Ho e-na le hoo, polelo “Sehalalelo sa Lihalalelo” e bolela sehalalelo sa leholimo sa Molimo—Sehalalelisiso sa leholimo—se leng tempeleng ea Jehova e khōlō ea moea.a—Baheberu 8:1-5; 9:2-10, 23.
Tempele ea Molimo ea moea e qalile ho sebetsa neng? Ak’u nahane ka se ileng sa etsahala ha Jesu a itlhahisa hore a kolobetsoe ka 29 C.E. Ho tloha ka nako eo ho ea pele bophelong ba hae, Jesu o ile a phethahatsa mantsoe a Pesaleme ea 40:6-8. Hamorao moapostola Pauluse o ile a bontša hore Jesu o ne a ile a rapela Molimo: “Ha ua ka ua batla sehlabelo le nyehelo, empa u ile ua ntokisetsa ’mele.” (Baheberu 10:5) Jesu o ne a tseba hore Molimo ‘o ne a sa batle’ hore mahlabelo a liphoofolo a ’ne a nyeheloe tempeleng e Jerusalema. Ho e-na le hoo, Jehova o ne a lokiselitse Jesu ’mele o phethahetseng oa motho hore a o nyehele e le sehlabelo. Ha Jesu a bolela takatso ea hae e tlohang pelong, o ile a tsoela pele: “Bona! ke tlile (moqolong oa buka ho ngoliloe ka ’na) ho etsa thato ea hao, Molimo.” (Baheberu 10:7) Karabelo ea Jehova e bile efe? Kosepele ea Matheu e re: “Ka mor’a hore Jesu a kolobetsoe kapele-pele a nyoloha a tsoa ka metsing; ’me, bonang! maholimo a buleha, ’me a bona moea oa Molimo o theoha joaloka leeba o tla holim’a hae. Bonang! Hape, ha e-ba le lentsoe le tsoang maholimong le reng: ‘Enoa ke Mora oa ka, ea ratoang, eo ke mo amohetseng.’”—Matheu 3:16, 17.
Hore ebe Jehova Molimo o ile a amohela ho hlahisoa ha ’mele oa Jesu e le sehlabelo ho ne ho bolela hore ho ne ho se ho e-na le aletare e khōlō ho aletare ea sebele e neng e le tempeleng ea Jerusalema. Ena e ne e le aletare ea “thato” ea Molimo, kapa tokisetso ea ho amohela bophelo ba Jesu joaloka motho e le sehlabelo. (Baheberu 10:10) Ho tlotsoa ha Jesu ka moea o halalelang ho ne ho bolela hore joale Molimo o ne a hlahisitse tokisetso eohle ea hae ea tempele ea moea.b Kahoo, ka nako ea ha Jesu a kolobetsoa, bolulo ba Molimo ba leholimo bo ile ba tlotsoa, kapa ba khethoa, e le “Sehalalelo sa Lihalalelo” tokisetsong e khōlō ea tempele ea moea.
[Mongolo o botlaaseng ba leqephe]
a Bakeng sa puisano mabapi le litšobotsi tse sa tšoaneng tsa tempele ea Molimo ea moea, bona Molula-Qhooa oa July 1, 1996 leqepheng la 14-19.
b Ho ile ha buuoa ka sena ka mokhoa o sa tobang leqepheng la 195 la buka ea Ela Hloko Boprofeta ba Daniele!
[Setšoantšo se leqepheng la 27]
“Sehalalelo sa Lihalalelo” se ile sa tlotsoa ha Jesu a kolobetsoa