Ho Fana ho Thabisang Molimo
JESU le barutuoa ba hae ba ne ba le Bethani ba thabela lijo tse hlabosang le metsoalle e meng e ’maloa, ho akarelletsa Maria, Maretha le Lazaro ea sa tsoa tsosoa bafung. Ha Maria a nka oli e bitsang chelete e ngata haholo ea boima ba ponto ’me a tlotsa Jesu ka eona maotong, Judase Iskariota o ile a khopeha ’me a bua se ka pelong ea hae. O ile a ipelaetsa ka ho re: “Ke hobane’ng ha oli ena e nkhang hamonate e ne e sa rekisoe ka lidenari tse makholo a mararo [chelete e batlang e lekana le moputso oa selemo] ’me li fuoe mafutsana?” Ba bang le bona ba ile ba qala ho tletleba.—Johanne 12:1-6; Mareka 14:3-5.
Leha ho le joalo, Jesu o ile a araba a re: “Mo tloheleng. . . . Etsoe kamehla le na le mafutsana, ’me neng kapa neng ha le batla le ka a etsetsa molemo kamehla, empa le ke ke la ba le ’na kamehla.” (Mareka 14:6-9) Baeta-pele ba bolumeli ba Bajuda ba ne ba ruta hore hase feela hore ho fana ka liphallelo hoa babatseha empa ho ka ba ha koahela libe. Ka lehlakoreng le leng, Jesu o ile a bontša ka ho hlaka hore Molimo ha a thabisoe feela ke ho fa mafutsana limpho tsa liphallelo.
Ho hlahloba ho se hokae tsela eo phutheho ea pele ea Bokreste e neng e fana ka eona ho tla totobatsa litsela tse ling tse sebetsang tseo re ka bontšang kameho ea rōna ka tsona ’me kahoo ra thabisa Molimo ka ho fana ha rōna. Ho tla boela ho re bontše mofuta o ikhethang oa ho fana o molemo ka ho fetisisa.
“Le Fane ka Limpho Tsa Mohau”
Jesu o ile a khothalletsa barutuoa ba hae ka makhetlo a ’maloa hore ba “fane ka limpho tsa mohau,” kapa joalokaha liphetolelo tse ling li fetolela poleloana ena, ba “fane ka liphallelo” kapa ba “fe ba fanang ka liphallelo.” (Luka 12:33; New English Bible; A Translation in the Language of the People, ea Charles B. Williams) Leha ho le joalo, Jesu o ile a lemosa ka ho etsa lipontšo tsa mponeng tse reretsoeng feela hore li tlotlise mofani ho e-na le ho tlotlisa Molimo. O ile a re: “Ha u il’o etsa limpho tsa mohau, u se ke ua letsa terompeta ka pele ho uena, feela joalokaha baikaketsi ba etsa ka lisynagogeng le literateng, e le hore ba ka tlotlisoa ke batho.” (Matheu 6:1-4) Bakreste ba pele ba ile ba sebelisa keletso ena, ’me ba qoba ho etsa pontšo ea mponeng ea baeta-pele ba baikaketsi ba bolumeli ba mehleng ea bona ’me ba khetha ho thusa ba hlokang ka ho ba etsetsa lintho kapa ka ho ba fa limpho sephiring.
Ka mohlala, ho Luka 8:1-3, re bolelloa hore Maria Magdalena, Joanna, Susanna le ba bang ba ile ba sebelisa “lintho tsa bona” ka lenyele ho etsetsa Jesu le baapostola ba hae lintho. Le hoja banna bana ba ne ba sa hloke, ba ne ba tlohetse mesebetsi ea bona ea boipheliso e le hore ba tsepamise boiteko ba bona ka ho feletseng tšebeletsong. (Matheu 4:18-22; Luka 5:27, 28) Ha e le hantle, basali bana ba ile ba tlotlisa Molimo ka ho ba thusa hore ba phethe kabelo ea bona eo ba e filoeng ke Molimo. ’Me Molimo o ile a bontša hore oa ba amohela ka hore a boloke ka Bibeleng tlaleho ea ho fana ha bona ka seatla se mosa e le hore meloko eohle e tlang e e bale.—Liproverbia 19:17; Baheberu 6:10.
Dorkase ke mosali e mong ea mosa ea neng a “tletse liketso tse molemo le limpho tsa mohau.” O ne a etsetsa bahlolohali ba futsanehileng liaparo a le motseng oa habo oa Joppa o pel’a leoatle. Hore na o ne a lefella masela ’ohle kapa o ne a mpa a ba etsetsa liaparo a sa ba lefise, teng ha re tsebe. Leha ho le joalo, mosebetsi oa hae o motle o ile oa etsa hore a ratoe ke bao a neng a ba thusa le ho ratoa ke Molimo, eo ka mohau a ileng a hlohonolofatsa molemo oa hae.—Liketso 9:36-41.
Sepheo se Nepahetseng ke sa Bohlokoa
Batho baa ba ile ba susumelletsoa ke eng hore ba fane? Ba ne ba sa susumetsoe ke kutloelo-bohloko feela e hlohlelletsoang ke boipiletso bo amang maikutlo ba hore ba fane ka thuso. Ba ne ba ikutloa hore letsatsi le letsatsi ba lokela ho etsa sohle seo ba ka se khonang ho thusa ba futsanehileng, ba mahlomoleng, ba kulang kapa ba hlahetsoeng ke mathata a itseng. (Liproverbia 3:27, 28; Jakobo 2:15, 16) Ena ke tsela ea ho fana e thabisang Molimo. E susumetsoa ka ho khetheha ke lerato le tebileng ho Molimo le takatso ea ho etsisa botho ba hae bo mohau le ho fana ha hae ka seatla se bulehileng.—Matheu 5:44, 45; Jakobo 1:17.
Moapostola Johanne o ile a totobatsa ntlha ena ea bohlokoa ea ho fana ha a ne a botsa a re: “Mang kapa mang ea nang le mokhoa oa lefatše lena oa ho tšehetsa bophelo ’me a bona mor’abo a hloka leha ho le joalo a mo koalla monyako oa qenehelo ea hae e bonolo, lerato la Molimo le lula ka tsela efe ho eena?” (1 Johanne 3:17) Karabo e totobetse. Ho rata Molimo ho susumelletsa batho ho thusa ka liphallelo. Molimo o ananela batho ba mo etsisang ba bontšang moea oa ho fana ka seatla se bulehileng ’me oa ba putsa. (Liproverbia 22:9; 2 Bakorinthe 9:6-11) Na kajeno re bona tsela ee ea ho fana ka seatla se bulehileng? Nahana ka se sa tsoa etsahala phuthehong e ’ngoe ea Lipaki Tsa Jehova.
Ntlo ea mosali e mong oa Mokreste ea seng a hōlile e ne e le boemong bo bobe ’me e hloka ho lokisoa. O ne a lula a le mong a bile a se na ba lelapa ba ka mo thusang. Ka lilemo tse ngata liboka tsa Bokreste li ’nile tsa tšoareloa lapeng la hae, ’me o ne a atisa ho ja le mang le mang ea amohelang memo ea hae. (Liketso 16:14, 15, 40) Ha litho tsa phutheho li hlokomela bothata boo a leng ho bona, li ile tsa phallela ho thusa. Tse ling li ile tsa ntša chelete, tse ling tsa fana ka matsoho. Ka mafelo-beke a se makae, baithaopi ba ile ba e rulela bocha, ba kenya bate e ncha, ba lila mokato oohle oa pele le ho o penta, ba ba ba kenya liraka tse ncha ka kichineng. Ho fana ha bona ha hoa ka ha khotsofatsa litlhoko tsa mosali eo feela empa ho ile ha boela ha momahanya phutheho ’me baahelani ba khahloa ke mohlala ona oa ho fana ha sebele ha Bokreste.
Ho na le litsela tse ngata tseo re ka thusang ba bang ka tsona. Na re ka qeta nako e itseng le moshemane kapa ngoanana ea se nang ntate? Na re ka ela mohlolohali ea seng a hōlile eo re mo tsebang mabenkeleng kapa ra mo rōkela lintho? Na re ka phehela motho e mong ea futsanehileng lijo kapa ra mo thusa ho lefella litšenyehelo tse itseng? Ha ho hlokahale hore re be barui hore re thuse. Moapostola Pauluse o ile a ngola a re: “Haeba ho itokisa ho le teng pele, ho amoheleha ka ho khethehileng ho ea ka seo motho a nang le sona, eseng ho ea ka seo motho a se nang sona.” (2 Bakorinthe 8:12) Leha ho le joalo, na Molimo o tla hlohonolofatsa feela ho fana hoo ho fuoang motho ka ho toba? Che.
Ho Thoe’ng ka Liphallelo Tse Hlophisitsoeng?
Ka linako tse ling thuso e fanoang ke batho ka bomong ha ea lekana. Ha e le hantle, Jesu le baapostola ba hae ba ne ba e-na le letlōle la mafutsana, ’me ba amohela menehelo ho batho ba amehileng ka bao ba kopanang le bona mosebetsing oa bona. (Johanne 12:6; 13:29) Ka tsela e tšoanang, liphutheho tsa lekholong la pele la lilemo li ne li amohela likoleke ha ho e-na le tlhokahalo e itseng ’me li hlophisa ho thusa ba bangata ka liphallelo.—Liketso 2:44, 45; 6:1-3; 1 Timothea 5:9, 10.
Ketsahalo e ’ngoe e joalo e ile ea etsahala hoo e ka bang ka 55 C.E. Liphutheho tse Judea li ne li oetsoe ke bofuma, mohlomong e le ka lebaka la tlala ea sekoboto e neng e sa tsoa hlasela. (Liketso 11:27-30) Moapostola Pauluse, ea neng a lula a tšoenyehile ka mafutsana, o ile a thathamisa liphutheho tse hlokang thuso ho ea fihla Macedonia. O ile a hlophisa koleke ’me a sebelisa banna ba tšoanelehang hore ba e tsamaise. (1 Bakorinthe 16:1-4; Bagalata 2:10) Eena le ba bang ba neng ba ameha ha baa ka ba amohela moputso bakeng sa tšebeletso ea bona.—2 Bakorinthe 8:20, 21.
Kajeno Lipaki Tsa Jehova le tsona li potlakela ho thusa ha ho hlaha likoluoa. Ka mohlala, lehlabuleng la 2001, lipula tse matla tsa sefefo li ile tsa baka likhohola Houston, Texas, U.S.A. Ka kakaretso, matlo a 723 a Lipaki a ile a senyeha ho isa bohōleng bo itseng, a mangata a ’ona a ne a batla a senyehile haholo. Hang-hang ho ile ha thehoa komiti e fanang ka thuso nakong ea tlokotsi e entsoeng ka baholo ba tšoanelehang ba Bakreste e le hore e bone hore na batho ka bomong ba hloka eng le ho aba liphallelo ho thusa Lipaki tse sebakeng seo ho sebetsana le boemo le ho lokisa matlo a tsona. Baithaopi ba ikemiselitseng ba tsoang liphuthehong tse ling tsa boahelani ba ile ba etsa mosebetsi oohle. E mong oa Lipaki o ile a ananela thuso eo hoo eitseng ha k’hamphani ea hae ea inshorense e mo fa chelete ea ho koahela litšenyehelo tsa ho lokisa ntlo ea hae, a ileng a nehelana ka chelete eo hang-hang letlōleng la thuso e le hore e ka thusa ba bang ba hlokang.
Leha ho le joalo, ha ho tluoa tabeng ea liphallelo tse hlophisitsoeng, re lokela ho ba hlokolosi, re sekaseke likōpo tse ngata tseo re li fumanang. Mekhatlo e meng e fanang ka liphallelo e na le litšenyehelo tse holimo tsa tsamaiso kapa tsa ho bokella chelete, e leng ho etsang hore ho sale karolo e fokolang feela ea chelete e bokeletsoeng bakeng sa morero oo e o reretsoeng. Liproverbia 14:15 e re: “Mang kapa mang ea se nang phihlelo o beha tumelo lentsoeng le leng le le leng, empa ea masene o nahana ka mehato ea hae.” Kahoo ke bohlale ho sekaseka lintlha tsena ka hloko.
Ho Fana ho Molemo ka ho Fetisisa
Ho na le ho fana hoo e leng habohlokoa esita le ho feta ho fana ka liphallelo. Jesu o ile a bua ka hona ha ’musi e mong e mocha oa morui a ne a botsa hore na o lokela ho etsa’ng e le hore a fumane bophelo bo sa feleng. Jesu o ile a re ho eena: “E-ea u rekise lintho tsa hao u fe mafutsana ’me u tla ba le letlotlo leholimong, u tle ’me u be molateli oa ka.” (Matheu 19:16-22) Hlokomela hore Jesu ha aa ka a re feela, ‘Fa mafutsana ’me u tla fumana bophelo.’ Ho e-na le hoo, o ile a phaella a re, “U tle ’me u be molateli oa ka.” Ka mantsoe a mang, le hoja ho thusa ka liphallelo ho le molemo, ho ba morutuoa oa Mokreste ho akarelletsa ho eketsehileng.
Ntho e ka sehloohong eo Jesu a neng a e thahasella e ne e le ho thusa ba bang moeeng. Nakoana pele ho lefu la hae, o ile a re ho Pilato: “Ke tsoaletsoe sena, ’me ke tletse sena lefatšeng, hore ke pakele ’nete.” (Johanne 18:37) Le hoja a ile a etella pele ho thusa ba futsanehileng, ho folisa ba kulang le ho fepa ba lapileng, ntho e ka sehloohong eo Jesu a ileng a e etsa e bile ho koetlisetsa barutuoa ba hae ho paka. (Matheu 10:7, 8) Ha e le hantle, e ’ngoe ea litaelo tsa hae tsa ho qetela ho bona e bile hore: “E-eang ’me le etse batho ba lichaba tsohle barutuoa.”—Matheu 28:19, 20.
Ke ’nete hore boboleli bo ke ke ba rarolla mathata ’ohle a lefatše. Leha ho le joalo, ho abela batho ba mefuta eohle litaba tse molemo tsa ’Muso oa Molimo ho tlotlisa Molimo kaha boboleli bo phethahatsa thato ea Molimo ’me bo bulela ba amohelang molaetsa oa Molimo tsela e isang melemong ea ka ho sa feleng. (Johanne 17:3; 1 Timothea 2:3, 4) Ke hobane’ng ha u sa mamele seo Lipaki Tsa Jehova li se buang lekhetlong le latelang ha li u etela? Li tlisa mpho ea moea. ’Me lia tseba hore ena ke tsela e molemo ka ho fetisisa eo li ka u fang ho itseng ka eona.
[Litšoantšo tse leqepheng la 6]
Ho na le litsela tse ngata tseo re ka bontšang ka tsona hore rea tsotella
[Setšoantšo se leqepheng la 7]
Ho bolela ha rōna litaba tse molemo ho thabisa Molimo ebile ho bula tsela e isang melemong ea ka ho sa feleng